Januari

Alana hita saonari mangolu di tingki parpudi. Lam jahat do angka halak. Jala lam godang do nasida “songon duhutduhut”. (Ps. 92:8) Alani i, didok si Paulus do tu halak Kristen, “Dakdanak ma hamu taringot tu na roa, alai matoras ma hamu marparrohaon!” (1 Kor. 14:20) Jadi songon dia hita mangulahon i? Boi tadapot alusna di ayat sadari on na mandok, “Alai anggo halak na mangalului Jahowa [mangantusi] saluhutna i.” Lapatanna, boi ma nasida mangantusi manang aha na dihaporluhon laho palashon roha ni Jahowa. Dipaboa do muse di Poda 2:6-9, dilehon Jahowa do bisuk tu angka halak na laho mangulahon na sintong. Alani i, gabe diantusi nasida ma “hatigoran dohot uhum, ro di ruhut hasintongan, sandok pangalaho na denggan i tahe”. Didapot si Noak, si Daniel, dohot si Job do bisuk sian Debata. (Hes. 14:14) Suang songon i ma naposo ni Debata saonari. Songon i do hamu? Didapot hamu do bisuk na sian Debata? Asa boi diantusi hamu saluhutna laho palashon roha ni Jahowa, ingkon tangkas do ditanda hamu Ibana. w18.02 9-10 ¶1-3

Ndang boi tapaksa ianakhonta manang parsiajar Bibelta asa tardidi. Jahowa pe ndang olo mamaksa halak asa manomba Ibana. (1 Joh. 4:8) Jadi tingki mangajari halak, ingkon taurupi do nasida mangantusi mansai ringkot do patoguhon parale-aleon tu Jahowa. Dung i, gabe diargai ibana ma hasintongan taringot Debata jala lomo rohana mangulahon na ingkon diulahon halak Kristen. Molo nunga dihilala ibana i sude, gabe taronjar ma rohana asa tardidi. (2 Kor. 5:14, 15) Ndang ditontuhon ingkon sadia umurna asa boi tardidi. Alana ndang sarupa hamajuon ni sude parsiajar Bibel. Ari na parohon las ni roha do di halak Kristen tingki tardidi nasida. Di tingki i ma hita tangkas mangarimangi, aha lapatan ni mangalehon diri jala tardidi. Ingkon marsitutu do hita asa hombar parniulaonta tu sude na ingkon diulahon halak Kristen. Angka sisean ni Jesus “ndang be mangolu di dirina sandiri alai di Kristus naung mate i do jala naung hehe”.​—2 Kor. 5:15, Bibel siganup ari; Mat. 16:24. w18.03 7-8 ¶14-17

Hea do hira na maol dihilala hamu laho manamue? Molo songon i do pangkilalaanmuna, boi do gabe maol hamu mandapot las ni roha jala mandapot parale-aleon na manongtong. Manamue do sada cara na dumenggan asa unang gabe lungun-lungunan hita. Jadi, aha do na mambahen sasahalak gabe maol manamue? Adong do piga-piga alana. Na parjolo, i ma godang do ulaon dohot tanggung jawab ni naposo ni Debata. Ra, piga-piga mangkilala ndang tolap nasida ala ndang adong tingki laho manamue. Molo songon i do na dihilala hamu, atur ma tingkimuna asa boi manamue angka dongan. Ringkot do on, alana dijujui Bibel do hita asa lomo rohanta manamue. Jadi, dipujihon do molo olo hita manamue. Alai asa boi mangulahon i, orui hamu ma angka ulaon na so pola ringkot. w18.03 18 ¶13-14

Jesus ma sitiruon na dumenggan taringot halak na jonok tu Debata. Tingki mangolu ibana di tano on, sai diihuthon ibana do Bapakna. Pingkiranna, pangkilalaanna, dohot ulaonna dos songon Jahowa. Sai diulahon ibana do sangkap ni Debata, jala diargai do uhumNa. (Joh. 8:29; 14:9; 15:10) Sian dia do i taboto? Taida ma na disurathon si Jesaya taringot asi ni roha ni Jahowa, dohot na disurat si Markus taringot pangkilalaan ni Jesus. (Jes. 63:9; Mrk. 6:34) Olo do hita maniru Jesus na tongtong patuduhon asi ni roha jala mangurupi na asing? Songon Jesus, marsitutu do hita marbarita na uli dohot mangajari halak? Halak na jonok tu Debata, lomo do rohana patuduhon asi ni roha jala mangurupi na asing. w18.02 20 ¶12

