1 Samuel

14 Di sada tikki, didok si Jonatan+ anak ni si Saul i ma tu halak na mamboan sinjatana, “Beta ma hita manaripar tu perkemahan ni tentara ni halak Palistim na di bariba an.” Alai dang dipaboa si Jonatan tu bapakna na naeng lao ibana. 2 Tikki i markemah do si Saul di jonok ni Gibea+ di toru ni hau delima na di Migron. Adong do hira-hira 600 halak na mandongani ibana.+ 3 (Si Ahia do na mamakke epod+ tikki i, i ma anak ni si Ahitub,+ abang ni si Ikabod,+ anak ni si Pinehas,+ anak ni si Eli+ malim ni Jahowa di Silo.)+ Jala dang diboto akka halak naung lao si Jonatan. 4 Tikki lao si Jonatan tu perkemahan ni tentara ni halak Palistim, mardalan do ibana sian holang-kolang ni dua dolok batu na songon ngingi. Na sada goarna Dolok Bozez, na sada nai goarna Dolok Sene. 5 Di jolo ni Mikhmas do dolok batu na di sabola utara jala songon tiang do dolok i. Jala di jolo ni Geba+ do dolok batu na di sabola selatan.

6 Dung i didok si Jonatan ma tu halak na mamboan sinjatana, “Beta ma hita manaripar tu perkemahan ni akka tentara na so marsunat i.+ Atik boha urupan ni Jahowa hita. Ai nang pe godang manang otik hita, dang adong na boi mangabbati Jahowa lao paluahon hita.”+ 7 Dung i didok halak na mamboan sinjatana i ma tu si Jonatan, “Ulahon ma dia na denggan di roham. Lao ma ho manang na tudia lomo ni roham. Huihutton pe ho manang na tudia pe ho lao.” 8 Dung i didok si Jonatan ma, “Manaripar ma hita tu inganan ni nasida jala tapatudu ma diritta tu nasida. 9 Molo didok nasida tu hita, ‘Disi ma hamu asa ro hami mandapotton hamu,’ disi ma hita jala unang ma nakkok hita mandapotton nasida. 10 Alai molo didok nasida, ‘Nakkok ma hamu, alo ma hami,’ nakkok ma hita. Ai lao pasahaton ni Jahowa do nasida tu tanganta. On ma na gabe tanda di hita.”+

11 Lao ma si Jonatan dohot halak na mamboan sinjatana i tu perkemahan ni tentara ni halak Palistim. Diida halak Palistim ma nasida jala ninna ma, “Ida ma! Nungnga kaluar halak Heber sian akka lubang partabunian ni nasida.”+ 12 Didok tentara ni Palistim ma tu si Jonatan dohot tu halak na mamboan sinjatana, “Nakkok ma hamu, asa hupamate hamu!”+ Didok si Jonatan ma tu na mamboan sinjatana, “Ihutton ma au, ai lao pasahaton ni Jahowa do nasida tu tangan ni halak Israel.”+ 13 Dijakkit si Jonatan ma dolok batu i, jala diihutton halak na mamboan sinjatana i do ibana. Dialo si Jonatan ma halak Palistim i, jala ro do sian pudina siboan sinjatana pamatehon akka halak na mangolu dope. 14 Di tikki na parjolo i, hira-hira 20 halak ma tentara ni halak Palistim na dipamate si Jonatan dohot halak na mamboan sinjatana i. Jala dang bidang* inganan ni nasida tikki mangalo na 20 halak i.

