Juli

Saonari hita mangolu “di ari parpudi” na mansai susa. (2 Tim. 3:1) Jala, ala ndang diripashon Jahowa dope angka parjahat, lam sursar do situasi di portibi on. Dipaboa sahalak panurat ni Bibel do ringkot ni mangasahon Jahowa tingki mangadopi parsoalan. (Ps. 123:1-4) Didok ibana, dipatudos do hita songon sahalak naposo na mangasahon tuanna. Alana, sahalak naposo ingkon mangasahon tuanna do ibana, asa boi dapotan sipanganon dohot parlinggoman. Alai, ingkon botoonna do laho pasonangkon roha ni tuanna, jala ingkon diulahon do i. Suang songon i ma hita. Ingkon taparsiajari do Hata ni Debata ganup ari, asa taboto laho pasonangkon roha ni Jahowa jala ingkon taulahon ma i. Jadi pos ma rohanta urupan ni Jahowa do hita tingki mangadopi hasusaan. w18.07 9 ¶1-2

Haluaon sian dosa do na ditaringoti Jesus disi. I do na mamparhatoban sude jolma sian najolo. (Joh. 8:34) Ala mardosa hita, gabe maol do hita mangulahon na denggan. I do na mambahen hita gabe marsak, susa, jala ujungna mate ma hita. (Rom 6:23) Molo dung disesa dosanta, gabe boi ma hita bebas jala marlas ni roha songon si Adam dohot si Hawa najolo. Didok Jesus, “Molo mian hamu di bagasan hatangku.” On lapatanna, molo olo hita mandapot haluaon i, adong do na ingkon taulahon. (Joh. 8:31) Aha ma i? Molo nunga tardidi hita, ingkon talehon do saluhut ngolunta jala taihuthon ma aturan na dilehon Jesus tu angka siseanna. (Mat. 16:24) Jadi alani tobusan i, gabe boi ma tadapot haluaon di ari na naeng ro. w18.04 7-8 ¶14-16

Dipingkirhon Jahowa do pangkilalaan ni naposona, nang pe sipata sala do pamingkirion ni nasida i. Rimangi ma pengalaman ni si Jona. Disuru do ibana paboahon barita panguhuman tu halak Ninive. Ala marhamubaon nasida, gabe ndang saut nasida diuhum Jahowa. Alai gabe jut do roha ni si Jona alani i. Jala mansai muruk ma ibana ala ndang saut panguhuman na dipaboa ibana i. Alai sabar do Jahowa tu si Jona, jala diurupi do ibana asa marpingkiran na denggan. (Jona 3:10–4:11) Ujungna, diantusi si Jona ma boasa dibahen Jahowa songon i. Jala dipangke do ibana laho manurat cerita on asa marlaba tu hita saonari. (Rom 15:4) Dipatudu Jahowa do roha sapangkilalaan tingki maradophon naposona. Diboto Ibana do sude hasusaan na taadopi. Diantusi Ibana do pingkiran, pangkilalaan dohot hagaleonta. Jala ‘ndang pasombuonna [hita] diela-ela lobi sian na tolapta’. (1 Kor. 10:13) Tontu, mansai las do rohanta tu janji ni Jahowa on! w19.03 16 ¶6-7

Dibahen do sude parenta taringot na ingkon diulahon halak Israel di Patik i. Alani i, ndang boi lomo-lomo ni angka sintua di tingki i tu halak Israel. Ingkon dibahen do na tigor tu nasida. Ndang holan mangurupi halak Israel asa tongtong manomba Jahowa tanggung jawab ni nasida. Alai ingkon diurupi do halak Israel laho pasaehon parsoalan. Parohahon ma angka contoh on. Molo adong halak Israel mambunu sasahalak, ndang boi pintor diuhum mate ibana. Andorang so diuhum, ingkon jolo disulingkiti angka sintua do boasa masa i. (5 Mus. 19:2-7, 11-13) Ingkon diurupi angka sintua do muse nasida molo adong parsoalan na masa di nasida. Mulai sian parsoalan taringot arta sahat tu parsoalan di keluarga. (2 Mus. 21:35; 5 Mus. 22:13-19) Molo diihuthon angka sintua dohot halak Israel do patik i, boi do hilalaon ni nasida sude labana. Jala on boi pasangaphon Jahowa. (3 Mus. 20:7, 8; Jes. 48:17, 18) Sian on taboto ma, ringkot do di Jahowa sude na taulahon. Lomo do rohana asa taulahon na tigor jala tahaholongi halak na asing. Diparrohahon Ibana do aha na tadok dohot na taulahon, nang pe tingki ndang adong halak na mangida. w19.02 23 ¶16-18

