Juli

Ra, sahalak “pangaramoti bagas” ni Raja Hiskia do si Sebna, jala timbo do pangkatna. (Jes. 22:15) Alai, gabe ginjang ma roha ni si Sebna, jala lomo do rohana pasangaphon dirina di adopan ni angka halak. (Jes. 22:16-18) Ala pasangaphon dirina sandiri do si Sebna, gabe dilehon Debata ma tugasna i tu halak na asing, i ma si Eliakim. (Jes. 22:19-21) Tingki i, Raja Sanherib sian Assur marsangkap laho manaluhon Jerusalem. Dung i, disuru si Sanherib ma piga-piga naposona dohot tentarana na mansai godang laho mambahen halak Jahudi dohot Raja Hiskia gabe mabiar tu ibana. (2 Raj. 18:17-25) Disuru si Hiskia ma si Eliakim dohot dua halak na asing laho manjumpangi nasida. Sada dongan ni si Eliakim, i ma si Sebna, naung gabe sekretaris. Sian on, boi ma taida molo si Sebna patuduhon serep ni roha, jala ndang gabe metmet rohana manang gabe manolsoli dirina sandiri. Rade do ibana manjalo tugas na so pola timbo. w18.03 23-24 ¶7-8, 10

Molo saleleng on hita holan mamingkirhon hasonangan dohot arta, unang ma metmet rohanta. Tongtong ma pangido tondi parbadia ni Jahowa, asa diurupi hita mangkaringkothon na dumenggan. (Luk. 11:13) Taingot ma Apostel Petrus. Ndang sai tongtong boi ditiru ibana pingkiran ni Jesus. (Mat. 16:22, 23; Luk. 22:34, 54-62; Gal. 2:11-14) Alai, sai marsitutu do ibana, jala rade do Jahowa mangurupi. Lam leleng, gabe boi ma ibana maniru pingkiran ni Kristus. Hita pe boi do songon i. Dipaboa si Petrus do piga-piga parange na boi mangurupi hita. I ma mangarajai diri, marhabengeton, mangkaholongi angka dongan, dohot angka parange na asing. (2 Ptr. 1:5-8) Ingkon marsitutu do hita mangulahon i. Jadi boi ma tarimangi sungkun-sungkun on ganup ari, ‘Parange na dia do na ingkon huulahon saonari asa jonok tu Debata?’ w18.02 26 ¶12-13

Tangkas do diantusi si Job poda ni Debata. Ala mananda Jahowa, taronjar do rohana mangulahon na sintong. Umpamana, diboto si Job molo tutu do hita mangkaholongi Debata, ingkon tahaholongi do dongan jolma. (Job 6:14) Burju do ibana maradophon halak na mora nang na pogos, dos songon keluargana sandiri. Didok si Job, “Nda laos Sitompa ahu di bagasan butuha ni dainang, manjadihon nang ibana?” (Job 31:13-22) Ndang ginjang rohana nang pe mamora, jala diparsangapi halak ibana. Ndang hea ibana marpingkir ibana na umtimbo sian na asing. Imbar do parangena sian angka halak na mamora jala na sangap saonari on. Rumingkot do di si Job parale-aleonna tu Jahowa sian angka arta. Diboto ibana do molo hamoraon i boi mambahen ibana mansoadahon “Debata na di ginjang i”. (Job 31:24-28) Diboto ibana do molo baoa dohot borua na marhasohotan nunga marpadan di adopan ni Jahowa. Alani i, marjanji do ibana di bagas rohana, asa unang mangida boru-boru na asing jala marsangkap na roa.​—Job 31:1. w18.02 13 ¶16; 14 ¶18-19

Diboto si Noak do, ndang sae holan gabe halak na burju. Alai, barani do ibana paboahon haporseaonna tu angka halak. Didok Bibel do ibana, “Parjamita hatigoran.” (2 Ptr. 2:5) Jala didok si Paulus do, “ala ni haporseaon i diuhum ibana do portibi on”. (Heb. 11:7, Bibel Siganup ari) Direhei jala diambati angka halak do ibana. Ra, marsangkap do angka halak laho pamatehon ibana. Alai, ndang mabiar ibana. (Poda 29:25) Gariada pos do rohana. Alani i, dilehon Jahowa ma habaranion tu ibana. Jadi, lehonon ni Debata do gogo tu angka halak na marsihohot di tingkinta saonari. Tongtong do si Noak marsihohot tu Jahowa saleleng lobi sian 500 taon dungkon disuru ibana paulihon parau. I ma na laho dipangke paluahon piga-piga halak dohot binatang sian Aek na Sumar. (1 Mus. 5:32; 6:14) Tontu ndang mura mangulahon on. Diboto si Noak, boi do gabe direhei jala digugai angka halak ibana. Alai tongtong do ibana porsea jala unduk tu Jahowa. “Songon na tinonahon ni Debata tu ibana, songon i dibahen.”​—1 Mus. 6:22. w18.02 4-5 ¶4, 6-7