Mansai maol do pagodang-godangkon ianakhon di tingkinta saonari. (2 Tim. 3:1-5) Alana disi tubu ianakhonmuna, ndang pintor diboto ibana dia na sala dohot na sintong. Jala panggora ni rohana ndang tarlatik dope. Alani i, porlu do nasida dipasingot asa tarlatik panggora ni rohana mamboto dia na sala dohot na sintong. (Rom 2:14, 15) Sahalak pakar Alkitab mandok, hata Junani na diterjemahon gabe “sipasingot”, boi do lapatanna “mangajari ianakhon”, manang pagodang-godangkon ianakhon asa gabe halak na martanggungjawab. Molo mardonganhon holong do natua-tua pasingothon ianakhonna, dame ma pangkilalaan ni ianakhonna. Gabe diantusi ianakhonna ma ndang sude na dihalomohon nasida boi diulahon. Alana aha na taulahon mangkorhon do i tu ngolunta. Jadi, ringkot do molo natua-tua mangasahon bisuk sian Jahowa laho pagodang-godangkon ianakhon nasida. Di ganup inganan, marasing-asing do cara ni halak pagodang-godangkon ianakhonna, jala asing do cara ni halak najolo dohot tu halak saonari. Alai, molo ditangihon natua-tua do Hata ni Debata, ndang be lilu nasida taringot aha na ingkon diulahon. Jala nasida pe ndang holan mangasahon pengalaman ni angka halak. w18.03 29-30 ¶8-9

Ndang natua-tuam na martanggung jawab tu haporseaonmu. Nang pe ho tading rap dohot natua-tuam, alai tanggung jawabmuna do taringot haporseaonmu. Boasa i ringkot diingot ho? Ndang adong nanggo sada pe sian hita na mamboto songon dia haporseaonta diuji di ari na naeng ro. Olo do ho tompu lungun-lungunan manang tompu muruk jala tamba ma sipingkiran. Sahalak borua remaja mandok, “Di roha ni angka dakdanak naung tardidi, ndang pola soal molo ndang mandapot kue ulang tahun di singkola. Alai dung remaja, ala lam balga ela-ela manang godaan laho mangulahon seks, porlu do dipapos rohana, sai parohon na denggan do molo mangihuthon patik ni Jahowa.” Sude do angka naposo ni Jahowa naung tardidi ingkon mangadopi ela-ela. Boi do i ro sian parsaripeon, sahit, manang parkarejoan. Alani i, manang aha pe na masa, sude naposo ni Jahowa porlu marhaporseaon.​—Jak. 1:12-14. w17.12 22 ¶4-5

Ndang godang halak na marsitaonon songon si Daud. Nang pe songon i, ndang gabe marrimas ibana. Didok si Daud, “Otapi rimas jala tadingkon mohopmohop; unang sai hamohophon tu roham, ai laho tu najat do i.” (Ps. 37:8) Na maniru Jahowa do hita molo tapadao rimas, manang ndang muruk. Songon Jahowa, olo do Ibana manalpuhon dosanta. “Ndang dibahen tu hita hombar tu angka dosanta”. (Ps. 103:10) Adong do labana molo ndang muruk hita. Alai, molo muruk do hita, boi do gabe darah tinggion, sesak napas ma hita, jala mura-mura ma hansit butuha. Jala molo muruk hita, ndang denggan caranta marpingkir. Olo do gabe hansit roha ni halak alani hatanta manang pambahenanta. Didok Bibel, “Ngolu tu pamatang do roha halambohon.” (Poda 14:30) Alani i, ingkon lambok ma hita. Molo songon i, aha do na boi taulahon molo hansit rohanta dibahen donganta? Jala songon dia do caranta asa boi mardame? Tapangke ma poda na sian Bibel asa marbisuk. w18.01 6-7 ¶14-15