Tingki masa hasusaan gabe maol do hita marlambok ni roha. Olo do gabe posi manang kasar hatanta. Molo songon i do na dihilala hamu, rimangi ma contoh ni Jesus. Piga-piga bulan andorang so mate, marsak do Jesus. Ala diboto, laho dibahen do ibana susa jala diuhum mate. (Joh. 3:14, 15; Gal. 3:13) Didok Jesus marsak situtu do rohana alani i. (Luk. 12:50) Piga-piga ari andorang so mate, didok Jesus do muse, “Susa do huhilala.” Didok ibana do i di tangiangna. (Joh. 12:27, 28) Sian tangiangna taboto ma na serep do roha ni Jesus jala unduk do ibana tu Debata. Dung dapot tingkina, ro ma angka musu ni Debata, disiksa ma ibana jala diuhum. Alai barani do Jesus mangadopi i. Nang pe songon i situasina, tongtong do Jesus marlambok ni roha. Tangkas ma, sitiruon na denggan do Jesus taringot patuduhon lambok ni roha nang pe tingki marsak.​—Jes. 53:10. w19.02 11 ¶14-15

Nang pe susa situasi na taadopi, ingkon barani do hita asa boi tongtong ro marpungu. Alana adong do angka donganta na tongtong ro marpungu nang pe marhabot ni roha, marmetmet ni roha manang marsahit. Na asing, tongtong do barani ro marpungu, nang pe diorai keluarga manang pamarenta. Molo barani hita, adong do labana tu angka donganta na di penjara. (Heb. 13:3) Alana molo dibege nasida tongtong hita setia, nang pe mangadopi hasusaan, nasida pe boi ma lam togu, barani jala setia. Tingki dipenjarahon si Paulus di Rom, las do rohana mambege ala tongtong angka donganta manomba Jahowa. (Plp. 1:3-5, 12-14) Ra andorang so kaluar manang dung kaluar sian penjara, ditongos ibana do surat tu halak Heber. Dijujui ibana do nasida asa unang manadingkon parpunguan.​—Heb. 10:25. w19.01 28 ¶9

Lomo do roha ni Sibolis asa sarupa hita dohot ibana mangalo Jahowa. Jala dijujui ibana do asa taharingkothon dirinta sandiri. Dirajai Sibolis do angka halak na di portibi on jala lomo rohana asa sega ‘hasomalanta na denggan’ manang ‘parangenta’ molo mardongan hita dohot nasida. (1 Kor. 15:33, surat na di toru.) Marsitutu do Sibolis manegai rohanta asa mangihuthon pingkiran ni angka halak di portibi on. (Kol. 2:8) Carana, dijujui ibana do angka halak asa mangkaringkothon arta di ngolu ni nasida. Hape ndang sude nasida boi gabe mamora jala boi do mambahen nasida gabe susa. Alana molo sai holan mangalului arta do nasida, olo do gabe marsahit, ndang solhot be tu keluarga, jala ndang marale-ale tu Debata. (1 Tim. 6:10) Tontu mandok mauliate do hita tu Jahowa ala dilehon bisuk tu hita, asa unang gabe arta na ringkot di hita.​—Pjm. 7:12; Luk. 12:15. w19.01 15 ¶6; 17 ¶9

Tingki ndang adong dope sitiruon sian Jesus, angka naposo ni Jahowa pe nunga mamboto na ingkon masipatoguan do nasida. Umpamana si Hiskia. Tingki ro halak Assur laho manaluhon Jerusalem, dijou ibana ma angka panglima dohot angka halak, jala dipatogu do nasida. Alani i, gabe togu ma roha ni nasida umbege hatana. (2 Kron. 32:6-8) Boi do muse hita marsiajar sian si Job taringot patoguhon roha. Nang pe ibana sandiri porlu dipatogu, alai diajari ibana do halak songon dia patoguhon roha na asing. Didok si Job, lomo do rohana patoguhon jala mangapuli, ndang na laho mambahen hansit roha ni halak. (Job 16:1-5) Alai ujungna, ibana sandiri pe dipatogu si Elihu dohot Jahowa do.​—Job 33:24, 25; 36:1, 11; 42:7, 10. w18.04 16 ¶6; 17 ¶8-9

