Panguhum
20 Alani i, marroan ma sude halak Israel mulai sian Dan+ sahat tu Ber-seba dohot na sian Gilead+ lao marpungu di jolo ni Jahowa di Mispa.+ 2 Dohot do disi marpungu akka pamimpin ni bangso na sian ganup marga ni Israel. Jala 400.000 ma godang ni tentara na mardalan pat jala na mamakke podang.+
3 Dibege halak Benjamin ma naung marpungu halak Israel di Mispa.
Didok halak Israel ma, “Paboa ma jo tu hami, boasa masa hajahaton on?”+ 4 Dialusi halak Lepi+ suami ni borua na tarbunu i ma, “Na ro do au marborngin rap dohot gundikku tu Gibea+ huta ni halak Benjamin. 5 Dung borngin, ro ma pangisi ni huta* Gibea manggurtuki jabu inganakku marborngin. Naeng dipamate nasida ma au, alai gabe diperkosa nasida do gundikku jala mate ma ibana.+ 6 Alani i, huboan ma bakke ni gundikki, huseati, jala hukirim ma sapponggol be tu ganup luat parbagianan ni halak Israel.+ Ai nungnga diulahon nasida ulaon na parohon ila jala na so suman di Israel. 7 Saonari hamu halak Israel, songon dia ma bahenon didok rohamuna+ tu na masa on?”
8 Jongjong ma nasida jala sude ma mandok, “Dang adong nanggo sahalak pe sian hita na boi mulak tu kemah manang tu jabuna. 9 On ma na lao tabahen tu pangisi ni kota Gibea: Tabahen ma undi,+ asa lao hita marporang mangalo nasida. 10 Sian sude marga ni Israel, tapillit ma 10 sian 100 halak, 100 halak sian 1.000 halak, jala 1.000 halak sian 10.000 halak. Nasida ma na paradehon sipanganon tu akka tentara, asa boi akka tentara i marporang mangalo pangisi ni kota Gibea, huta ni halak Benjamin naung mangulahon na so suman di Israel.” 11 Dung i marsada ma sude halak Israel mangalo pangisi ni kota Gibea.
12 Disuru halak Israel i ma akka halak manjuppangi sude halak Benjamin lao mandok, “Boasa masa hajahaton on di tonga-tongamuna? 13 Pasahat ma tu hami akka halak na so hasea i na di kota Gibea on,+ asa hupamate hami nasida jala asa unang adong be hajahaton di Israel.”+ Alai dang olo halak Benjamin manangihon hata ni halak Israel, dongan sabangso ni nasida.
14 Dung i, marpungu ma halak Benjamin di luar ni kota Gibea lao marporang mangalo halak Israel. 15 Di tikki i, dipapungu halak Benjamin ma 26.000 tentara ni nasida na mamakke podang sian akka kota ni nasida. Asing ni i, dipapungu do muse 700 tentara na unjago na sian Gibea. 16 Sian akka tentara i, adong do 700 tentara na kidal. Sude do nasida boi mamakke ambalang* jala dang hea pilit nanggo saotik.*
17 Alai dipapungu halak Israel na sian marga na asing ma 400.000 tentara na mamakke podang+ jala na somal marporang. 18 Lao ma bangso Israel i tu Betel, dipangido nasida ma tudu-tudu sian Debata.+ Didok nasida ma, “Ise do sian hami na parjolo lao mangalo halak Benjamin?” Dialusi Jahowa ma, “Marga Juda ma parjolo lao.”
19 Dung manogot, borhat ma halak Israel jala markemah di jonok ni Gibea, asa boi nasida marporang mangalo halak Gibea.
20 Ro ma halak Israel jala marbaris ma nasida di Gibea lao marporang mangalo halak Benjamin. 21 Dung i ro ma tentara ni halak Benjamin sian Gibea jala dipamate ma 22.000 tentara ni halak Israel di na sadari i. 22 Alai dang mabiar halak Israel i. Marbaris do nasida muse di inganan na sarupa songon di ari na parjolo i. 23 Dung i mulak ma halak Israel tu Betel. Sai tangis ma nasida di jolo ni Jahowa sahat tu borngin. Didok nasida ma tu Jahowa, “Ikkon lao dope hami mangalo halak Benjamin, dongannami sabangso i?”+ Dialusi Jahowa ma, “Olo, lao ma hamu.”
