Panglima Tentara Dohot Sahalak Dakdanak Borua

Di Siria, adong sahalak dakdanak borua na dao sian natua-tuana. Dibuat tentara ni Siria do ibana sian keluargana. Jala dibahen ma ibana gabe pelayan ni istri ni sahalak panglima tentara na margoar si Naaman. Jahowa do na disomba dakdanak on, nang pe halak na di sakalilingna dang manomba Jahowa.

Marsahit kusta ma si Naaman, jala massai haccit do dihilala ibana. Lomo roha ni dakdanak on naeng mangurupi si Naaman. Didok ma tu istri ni si Naaman, ‘Adong do na huboto na boi pamaluppon tuan i. Adong sahalak nabi ni Jahowa di Israel na margoar si Elisa. Boi do dipamalum ibana tuan i.’

Dipaboa istri ni si Naaman ma i tu suamina. Dioloi si Naaman ma i. Lao ma ibana tu Israel tu jabu ni si Elisa. Dirippu si Naaman, denggan do ibana disambut si Elisa. Hape, holan pelayanna do disuru si Elisa mandok tu si Naaman, ‘Lao ma ho tu Sunge Jordan jala maridi ma ho sappe pitu hali. Malum do i.’

Gabe kecewa ma si Naaman. Didok ma, ‘Hurippu do jouonna goar ni Debatana i huhut manjama dagingku lao pamaluppon au. Hape maridi do au disuru tu sunge di Israel. Boasa pola ikkon tusi au disuru? Godang do sunge na dumenggan di Siria.’ Muruk ma si Naaman jala lao ma ibana sian jabu ni si Elisa.

Didokkon parkarejona ma tu si Naaman asa dioloi hata ni si Elisa. Didok nasida, ‘Dang lomo roham naeng malum? Dang maol i ulahononmu. Coba ma jo Tuan.’ Gabe olo ma si Naaman. Lao ma nasida tu Sunge Jordan jala maridi ma ibana sappe pitu hali. Dung maridi, pittor malum ma sahitna i. Las hian ma rohana. Dung i, lao ma ibana mandok mauliate tu si Elisa. Didok ma, ‘Saonari huboto ma, Jahowa do Debata na sittong.’ Diboto ho do songon dia perasaan ni dakdanak borua i dung mulak si Naaman jala nungnga malum?