Didok si Daud pe songon i, ndang na mandok ndang boi mate jala ndang di bagasan kuburan ibana. Alai, tangkas do didok hata ni Debata, molo si Daud gabe matua jala mate, “gabe top dohot angka ompuna, jala tartanom di huta ni si Daud”. (1 Raj. 2:1, 10) Jadi, ise do na nidokna di ayat on? Dipatorang si Petrus do ise na didok di Psalmen 16:10, dung piga-piga minggu Jesus mate jala dipahehe. (Ul. 2:29-32) Didok do muse tu nasida molo si Daud nunga mate jala nunga ditanom. Ndang adong disurat di Bibel, molo nasida ndang satolop tu si Petrus tingki didok ibana si Daud na ‘sian pamotoanna hian dihatahon ibana disi haheheon ni’ Messias. Tangkas do dipatorang si Petrus hata ni si Daud na disurat di Psalmen 110:1. (Ul. 2:33-36) Jala hatorangan ni si Petrus mangurupi godang halak porsea, Jesus do na gabe ‘Tuan jala Messias’. Diantusi angka halak do molo Psalmen 16:10 digohi tingki Jesus dipahehe sian hamatean. w17.12 12 ¶10-12

Marbisuk do Punguan Na Mangaradoti Organisasi laho mamangke angka sumbangan na talehon. (Mat. 24:45) Martangiang do nasida jala manat do tingki mambahen haputusan laho mamangke sumbangan i. (Luk. 14:28) Asing ni i, dipapungu apostel Paulus do hepeng laho mangurupi angka dongan na di Judea. Dipastihon do ise na pasahathon hepeng i. Dipingkirhon nasida do “na patut ingoton di jolo ni Tuhan i, nang di jolo ni jolma”. (2 Kor. 8:18-21) Saonari, ditiru organisasinta do si Esra dohot si Paulus na marbisuk mamangke sumbangan. (Esr. 8:24-33) Godang do ulaon ni organisasi ni Jahowa di tingki parpudi on. Asa marbisuk mamangke sumbangan na dilehon, marragam do cara dibahen laho mangatur parhepengon. w18.01 18 ¶12-13

Tingki adong na mambahen hansit rohanta, taingot ma, hita pe hea do mambahen hansit roha ni donganta. Olo do nasida manalpuhon hasalaanta. Mandok mauliate do hita alani holong dohot haburjuon ni nasida! (Pjm. 7:21, 22) Dipasada Kristus do hita dohot angka dongan na manomba Jahowa. Alani i, mandok mauliate ma hita. Dos do Debata na tasomba, dos do barita na tapasahat, jala dos do hasusaan na taadopi. Molo tapatudu holong dohot haburjuon, jala olo hita manesa hasalaan ni angka dongan, gabe marsada ma huria. Jala, boi ma tongtong taingot upa na sian Debata. Molo adong roha mangiburu di hita, boi do gabe ndang dapotta upa sian Debata. Dipatorang do di Bibel, songon dia roha mangiburu boi parohon jea. Umpamana, gabe dibunu si Kain do anggina, i ma si Abel ala mangiburu. Gabe mangalo do Si Kora, si Datan, dohot si Abiram tu si Musa ala mangiburu. Jala, gabe naeng dipamate Raja Saul do si Daud ala mangiburu. w17.11 29 ¶9-10

Tingki gabe anggota panitia pengadilan, ingkon manat do angka sintua manulingkiti, tutu do naung marhamubaon halak na marsala i manang ndang. Ndang sai mura mangulahon on. Sasahalak didok marhamubaon molo disolsoli ibana hasalaanna i. (Pgk. 3:3) Ingkon marhamubaon do sasahalak asa boi dapotan asi ni roha. Diboto Jahowa dohot Jesus do pingkiran dohot pangkilalaan ni sasahalak. Ala siboto roha do nasida. Alai, ndang siboto roha angka sintua. Alani i, songon dia do angka sintua mamboto, na tutu do sasahalak naung marhamubaon? Parjolo, pangido ma bisuk dohot pangantusion sian Jahowa. (1 Raj. 3:9) Na paduahon, pangke ma Bibel dohot publikasinta laho mangurupi hamu mangida imbar ni “arsak ni roha ni portibi” dohot “arsak ni roha, na sian Debata” manang hamubaon na sasintongna. (2 Kor. 7:10, 11) Ida ma songon dia Bibel patorangkon taringot halak na marhamubaon dohot na so marhamubaon. Parrohahon ma songon dia pangkilalaanna, pingkiranna, dohot parniulaonna. w17.11 19-20 ¶16-17