24 Dung i ro ma muse halak Israel mandapotton halak Benjamin di ari na paduahon. 25 Ro ma halak Benjamin sian Gibea mandapotton halak Israel.+ Jala dipamate nasida ma akka tentara ni Israel na mamakke podang. Godangna 18.000 halak. 26 Mulak ma sude tentara ni halak Israel tu Betel. Hundul ma nasida di jolo ni Jahowa huhut tangis.+ Di ari i, marpuasa+ ma nasida sahat tu borngin. Dipelehon nasida ma pelean situtungon+ dohot pelean pardamean*+ di jolo ni Jahowa. 27 Dipangido nasida ma tudu-tudu sian Jahowa,+ ai disi do poti parpadanan ni Debata na sittong. 28 Tikki i, si Pinehas+ anak ni si Eleasar, pahoppu ni si Aron do na martugas* disi. Disukkun nasida ma, “Ikkon lao do hami marporang mangalo halak Benjamin dongannami sabangso i, manang hupaso hami ma on?”+ Dialusi Jahowa ma, “Lao ma hamu, ai marsogot pasahatonku ma nasida tu hamu.” 29 Dung i, diatur halak Israel ma asa dikalilingi akka tentara i kota Gibea lao manaluhon nasida.+
30 Ro ma halak Israel marporang mangalo halak Benjamin di ari na patoluhon. Marbaris ma nasida lao mangalo halak Gibea songon na parjolo i.+ 31 Ro ma halak Benjamin mangalo akka tentara ni halak Israel, ujungna lam dao ma halak Benjamin i sian kota.+ Songon na somal, dilele jala dipamate nasida ma akka tentara ni halak Israel. Dipamate nasida do hira-hira 30 tentara ni Israel di dalan na tu Betel dohot na tu Gibea.+ 32 Didok halak Benjamin ma, “Nungnga talu nasida tabahen songon na parjolo i.”+ Alai didok halak Israel ma, “Mundur ma hita, asa ro nasida tu dalan jala asa lam dao nasida sian kota.” 33 Borhat ma sude tentara ni Israel sian ingananna be jala marbaris ma nasida di Baal-tamar. Di tikki i, nungnga dikalilingi akka tentara ni Israel kota Gibea jala nungnga rade nasida lao marporang. 34 Alani i, ro ma 10.000 tentara na unjago na dipillit sian sude marga ni Israel tu kota Gibea, jala massai borat do parporangan i. Alai, dang diboto halak Benjamin na lao talu nama nasida satokkin nai.
35 Ditaluhon Jahowa ma halak Benjamin+ di jolo ni halak Israel. Di na sadari i, dipamate tentara ni halak Israel ma 25.100 tentara ni halak Benjamin na mamakke podang.+
36 Alai, tikki diida halak Benjamin naung mundur tentara ni Israel, dirippu nasida do naung ditaluhon nasida halak Israel.+ Hape, mundur pe nasida ala na pos do roha ni nasida tu akka tentara na makkalilingi kota Gibea.+ 37 Hatop ma ro akka tentara na martabuni i tu Gibea jala marserak ma nasida di kota i. Dipamate nasida ma sude halak na di kota i mamakke podang.
38 Nungnga didok halak Israel hian, asa dibahen akka tentara na mangalo kota Gibea i api di kota i, jala timusna gabe tanda tu tentara ni Israel na asing.
39 Di tikki na mundur i tentara ni halak Israel sian parporangan mangalo halak Benjamin, dilele halak Benjamin do nasida jala dipamate do hira-hira 30 tentara ni halak Israel.+ Didok nasida do muse, “Nungnga tataluhon nasida di jolotta songon parporangan na parjolo i.”+ 40 Alai, tarida ma timus nakkok sian kota Gibea. Dibereng halak Benjamin ma tu pudi, diida nasida ma nungnga tartutung kota i, jala nungnga sahat timusna tu langit. 41 Dung i, marbalik ma muse halak Israel naung dilele i mangalo halak Benjamin. Gabe gaor ma halak Benjamin, ai diboto nasida naeng talu nama nasida. 42 Mundur ma nasida sian tentara ni halak Israel jala lari doppak gurun. Alai dilele tentara ni Israel i do nasida. Dohot do muse halak na sian akka kota na disi marroan lao manaluhon halak Benjamin. 43 Torus do dilele tentara ni Israel halak Benjamin, jala tudia pe halak Benjamin lao nungnga disi tentara ni Israel. Ditaluhon tentara ni Israel ma halak Benjamin i di jolo ni kota Gibea, i ma di sabola timur ni kota i. 44 Ujungna, mate ma 18.000 halak Benjamin. Hape, akka tentara na jago do nasida sude.+
45 Dung i marbalik ma halak Benjamin na mangolu i dope, lari ma nasida tu arah gurun tu Dolok Rimmon.+ Dipamate tentara ni halak Israel ma 5.000 halak Benjamin di akka dalan. Torus ma dilele tentara ni Israel nasida sahat tu Gideom, jala dipamate nasida ma 2.000 halak nai. 46 Di na sadari i, mate ma 25.000 tentara ni halak Benjamin. Tentara na jago do nasida sude na mamakke podang.+ 47 Alai adong do 600 tentara ni halak Benjamin na lari tu arah gurun tu Dolok Rimmon. Jala disi do nasida tinggal saleleng opat bulan.
48 Marbalik ma akka tentara ni Israel mangalo halak Benjamin, dipamate nasida ma sude halak na mangolu di kota i mamakke podang. Dohot do pinahan ni halak Benjamin dipamate. Jala ditutung nasida do sude kota na dibolus nasida.