Panguhum
10 Dung mate si Abimelek, gabe si Tola anak ni si Pua, pahoppu ni si Dodo halak Isasar i ma na paluahon halak Israel.+ Di Samir do si Tola tinggal, di huta na di inganan na mardolok-dolok di Epraim. 2 Ibana ma na gabe panguhum ni halak Israel saleleng 23 taon. Dung i mate ma ibana jala dikuburhon di Samir.
3 Dukkon si Tola, si Jair halak Gilead ma na gabe panguhum ni halak Israel saleleng 22 taon. 4 Adong 30 anakna akka na hundul di ginjang ni 30 halode. Adong do 30 kota ni akka anakna i jala di Gilead do i sude. Sahat tu saonari, digoari do akka kota i Hawot-jair.+ 5 Dung mate si Jair dikubur ma ibana di Kamon.
6 Dibahen halak Israel ma muse sogo roha ni Jahowa.+ Disomba nasida do akka Baal,+ akka patung Astarot, akka debata na disomba akka halak na tinggal di Aram,* di Sidon, di Moab,+ akka debata ni halak Ammon,+ dohot akka debata ni halak Palistim.+ Ditadikkon nasida do Jahowa jala dang disomba nasida be Ibana. 7 Gabe muruk ma Jahowa tu halak Israel. Dipasombu Ibana ma nasida ditaluhon* halak Palistim dohot halak Ammon.+ 8 Mulai sian taon i, susa jala porsuk ma ngolu ni halak Israel dibahen nasida. Saleleng 18 taon ma porsuk ngolu ni halak Israel na di bariba ni Sunge Jordan. Najolo tano ni halak Amori na di Gilead do i. 9 Asing ni i, manaripar do halak Ammon sian Sunge Jordan lao mangalo marga Juda, Benjamin, dohot Epraim. Gabe marsak situtu ma halak Israel. 10 Dung i dipangido halak Israel ma tu Jahowa asa diurupi nasida.+ Didok nasida ma, “Nungnga mardosa hami tu Ho. Hutadikkon hami do Debatanami jala husomba hami do akka Baal.”+
11 Alai didok Jahowa ma tu halak Israel, “Nungnga hupalua hamu sian Mesir,+ sian halak Amori,+ halak Ammon, halak Palistim,+ 12 halak Sidon, halak Amalek, dohot halak Midian. Ai dibahen nasida do porsuk ngolumuna. Tikki mangangguki hamu mangalu-alu tu Au, hupalua do hamu sian tangan ni nasida. 13 Alai, ditadikkon hamu do Au jala disomba hamu do akka debata na asing.+ Alani i, dang olo be Au paluahon hamu.+ 14 Lao ma hamu tu akka debata na pinillitmuna i. Jala pangido ma tu nasida asa diurupi hamu.+ Nasida ma na paluahon hamu di tikki susa.”+ 15 Didok halak Israel ma tu Jahowa, “Nungnga mardosa hami. Bahen ma tu hami dia na denggan di roham. Alai sadari on, palua ma hami.” 16 Dung i, dibolokkon halak Israel ma akka patung ni debata na asing sian tonga-tonga ni nasida. Jala disomba nasida ma Jahowa.+ Alani i, dang tarpaida-ida Ibana be* halak Israel susa.+
17 Di pudian ni ari, marpungu ma halak Ammon+ jala markemah di Gilead. Alani i, marpungu ma halak Israel jala markemah di Mispa. 18 Makkatai ma halak Gilead dohot akka pamimpin ni nasida. Didok nasida ma sama nasida, “Manang ise na olo mamimpin hita marporang mangalo halak Ammon,+ ibana ma na gabe pamimpin ni sude pangisi ni huta Gilead.”