Rut
1 Tikki mamaretta akka hakim,+ massai susa do mangalului sipanganon di Israel. Alani i, pinda ma sahalak bawa na sian Betlehem+ na di Juda tu Moab.+ Diboan ma istrina dohot dua anakna. 2 Goar ni bawa i si Elimelek,* istrina si Naomi,* jala dua anakna si Malon* dohot si Kilian.* Halak Eprata do nasida na sian Betlehem na di Juda. Dung sahat nasida di Moab, disi ma nasida tinggal.
3 Dang sadia leleng mate ma si Elimelek suami ni si Naomi. Gabe holan anakna na dua i ma dongan ni si Naomi. 4 Dung i, mangoli ma anakna na dua i tu boru Moab. Sada tu si Orpa, na sada nai tu si Rut.+ Hira-hira sappulu taon ma nasida maringanan disi. 5 Dang sadia leleng, mate ma si Malon dohot si Kilian. Gabe dang adong be anak dohot suami ni si Naomi. 6 Dibege si Naomi ma nungnga dipasu-pasu Jahowa muse akka naposona di Israel. Jala dang maol be nasida mangalului sipanganon. Alani i, naeng lao ma ibana dohot parumaenna na dua i sian Moab.
7 Borhat ma si Naomi dohot parumaenna na dua i sian Moab. Tikki di pardalanan naeng tu Juda, 8 didok si Naomi ma tu akka parumaenna i, “Mulak ma hamu tu natua-tuamuna. Sai anggiat ma dipatudu Jahowa holongna* tu hamu,+ songon hamu na makkaholongi au dohot suamimuna naung mate i. 9 Sai anggiat ma dilehon Jahowa suami tu hamu asa unang susa ngolumuna.”+ Dung i, diumma si Naomi ma parumaenna na dua i jala tangis ma nasida. 10 Alai sai didok parumaenna i ma, “Daong inang, ikkon rap do hami dohot ho mulak tu bangsom.” 11 Didok si Naomi ma, “Mulak ma hamu inang. Boasa pola diihutton hamu au? Dang boi be au manubuhon anak lao gabe suamimuna!+ 12 Mulak ma hamu inang. Mulak ma hamu, dang mungkin be muli au muse. Ai nungnga matua au. Molo tung muli pe au borngin on jala manubuhon anak, 13 tarpaima hamu ma nasida sahat tu na balga? Gabe so muli ma hamu muse alani i? Unang ma inang, marsak situtu do au ala dohot hamu susa. Ai au do na dihukum Jahowa.”+
14 Lam gogo ma nasida tangis. Dung diumma si Orpa simatuana i, lao ma ibana. Alai molo si Rut dang olo lao. 15 Dung i, didok si Naomi ma, “Nungnga mulak be si Orpa tu bangsona dohot tu akka debatana. Ihutton ma ibana.”
16 Alai didok si Rut ma, “Unang ma sai suru au lao manadikkon ho inang. Manang tudia pe ho lao, tusi do au. Manang didia pe ho marborngin, disi do au marborngin. Bangsom nama bangsokku, jala Debatam nama Debatakku.+ 17 Didia ho mate disi do au mate jala disi do au dikuburhon. Molo dang alani hamatean, hukumon ni Jahowa ma au molo hutadikkon ho.”
18 Ala sai didok si Rut na ikkon dohot ibana, dang diorai si Naomi be ibana. 19 Dung i mardalan ma muse nasida tu Betlehem.+ Dung sahat disi, heran ma parhuta i. Adong ma sahalak borua na mandok, “Ai si Naomi do i?” 20 Didok ibana ma tu borua i, “Unang jou be au si Naomi.* Alai jou ma au si Mara.* Ai susa hian do ngolukku dibahen Debata.*+ 21 Godang do na huboan tikki pinda sian on. Alai saonari dang adong be huboan manang aha tuson dibahen Jahowa. Unang jou be au si Naomi. Ai sogo do roha ni Jahowa tu au jala susa do ngolukku dibahen Debata.”+
22 Songon i ma parmulak ni si Naomi dohot si Rut parumaenna halak Moab i.+ Sahat ma nasida di Betlehem. Di tikki i nungnga mulai panen barli.*+