Asa sude hita tongtong marsada, tatiru ma holong ni Jahowa. (1 Joh. 4:8) Jala unang ma tadok, “Mardame do ahu dohot angka dongan, alai ndang pola ingkon solhot ahu tu nasida.” Molo tadok songon i, ndang na taihuthon poda ni si Paulus, i ma sabar di bagasan roha na holong. (Eps. 4:2) Ndang holan sabar na didok si Paulus dison, alai didok do ingkon ‘marsihaholongan’. Marragam do parange ni angka dongan di huria, alai sude do nasida dijangkon Jahowa. (Joh. 6:44) Tontu, diida Jahowa do angka na denggan sian nasida umbahen na dihaholongi Ibana nasida. Molo diargai angka dongan do holong ni Debata, diargai nasida do holong na tapatuduhon. Ingkon marsitutu ma hita mangkaholongi nasida, dos songon Jahowa mangkaholongi nasida.​—1 Joh. 4:20, 21. w18.01 13-14 ¶14

Piga-piga natua-tua marpingkir, tumagon ma tamat ianakhonna kuliah jala dapot karejo na denggan jolo, baru ma nasida tardidi. Tontu, alani holongna do umbahen na dipingkiri nasida songon i. Alai, porlu do rimangan ni angka natua-tua sungkun-sungkun on: ‘Boi do cara sisongon i mangurupi ianakhonku asa marhasil di ngoluna? Hombar do i tu hata ni Bibel?’ Ingkon tongtong do diingot natua-tua, godang do na di portibi on na maralo sian lomo ni roha ni Debata. (Jak. 4:7, 8; 1 Joh. 2:15-17; 5:19) Jadi, parale-aleonna tu Jahowa do na boi mangondingi ianakhonmuna sian Sibolis, portibi on, dohot pamingkirion na sala. Jadi, molo singkola dohot karejo do na rumingkot dibahen hamu tu ianakhonmuna, gabe dirimpu ibana ma ndang apala ringkot marale-ale tu Jahowa. Bahaya do i. Molo holong do hamu tu ianakhonmuna, lomo do rohamuna molo portibi on na mangajari ianakhonmuna asa sonang ngoluna? Holan sada do carana asa boi marhasil jala marlas ni roha, i ma molo Jahowa na rumingkot di ngolunta.​—Ps. 1:2, 3. w18.03 11-12 ¶10-11

Godang do naposo ni Jahowa na so mangkaringkothon hamoraon. Alani i, gabe boi ma nasida mangalehon godang tingkina tu Jahowa, jala marlas ni roha ma nasida. Songon donganta si Jack, holan na marsak do ibana di jabu alani karejona. Alai didok ibana, “Merintis do tunggane borungku jala sai jotjot do las rohana.” Jala didok tunggane boruna do muse, “Molo ahu, burju hian do boshu!” Ujungna, digadis ibana ma jabuna na balga, jala ditadingkon ibana ma bisnisna. Merintis ma ibana dohot tunggane boruna. Didok ibana do muse, “Alai, saonari nunga gabe sahalak perintis ahu, jala nunga karejo hami tu Bos na sarupa, i ma Jahowa.” Porlu do tapareso caranta mangida hepeng. Boi do tasungkun dirinta sandiri, ‘Sian parngoluonku, tarida do na satolop ahu tu na didok Bibel taringot hepeng? Hepeng do na umringkot di ngolungku? Na ummarga do di ahu arta sian sasudena? Pos do rohangku, lehonon ni Jahowa do sude na huhaporluhon?’ Pos ma rohanta, ndang ditadingkon Jahowa halak na marhaposan tu Ibana. w18.01 24-25 ¶12-13