Saonari, godang do angka film, buku, dohot acara tv na patuduhon ndang sala molo marparange sisongon i. Sasintongna, on boi mambahen keluarga gabe sursar. Sian najolo, nunga leleng diboto halak taringot on. Umpamana, najolo di halak Junani molo adong ianakhonna na mamungkul natua-tuana boi do diusir ibana sian hutana. Alai di halak Rom, molo sasahalak mangulahon sisongon i, sarupa do uhum tu ibana dohot uhum tu sahalak pambunu. Disurat do di Bibel molo dakdanak ingkon mamparsangapi natua-tuana. (2 Mus. 20:12; Eps. 6:1-3) Aha do na mangurupi dakdanak asa unduk tu natua-tuana, nang pe saonari nunga godang na so unduk be? Molo sai diingot nasida angka na denggan na dibahen natua-tuana, tontu gabe taronjar do rohana asa mangargai jala unduk. Porlu do nasida mangantusi, dihalomohon Jahowa do asa nasida mangoloi natorasna. Tingki sahalak na poso paboahon haburjuon ni natua-tuana, on mangurupi angka na poso na asing asa mangargai natua-tuana. w18.01 29 ¶8-9

Saonari, molo adong dosa na balga na taulahon ingkon tajumpangi do angka sintua. Asa boi hita marale-ale muse tu Jahowa. Boasa i ringkot? Na parjolo, ala i do na nidok ni Jahowa. Ingkon sintua do na mangurupi halak na mangulahon dosa na balga. (Jak. 5:14-16) Na paduahon, asa boi na mardosa i mulak tu Jahowa, jala ndang be mangulahon na sala. I do na tinuju ni angka sintua. (Gal. 6:1; Heb. 12:11) Na patoluhon, nunga dilehon tanggung jawab tu angka sintua jala dilatik do nasida laho mangurupi halak na marhamubaon asa unang sai marsak be alani hasalaan i. Didok Jahowa do angka sintua songon “partabunian sian habahaba.” (Jes. 32:2, Bibel siganup ari) On ma sada cara ni Jahowa patuduhon asi ni roha tu hita. Godangan naposo ni Debata paboahon, lumbang do pangkilalaan molo dung mangkatai dohot angka sintua. w17.11 11 ¶8-9

Ingkon marsitutu do hita asa unang marsaor dohot keluarga na dipecat marhite telepon, sms, surat, manang internet. Ndang mura mangulahon i. Alai tongtong ma mangkirim! Saluhutna do “dihirimi” holong. Alani i, mangkirim ma hita asa mulak halak na tahaholongi i tu Debata Jahowa. (1 Kor. 13:7) Molo taida adong hamubaonna, tatangiangkon ma asa tongtong ibana togu jala manjangkon hata ni Jahowa na mandok, “Sai mulak ma ho tu ahu.” (Jes. 44:22) Jesus paboahon, ingkon umholong do rohanta tu ibana sian tu sude halak. Pos do roha ni Jesus, boi do togu siseanna nang pe adong paraloan sian keluarga. Alani i, molo adong keluarganta na marsogo ni roha tu hita alani hasintongan, tapangasahon ma Jahowa. Pangido ma pangurupionNa asa boi tongtong martahan. (Jes. 41:10, 13) Las do roha ni Jahowa dohot Jesus molo marsihohot hamu. Jala lehonon ni nasida ma pasu-pasu tu hamu. w17.10 14 ¶19-21

Asi do roha tu na marsahit dohot tu na matua. Jala tatangiangkon do asa ro Harajaon ni Debata jala ndang adong be angka na marsahit dohot na matua. Alai andorang so ro i, ingkon taurupi do nasida. Parohahon ma na masa tu sahalak pengarang buku. Ibana paboahon, nunga matua omakna jala pikun. Sada tingki dikotori omakna ma bajuna sandiri. Tingki laho paiashon bajuna i, ro ma dua halak Sitindangi Ni Jahowa na jotjot manjumpangi omakna. Diurupi nasida ma omakna i paiashon bajuna i. Dung i, dibahen nasida ma tes jala rap hundul mangkata-hatai dohot omakna i. Mandok mauliate do anakna i tu nasida. Jala didok ma, “Diulahon nasida do angka na niajarhon ni nasida i.” Songon dia molo hita? Asi do rohanta mida halak na marsahit dohot na matua? Olo do hamu mangurupi nasida nasa tolapmuna?​—Plp. 2:3, 4. w17.09 10 ¶5; 13-14 ¶14

