Josua
8 Dung i didok Jahowa ma tu si Josua, “Unang ma mabiar ho.+ Boan ma sude tentaram mangalo kota Ai. Nungnga hupasahat tu ho raja ni Ai, rakyatna, dohot hutana.+ 2 Bahen ma tu kota Ai dohot tu rajana songon na binahenmu tu kota Jeriko dohot tu rajana.+ Masuk ma hamu sian pudi ni kota i manaluhon nasida. Alai boi do buatonmuna arta dohot pinahan ni nasida.”
3 Dipillit si Josua ma 30.000 tentara na gogo. Dung i lao ma ibana dohot akka tentarana manaluhon kota Ai. Disuru ibana ma nasida borhat tikki borngin. 4 Didok si Josua ma tu nasida, “Martabuni ma hamu di pudi ni kota i jala unang ma padaohu hamu sian i. Rade ma hamu lao marporang. 5 Lao pe au dohot akka tentara na asing tu kota i. Molo kaluar nasida mangalo hami songon na parjolo i,+ mundur pe hami sian nasida. 6 Tikki kaluar nasida mangalo hami, lari pe hami asa lam dao nasida sian kota i. Ai dokkonon ni nasida ma, ‘Nungnga mundur be nasida songon na parjolo i.’+ 7 Dung i, ikkon kaluar ma akka tentara na martabuni di pudi ni kota i jala ditaluhon ma kota i. Ai nungnga dipasahat Jahowa Debatamuna kota i tu hamu. 8 Dung ditaluhon hamu kota i, tutung ma i.+ Ikkon ulahononmuna do sude paretta ni Jahowa. On ma parettakku.”
9 Dung i disuru si Josua ma nasida lao. Lao ma nasida tu pudi ni kota i. Martabuni ma nasida di holang-kolang ni Betel dohot Ai, i ma na di sabola barat ni kota Ai. Alai disi do si Josua dohot akka tentara na asing saborngin i.
10 Marsogotna i hatop ma si Josua dungo. Dipapungu ibana ma akka tentara i. Dung i, diboan ibana dohot akka pamimpin ni halak Israel ma akka tentara i tu kota Ai. 11 Mardalan ma ibana dohot sude tentarana+ tu jolo ni kota Ai. Markemah ma nasida di sabola utara ni kota i. Adong do rura di holang-kolang ni inganan ni nasida dohot kota Ai. 12 Nungnga disuru+ si Josua hian hira-hira 5.000 tentara tu holang-kolang ni Betel+ dohot Ai, i ma di sabola barat ni kota Ai. 13 Jadi di sabola utara+ ma markemah si Josua dohot akka tentara na asing. Jala di sabola barat+ ma markemah akka tentara na 5.000 i. Dung borngin, lao ma si Josua tu tonga-tonga ni rura i.
14 Dung diida raja Ai na masa i, kaluar ma ibana dohot akka tentarana lao mangalo halak Israel tu sada inganan di jolo ni gurun. Alai dang diboto ibana, naung adong akka tentara na asing na martabuni di pudi ni kota i lao manaluhon nasida. 15 Dung ro halak Ai mangalo halak Israel, lari ma si Josua dohot akka tentarana tu dalan na lao tu gurun i.+ 16 Disuru ma sude halak na sian kota Ai mangalele halak Israel. Alani i, gabe lam dao ma nasida sian kota i. 17 Sude ma bawa na di kota Ai dohot na di Betel kaluar lao mangalele halak Israel. Gabe dang adong be na manjaga kota i.