Ingkon marsitutu do ho mangulahon ulaon haluaon i. Alani i, ringkot do ho manjaha jala mangarimangi Hata ni Debata, martangiang tu Jahowa, jala ingot ma songon dia Jahowa nunga mangurupi ho. Molo diulahon ho songon i, pos ma roham, boi do Jahowa gabe ale-alem. Gabe lomo ma roham paboahon haporseaonmu tu na asing. (Ps. 73:28) Didok Jesus, “Nasa na giot mangihuthon Ahu, disoadahon ma dirina, diporsan ma [tiang] na tu ibana; diihuthon ma Ahu!” (Mat. 16:24) Ganup halak Kristen ingkon marjanji asa manomba Jahowa jala tardidi. Molo diulahon ho songon i, hilalaonmu ma las ni roha saonari, jala marpangkirimon laho mangolu salelengna di paradeiso. Jadi, ulahon ma angka na boi mambahen hamu malua! w17.12 26 ¶18-19

Molo sabar natua-tua mangajari ianakhonna, boi ma diantusi ianakhonna ‘ganjang dohot bidang, bagas dohot timbo’ ni haporseaon i. (Eps. 3:18) Taajari ma nasida hombar tu umurna jala mamangke cara na mura diantusi. Molo togu haporseaon ni nasida, mura ma nasida patorangkon haporseaonna tu na asing, umpamana dongan sasingkola. (1 Ptr. 3:15) Boi do dipatorang ianakhonmuna sian Bibel taringot hamatean? Pos do rohanasida tu hatorangan na sian Bibel? Ingot ma, ingkon sabar do hamu mangurupi ianakhonmu marhaporseaon tu isi ni Bibel ala mangkorhon na denggan do i. (5 Mus. 6:6, 7) Asing ni i, sitiruon na pinatudumuna mangurupi ianakhonmuna marhaporseaon. Si Stephanie, naung tolu boruna mandok, “Sai hurimangi do: ‘Hupaboa do tu ianakhonku boasa pos rohangku na tutu adong Jahowa? Pos do rohangku tu holongNa dohot tu hatigoranNa?’ Molo diringku sandiri pe ndang marpos ni roha tu Bibel, boha ma ianakhonku boi marpos ni roha?” w17.12 17-18 ¶8-10

Boasa pos situtu roha ni si Marta na laho hehe ibotona i? Ala nunga diboto ibana haheheon na masa di tingki naung salpu. Ra, tingki dakdanak nunga diparsiajari ibana di jabuna manang di inganan parpunguan nasida. Alai, saonari taparsiajari ma tolu hatorangan taringot haheheon na disurat di Bibel. Rimangi ma haheheon na parjolo sahali, i ma di tingki ni si Elia. Dilehon Jahowa do gogo tu si Elia laho mambahen halongangan. Parrohahon ma na masa di dompak ni utara Israel di Penisia di huta Sarpat. Disi, adong ma sahalak ina na mabalu dohot sada ianakhonna. Pogos do nasida. Alai, burju do ibana manamue si Elia. Alani i, dibahen Jahowa ma asa ndang marnasuda sipanganon sian hudon ni nasida. Gabe boi ma nasida tongtong mangolu. (1 Raj. 17:8-16) Alai ndang piga leleng marsahit ma anakna i, laos mate. Huhut ditiop si Elia anakna i, martangiang ma ibana tu Jahowa. Ninna ma, “Ale Jahowa, Debatangku, ua paulak ma hosa ni dakdanak on tu bagasan ibana.” Ditangihon Jahowa do tangiang ni si Elia jala mulak mangolu ma dakdanak i. On ma haheheon na parjolo sahali disurat di Bibel. (1 Raj. 17:17-24) Tontu diboto si Marta do carita on. w17.12 3 ¶1; 4 ¶3, 5-6

