Josua
5 Dibege sude raja ni halak Amori+ na di sabola barat ni Sunge Jordan ma na masa tu halak Israel. Dohot do muse sude raja ni halak Kanaan+ na jonok tu laut mambege i. Dibege nasida do na dipakoring Jahowa aek ni Sunge Jordan asa boi halak Israel menyeberang.+ Gabe mabiar* jala dang barani be nasida mangalo halak Israel.+
2 Di tikki i, didok Jahowa ma tu si Josua, “Bahen ma akka piso sian batu jala sunat+ ma muse akka bawa ni halak Israel.” 3 Dung i dibahen si Josua ma akka piso sian batu, jala disunat ma akka bawa ni halak Israel di Gibeat-haaralot.+ 4 On ma na mambahen disunat si Josua nasida: Dung kaluar nasida sian Mesir, nungnga mate sude bawa na boi marporang.* Mate do nasida di gurun tikki di pardalanan sian Mesir.+ 5 Nungnga disunat sude halak na kaluar sian Mesir. Alai, dang disunat dope akka halak na tubu di gurun saleleng di pardalanan sian Mesir. 6 Saleleng 40 taon+ halak Israel di gurun,* nungnga mate be sude akka bawa na boi marporang. Ai dialo nasida do Jahowa.+ Alani i marsumpa ma Jahowa, na so boi idaon ni nasida huta na dijanjihonna i.+ Hape nungnga marjanji hian Jahowa tu akka ompu ni nasida lao mangalehon huta i,+ i ma luat na godang susu dohot madu disi.+ 7 Gabe akka anak ni nasida ma na manggattihon nasida.+ Alai, dang disunat dope akka anak ni nasida i saleleng di pardalanan, alani i do disunat si Josua nasida.
8 Dung sae disunat sude bangso Israel, toktong dope nasida di perkemahan sahat tu na malum.
9 Dung i didok Jahowa ma tu si Josua, “Dang issakan ni halak Mesir be hamu. Ai nungnga hubolokkon* i sadari on sian hamu.” Alani i, sahat tu saonari digoari ma inganan i Gilgal.+
10 Toktong dope halak Israel markemah di Gilgal. Di ari na pasappulu opatton di bulan i,+ dirayahon nasida ma Paska di gurun na di Jeriko di tikki borngin. 11 Marsogotna i, dung sae ari Paska, mulai ma diallang nasida parbue ni suan-suanan na di huta Kanaan. Diallang nasida ma roti na so marragi+ dohot gandum na disaok.* 12 Dung mulai diallang nasida parbue ni suan-suanan na di huta Kanaan, dang turun be manna tu nasida.+ Mulai sian taon i, parbue ni suan-suanan na di huta i ma na diallang halak Israel.+
13 Dung jonok si Josua tu kota Jeriko, diida ibana ma sahalak bawa+ jongjong di jolona maniop podang.+ Didapotton si Josua ma ibana, jala didok ma, “Dongannami do ho manang musunami?” 14 Didok bawa i ma, “Daong, pamimpin ni tentara ni Jahowa do au.”+ Pittor marsinggang jala marsomba ma si Josua. Didok ma, “Aha do na lao dohonon ni Tuanku tu au naposomon?” 15 Didok pamimpin ni tentara ni Jahowa i ma, “Bukka ma solopmi. Ai di inganan na badia do ho jongjong.” Dung i dibahen si Josua ma songon i.+