Tapatudu ma holong jala taulahon ma na denggan tu donganta, nang pe ndang adong halak na mangida jala mamboto i. (Mat. 6:1-4) Hita pe ingkon mangargai angka dongan. (Rom 12:10) Diargai Jesus do angka apostelna. Olo do Jesus mamburi patnasida. (Joh. 13:3-5, 12-15) Tingki i, ndang apala tangkas diantusi angka apostel i na binahen ni Jesus. Dung pe ro tondi parbadia tu nasida, diantusi nasida ma lapatan ni na binahen ni Jesus i. (Joh. 13:7) Hita pe taargai ma donganta. Marsitutu ma hita asa boi marserep ni roha jala marhobas songon Jesus. Unang ma didok rohanta, dumenggan hita sian na asing. Ra ala umtimbo singkolanta, ala gumodang hepengta, manang ala dilehon tanggung jawab na sumurung tu hita. (Rom 12:3) Jala unang ma mangiburu hita tingki adong donganta na dipuji. Marlas ni roha ma hita dohot nasida, nang pe didok rohanta hita pe patut do dipuji. w17.10 5-6 ¶9-10

Sian pengalaman ni angka dongan, balga do pangkorhonna molo tajahahon Bibel tingki marbarita. Umpamana songon na masa tu sahalak donganta baoa. Saleleng martaon-taon jotjot do ibana mangalehon sijahaon tu sahalak baoa naung matua. Alai sada tingki, andorang so mangalehon Joujou Paboahon dijahahon ibana ma 2 Korint 1:3, 4. Ayat i mandok, “Ama Parasiroha situtu jala Debata, Sipangapul na sumurung! Ai diapul do hami di bagasan saluhut haporsuhonnami.” Mansai hona do ayat on tu roha ni parjabu i. Jala disuru ma donganta i asa manjahahon ayat i muse. Dung i, dipaboa ma na porlu do ibana dohot tungganeboruna diapuli saonari. Alani ayat i gabe lomo ma rohana marsiajar Bibel. Tangkas ma, balga do pangkorhonna molo tapangke Bibel tingki marbarita!​—Ul. 19:20. w17.09 23-24 ¶9-10

Ra, olo do tarsonggot manang muruk suru-suruan ni Debata na marsihohot alani hata ni Sibolis. Alai ndang songon i Jahowa, sintong do dibahen alusNa tu Sibolis. Lambat tarrimas do Jahowa jala tigor do Ibana maradophon Sibolis. (2 Mus. 34:6; Job 2:2-6) Sian dia taboto? Dilehon Jahowa do tingki, asa unang adong na mate. Ai lomo do rohaNa asa “saluhutna [halak] sahat tu hamubaon ni roha”. (2 Ptr. 3:9) Sian cara ni Jahowa, taboto ma ingkon manat do tapingkiri aha na laho tahatahon manang taulahon. Alani i, manat ma pingkiri andorang so tabahen haputusan na ringkot. Pangido ma bisuk sian Debata asa boi mangkatahon manang mangulahon na sintong. (Ps. 141:3) Maol do hita mangorom diri tingki muruk manang jut rohanta. I do alana, godang do halak na manolsoli hata dohot pambahenanna.​—Poda 14:29; 15:28; 19:2. w17.09 4-5 ¶6-7

Na laho gabe raja do si Josua, Sintua ni Malim i? Daong. Ndang pinompar ni si Daud ibana, jadi ndang marhak ibana gabe raja. Tingki dilehon tumpal i tu ibana, on manggombarhon na laho masa di ari na naeng ro. Adong sasahalak na digoari Tumbur manang Tunas na laho gabe raja jala malim. Bibel paboahon, Jesus Kristus do Tunas i. (Jes. 11:1; Mat. 2:23) Jesus ma na didok Raja jala Sintua ni Malim. Ibana do na manguluhon tentara ni Jahowa, i ma angka suru-suruan. Linggomanna ma angka naposo ni Debata asa mangkilala hadameon nang pe mangolu di portibi na jahat. (Jer. 23:5, 6) Satongkin nai, taluhononna ma sude angka bangso jala linggomanna ma naposo ni Jahowa. (Pgk. 17:12-14; 19:11, 14, 15) Alai saonari, adong do ulaon na ringkot na ingkon ulahonon ni Jesus manang Tunas i. w17.10 24-25 ¶12-14