Dijujui angka halak do hita asa mangalehon sude tingki dohot gogonta tu parkarejoan. Tarlumobi molo karejo i boi mambahen hita gabe tarbarita, diparsangapi, jala mamora. Ala godang halak na mandok songon i, boi do gabe songon i pingkiranta. Tutu do karejo na jago jala na parohon sangap, boi mambahen las rohanta? Ndang. Umpamana, lomo do roha ni Sibolis asa diparsangapi jala tarbarita. Dapotna do i. Alai, ndang marlas ni roha ibana, gariada tarrimas do. (Mat. 4:8, 9; Pgk. 12:12) Rimangi ma las ni roha na tadapot, ala mangurupi angka halak mananda Debata jala mamboto janjiNa. Ndang adong karejo na asing na boi parohon las ni roha sisongon i. Laho mandapot karejo na jago, boi do gabe masilatean halak, gabe garang, manang mangiburu tu donganna. Nang pe denggan karejo nasida, alai hira na so marlapatan do ngolu ni nasida. Di Bibel, didok do nasida songon “manangkup alogo sambing.”​—Pjm. 4:4, Bibel siganup ari. w17.11 24-25 ¶11-13

Di jaman ni Jesus, tongtong do ringkot musik laho mamuji Jahowa. Rimangi ma taringot borngin andorang so mate Jesus. I ma borngin na mansai ringkot. Dung dibahen Jesus parpadanan dohot angka siseanna, marende do nasida. Diendehon nasida do ende puji-pujian tu Jahowa. Sitiruon na denggan do halak Kristen di abad na parjolo. Di jabu-jabu do nasida marpungu laho manomba Jahowa. Nang pe ndang songon uli ni bagas joro jabu ni nasida, alai las do rohanasida marende. Didok apostel Paulus do tu angka dongan di tingki i, ‘Masiajaran jala masipaingotan ma hamu marhitehite angka ende psalmen, endeende pujipujian dohot ende partondion; endehon hamu ma Debata di bagasan rohamuna marroha hamauliateon!’ (Kol. 3:16) Ingkon “marroha hamauliateon” do hita tingki marende sian buku endenta. Alana, on ma sada cara ni “naposo haposan jala na marroha”, “mangalehon [hita] mangan di tingkina”.​—Mat. 24:45. w17.11 4-5 ¶7-8

Disuru Jahowa do halak Israel asa papulikkon onom huta na laho gabe huta parlinggoman. Tolu di siamun ni sunge Jordan, jala tolu di hambirangna. Boasa ingkon songon i? Asa boi hatop jala mura halak na mambunu i lari tu huta parlinggoman i. (4 Mus. 35:12-14) Jala dalan tu huta i pe, dijaga do asa tongtong denggan. (5 Mus. 19:3) Hombar tu adat ni halak Jahudi, dibahen do tanda di angka dalan. On mangurupi halak mamboto didia do huta parlinggoman i. Ala nunga adong huta parlinggoman di Israel, ndang ingkon tu bangso na asing be halak na mambunu i mangalului parlinggoman. Alana, boi do annon ibana gabe tarela-ela manomba debata na so sintong. Jahowa mandok, ingkon diuhum mate do halak na mambunu. Alai molo ndang sangaja sasahalak mambunu, dipatudu Jahowa do asi ni rohaNa, jala dilinggomi do ibana. Sahalak panulingkit Bibel mandok, “Sudena [uhum ni Debata] tangkas jala mura antusan.” Ndang panguhum na kejam Jahowa. Ndang sai dilului Ibana hasalaan ni sasahalak. Gariada, “parasiroha bolon” do Ibana.​—Eps. 2:4. w17.11 16-17 ¶4-5

Di parnidaan ni si Sakaria, adong ma sada gulungan na habang, sahalak borua di bagasan ampang manang karanjang, dohot dua borua na marhabong songon siboru tasik manang bangau. (Sak. 5:1, 7-9) Boasa dilehon Jahowa parnidaan i tu si Sakaria? Parnidaan ni si Sakaria na paonomhon dohot na papituhon marisi hata sipasingot tu halak na mangulahon na roa. Ndang pasombuon ni Jahowa hajahaton salelengna. Alani i, ingkon tahasogohon do hajahaton. Dipapos do rohanta, molo marsitutu hita mambahen las roha ni Debata na parholong, ndang buraanNa hita. Gariada linggomanNa do hita jala pasu-pasuonNa. Maol do tongtong ias di portibi na jahat on alai pos ma rohanta, urupan ni Jahowa do hita jala boi do hita marhasil. w17.10 15 ¶1; 20 ¶19