15 Mabiar ma akka tentara ni halak Palistim na di luar ni perkemahan, na di perkemahan, dohot na lao sian perkemahan i.+ Humutur ma tano on jala gabe mabiar ma halak Palistim dibahen Debata. 16 Di tikki i, adong do akka tentara na manjaga si Saul di Gibea+ na di Benjamin. Diida nasida do gaor sude tentara ni halak Palistim di perkemahan ni nasida.+

17 Didok si Saul ma tu akka halak na rap dohot ibana, “Etong hamu ma sude halak na rap dohot hita, jala lului hamu ma ise na manadikkon hita.” Dung dietong nasida, diboto nasida ma na so disi be si Jonatan dohot halak na mamboan sinjatana. 18 Didok si Saul ma tu si Ahia,+ “Boan ma poti parpadanan ni Debata na sittong i tuson!” (Di tikki i,* di tonga-tonga ni halak Israel i do poti parpadanan ni Debata na sittong.) 19 Tikki makkatai si Saul tu malim i, lam gaor ma perkemahan ni halak Palistim. Gabe didok si Saul ma tu malim i, “Paso ma i.” 20 Marpungu ma si Saul dohot sude halak na rap dohot ibana, jala lao ma nasida marporang. Diida nasida ma disi masitikkaman halak Palistim sama nasida jala gaor hian ma disi. 21 Asing ni i, adong do halak Heber na asing na gabe marpihak tu halak Israel na dipimpin ni si Saul dohot si Jonatan. Hape marpihak tu halak Palistim hian do nasida jala rap lao do nasida tu perkemahan. 22 Adong do muse halak Israel na martabuni+ di inganan na mardolok-dolok di Epraim. Dibege nasida do naung lari halak Palistim. Alani i, ro ma nasida tu parporangan i lao mangalele halak Palistim. 23 Marporang do nasida sahat tu Bet-apen.+ Jala dipalua Jahowa do nasida di ari i.+

24 Alai, loja hian do halak Israel di ari i, jala nungnga gale nasida. Ai marsumpa do si Saul tu nasida, didok do, “Hona bura ma manang ise na mangallang manang aha pe* andorang so borngin jala andorang so hutaluhon akka musukku!” Alani i, dang diallang nasida be manang aha.+

25 Dung i masuk ma sude halak Israel* i tu tombak jala diida nasida ma adong madu di tano. 26 Tikki masuk nasida tu tombak, diida nasida ma manetek madu. Alai, dang adong na mangallang i. Ai mabiar do nasida alani sumpa i. 27 Alai dang dibege si Jonatan tikki marsumpa bapakna tu halak Israel.+ Alani i, disurdukkon ibana ma tukkot na di tanganna tu madu i. Dung diallang ibana madu i, mulak ma muse gogona.* 28 Mangida i, didok sahalak sian halak Israel i ma, “Nungnga marsumpa bapakmu tu hami, didok do, ‘Hona bura ma manang ise na mangallang manang aha pe sadari on!’+ Alani i do gabe gale akka halak.” 29 Alai, didok si Jonatan ma, “Susa* do bangso on dibahen bapakku. Hape holan saotik do huallang madu i, nungnga mulak muse gogokku.* 30 Autsugari ma diloas sude halak on mangallang sipanganon+ na dibuat sian musu ni nasida, tottu unggodang dope halak Palistim na dipamate.”

31 Loja hian do halak Israel di ari i, ai torus do nasida mangalele jala pamatehon halak Palistim mulai sian Mikhmas sahat tu Ayalon.+ 32 Marsigulut ma nasida mambuat akka barang na binuat ni nasida sian musu. Dibuat nasida ma muse biru-biru dohot lombu jala diseat nasida ma i disi. Diallang nasida ma jagal i dohot mudarna.+ 33 Dung i adong ma na paboahon tu si Saul, “Nungnga mardosa be bangso on tu Jahowa, ala nungnga diallang nasida jagal i rap dohot mudarna.”+ Didok si Saul ma, “Dang setia be hamu. Hatop, gulikkon hamu ma tuson batu na balga i.” 34 Didok si Saul ma muse, “Lao ma hamu tu saluhut bangso on, jala dok ma tu nasida, ‘Ganup sian hamu, ikkon diboan do lombu jantanna dohot biru-biruna tuson. Seat ma i di atas ni batu na balga on, baru pe allang hamu. Unang ma allang hamu jagal i dohot mudarna,+ asa unang mardosa hamu tu Jahowa.’” Di borngin i, ganup ma sian nasida mamboan lombu jantanna jala diseat ma i disi. 35 Dipajongjong si Saul ma sada langgatan tu Jahowa.+ Jala on ma langgatan na parjolo na dipajongjong ibana tu Jahowa.