Aha do na laho diulahon hamu molo nunga kotor jala bau pangkeanmuna? Tontu pintor hatop do ditanggalhon hamu i. Dos songon i ma, molo nunga taboto na taulahon i mambahen hansit roha ni Jahowa, pintor tabahen ma hamubaon. Tingki mangkatai taringot ulaon na sala, didok si Paulus do, “Bolongkon hamu ma saluhutna i.” Sada sian i, i ma parmainanon. (Kol. 3:5-9) Di Bibel na didok “parmainanon”, i ma hubungan seks na diulahon sasahalak tu na so dongan saripena. Si Paulus mandok ingkon ‘bunuon’ ni halak Kristen do ruas ni daging nasida na boi mambahen nasida mangulahon parmainanon. Lapatanna ingkon marsitutu do hita laho mambolongkon giot-giot na sala. Maol do mangulahon on, alai boi do hita marhasil! w17.08 16-17 ¶5-6

Marsitaonon do panurirang Mika dos songon hita. Mangolu di tingki pamarentaon ni Raja Ahas do ibana. Mansai roa do pangalaho ni si Ahas. Alani i, mansai godang ma hajahaton di luat i. Songon na dipatorang di Bibel, “girgir do tangannasida mangulahon na roa”. (Mik. 7:1-3) Diboto si Mika do na so boi paubaonna situasi i. Molo songon haporseaon ni si Mika do haporseaonta, rade do hita paimahon Jahowa. Ndang songon halak na di penjara, na paimahon laho diuhum. Na tarpaksa do ibana paimahon, jala ndang adong pangkirimonna. Alai molo hita, rade do hita paimahon Jahowa! Ala taboto, gohan ni Jahowa do janjiNa di tingki na pas, i ma mangalehon ngolu na saleleng ni lelengna tu hita! Alani i, gabe sabar ma hita jala martahan “mardongan las ni roha”. (Kol. 1:11, 12) Huhut paimahon, unang ma marungut-ungut hita ala didok rohanta hurang hatop Jahowa manggohi janjiNa. Ndang las roha ni Jahowa molo songon i hita.​—Kol. 3:12. w17.08 4-5 ¶6-7

Songon dia do asa marlaba pangurupion ni Jahowa tu hita? Ingkon togu do parale-aleonta tu Ibana. Alani i, ingkon unduk do rohanta. (Sep. 2:3) Halak na unduk roha mangasahon Jahowa na laho manalpuhon sude hajahaton dohot sitaonon. Lomo do roha ni Jahowa tu halak sisongon i. ‘Dipatungki tu tano do ianggo angka parjahat i’ bahenon ni Debata. (Ps. 147:6b) Ndang lomo rohanta masa i tu hita! Lomo do rohanta asa tongtong dipatudu Jahowa holongNa tu hita. Alani i, tahagigihon ma na dihagigihon Ibana. (Ps. 97:10) Ingkon tahagigihon do ulaon na rorang. Lapatanna, ingkon tapasiding do angka na boi mangela-ela hita laho mangulahon i, songon pornografi. (Ps. 119:37; Mat. 5:28) Ra maol do mangulahon i, alai molo marsitutu hita, pasu-pasuon ni Jahowa ma hita. Ndang boi holan mangasahon dirinta sandiri. Tapangido ma pangurupion ni Jahowa. w17.07 18-19 ¶11-13

Hita pe boi do tapangke artanta laho mangurupi di ulaon marbarita. Nang pe hita ndang dohot tu dinas sepenuh waktu manang pinda tu inganan na mangkaporluhon pangurupion, alai boi do hita mangurupi na asing. Umpamana, marlaba do sumbangan na talehon laho mambahen buku jala mangurupi ulaon marbarita di inganan na mansai pogos, na godang halak naeng mananda hasintongan. Songon di negara Kongo, Madagaskar, dohot Rwanda, arga situtu do Bibel. Sipata, dos do arga ni sada Bibel tu gaji saminggu manang sabulan. Saleleng martaon-taon, ingkon dipillit angka donganta do laho manuhor sipanganon tu keluargana manang manuhor Bibel. Alai saonari, ala nunga adong sumbangan jala denggan do dipangke, boi ma organisasi ni Jahowa manerjemahon jala manongos Bibel na so pola margarar tu ganup keluarga dohot angka parsiajar Bibel.​—2 Kor. 8:13-15. w17.07 6 ¶11