Godang do angka donganta borua na so marhamulian dope, na mangalehon tingki ni nasida merintis, dohot tu ulaon Rancang Bangun Setempat, manang mangisi formulir Singkola tu Parbarita Harajaon. Jala piga-piga donganta borua digokkon do tu Singkola Gilead. Angka donganta borua di huria naung matua, godang do na so boi be mangulahon godang ulaon. Nang pe ndang songon najolo i be gogo ni nasida, alai tongtong do dipatudu nasida habaranion, jala diulahon nasida do nasa na boi ulahonon ni nasida. Umpamana, diurupi nasida do angka sintua laho pasingothon donganta borua na poso taringot marpangkean. Lambok jala burju do nasida pasingothon angka na poso i. Diurupi do na poso asa mamingkiri pangkorhon ni pangkeanna tu angka dongan na asing. (1 Tim. 2:9, 10) Molo dipatuduhon nasida holong sisongon i, gabe lam togu ma huria. w17.09 31-32 ¶17-18

Saleleng martaontaon godang do pamarenta na mangambati penerjemahan ni Bibel. Alai, adong do angka halak na marsihohot tu Debata. Marsitutu do nasida paradehon Bibel, asa boi dijaha halak. Umpamana songon si John Wycliffe. Maringanan di Inggris do ibana taon 1300-an. Taon 1382, diterjemahon si John Wycliffe dohot angka donganna ma Bibel tu hata Inggris. Jala jotjot do on dipangke angka halak na digoari punguan Lollard. Mansai lomo do roha ni nasida tu terjemahan i. Laho ma nasida tu huta-huta di Inggris jala dijahahon nasida ma i tu angka halak. Maratus taon dungkon i, diterjemahon ma Bibel tu angka hata na boi diantusi godangan halak. On dibahen di Eropa manang di inganan na asing. w17.09 18-19 ¶10-12

Molo ndang marianakhon dope, didok do tong i “marniae di daging”. (Poda 13:12) Najolo, molo adong borua na so boi marianakhon, gabe hailaan do i di ibana. Lungun do roha ni si Rahel, tungganeboru ni si Jakkob, mangida kakakna boi marianakhon. (1 Mus. 30:1, 2) Sitaonon na asing na diadopi na mardongan saripe, i ma molo marujung ngolu dongan saripena. Nang pe didok rohanasida ndang masa sisongon on di ngoluna, godang do na mangadopi on. Alai porsea do hita tu haheheon, jala boi do on mangapuli rohanta. (Joh. 5:28, 29) Di Bibel, godang do janji ni Jahowa na boi mangapuli rohanta tingki marsitaonon. w17.06 3 ¶1; 4 ¶6; 5 ¶9

Hea do si Musa manungkun tu Jahowa, na urupan ni Jahowa do ibana manang na ndang. Dipaboa Jahowa ma tu ibana taringot goar dohot parangeNa. Dipaboa Jahowa do jumolo taringot asi ni rohaNa, sian bisuk manang huasoNa. (2 Mus. 34:5-7) On boi paposhon roha ni si Musa, na urupan ni Jahowa do naposoNa. (2 Mus. 33:13) Alai nang pe ditompa suman tu Debata, ndang sai mura patuduhon asi ni roha, ala jolma na mardosa do hita. Jotjot do hita mangkaringkothon diri jala maol mangurupi na asing. Jadi songon dia do hita asa manarihon na asing? Na parjolo, taulas ma songon dia Jahowa dohot naposoNa na patuduhon asi ni roha. Na paduahon, taulas ma songon dia hita maniru Debata na patuduhon asi ni roha, jala taulas ma aha do labana molo taulahon i? w17.09 9 ¶1; 10 ¶3

Laho pasangaphon Jahowa do umbahen na olo hita patuduhon parange na imbaru, ndang asa dipuji jolma. Taingot ma, suru-suruan na so mardosa pe boi do gabe marginjang ni roha jala ujungna gabe mardosa. (Bandingkon Hesekiel 28:17.) Jolma na mardosa do hita. Alani i, gabe maol ma hita pasidingkon ginjang ni roha. Alai boi do hita patuduhon serep ni roha. Aha do na boi mangurupi hita mangulahon i? Manjaha jala mangarimangi Hata ni Debata ganup ari, boi mangurupi hita patuduhon serep ni roha. (5 Mus. 17:18-20) Ringkot do mangarimangi ajaran ni Jesus. Dibahen ibana do sitiruon taringot cara patuduhon serep ni roha. (Mat. 20:28) Alani serep ni rohana, diburi Jesus do pat ni angka apostelna. (Joh. 13:12-17) Asing ni i, martangiang ma mangido tondi parbadia ni Jahowa. Tondi parbadiaNa boi mangurupi hita mangalo pingkiran na sala na mandok dumenggan do dirinta sian dongan na asing.​—Gal. 6:3, 4. w17.08 24 ¶11-12

