Jeremia
21 Makkatai ma Jahowa tu si Jeremia tikki disuru Raja Sedekia+ si Pashur+ anak ni si Malkia dohot Malim Sepania+ anak ni si Maaseya mandapotton si Jeremia. Songon on ma hata ni raja na pinaboa ni nasida, 2 “Tolong ma jo pangido tu Jahowa tudu-tudu taringot tu hita. Ai naeng ro nama si Nebukadnesar* raja ni Babel marporang mangalo hita.+ Olo do ra bahenon ni Jahowa sada tanda halongangan* asa mundur si Nebukadnesar i sian hita.”+
3 Didok si Jeremia ma tu nasida, “Songon on do na ikkon dokkononmuna tu si Sedekia, 4 ‘Didok Jahowa Debata ni Israel ma, “Adong do di tanganmuna sinjata lao mangalo raja ni Babel+ dohot halak Kasdim naung mengepung kotamuna i. Sinjata na dipakke hamu lao marporang bahenokku ma i mangalo hamu sandiri. Papunguokku ma sudena i di tonga-tonga ni kota. 5 Angkatokku ma tanganku na gogo i dohot huasokku na balga i lao mangalo hamu+ jala di bagasan muruk dohot rimashu na massai balga i ma Au mangalo hamu.+ 6 Pamateonku ma sude pangisi ni kota on, jolma dohot binatang. Mate ma nasida sude alani sahit na masa di godang inganan.”’+
7 “‘Didok Jahowa ma, “Dung masa i, pasahatonku ma akka halak na malua sian sahit, podang, dohot haraparon tu tangan ni raja ni Babel. Pasahatonku ma si Sedekia raja ni Juda, akka parkarejona, dohot sude penduduk ni kota i tu tangan ni si Nebukadnesar* raja ni Babel. Pasahatonku ma nasida tu tangan ni musu ni nasida dohot tu tangan ni akka halak na naeng pamatehon nasida.+ Pamateon ni Raja Nebukadnesar ma nasida mamakke podang. Dang parduli ibana tu nasida, dang manolsoli rohana mangulahon i jala dang asi rohana tu nasida.”’+
8 “Dokkon ma tu bangso i, ‘Songon on do hata ni Jahowa, “Nungnga hulehon tu jolomuna sipilliton, dalan tu hangoluan dohot dalan tu hamatean. 9 Mate ma akka halak na toktong tinggal di kota on, mate ma nasida dibahen podang, haraparon, dohot sahit na masa di godang inganan. Alai ianggo halak na kaluar jala na menyerah tu halak Kasdim na ro mengepung hamu, toktong ma ibana mangolu jala malua ma hosana.”’+
10 “‘“Nungnga hutottuhon di rohakku na so parookku na denggan tu kota on,* alai parookku do jea tu kota on,”+ ninna Jahowa. “Na lao dipasahat ma kota on tu tangan ni raja ni Babel+ jala tutungon ni raja i ma i.”+
11 “‘Hamu akka keluarga ni raja ni Juda, tangihon hamu ma hata ni Jahowa. 12 Hamu akka pinoppar ni si Daud, songon on ma hata ni Jahowa,
“Dalatton hamu ma hukum na tigor ganup manogot.
Urupi hamu ma halak na hona rampok sian pangarampok,+
Asa unang marsigorgor murukku songon api,+
Na torus marsigorgor jala dang adong na boi mangittopi
Alani ulaonmuna na jahat i.”’+
13 Didok Jahowa ma, ‘Hamu akka halak na tinggal di kota,
Kota na adong di dolok batu na di tano na rata, alookku ma hamu.
Ai didok hamu do, “Ise ma na olo turun mangalo hami?
Ise ma na lao ro tu inganannami lao manaluhon hami?”
14 Hukumokku ma hamu
Hombar tu pangalahomuna,’+ ninna Jahowa.
‘Bahenokku ma tartutung tombakmuna,
Jala rarat do apina i manutung sude na adong di sakalilingmuna.’”+