18 Didok Jahowa ma tu si Josua, “Angkat ma tombak* na di tanganmi doppak kota Ai.+ Nungnga hulehon kota i tu ho.”+ Dung i dibahen si Josua ma songon i. 19 Tikki diangkat si Josua tombak na di tanganna i doppak kota Ai, kaluar ma akka tentara na di pudi ni kota i. Masuk ma nasida tusi jala ditutung ma kota i.+
20 Tikki diida halak Ai tu pudi, diida nasida ma timus sian kota i. Gabe mabiar ma nasida jala dang tolap be nasida lao manang na tudia. Halak Israel na dilele nasida tu gurun i pe, nungnga marbalik mangalo nasida. 21 Tikki diida si Josua dohot akka tentarana timus sian kota i, diboto nasida ma naung masuk tentarana tu kota i. Gabe marbalik ma nasida mangalo halak Ai. 22 Dung i ro ma akka tentara na asing na di kota i mangurupi nasida. Dang boi be halak Ai lao manang na tudia, ala nungnga ro halak Israel sian jolo dohot sian pudi mangalo nasida. Dipamate tentara ni Israel ma nasida sude, jala dang adong na boi malua.+ 23 Alai, dang dipamate nasida raja ni Ai.+ Ditakkup nasida ma ibana jala diboan tu jolo ni si Josua.
24 Dipamate tentara ni Israel ma sude tentara ni halak Ai na di gurun, ala tusi do nasida dilele. Dibunu ma nasida sude mamakke podang. Dung i, mulak ma sude tentara ni Israel tu kota Ai jala ditaluhon ma kota i. 25 Sude ma halak Ai dipamate sadari i, bawa dohot borua. Godang ni nasida 12.000 halak. 26 Sai diangkat si Josua do tombak+ na di tanganna doppak kota Ai sahat tu na dipamate+ sude halak Ai. 27 Alai dibuat halak Israel do pinahan dohot akka arta ni nasida, songon paretta ni Jahowa tu si Josua.+
28 Dung i ditutung si Josua ma kota Ai. Holan tembok na maruppak+ nama na adong disi sahat tu sadari on. 29 Digattung si Josua ma raja ni Ai tu sada tiang.* Dung naeng borngin, disuru si Josua ma asa dipaturun bakkena sian tiang i.+ Dung i, dibolokkon nasida ma bakkena i tu gerbang ni kota i, jala dibahen ma akka batu na balga di ginjang ni bakkena. Disi dope i sahat tu sadari on.
30 Laos di tikki i, dibahen si Josua ma sada langgatan* di Dolok Ebal,+ i ma langgatan tu Jahowa Debata ni Israel. 31 Dibahen ma i songon paretta ni si Musa naposo ni Jahowa i tu bangso Israel, dohot songon na tarsurat di bukku Patik+ ni si Musa. Disurat do disi, “Ikkon sian batu na so hea dipahat do dibahen sada langgatan.”+ Dibahen nasida ma pelean situtungon dohot pelean pardamean* tu Jahowa di ginjang ni langgatan i.+
32 Dung i disurat si Josua ma Patik ni si Musa di batu, i ma Patik+ na sinurat ni si Musa di jolo ni bangso Israel.+ 33 Jongjong ma sude halak Israel di kiri dohot di kanan ni poti parpadanan ni Jahowa i, na di jolo ni malim Lepi na mamboan poti i. Dohot ma i akka pangituai,* akka pamimpin, akka hakim dohot akka halak na sian bangso na asing.+ Satonga sian nasida jongjong di jolo ni Dolok Gerizim jala satonga nai jongjong di jolo ni Dolok Ebal.+ (Songon paretta ni si Musa naposo ni Jahowa i.)+ Dibahen halak Israel do songon i asa dipasu-pasu Debata nasida. 34 Dung i gogo ma dijahahon si Josua sude Patik+ ni si Musa i. Dijahahon do pasu-pasu+ dohot bura+ na tarsurat di bukku Patik i. 35 Dang adong nanggo sada sian Patik ni si Musa na so dijahahon si Josua di jolo ni bangso Israel.+ Dohot ma i di jolo ni akka borua, dakdanak dohot akka halak na sian bangso na asing+ na maringanan di tonga-tonga ni nasida.+