4 Musa
34 Dung i didok Jahowa ma muse tu si Musa, 2 “Paboa ma aturan on tu halak Israel, ‘Molo dung masuk hamu tu luat Kanaan,+ luat parbagiananmuna i, on ma parbatasan ni luat i.+
3 “‘Parbatasanna di sabola selatan, i ma mulai sian Gurun Zin na saganjang ni parbatasan ni luat Edom. Jala parbatasan di sabola timurna di bagian selatan, i ma mulai sian ujung ni Laut Sira.*+ 4 Sian i, belok ma muse tu sabola selatan, i ma tu Tanjakan Akrabim+ sahat tu Zin jala marujung di Kades-barnea+ na di sabola selatan. Dung i torus ma muse parbatasan i tu Hazar-adar+ sahat tu Azmon. 5 Sian Azmon, belok ma parbatasan i tu Rura* Mesir jala marujung ma i di Laut na Balga.*+
6 “‘Parbatasanna di sabola barat, i ma Laut na Balga dohot topi ni laut i. On ma na gabe parbatasanmuna di sabola barat.+
7 “‘On ma parbatasan ni luat i di sabola utara: Mulai ma i sian Laut na Balga sahat tu Dolok Hor. 8 Sian Dolok Hor torus ma i tu Lebo-hamat,*+ jala marujung ma i di Jedad.+ 9 Torus ma muse parbatasan i tu Sipron jala marujung di Hasor-enan.+ On ma na gabe parbatasanmuna di sabola utara.
10 “‘Jala parbatasanmuna di sabola timur, i ma mulai sian Hasor-enan sahat tu Sepam. 11 Sian Sepam torus ma muse parbatasan i tu Ribla na di sabola timur ni Ain, dung i turun ma muse tu rura na di topi ni Laut Kineret.*+ 12 Torus ma muse tu Sunge Jordan jala marujung di Laut Sira.+ Akka i ma na gabe luatmuna+ dohot akka parbatasan na di sakalilingna.’”
13 Dipaboa si Musa ma muse songon on tu halak Israel, “On ma akka luat na gabe parbagiananmuna na dibagi mamakke undi.+ Dilehon ma i tu na sia satonga marga nai, songon na diparettahon Jahowa. 14 Ai nungnga dibuat marga Ruben, marga Gad, dohot satonga sian marga Manasse tano parbagianan ni nasida mangihutton keluarga sian pihak bapak ni nasida be.+ 15 Nungnga dibuat na dua satonga marga i tano parbagianan ni nasida, i ma na di sabola timur ni Sunge Jordan na di jonok ni Jeriko doppak parbissar ni mataniari.”+
16 Didok Jahowa ma muse tu si Musa, 17 “Goar ni akka bawa na mambagi luat na gabe parbagiananmuna, i ma Malim Eleasar+ dohot si Josua+ anak ni si Nun. 18 Jala pillit ma sada pamimpin sian ganup marga lao mambagi luat parbagiananmuna i.+ 19 Akka on ma goar ni bawa i: sian marga Juda,+ i ma si Kaleb+ anak ni si Jepune. 20 Sian marga Simeon,+ i ma si Semuel anak ni si Amihud. 21 Sian marga Benjamin,+ i ma si Elidad anak ni si Kilson. 22 Pamimpin na sian marga Dan,+ i ma si Bukki anak ni si Jogli. 23 Sian pinoppar ni si Josep,+ i ma sian marga Manasse.+ Pamimpinna i ma si Hanniel anak ni si Epod. 24 Pamimpin sian marga Epraim,+ i ma si Kemuel anak ni si Siptan. 25 Pamimpin sian marga Zebulon,+ i ma si Elisapan anak ni si Parnak. 26 Pamimpin sian marga Isasar,+ i ma si Paltiel anak ni si Azan. 27 Pamimpin sian marga Aser,+ i ma si Ahihud anak ni si Selomi. 28 Jala pamimpin sian marga Naptali,+ i ma si Pedahel anak ni si Amihud.” 29 Akka i ma bawa na dipillit Jahowa lao mambagi luat Kanaan tu sude halak Israel.+