36 Didok si Saul ma muse, “Beta ma hita lao mangalele halak Palistim tikki borngin, jala tabuat ma akka barang ni nasida sahat tu manogot. Unang ma tapasombu adong na malua.” Gabe didok nasida ma, “Ulahon ma na denggan di roha ni tuan.” Alai didok malim ma, “Jolo tasukkun ma tu Debata na sittong dison.”+ 37 Disukkun si Saul ma tu Debata, “Boi do leleonnami halak Palistim?+ Pasahatonmu do nasida tu tangan ni halak Israel?” Alai dang dialusi Debata ibana di ari i. 38 Didok si Saul ma, “Ro ma hamu tuson sude pamimpin ni akka tentara, asa talului manang na dosa aha na diulahon sadari on. 39 Songon pastina Jahowa mangolu,* na paluahon halak Israel, ikkon dipamate do halak na mardosa i, nang pe si Jonatan anakku na mangulahon i.” Alai dang adong na mangalusi ibana. 40 Didok si Saul ma muse tu halak Israel i, “Di bariba i ma hamu jongjong jala si Jonatan dohot au di bariba on ma jongjong.” Didok bangso i ma tu si Saul, “Ulahon ma na denggan di roha ni tuan.”

41 Dung i, didok si Saul ma tu Jahowa, “Ale Debata ni halak Israel, alusi ma hami marhite Tumim* on!”+ Tarpillit ma si Jonatan dohot si Saul, gabe tarboto ma dang marsala akka tentara i. 42 Didok si Saul ma muse, “Bahen ma undi,+ asa taboto ise na mardosa, au do manang anakku si Jonatan.” Jala tarpillit ma si Jonatan. 43 Didok si Saul ma tu si Jonatan, “Paboa ma tu au, aha do na diulahon ho?” Didok si Jonatan ma, “Na huallang do saotik madu na di ujung ni tukkottu.+ Alani i, pamate hamu ma au!”

44 Didok si Saul ma, “Sai borat ma hukumon ni Debata au molo dang mate ho Jonatan.”+ 45 Didok akka tentara i ma tu si Saul, “Na ikkon mate do si Jonatan? Hape ibana do na mambahen monang*+ halak Israel. Dang boi songon i! Songon pastina Jahowa mangolu, na so jadi madabu obukna nanggo sada tu tano. Ai Debata do na mangurupi ibana marporang sadari on.”+ Songon i ma akka tentara i paluahon* si Jonatan, gabe dang jadi ibana dipamate.

46 Dung i, so ma si Saul mangalele halak Palistim jala mulak ma halak Palistim tu huta ni nasida.

47 Ditaluhon si Saul ma sude musu na di sakalilingna. Jala dirajai ibana ma sude luat ni halak Israel. Ditaluhon ibana do halak Moab,+ halak Ammon,+ halak Edom,+ akka raja ni Zoba,+ dohot halak Palistim.+ Tudia pe ibana lao, sai monang do ibana. 48 Garang do ibana marporang jala ditaluhon ibana do halak Amalek.+ Dipalua ibana do halak Israel sian tangan ni sude musu ni nasida.

49 Akka anak ni si Saul, i ma si Jonatan, si Ispi, dohot si Malki-sua.+ Adong do dua boruna, si Merab+ ma na uttua jala si Mikhal ma na upposo.+ 50 Istri ni si Saul, i ma si Ahinoam boru ni si Ahimas. Jala pamimpin ni tentarana, i ma si Abner,+ anak ni si Ner, bapa uda ni si Saul. 51 Si Kis+ do bapak ni si Saul jala si Ner+ do bapak ni si Abner, anak ni si Abiel.

52 Saleleng ngolu ni si Saul, sai marporang do halak Israel mangalo halak Palistim.+ Tikki diida si Saul adong halak na gogo manang na barani, dibahen ibana do halak i gabe tentarana.+