Hea do dihilala hamu songon na dihilala si Paulus? Ra hea do hita mangido pangurupion sian Debata tingki mambahen haputusan. Jala tahilala ma tondi parbadia manogu-nogu hita. Alai dungkon i, gabe godang do ambat-ambat na taadopi manang gabe muba parngoluonta. (Pjm. 9:11) Aha do na boi mangurupi hita asa ‘unang mangkolsohon agia aha’ jala mangkilala “dame ni Debata”? Hata ni si Paulus tu angka dongan di Pilippi patuduhon, ingkon martangiang do hita tingki holsoan. Paboa ma holso ni rohamuna di bagasan tangiang. (1 Ptr. 5:6, 7) Molo nunga martangiang tu Jahowa, pos ma rohamuna na ramotanNa do hamu. Unang ma lupa mandok mauliate alani pasu-pasu naung tajalo. Jala ingot ma, na “tarpatupa [Jahowa] do andul lumobi sian na tapangido manang tapingkiri”.​—Eps. 3:20. w17.08 10 ¶4; 11 ¶6; 12 ¶10

Godang do angka donganta na merintis sian haposoonna, jala dapot nasida do las ni roha. Boi do dihatai hamu tu nasida taringot cita-citamuna. Ra paboaon ni nasida ma tu hamu, molo merintis, dapotmuna ma pangajarion na marlaba tu ngolumuna. Godang do na diparsiajari Jesus sian Amana tingki di surgo. Jala tingki di tano on pe, tongtong do ibana marsiajar. Marlas ni roha do ibana tingki marbarita na uli jala tongtong marsihohot. (Jes. 50:4; Heb. 5:8; 12:2) Disuru Jesus do hita ‘mamodai saluhut bangso’ manang mambahen sisean jala mangajari angka halak. (Mat. 28:19, 20) Molo on do na laho ulahononmu, dapotmu ma las ni roha. Songon karejo na asing, porlu do tingki asa lam malo. w17.07 23 ¶6-7

Ama Parasiroha jala Sipangapul na sumurung do Jahowa. (2 Kor. 1:3, 4) Boi do angka dongan di huria mangapuli sasahalak na marhabot ni roha. (1 Tes. 5:11) Songon dia do hita patoguhon jala mangapuli sasahalak na “marsak” manang na marhabot ni roha? (Poda 17:22, Bibel siganup ari) Taingot ma ayat na mandok “adong do tingki hohom, adong do tingki mangkatai”. (Pjm. 3:7, Bibel siganup ari) Sahalak na mabalu na margoar si Dalene paboahon, ingkon dipatolhas halak na marhabot ni roha do pangkilalaan dohot pingkiranna. Alani i, denggan ma tatangihon nasida, jala unang ma pintor taalusi hata ni nasida. Si Junia, na ibotona mate maningkot mandok, “Nang pe ndang boi taantusi sude pangkilalaan ni nasida, alai na rumingkot i ma molo rade hita manangihon nasida.” Porlu taingot, ndang sai sarupa pangkilalaan dohot cara ni halak patuduhon habot ni roha. w17.07 10 ¶3; 11-12 ¶11; 12 ¶12, 13

Di godangan halak, hepeng do na rumingkot. On do na sai dipingkirhon jala diholsohon rohanasida. Marsitutu do nasida asa mandapot godang hepeng. Alai di halak na asing, na rumingkot, i ma keluarga, kesehatan, manang cita-cita. Sasintongna adong do parsoalan na rumingkot sian sudena i, i ma taringot mamparhatutu hak ni Jahowa laho mamarenta. Ala on do na rumingkot, ingkon talehon do rohanta tusi. Molo ndang manat, boi do ulaonta siganup ari manang sitaononta mambahen hita lupa tu parsoalan on. Molo marpihak hita tu hak ni Jahowa laho mamarenta, marhasil ma hita mangadopi sitaonon jala lam solhot tu Jahowa. w17.06 15 ¶1-2

