Josua
11 Dung dibege Raja Jabin na sian Hazor na binahen ni halak Israel, disuru ibana ma halak mandapotton Raja Jobab na sian Madon,+ raja ni Simron, dohot raja ni Aksap.+ 2 Nasida ma akka raja di inganan na mardolok-dolok di sabola utara. Disuru ibana ma muse halak mandapotton akka raja na di gurun* na di sabola selatan ni Kineret. Jala disuru ma muse asa didapotton akka raja na di Syefela dohot akka raja na di luat Dor,+ i ma inganan na mardolok-dolok di sabola barat. 3 Disuru ibana ma muse halak mandapotton halak Kanaan+ na di sabola timur dohot di sabola barat, halak Amori,+ halak Het, halak Perisi, halak Jebus na di inganan na mardolok-dolok, dohot halak Hevi+ na maringanan di toru ni Dolok Hermon+ na adong di Mispa. 4 Dung i, borhat ma nasida rap dohot akka tentarana na massai godang, na songon pasir di topi ni laut. Diboan nasida do muse hoda dohot kareta porang na massai godang. 5 Marpungu do sude raja i jala markemah di mual na di Merom lao mangalo halak Israel.
6 Dung i didok Jahowa ma tu si Josua, “Unang ma mabiar ho tu nasida.+ Ai marsogot, hira-hira di tikki sisongon on lehonokku ma nasida sude lao pamateon ni halak Israel. Ikkon seatonmu do urat ni pat ni hoda+ ni nasida jala ikkon tutungonmu do akka kareta porang ni nasida.” 7 Dung i, toppu ma ro si Josua dohot akka tentarana mangalo nasida di mual na di Merom. 8 Dilehon Jahowa do nasida sude tu halak Israel.+ Ditaluhon halak Israel ma nasida jala dilele sahat tu Sidon na Balga,+ tu Misrepot-maim,+ jala sahat tu Rura Mispe na di sabola timur. Dang adong nanggo sahalak pe sian nasida na mangolu.+ 9 Diulahon si Josua do sude na diparettahon Jahowa. Diseat ibana do urat ni pat ni hoda ni nasida jala ditutung ibana do akka kareta porang ni nasida.+
10 Dung i lao ma si Josua manaluhon kota Hazor. Dipamate ibana ma rajana mamakke podang,+ ai umgogo do kota Hazor sian sude kota na adong di sude harajaon i. 11 Dipamate nasida ma sude halak na di kota i mamakke podang.+ Dang adong nanggo sahalak pe na mangolu.+ Dung i, ditutung ma kota Hazor. 12 Ditaluhon si Josua do sude kota i dohot akka rajana.+ Dipamate+ do nasida sude mamakke podang songon na diparettahon si Musa naposo ni Jahowa i. 13 Alai dang ditutung halak Israel akka kota na adong di dolok. Holan kota Hazor do na ditutung si Josua. 14 Dibuat halak Israel do sude akka pinahan dohot akka arta ni nasida.+ Dipamate do sude halak mamakke podang.+ Dang adong sahalak pe na dipasombu mangolu.+ 15 Sude paretta na dipasahat Jahowa tu si Musa, dipasahat si Musa do muse tu si Josua,+ jala songon i ma na diulahon si Josua. Diulahon ibana do sude na diparettahon Jahowa marhite si Musa.+
16 Ditaluhon si Josua ma sude kota i. Ditaluhon do muse akka inganan na mardolok-dolok di Juda, Negeb,+ Gosen, Syefela,+ Araba,+ dohot di inganan na mardolok-dolok di Israel dohot akka luat na di toru ni dolok. 17 Ditaluhon ma muse mulai sian Dolok Halak na di jolo ni Seir sahat tu Baal-gad+ na di Rura Libanon di toru ni Dolok Hermon.+ Ditakkup ma sude rajana jala dipamate. 18 Leleng do si Josua marporang mangalo sude raja na disi. 19 Dang adong na mardame dohot halak Israel asing ni halak Hevi na tading di Gibeon.+ Alana ditaluhon halak Israel do akka kota na asing.+ 20 Dipaloas Jahowa do jugul roha+ ni nasida asa marporang mangalo halak Israel. Alani i, dang asi roha ni Debata tikki dipamate nasida.+ Dipamate do nasida sude songon na diparettahon Jahowa tu si Musa.+
21 Dipamate si Josua do sude halak Anakim+ na adong di inganan na mardolok-dolok, mulai sian Hebron, Debir, Anab, sude inganan na mardolok-dolok di Juda dohot di Israel. Ditaluhon si Josua do nasida sude dohot kota ni nasida.+ 22 Dang adong be halak Anakim na tading di Israel, asing ni na adong+ di Gasa,+ di Gat,+ dohot di Asdod.+ 23 Ditaluhon si Josua do sude kota i, songon janji ni Jahowa tu si Musa.+ Dibagi si Josua ma tano i tu halak Israel hombar tu marga ni nasida+ jala dang marporang be nasida dukkon i.+