5 Musa
26 “Molo dung masuk hamu tu luat na dilehon Jahowa Debatamuna i tu hamu gabe appunamuna, jala molo dung dibuat hamu luat i, dung i tinggal hamu disi, 2 buat hamu ma deba sian hasil panen* na parjolo, i ma hasil na dipapungu hamu di luat na dilehon Jahowa Debatamuna i tu hamu. Peakkon hamu ma i di karanjang, jala lao ma hamu tu inganan na dipillit Jahowa Debatamuna i lao pasangappon goarna.+ 3 Dung i, lao ma hamu manjuppangi malim na marhobas di tikki i, jala dokkon ma tu ibana, ‘Sadari on, naeng paboaokku do tu Jahowa Debatanta i, naung masuk au tu luat na lao lehononna i tu hita, i ma luat na dijanjihon Jahowa tu akka omputta.’+
4 “Buaton ni malim ma karanjang i sian tanganmuna jala peakkononna ma i di jolo ni langgatan ni Jahowa Debatamuna. 5 Dokkon hamu ma songon on di jolo ni Jahowa Debatamuna, ‘Halak Aram*+ do ompukku jala marpinda-pinda* do ibana. Najolo, lao do ibana tu Mesir+ jala gabe halak panoppang rap dohot keluargana.+ Otik do nasida tikki borhat tusi. Alai dung disi, gabe sada bangso na massai balga jala na gogo do nasida.+ 6 Jahat do halak Mesir tu hami jala kejam. Dipaksa do hami karejo gabe hatoban ni nasida.+ 7 Alani i, mangangguki ma hami tu Ho, ale Jahowa Debata ni akka ompunami. Ditangihon Ho do hami. Diida Ho do ale Jahowa hasusaannami, sitaononnami, jala songon dia haccitna dibahen tu hami.+ 8 Jala ujungna, diboan Ho do hami, ale Jahowa, kaluar sian Mesir marhite tanganmu na gogo i, dohot hagogoonmu na tung massai balga i.+ Diboan Ho do hami marhite tanda halongangan, mukjizat, dohot ulaon na parohon biar.+ 9 Dung i diboan Ho do hami tu inganan on, dilehon Ho do luat on tu hami, i ma luat na godang susu dohot madu.+ 10 Saonari, nungnga huboan be hasil panen na parjolo na nilehonmu tu au, ale Jahowa.’+
“Ikkon dipeakkon hamu do i di jolo ni Jahowa Debatamuna jala ikkon marsomba do hamu di jolo ni Jahowa Debatamuna i. 11 Dung i marlas ni roha ma hamu alani sude akka na denggan na dilehon Jahowa Debatamuna tu hamu dohot tu keluargamuna, tu halak Lepi, dohot tu sude halak na sian bangso na asing na adong di tonga-tongamuna.+
12 “Dung i di taon na patoluhon, i ma tikki dipapungu hamu saparsappulu+ sian sude hasil panenmuna, ikkon dilehon hamu do i tu halak Lepi, tu akka panoppang, tu dakdanak na so marama,* dohot tu ina na mabalu. Lehon hamu ma i diallang nasida di akka kotamuna* sappe puas.+ 13 Dung i ikkon dohononmuna ma di jolo ni Jahowa Debatamuna, “Nungnga hupapinda be akka bagian na badia sian jabukku. Nungnga hulehon be i tu halak Lepi, tu akka panoppang, tu dakdanak na so marama, dohot tu ina na mabalu+ songon parettami tu au. Dang adong na hulanggar jala dang adong na so huulahon akka parettami. 14 Dang adong hubuat sian i lao hupangan tikki marlungun ni roha au, dang hupapinda i tikki ramun* au, manang dang hulehon i tu halak na mate. Nungnga huoloi hata ni Jahowa Debatakku, jala nungnga huulahon sude paretta na pinaboam tu au. 15 Saonari ida ma sian surgo, sian ingananmu na badia i. Pasu-pasu ma bangso Israel, bangsomi. Pasu-pasu ma luat na godang susu dohot madu i,+ i ma luat naung dilehon Ho tu hami+ songon sumpa na nidokmu tu akka ompunami.’+
16 “Sadari on, diparettahon Jahowa Debatamuna do hamu asa mangulahon sude patik on dohot akka aturan naung ditottuhon on. Ikkon dioloi hamu do sudena i jala diulahon hamu sian nasa rohamuna+ dohot sian nasa ngolumuna. 17 Sadari on, nungnga dijalo hamu jaminan sian Jahowa, molo diihutton hamu dalanna, dioloi hamu patikna,+ parettana,+ dohot aturan naung ditottuhon Ibana,+ jala molo ditangihon hamu hatana, Ibana ma na gabe Debatamuna. 18 Jala sadari on, nungnga dilehon hamu jaminan tu Jahowa na olo do hamu gabe bangsona, gabe appunana na massai arga*+ songon janjina tu hamu, jala na olo do hamu mangulahon sude parettana. 19 Molo dipatudu hamu dirimuna badia di jolo ni Jahowa Debatamuna,+ bahenonna ma hamu gabe untimbo sian sude bangso naung dibahen Ibana,+ bahenonna ma hamu dipuji, tarbarita, jala sangap, songon janjina tu hamu.”