Marhite holong do Jahowa mamangke huasoNa. Angka tungganedoli dohot sintua na marpihak tu pamarentaon ni Jahowa, rade do maniru Ibana, ndang kejam, jala ndang lomo-lomo ni nasida. Marsitutu do si Paulus maniru Debata dohot Jesus. Ndang dipaila jala ndang dipaksa ibana halak na asing mangulahon na denggan. Alai, lambok do ibana manjujui na asing mangulahon na denggan. (Rom 12:1; Eps. 4:1; Plm. 8-10) Taboto ma, Jahowa do na ditiru si Paulus. Molo tahaholongi na asing, na marpihak tu pamarentaon ni Jahowa do hita. Boi do tapatudu na marpihak hita tu pamarentaon ni Jahowa marhite mangargai jala satolop tu na manguluhon hita. Nang pe ndang taantusi boasa dibahen sada keputusan, alai tongtong ma taihuthon i. Tajangkon ma Jahowa gabe Pamarenta jala unduk tu Ibana, unang songon pangalaho ni portibi on.​—Eps. 5:22, 23; 6:1-3; Heb. 13:17. w17.06 24 ¶14-15

Alani i, taurupi jala taparrohahon ma donganta na marmetmet ni roha, na marsak, manang na marsitaonon. (Poda 12:25; Kol. 4:11) Marhite pangkataion dohot parniulaonta, tapatudu ma holong “tu donganta sahaporseaon”. (Gal. 6:10) Didok di Bibel, di “tingki parpudi” on, godang do halak na mangkaringkothon diri jala mangahut. (2 Tim. 3:1, 2) Alani i, ingkon marsitutu do hita patoguhon holongta tu Jahowa, tu HataNa, dohot tu dongan sahaporseaon. Ala mardosa dope hita, sipata adong do parsoalanta dohot dongan sahaporseaon. Alai, ala masihaholongan, pintor tasalpuhon do angka parsoalan dohot hansit ni roha. (Eps. 4:32; Kol. 3:14) Alani i, tongtong ma tahaholongi Jahowa, HataNa, dohot dongan sahaporseaon. w17.05 20 ¶17-18

Ingkon taadopi do parniulaon na so tigor na dibahen halak na asing. Alai, diuji do haporseaonta tingki dongan sahaporseaon mambahen na so tigor tu hita. Songon dia do hita maradophon i? Gabe gale do partondionta? Mardosa do hita jala boi mambahen hasalaan. Alani i, olo do sipata adong mambahen na so tigor tu hita manang hita na mambahen na so tigor tu dongan na di huria. Nang pe ndang jotjot masa i, unang ma songgot rohanta manang gabe gale partondionta molo masa sisongon i. Dilehon Jahowa do poda di Bibel laho mangurupi hita tongtong marsihohot nang pe adong dongan sahaporseaon mambahen na so tigor tu hita.​—Ps. 55:13-15. w17.04 16 ¶4-5

Tamba do arsak ni roha molo marhasohotan tu na so manomba Jahowa. Alai, diorai Jahowa do naposoNa marsirang manang padao-dao holan ala ndang sahaporseaon. (1 Kor. 7:12-16) Molo ndang sisomba Jahowa tungganedolimuna, ingkon tongtong do hamu unduk tu ibana, ala ibana do kepala keluarga. Manang, molo ndang sisomba Jahowa tungganeborumuna, sarihon ma jala haholongi ma ibana. (Eps. 5:22, 23, 28, 29) Aha do na boi ulahononmuna, molo ndang diloas dongan saripemuna hamu jotjot mangulahon ulaon partondion? Songon na masa tu sahalak donganta borua. Holan piga-piga ari di bagasan saminggu do ibana diloas tungganedolina marbarita. Molo songon i do na masa tu hamu, sungkun ma di rohamuna, ‘Na diorai dongan saripengku do ahu manomba Jahowa? Molo ndang, boi do huoloi pangidoanna i?’ Molo marbisuk do hamu tingki mangadopi i, gabe lam otik ma parsoalan di parsaripeonmuna.​—Tit. 3:2. w17.10 10-11 ¶7-8

