Josua

13 Saonari nungnga matua si Josua jala nungnga naeng mate.+ Alani i, didok Jahowa ma tu ibana, “Nungnga matua ho jala nungnga naeng mate. Alai godang dope akka huta na so ditaluhon. 2 On ma akka huta na so ditaluhon dope:+ sude huta ni halak Palistim dohot huta ni halak Gesur+ 3 (mulai sian Sihor na di sabola timur ni* Mesir sahat tu parbatasan ni Ekron na di sabola utara, najolo didok do i huta ni halak Kanaan)+ dohot ma muse huta ni lima pamimpin ni halak Palistim,+ i ma halak Gasa, halak Asdod,+ halak Askelon,+ halak Gat,+ halak Ekron,+ dohot huta ni halak Awi+ 4 di sabola selatan. Dohot ma muse sude huta ni halak Kanaan, Meara, huta ni halak Sidon+ sahat tu Apek, i ma parbatasan ni huta ni halak Amori. 5 Dohot ma muse huta ni halak Gebal+ dohot saluhut Libanon na di sabola timur, mulai sian Baal-gad na di toru ni Dolok Hermon sahat tu Hamat.*+ 6 Dohot ma muse huta ni akka halak na maringanan di inganan na mardolok-dolok, mulai sian Libanon+ sahat tu Misrepot-maim,+ dohot sude huta ni halak Sidon.+ Hupalao pe nasida sian jolo ni halak Israel.+ Alai bagi ma tano i tu halak Israel gabe appuna ni nasida songon naung huparettahon tu ho.+ 7 Saonari bagi ma tano i tu sia marga dohot tu satonga sian marga Manasse.”+

8 Nungnga dilehon si Musa tano na di sabola timur ni Sunge Jordan tu marga Ruben, tu marga Gad, dohot tu satonga sian marga Manasse. On ma tano na dilehon si Musa naposo ni Jahowa i tu nasida:+ 9 mulai sian Aroer+ na di topi ni Rura Arnon,+ akka kota na di tonga-tonga ni rura i, dohot sude dolok-dolok mulai sian Medeba sahat tu Dibon. 10 Dilehon do muse sude kota na dirajai Raja Sihon, i ma raja ni halak Amori na mamaretta di Hesbon sahat tu parbatasan ni huta ni halak Ammon.+ 11 Dilehon do muse Gilead, huta ni halak Gesur, halak Maakat,+ sude luat na di Dolok Hermon, dohot sude luat Basan+ sahat tu Salka.+ 12 Dilehon do muse sude kota na dirajai Raja Og na di Basan na mamaretta di Astarot dohot di Edrei. (Ibana ma sahalak sian halak Repaim na so dipamate.)+ Ditaluhon si Musa do nasida jala dipalao.+ 13 Alai dang dipalao+ halak Israel halak Gesur dohot halak Maakat. Rap tinggal do nasida dohot halak Israel sahat tu sadari on.

14 Alai dang adong parbagianan ni marga Lepi.+ Alana pelean situtungon na tu Jahowa Debata ni Israel i ma na gabe parbagianan ni nasida,+ songon na dijanjihon Debata tu nasida.+

15 Dilehon si Musa do tano parbagianan tu akka keluarga sian marga Ruben. 16 Tano parbagianan ni nasida, mulai sian Aroer na di topi ni Rura Arnon, akka kota na di tonga-tonga ni rura i, sude dataran tinggi Medeba, 17 Hesbon dohot akka huta+ na adong di dataran tinggi, i ma Dibon, Bamot-baal, Baal-meon,+ 18 Jahas,+ Kadermat,+ Mepaat,+ 19 Kiriataim, Sibna,+ Zeret-hasahar na di dolok na jonok tu rura i, 20 Bet-peor, inganan na mardolok-dolok di Pisga,+ Bet-jesimot,+ 21 sude kota na di dataran tinggi, dohot sude kota na dirajai Raja Sihon, i ma raja ni halak Amori na mamaretta di Hesbon.+ Ditaluhon+ si Musa do ibana dohot akka pamimpin ni halak Midian na maringanan di huta i, i ma si Evi, si Rekem, si Zur, si Hur, dohot si Reba,+ na dirajai Raja Sihon. 22 Dohot do dipamate halak Israel si Bileam,+ i ma sahalak datu+ anak ni si Beor. 23 Sunge Jordan ma parbatasan ni tano parbagianan ni marga Ruben. Sude huta dohot kota na adong disi, dilehon do tu akka keluarga na sian marga Ruben.

24 Dilehon si Musa do muse tano parbagianan tu akka keluarga na sian marga Gad. 25 Tano parbagianan ni nasida i ma Jaser,+ sude kota na di Gilead, satonga huta ni halak Ammon+ sahat tu Aroer na di jolo ni Rabba.+ 26 Dilehon do muse tu nasida mulai sian Hesbon+ sahat tu Ramot-mispe, Betonim, mulai sian Mahanaim+ sahat tu parbatasan ni Debir, 27 dohot akka huta na di rura na dirajai Raja Sihon na sian Hesbon,+ i ma Bet-haram, Bet-nimra,+ Sukot,+ dohot Zapon. Parbatasan ni nasida, i ma sabola timur ni Sunge Jordan sahat tu ujung ni Laut Kineret.*+ 28 On ma akka huta dohot kota na gabe tano parbagianan ni akka keluarga na sian marga Gad.

29 Dilehon si Musa do muse tano parbagianan tu akka keluarga na sian satonga ni marga Manasse.+ 30 Tano parbagianan ni nasida, i ma mulai sian Mahanaim,+ sude Basan, sude huta na dirajai Raja Og na sian Basan, dohot sude huta di perkemahan ni Jair+ na di Basan. Adong ma 60 huta godangna. 31 Dilehon do muse tu nasida satonga ni Gilead, Astarot, Edrei,+ dohot akka huta na dirajai Raja Og na di Basan. Dilehon ma i tu satonga sian pinoppar ni si Mahir+ anak ni si Manasse.

32 On ma akka huta na di Gurun Moab na di sabola timur ni Sunge Jordan di bariba ni Jeriko.+ Dilehon si Musa do i tu nasida gabe tano parbagianan ni nasida.

33 Alai dang adong dilehon si Musa tano parbagianan ni marga Lepi.+ Jahowa Debata ni Israel do na gabe parbagianan ni nasida, songon na dijanjihon Debata tu nasida.+