Ulaon ni Apostel

21 Nang pe borat rohanami manadikkon nasida, alai ikkon ditinggalhon hami do nasida. Markapal ma hami tu Kos. Marsogotna i sahat ma hami di Rodos jala sian i torus ma hami tu Patara. 2 Dung dapotnami kapal na lao borhat tu Penisia, nakkok ma hami tu kapal i jala borhat ma hami. 3 Diida hami do Pulo Siprus di sabola kiri, alai torus do hami markapal tu Siria. Dung i so ma kapal i di Tirus lao paturunhon akka barang. 4 Dilului hami ma akka sisean na disi. Dung juppang, tinggal ma hami disi rap dohot nasida saleleng pitu ari. Alai mulak-ulak do didok nasida tu si Paulus asa unang lao ibana tu Jerusalem.+ Ai nungnga diurupi tondi parbadia nasida lao mamboto i. 5 Dung dapot tikkina, ditinggalhon hami ma nasida jala ditorusson hami ma pardalanannami. Sude do nasida paborhatton hami sahat tu luar ni kota, dohot ma i akka borua nang akka dakdanak. Dung sahat hami di topi ni laut, marsinggang ma hami sude jala martangiang. 6 Dung mandok hata parsirangan hami, nakkok ma hami tu kapal jala mulak ma nasida tu jabu ni nasida be.

7 Dung markapal hami sian Tirus sahat ma hami di Ptolemais. Dijuppangi hami ma akka dongan na disi jala sadari ma hami tinggal disi rap dohot nasida. 8 Marsogotna i borhat ma hami muse jala sahat ma di Kaesarea. Lao ma hami tu jabu ni si Pilippus jala rap tinggal dohot ibana. Sahalak parbarita na uli do ibana jala ibana do sada sian pitu bawa+ na dipillit akka apostel na di Jerusalem i. 9 Adong do opat boru ni si Pilippus, dang muli dope nasida jala manurirangi*+ do nasida. 10 Dung piga-piga ari hami disi, ro ma sahalak panurirang na margoar si Agabus+ sian Judea. 11 Ro ma ibana mandapotton hami. Dibuat ibana ma ikat pinggang ni si Paulus. Ditalihon si Agabus ma i tu patna dohot tu tanganna sandiri. Ninna ma, “On ma hata na didok marhite tondi parbadia, ‘Na lao ditali halak Jahudi na di Jerusalem+ ma nappuna ikat pinggang on. Songon on ma ibana ditali jala pasahaton ni nasida ma ibana tu bangso na asing.’”+ 12 Dung hubege hami hata i, rap ma hami dohot akka dongan na disi mangelek-elek si Paulus asa unang lao ibana tu Jerusalem. 13 Dung i didok si Paulus ma, “Boasa sai tangis hamu? Gabe marsak do au dibahen hamu. Pos ma rohamuna, dang mabiar au ditali di Jerusalem. Dang holan i, mate pe nungnga rade au alani Tuan Jesus.”+ 14 Ala dang tarbahen hami be manang aha lao mangorai, dang hupaksa hami be ibana. Alai hudok hami ma, “Sai lomo ni roha ni Jahowa* ma na saut.”

15 Dung piga-piga ari hami disi, huparade hami ma na porlu di pardalanan jala borhat ma hami tu Jerusalem. 16 Dohot do piga-piga sisean na sian Kaesarea mandongani hami. Ditaruhon do hami tu jabu ni si Manason asa disi hami marborngin. Sian Siprus do ibana jala nungnga leleng ibana gabe sisean. 17 Dung sahat hami di Jerusalem, las do roha ni akka dongan na disi manjalo hami. 18 Marsogotna i, lao ma hami rap dohot si Paulus manjuppangi si Jakobus+ jala disi do sude sintua. 19 Dijalang si Paulus ma nasida. Dung i, diceritahon ibana ma takkas tu nasida akka naung dibahen Debata di tonga-tonga ni bangso na asing marhite ulaonna marbarita.