Songon naung disurirangkon, angka jolma “sian saluhut dila ni bangso parbegu” dohot tu organisasi ni Jahowa. (Sak. 8:23) Molo ndang diantusi ianakhonmu bahasamuna, maol ma mangajarhon hasintongan tu nasida. Nasida ma parsiajar Bibel na rumingkot di hamu. Molo nasida “mananda” Jahowa, boi ma mangolu salelengna. (Joh. 17:3) Laho mangurupi ianakhonmu mangantusi hasintongan ni Jahowa, ingkon jotjot do “taringotanmu angka i” tu nasida. (5 Mus. 6:6, 7) Ra, lomo do roha ni ianakhonmuna marsiajar bahasa na baru tingki di singkola manang sian na asing. Alai, molo jotjot mangkatai hamu tu nasida, disi ma diparsiajari nasida bahasamuna. Molo diantusi do bahasamuna i, lam mura ma nasida paboahon pangkilalaanna tu hamu. Molo boi nasida mamangke lobi sian sada bahasa, gabe lam maju ma pamingkirion ni nasida jala mura mangantusi pangkilalaan ni na asing. w17.05 10 ¶5-6

Adong 900 hureta ni tentara ni si Jabin. Hape ndang godang ugasan ni halak Israel laho marporang. (Pangh. 4:1-3, 13; 5:6-8) Alai marhite si Debora, didok Jahowa ma tu si Barak songon na dipaboa di ayat i. Dung i, laho ma si Barak dohot tentarana marporang tu Taanak. (Pangh. 4:14-16) Diurupi Jahowa do halak Israel asa monang. Tompu ma ro udan haba-haba jala margambo ma inganan i. On ma na mambahen halak Israel boi monang. Dilele si Barak ma tentara ni si Sisera hira-hira 24 kilometer daona, sahat tu Haroset. Tingki di pardalanan, ndang boi mardalan hureta ni si Sisera ala nunga margambo sude inganan i. Laho ma ibana marlojong tu Zaannim, ra di jonok ni Kades. Tingki disi, laho ma si Sisera martabuni tu undung-undung ni sahalak borua na margoar si Jael. Loja hian dihilala si Sisera, gabe tarpodom ma ibana. Tingki modom, dibunu si Jael ma ibana. (Pangh. 4:17-21) Dibahen Jahowa ma monang halak Israel! w17.04 29 ¶6-8

Dung Armagedon, adong dope organisasi di tano on? Bibel mandok, “Na maimaima do hita di langit na imbaru dohot di tano na imbaru, inganan ni hatigoran i, hombar tu bagabagana.” (2 Ptr. 3:13) Laho diripashon ma pamarentaon na jahat dohot angka rayatna. Alai, aha do na laho manggantihon i? ‘Langit na imbaru dohot tano na imbaru.’ Langit na imbaru, i ma Harajaon ni Debata na diparenta Jesus dohot 144.000 angka na miniahan. Tano na imbaru, i ma halak na gabe rayat di Harajaon ni Debata. Tingki mamarenta, ditiru Jesus dohot angka na miniahan do Jahowa, Debata na taratur. (1 Kor. 14:33) Alani i, denggan do pamarentaon di “tano na imbaru”. Adong do angka baoa na dipillit laho mangaradoti godang ulaon. (Ps. 45:17) Nasida diuluhon Jesus dohot 144.000 angka na miniahan. Rimangi ma, sude organisasi na jahat laho digantihon sada organisasi na denggan, na so hea marsangkap na jahat! w17.04 12-13 ¶8-9

Badia do parsaripeon i, jala mansai ringkot di adopan ni Jahowa. Tingki na mardongansaripe mambahen padan, nunga marjanji nasida di adopan ni Jahowa dohot di jolo ni natorop. Marjanji do nasida asa masihaholongan, marlas ni roha, jala mangargai dongan saripena saleleng nasida na dua mangolu di tano on mangihuthon uhum ni Debata taringot parsaripeon. Ra ndang sarupa hata na dipangke halak laho marpadan di parsaripeon di inganan na asing. Alai, dos do padan i di adopan ni Debata. Tingki marpadan, nasida na dua nunga gabe na mardongan saripe. Lapatanna, ingkon marsada ma nasida salelengna. (1 Kor. 7:39) Jesus mandok, “Naung pinadomu ni Debata, ndang jadi sirangon ni jolma!” Unang ma tubu di roha ni na mardongan saripe boi nasida marsirang molo ndang martua parsaripeonna. (Mrk. 10:9) Ala mardosa do sude jolma, ndang adong parsaripeon na sempurna. Alani i ma didok di Bibel, “marniae di daging” do na marsaripe.​—1 Kor. 7:28 w17.04 8 ¶14-15