Dilehon Jahowa do Gogo tu si Simson

Ala godang halak Israel na manomba patung, dipasombu Jahowa ma halak Palistim mangarajai nasida. Alai adong do halak Israel na torus manomba Jahowa. Sada sian i, i ma si Manoa. Dang adong dope gellengna. Di sada tikki, disuru Jahowa ma malaikat manjuppangi istrina. Didok malaikat i ma, ‘Satokkin nai, adong nama anakmu. Ibana ma na lao menyelamatton bangso Israel sian halak Palistim. Gabe halak Nasir ma ibana.’ Diboto ho do aha halak Nasir i? Halak Nasir, i ma halak na mandapot tugas na spesial sian Debata. Dang boi dipangkas halak Nasir obukna.

Dapot ma tikkina, tubu ma anak ni si Manoa. Dibahen ma goarna si Simson. Dung lam balga si Simson, dilehon Jahowa ma gogo tu ibana. Boi do dipamate ibana singa. Hea do dibunu ibana 30 halak Palistim. Gabe sogo ma roha ni halak Palistim jala naeng dipamate ma ibana. Sada tikki, marborngin ma ibana di Gasa. Ro ma halak Palistim marpungu di gerbang ni kota i. Dipaima nasida ma sahat tu manogot lao pamatehon si Simson. Alai di tonga borngin, dungo ma si Simson. Lao ma ibana tu gerbang ni kota i. Dicabut ma gerbang i jala diangkat. Diboan ibana ma i tu pussu ni dolok di jonok ni huta Hebron!

Di sada tikki, dijuppangi halak Palistim ma si Delila, hallet ni si Simson. Didok ma tu si Delila, ‘Dilehon hami pe tu ho godang hepeng molo boi diboto ho aha na mambahen si Simson gabe gogo. Naeng ditakkup hami do ibana jala dipenjarahon.’ Dioloi si Delila do hata ni nasida i ala lomo rohana godang hepengna. Di mulana, dang olo si Simson paboahon boasa massai gogo ibana. Alai torus do disukkuni si Delila ibana. Ujungna didok si Simson ma, ‘Dang hea dipangkas obukku ala halak Nasir do au. Gabe mago do gogokku molo dipangkas obukku.’ Dibahen si Simson do keputusan na sala ala dipaboa ibana rahasiana tu si Delila.

Dung i hatop ma dijuppangi si Delila halak Palistim, jala didok ma, ‘Nungnga huboto be rahasiana!’ Tikki modom si Simson di abinganna, disuru ma halak mamangkas obukna. Dung i, gogo ma soara ni si Delila mandok, ‘Simson, nungnga ro halak Palistim!’ Dungo ma si Simson, alai dang margogo be ibana. Ditakkup halak Palistim ma ibana, dicongkel ma matana, jala dipenjarahon.

Di sada tikki, marpungu ma marribu halak Palistim di sada kuil. Disi do nasida manomba Dagon, debata ni nasida. Didok nasida ma, ‘Nungnga dilehon debatatta si Simson tu hita! Boan ma si Simson i tuson! Asa taparekkeli ibana.’ Dipajongjong ma ibana di jonok ni dua tiang ni bangunan i jala sai diejek nasida do ibana. Dung i martangiang ma si Simson, ninna ma, ‘Ale Jahowa, lehon ma tu au gogo sahali on pe.’ Di tikki i, nungnga ganjang be muse obuk ni si Simson. Dionjar ibana ma dua tiang i sagogo ni gogona. Maruppak ma bangunan i, mate ma sude halak di inganan i, termasuk ma si Simson.