Josua

17 Dung i dibahen ma undi+ lao manottuhon tano parbagianan ni marga Manasse+ anak siakkangan ni si Josep.+ Si Mahir+ do anak siakkangan ni si Manasse. Sahalak tentara do ibana jala ibana do bapak ni si Gilead. Alani i, dilehon ma tu ibana huta Gilead dohot Basan.+ 2 Dilehon do muse tano parbagianan tu satonga sian marga Manasse mangihutton undi, i ma pinoppar ni si Abieser,+ pinoppar ni si Helek, pinoppar ni si Asriel, pinoppar ni si Sikem, pinoppar ni si Heper, dohot pinoppar ni si Semida. On ma akka bawa pinoppar ni si Manasse anak ni si Josep mangihutton keluarga ni nasida.+ 3 Dang adong anak ni si Zelapehat,+ holan akka boruna do na adong. Bapak ni si Zelapehat, i ma si Heper. Bapak ni si Heper, i ma si Gilead. Bapak ni si Gilead, i ma si Mahir. Bapak ni si Mahir, i ma si Manasse. On ma goar ni akka boru ni si Zelapehat: si Mala, si Noak, si Hoglah, si Milka, dohot si Tirza. 4 Alani i, lao ma akka boruna i mandapotton Malim Eleasar,+ si Josua anak ni si Nun, dohot akka pamimpin ni bangso i. Didok nasida ma, “Nungnga diparettahon Jahowa marhite si Musa asa dilehon tano parbagianan tu hami. Jala di tonga-tonga ni tano parbagianan ni keluarganami ma tano i.”+ Dung i dilehon ma tano parbagianan ni nasida di tonga-tonga ni keluarga ni bapak ni nasida, songon na diparettahon Jahowa.+

5 Asing ni tano na di Gilead dohot na di Basan, i ma na di bariba* ni Sunge Jordan, adong do muse sappulu bagian na gabe tano parbagianan ni marga Manasse.+ 6 Ai dilehon do tano parbagianan tu akka borua sian marga Manasse rap dohot akka pinopparna bawa. Jala nungnga dilehon tano Gilead gabe tano parbagianan ni satonga sian marga Manasse.

7 Parbatasan tano parbagianan ni marga Manasse, i ma sian Aser sahat tu Mikhmetat+ na di jolo ni Sikem.+ Sian i torus ma i muse tu selatan* tu huta ni halak En-Tappua. 8 Parbagianan ni marga Manasse do tano Tappua.+ Alai tano Tappua na di parbatasan ni tano marga Manasse, appuna ni marga Epraim do i. 9 Sian i turun ma tu Sunge* Kana na di sabola selatan. Di tonga-tonga ni kota marga Manasse i, adong do piga-piga kota ni marga Epraim.+ Di sabola utara ni sunge i do parbatasan ni kota ni marga Manasse. Jala laut ma ujung ni parbatasan i.+ 10 Dung i tu sabola selatan, i ma tano parbagianan ni marga Epraim. Di sabola utara, i ma tano parbagianan ni marga Manasse. Jala sahat tu laut ma parbatasan ni tano marga Manasse.+ Parbatasan tano ni nasida* di sabola utara, i ma tano parbagianan ni marga Aser. Jala parbatasan parbagianan ni nasida di sabola timur, i ma tano parbagianan ni marga Isasar.

11 Di tano parbagianan ni marga Isasar dohot marga Aser adong do na dilehon tu marga Manasse, i ma Bet-sean dohot akka kota di sakalilingna, Ibleam+ dohot akka kota di sakalilingna, dohot huta ni halak Dor+ dohot akka kota di sakalilingna. Dilehon do muse tu nasida tolu huta di inganan na mardolok-dolok, i ma huta ni halak En-dor+ dohot akka kota di sakalilingna, huta ni halak Taanak+ dohot akka kota di sakalilingna, huta ni halak Megiddo dohot akka kota di sakalilingna.

12 Alai dang boi ditaluhon halak Manasse akka kota i, toktong do dijugulhon halak Kanaan maringanan disi.+ 13 Dung lam gogo halak Israel, dang dipalao nasida sude halak Kanaan sian i.+ Dipaksa nasida do halak Kanaan i gabe hatoban.+

14 Ro ma pinoppar ni si Josep mandok tu si Josua, “Boasa holan sada bagian+ dilehon ho gabe tano parbagianannami?* Hape massai godang do hami. Ai dipasu-pasu Jahowa do hami sahat tu saonari.”+ 15 Dialusi si Josua ma nasida, “Molo nungnga godang hamu, lao ma hamu tu tombak na di huta ni halak Perisi+ dohot halak Repaim.+ Paias hamu ma i asa disi hamu maringanan. Ai dang siat be hamu di huta na mardolok-dolok di Epraim.”+ 16 Dung i didok pinoppar ni si Josep ma muse, “Dang siat be hami di inganan na mardolok-dolok i. Asing ni i, adong do kareta porang+ ni sude halak Kanaan na maringanan di rura, i ma halak na di Bet-sean,+ di akka kota sakalilingna, dohot na di Jisreel.+ Jala mamakke sasabi na ganjang do kareta porang* ni nasida i.” 17 Dung i, didok si Josua ma tu marga Epraim dohot tu marga Manasse, i ma pinoppar ni si Josep, “Godang do hamu jala massai gogo. Alani i, dang holan sada bagian na lao jaloonmuna.+ 18 Dohot do sude inganan na mardolok-dolok gabe appunamuna.+ Nang pe tombak dope i saonari, paias hamu ma i asa gabe parbatasan ni tanomuna i. Palao hamu ma halak Kanaan nang pe mamakke sasabi na ganjang kareta porang* ni nasida.”+