Tarapul do rohanta mamboto pengalaman ni si Job. Gabe taboto, ndang ala na muruk Jahowa umbahen na ro pangunjunan tu hita. Molo masa pangunjunan, tapatudu ma na marpihak hita tu Jahowa. Molo tongtong marsihohot, las ma roha ni Jahowa, jala lam togu ma pangkirimonta. (Rom 5:3-5) Pengalaman ni si Job patuduhon “parasiroha bolon do Tuhan i jala partalup ni roha”. (Jak. 5:11) Molo marpihak tu Jahowa, pasu-pasuonNa ma hita. On mangurupi hita asa sabar jala marsihohot “mardongan las ni roha”. (Kol. 1:11) Tutu, molo marsitaonon hita, boi do gabe maol mamingkirhon taringot mamparhatutu hak ni Jahowa mamarenta. Alani i, sitaonon aha pe na taadopi, tapaingot ma dirinta taringot ringkot ni mamparhatutu hak ni Jahowa mamarenta. w17.06 19 ¶15-16

Saonari, lomo do roha ni halak manuhor angka barang na baru, songon baju, handphone, komputer, dohot na asing. Dirajai holongan di hepeng dohot arta do nasida. Ala naung gabe halak Kristen, aha do na rumingkot di hamu? Rimangi ma: ‘Gabe suda do tingkingku mamingkirhon mobil manang baju na baru sian mangalehon tingki paradehon na diulas di parpunguan? Pasibukhu do ahu gabe ndang jotjot martangiang dohot manjaha Bibel?’ Molo ndang manat, boi do gabe rumingkot roha na holongan di hepeng sian holong ni rohanta tu Kristus. Tarimangi ma hata na didok Jesus di ayat na diulas sadari on. Jesus mandok, “Ndang haoloan sada halak dua induk.” Didok muse, “Ndang haoloan hamu Debata rap dohot Mammon (Hamoraon)!” Lapatanna, molo hamoraon manang arta do na rumingkot di hita, ndang boi talehon na dumenggan tu Jahowa. (Mat. 6:24) Ala mardosa dope hita, ingkon marsitutu do mangalo “hisaphisap ni dagingta”, dohot ma i roha na holongan di hepeng.​—Eps. 2:3. w17.05 25-26 ¶15-16

Ala mardosa, dos ma hita songon gunsi na sian tano liat. Alai barita na tapasahat dos songon arta na arga na boi mangalehon ngolu salelengna tu hita dohot tu na mambege. Marsitutu do si Paulus paboahon taringot Harajaon ni Debata tu na asing. (Rom 1:14, 15; 2 Tim. 4:2) Ala holong rohana tu barita na uli, on mambahen ibana barani marbarita nang pe godang na mangalo. (1 Tes. 2:2) Songon dia do hita maniru si Paulus? Sada cara na diulahon si Paulus laho patuduhon holong tu pangkobasionna, i ma marhite marbarita tu na asing. Songon si Paulus dohot halak Kristen di abad na parjolo, hita pe marbarita sian jabu tu jabu, di inganan na ribur, manang didia pe hita pajumpang dohot halak. (Ul. 5:42; 20:20) Talului ma cara laho marbarita tu godang halak. Molo tolap do hita, boi do gabe perintis ekstra manang perintis biasa, marsiajar bahasa na asing, pinda tu inganan na asing di negaranta, manang pinda tu negara na asing.​—Ul. 16:9, 10. w17.06 11 ¶8-9

Angka organisasi do na mambahen lam godang hajahaton di portibi on. Umpamana, marjuta halak dioto-otoi organisasi ni agama. Margabus do nasida taringot ise Debata na sasintongna, didok do ndang boi tahaporseai isi ni Bibel, jala dioto-otoi do angka jolma taringot ari na naeng ro. Pamarentaon na jahat satolop tu porang, paimbar-imbarhon halak, jala manusai na pogos dohot na gale. Lam mamora jala lam marhuaso do pamarentaon sisongon i, ala mardingkan jala manjalo suap. Adong do muse perusahaan na mangahut jala manegai lingkungan. Dibuat nasida do untung sian godang halak laho mambahen piga-piga halak asa mamora. Alani i, martanggung jawab do organisasi na jahat taringot tu hasusaan di portibi on. Nunga dipaboa Bibel hian, na laho dilengsehon nama angka pamarenta na adong di portibi, angka organisasi na mardongan dohot portibi on dohot sude halak na so olo marpihak tu Harajaon i Debata.​—Jer. 25:31-33. w17.04 12 ¶7-8

