Ulaon ni Apostel

11 Dibege akka apostel dohot akka dongan sahaporseaon na di Judea ma naung dohot akka halak sian bangso na asing manjalo hata ni Debata. 2 Tikki ro si Petrus tu Jerusalem, muruk ma tu ibana akka halak na mangihutton patik taringot tu sunat.+ 3 Didok ma tu si Petrus, “Masuk do ho attong tu jabu ni na so marsunat jala mangan do ho rap dohot nasida.” 4 Alani i, dipatorang si Petrus ma sude na masa i tu nasida. Ninna ma,

5 “Tikki martangiang au di Joppe, mandapot parnidaan ma au. Huida ma adong na songon kain linen na bidang turun sian langit. Herbang do kain i turun tu jolokku.+ 6 Tikki hupareso manang aha isina, huida ma disi akka binatang siopat pat, binatang liar, binatang na mangissir, dohot akka pidong. 7 Dung i hubege ma muse soara na mandok tu au, ‘Jongjong ma ho Petrus, seat ma akka binatang i, jala allang ma!’ 8 Alai nikku ma, ‘Dang olo au Tuan! Ai dang hea dope huallang sipanganon na ramun* dohot na so diloas allangon mangihutton patik.’ 9 Alai tarbege ma muse soara i mandok, ‘Molo dung didok Debata ias, dang boi be dohononmu i ramun.’ 10 Tolu hali ma mulak-ulak masa songon i, dung i tarangkat ma muse kain i tu langit. 11 Laos di tikki i, ro ma tolu halak bawa tu jabu inganannami marborngin i. Na disuru do nasida ro sian Kaesarea manjuppangi au.+ 12 Dung i dipaboa ma tu au marhite tondi parbadia asa unang pola ragu au lao mangihutton nasida. Rap borhat do au dohot dongan sahaporseaon na onom on jala masuk tu jabu ni bawa i.

13 “Dipaboa bawa i ma tu hami, naung diida ibana jongjong suru-suruan di jabuna. Didok ma tu ibana, ‘Suru ma halak tu Joppe mangalap si Simon na digoari si Petrus.+ 14 Paboaonna ma tu ho dohot tu sude keluargam songon dia carana asa boi hamu malua.’ 15 Alai tikki mulai makkatai dope au tu nasida, mandapot tondi parbadia ma nasida, songon na masa tu hita di mulana i.+ 16 Gabe huingot ma hata ni Tuan na mandok, ‘Aek do dididihon si Johannes tu hamu,+ alai didihonokku ma tu hamu tondi parbadia.’+ 17 Alani i, tung margogo ma au mangabbati Debata?+ Ai nungnga dilehon Ibana silehon-lehon songon naung dilehon tu hita, akka na porsea tu Tuan Jesus Kristus.”

18 Dung dibege nasida i, gabe hohom ma nasida. Dipuji ma Debata, ninna ma, “Dilehon Debata do hape tikki tu akka bangso na asing asa muba nasida jala mandapot hangoluan.”+

19 Dung dibunu si Stepanus, dibahen ma akka na haccit tu akka sisean. Gabe marserak+ ma nasida tu Penisia, tu Siprus, dohot tu Antiokia. Alai holan tu halak Jahudi+ do dipaboa nasida hata ni Debata. 20 Nang pe songon i, adong do akka sisean na sian Siprus dohot Kirene na ro tu Antiokia. Dibaritahon nasida ma barita na uli taringot tu Tuan Jesus tu halak na marbahasa Junani. 21 Diurupi Jahowa* do nasida, gabe lam godang ma halak na porsea jala diihutton nasida ma Tuan i.+

22 Sahat ma barita taringot nasida tu huria na di Jerusalem. Gabe disuru nasida ma si Barnabas+ lao tu Antiokia. 23 Dung sahat ibana disi, diida ibana ma songon dia Debata mangalehon asi ni rohana na massai balga i tu akka dongan na disi. Gabe las ma rohana jala dipatogu ibana ma roha ni nasida sude, asa toktong nasida setia tu Tuan i sian nasa roha.+ 24 Halak na burju do si Barnabas, togu do haporseaonna, jala digohi tondi parbadia do ibana. Alani i, lam godang ma halak na tamba gabe sisean ni Tuan i.+ 25 Dung i borhat ma si Barnabas tu Tarsus jala dilului ibana ma si Saulus+ di sude inganan. 26 Dung juppangna si Saulus, diboan ma ibana tu Antiokia. Saleleng sataon ma nasida rap dohot huria na disi, jala godang do halak diajari nasida. Marhite tudu-tudu na sian Debata, di Antiokia ma parjolo sahali akka sisean i digoari Kristen.+

27 Di tikki i, ro ma akka panurirang*+ sian Jerusalem tu Antiokia. 28 Adong do sian nasida na margoar si Agabus.+ Marhite panogu-noguon ni tondi parbadia, disurirangkon ibana ma na lao masa haraparon di liat portibi on.+ Jala tutu do i masa di tikki pamarettaon ni si Klaudius. 29 Dung i, sapandapot ma akka sisean papunguhon silehon-lehon sesuai tu na tarbahen ni nasida+ be lao mangurupi+ akka dongan na di Judea. 30 Dung dipapungu nasida i, dilehon ma i tu akka sintua marhite si Barnabas dohot si Saulus.+