4 Musa
8 Didok Jahowa ma tu si Musa, 2 “Songon on ma dokkon tu si Aron, ‘Tikki dipagalak ho lampu na pitu i, atur ma parpeakna asa tiur na di jolo ni inganan ni lampu i.’”+ 3 Diulahon si Aron ma songon i. Dipagalak ibana ma lampu i asa tiur na di jolo ni inganan ni lampu i,+ songon na diparettahon Jahowa tu si Musa. 4 Songon on ma cara mambahen inganan ni lampu i: Ditopa ma i sian mas. Ditopa+ do i mulai sian tiangna sahat tu kelopakna. Dibahen do i mangihutton contoh na dipatudu Jahowa tu si Musa marhite parnidaan.+
5 Didok Jahowa ma muse tu si Musa, 6 “Papulik ma halak Lepi sian tonga-tonga ni halak Israel jala pabadia ma nasida.+ 7 On ma na ikkon ulahononmu lao pabadiahon nasida. Pispisson ma aek lao paiasson dosa ni nasida. Suru ma asa dicukkur nasida sude ibbulu na di daging ni nasida jala asa disussi baju ni nasida, asa gabe badia nasida.+ 8 Ikkon buaton ni nasida do sada lombu jantan na poso.+ Jala ikkon boanon ni nasida do muse topung na halus na dicampur dohot miak lao gabe pelean sipanganon.*+ Ikkon buatonmu do muse sada nai lombu jantan na poso lao gabe pelean hasesaan ni dosa.+ 9 Dung i boan ma halak Lepi i tu jolo ni kemah parpunguan, jala suru ma sude halak Israel asa ro marpungu.+ 10 Tikki diboan ho halak Lepi i tu jolo ni Jahowa, suru ma halak Israel mameakkon tangan ni nasida tu ulu ni halak Lepi i.+ 11 Dung i, dipasahat* si Aron ma halak Lepi i tu jolo ni Jahowa gabe songon pelean na diayunhon+ na sian halak Israel. Ai nasida ma na lao marhobas tu Jahowa.+
12 “Dipeakkon halak Lepi i ma tangan ni nasida tu ulu ni akka lombu jantan i.+ Dung i, dipelehon nasida ma sada lombu i gabe pelean hasesaan ni dosa. Jala lombu na sada nai dipelehon gabe pelean situtungon tu Jahowa asa disesa dosa+ ni halak Lepi. 13 Suru ma halak Lepi i jongjong di jolo ni si Aron dohot akka anakna jala pasahat* ma nasida tu Jahowa songon pelean na diayunhon. 14 Papulik ma halak Lepi i sian tonga-tonga ni halak Israel. Ai appunakku do sude halak Lepi.+ 15 Dung i boi ma halak Lepi ro tu kemah parpunguan lao marhobas. Songon i ma ho pabadiahon nasida jala pasahatton* nasida gabe pelean na diayunhon. 16 Sian tonga-tonga ni halak Israel, nasida ma na dilehon tu Au gatti ni anak siakkangan* ni halak Israel.+ Buatokku ma nasida gabe appunakku. 17 Appunakku do sude anak siakkangan ni halak Israel dohot anak ni binatang ni nasida na parjolo tubu.+ Ai nungnga hupapulik* nasida lao di Au tikki hupamate sude anak siakkangan ni halak Mesir dohot binatang ni nasida na parjolo tubu.+ 18 Bahenokku ma halak Lepi i gatti ni anak siakkangan ni halak Israel. 19 Sian sude halak Israel, halak Lepi ma na lao pasahatonku tu si Aron dohot tu akka anakna. Nasida ma na marhobas di kemah parpunguan+ gatti ni halak Israel. Nasida ma na mangurupi malim lao mangido tu Debata asa disesa dosa ni halak Israel, asa unang marjea halak Israel+ ala ro tu labbung ni inganan na badia.”
20 Dibahen si Musa, si Aron, dohot sude halak Israel ma songon i tu halak Lepi i. Diulahon nasida do i dos songon na diparettahon Jahowa tu si Musa taringot tu halak Lepi. 21 Dipaias* halak Lepi ma diri ni nasida jala disussi ma baju ni nasida.+ Dung i dipasahat* si Aron ma nasida gabe songon pelean na diayunhon di jolo ni Jahowa.+ Jala dipangido si Aron ma tu Debata asa disesa dosa ni nasida, asa gabe ias nasida.+ 22 Dung i, ro ma halak Lepi i tu kemah parpunguan jala marhobas ma nasida disi. Si Aron dohot akka anakna ma na mangawasi nasida. Diulahon ma songon i tu halak Lepi i dos songon na diparettahon Jahowa tu si Musa.
23 Didok Jahowa ma muse tu si Musa, 24 “On ma peraturan na marlakku tu halak Lepi: Bawa na marumur 25 taon tu ginjang, ikkon dohot do tu kelompok na martugas di kemah parpunguan. 25 Alai molo nungnga 50 taon umurna, dang dohot be ibana tu kelompok na martugas di kemah parpunguan jala maradi ma ibana sian tugasna i. 26 Alai boi do urupan ni nasida marga Lepi na asing na marhobas di kemah parpunguan i, nang pe dang adong be tanggung jawab na dilehon tu nasida. Songon i ma na ikkon ulahononmuna tu halak Lepi dohot tu akka ulaon ni nasida.”+