20 Dung dibege nasida hatoranganna i, dipuji nasida ma Debata. Dung i didok nasida ma tu si Paulus, “Ale Paulus, dongannami, nungnga diida ho be songon dia marribu halak Jahudi gabe porsea jala sian nasa rohana do nasida mangihutton Patik i.+ 21 Alai songon on do barita naung dibege nasida taringot tu ho, ‘Diajarhon si Paulus do tu sude halak Jahudi na tinggal di tonga-tonga ni bangso na asing asa unang diulahon nasida* patik ni si Musa. Diajarhon ibana do muse asa unang disunat anakkon ni nasida, jala asa unang diihutton nasida adat naung diulahon sian najolo.’+ 22 Pasti dibege nasida do annon naung sahat ho dison. Jadi aha ma na lao bahenotta? 23 Alani i didok rohanami, songon on ma bahen: Adong do dison opat halak bawa naung mambahen sada janji tu Debata. 24 Lao ma ho rap dohot nasida, ulahon hamu ma ulaon paiasson diri jala garar ma na porlu di nasida, asa digusting nasida obuk ni nasida. Dung i diboto sude halak ma na so tutu barita na dibege nasida taringot tu ho, ai diihutton ho do na di Patik i.+ 25 Jala taringot tu akka bangso na asing naung gabe porsea i, nungnga hukirim hami surat na marisi taringot tu keputusannami. Hupaboa hami do di surat i asa dipadao nasida dirina sian naung dipelehon tu akka patung,+ sian mudar,+ sian binatang na mate na so jolo diseat,*+ dohot sian seks na so patut.”*+

26 Marsogotna i, ditogihon si Paulus ma siopat halak i asa dibahen nasida ulaon paiasson diri.+ Dung i masuk ma ibana tu bagas joro jala dipaboa ma manang na andigan sae ulaon i, asa boi dipelehon malim di ari i pelean ni ganup nasida.

27 Dung naeng sae pitu ari ulaon paiasson diri i, diida akka halak Jahudi na sian Provinsi Asia ma si Paulus di bagas joro. Dihasut nasida ma akka jolma lao manakkup si Paulus. 28 Gogo ma didok nasida, “Hamu halak Israel, urupi hamu ma hami! Ai on do halak na lao tu sude inganan mangajari sude halak asa mangalo bangsotta, mangalo Patikta, dohot bagas jorotta. Dang holan i, diboan ibana do halak Junani tu bagas joro on gabe ramun* ma dibahen ibana inganan na badia on.”+ 29 Ai dirippu nasida do diboan si Paulus si Tropimus+ halak Epesus i tu bagas joro. Ai nungnga diida nasida hian si Paulus rap dohot ibana di kota i. 30 Gabe gaor ma sude kota i, rap marlojong ma akka jolma i manakkup si Paulus. Disarat nasida ma ibana kaluar sian bagas joro. Dung i pittor ditutup nasida ma akka pintu ni bagas joro i. 31 Tikki naeng dipamate nasida si Paulus, nungnga sahat barita tu komandan ni tentara naung gaor sude halak na di Jerusalem. 32 Pittor diboan ibana ma akka tentarana dohot akka perwira. Marlojong ma nasida mandapotton akka jolma i. Tikki diida akka jolma i ro komandan i dohot akka tentarana, dang ditorusson nasida be mamukkuli si Paulus.

33 Ro ma komandan ni tentara i tu labbung ni si Paulus. Ditakkup ma ibana, jala disuru ma asa ditali si Paulus mamakke dua ratte.+ Dung i disukkun komandan i ma ise ibana jala aha dibahen ibana. 34 Alai marsurak ma akka jolma i, adong na mandok songon on jala na deba mandok songon an. Alani gaorna, gabe so diboto komandan i be manang aha sasittongna na masa. Gabe disuru ibana ma asa diboan si Paulus tu markas ni tentara i. 35 Dung sahat si Paulus di tangga, diangkat akka tentara i ma ibana ala nungnga lam mangamuk akka jolma i. 36 Diihutton akka jolma i do nasida huhut marsurak mandok, “Pamate ibana!”

37 Tikki naeng diboan nasida si Paulus masuk tu markas ni tentara i, didok ibana ma tu komandan ni tentara i, “Boi do hita makkatai?” Dialusi komandan i ma, “Diboto ho do hape bahasa Junani? 38 Ai ho do kan halak Mesir na baru-baru on manjujui halak asa mangalo pamaretta? Ho do kan na manogihon 4.000 halak na marsenjata* kaluar tu padang gurun?” 39 Dung i didok si Paulus ma, “Halak Jahudi+ do au na tubu di Tarsus,+ kota na tarbarita do i di Kilikia. Paloas ma jo au makkatai tu akka jolma i.” 40 Dung dipaloas komandan i si Paulus makkatai, jongjong ma ibana di tangga, dibahen ibana ma tanda dohot tanganna asa hohom akka jolma i. Dung hohom nasida, makkatai ma ibana di bahasa Heber,+ ninna ma,