Marasi ni roha do Jahowa tu si Ahab, ala Ibana do “na manguji angka roha”, na mamboto taringot dirinta na sasintongna. (Poda 17:3) Diuji do haporseaon ni keluarga dohot ale-ale ni si Nabot tingki dibege molo keluarga ni si Ahab ndang jadi diuhum Jahowa sahat tu na mate ibana. Alai, serep ni roha mangurupi nasida tongtong marhaporseaon, manomba Jahowa, jala porsea ndang hea diulahon Debata na so tigor. (5 Mus. 32:3, 4) Di ari na naeng ro, dipasu-pasu ma keluarga ni si Nabot dung diida nasida si Nabot dipahehe. On ma hatigoran na dipatudu Jahowa tu si Nabot dohot ianakhonna. (Job 14:14, 15; Joh. 5:28, 29) Diboto halak na marserep ni roha, “nasa parulaon ni jolma boanon ni Debata sogot tu paruhuman ro di saluhut na buni, nang na denggan nang na jat”. (Pjm. 12:14) Diboto Jahowa do na masa na so taboto. Alani i, serep ni roha mangurupi hita marhaporseaon tu Jahowa. w17.04 22-24 ¶8-9

Ala lam susa situasi saonari, godang do angka donganta na gabe pangungsi. Maol do i di nasida. Godang angka na baru na ingkon diparsiajari. Umpamana, bahasa, hasomalan, dohot uhum taringot manggarar pajak, parsingkolaan, jala mangajari ianakhon! Sabar do hamu mangurupi donganta na mangadopi ambat-ambat sisongon on? (Plp. 2:3, 4) Sipata, ndang diloas pamarenta angka donganta i manjumpangi dongan sahaporseaon di inganan i. Adong do pamarenta na so paloashon pangurupion sian dongan sahaporseaon. Olo do ra dilehon pamarenta karejo na mambahen nasida ndang boi marpungu. Molo ndang dijalo karejo i, ndang boi nasida tading di inganan i. Ala mabiar jala mangkaporluhon pangurupion, adong do na olo manjalo karejo i. Alani i, hatop ma tajumpangi donganta pangungsi, asa diboto na tasarihon do nasida. Pangurupion sisongon i boi patoguhon haporseaon ni nasida.​—Poda 12:25. w17.05 5 ¶9-10

Tingki di tano on dope Jesus, dipatorang ibana do angka aha na gabe “tanda ni ujung ni portibi on”. Didok ibana, “Lam tu ngalina ma haholongon ni roha di jolma godangan.” (Mat. 24:3) Mangangku halak Jahudi di abad na parjolo naposo ni Debata, alai sasintongna lam ngali do holong ni nasida tu Debata. Alai, godang do halak Kristen di abad na parjolo na so marparange sisongon i. Marhiras ni roha do nasida “mamaritahon Kristus Jesus” jala mangkaholongi Debata, dongan sahaporseaon, dohot angka halak na so mamboto hasintongan. Tongtong do dipatogu nasida holongna tu Debata. (Ul. 2:44-47; 5:42) Alai, adong do piga-piga halak Kristen na paloashon lam ngali holongna tu Debata. Sian dia taboto? Didok Jesus tu halak Kristen di Epesus, “Naung tinadingkonmu holong ni roham na di mulana i!” (Pgk. 2:4) Ra, gabe diihuthon nasida do angka jolma di humaliangna na holan pasonangkon dirina sandiri.​—Eps. 2:2, 3. w17.05 15-16 ¶1-3

Sahalak pamimpin jala tentara na barani do si Jepta. Si Hanna, i ma borua na marserep ni roha na mamparrohahon keluargana. Sisomba Jahowa do nasida na dua, jala dos do na diulahon si Jepta dohot si Hanna. Hea do nasida marjanji tu Jahowa, jala digohi nasida do janjina i. Gabe sitiruon do nasida tu angka jolma na laho mambahen janji tu Jahowa. Di Bibel, janji, i ma padan na tabahen tu Debata. Umpamana, olo do ra sasahalak marjanji tu Jahowa asa lam denggan marparange, mangalehon silehon-lehon, mangalehon gumodang tingki tu Ibana, manang pasidingkon ulaon na roa. Ingkon sian rohanta sandiri do janji na tabahen, ndang ala na dipaksa. Di adopan ni Jahowa, molo nunga marjanji hita, ringkot do i tagohi. Di Bibel, dipatudos do janji i songon sumpa. Sumpa, i ma janji ni sasahalak laho mangulahon sada ulaon manang ndang mangulahon ulaon i.​—1 Mus. 14:22, 23; Heb. 6:16, 17. w17.04 3-4 ¶1-2