Dipaboa si Jesaya do songon dia Jahowa patoguhon naposona. Didok ibana, “Marhuaso do ro Tuhan Jahowa, jala tanganna gumomgom ibana.” (Jes. 40:10) Di Bibel, hata “tangan” jotjot do dipangke laho manggombarhon hagogoon. Hata na mandok “tanganna gumomgom”, paingothon hita Jahowa do Raja na marhuaso. Mulai sian najolo, dipangke Jahowa do gogona laho mangurupi angka naposona. Sahat tu saonari pe dipangke Jahowa do gogona laho mangurupi angka halak na porsea tu Ibana. (5 Mus. 1:30, 31; Jes. 43:10) Tingki susa hita dibahen musu, diingot Jahowa do janjina na mandok, “Ahu margogoihon ho.” Alana di piga-piga negara adong do na mangorai ulaonta marbarita dohot na mangalarang organisasinta. Alai unang ma mabiar hita alani i. Alana marjanji do Jahowa na lehononna do tu hita gogo asa unang mabiar. Didok Ibana, “Tung so adong sinjata na mampan tu ho.”​—Jes. 54:17, Bibel siganup ari. w19.01 5-6 ¶12-13

Imbar do jolma sian binatang. Molo jolma, porlu do mamboto ise na manompa nasida. (Mat. 4:4) Holan jolma do na hea manungkun songon, “Aha do tujuan ni ngolu on?” dohot “Aha do na laho masa di ari na naeng ro?” Asa boi togu haporseaonta dohot parale-aleonta tu Debata, dilehon Ibana do Bibel. Jala marhite “naposo haposan” diparade do angka sijahaon. (Mat. 24:45) Alani i, molo tatangihon Debata, tadapot ma parbinotoan, bisuk, dohot las ni roha. Ala marragam do na diparade organisasi laho patoguhon haporseaonta, on mambahen hita marlas ni roha. (Jes. 65:13, 14) Angka na diparade organisasi, mangurupi hamu asa mananda Jahowa jala mangantusi isi ni Bibel. Jala mangurupi hamu asa marbisuk dohot marpangantusion na denggan. (Poda 2:10-14) Umpamana, molo marbisuk jala marpangantusion hamu, boi ma diboto hamu na adong do Debata. Jala botoonmuna ma, molo hepeng dohot arta ndang boi mambahen hamu marlas ni roha. Diurupi ma muse hamu laho pasidingkon angka ulaon dohot hasomalan na boi parohon jea. Alani i, ulahon ma angka na boi mambahen hamu gabe marbisuk jala marpangantusion! w18.12 16-17 ¶6-7

Ndang sadia leleng nai, dos ma umurta “songon ariari ni hau”. Alana, piga-piga hau boi do mangolu marribu taon. Alani i, ingkon tongtong do jolma sehat asa boi leleng mangolu. Tontu mansai las do roha molo boi mangolu di inganan na dame jala uli songon na disurirangkon ni si Jesaya. Jala tutu do surirang on laho saut! Pingkirhon ma angka janji ni Debata na patuduhon na laho saut do paradeiso i. Disi, dipasu-pasu Debata ma sude jolma. Ndang adong be binatang buas manang halak parjahat. Ndang adong be halak na mapitung, na nengel dohot na lumpu. Dibangun nasida do jabu laho diingani, jala gok parbue ni suan-suanan ni nasida. Umur ni nasida pe, umganjang do sian umur ni hau. Tangkas do didok di Bibel, na ingkon saut do paradeiso i. Alai piga-piga halak mandok, ndang di tano on i saut. Adong do bukti na patuduhon molo paradeiso i saut di tano on? Tingki di tano on Jesus, tangkas do dipaboa ibana na laho adong do paradeiso.​—Luk. 23:43. w18.12 5-6 ¶13-15

Nang pe nunga somal hita mambahen keputusan mangihuthon cara marpingkir ni keluarga manang pengalamanta, boi do i muba hombar tu angka na jotjot tapingkirhon. Alani i, molo sai tarimangi pingkiran ni Jahowa, gabe pos ma rohanta na dumenggan do pingkiranna. Gabe taronjar ma rohanta maniru pingkiran ni Jahowa. Asa boi tatiru pingkiran ni Jahowa, ‘unang ma tatiru angka halak na di portibi on’. Lapatanna, unang ma tatonton, tajaha, manang tabege angka na dihasogohon Debata. Rimangi ma tudosan on. Sasahalak na lomo rohana asa tongtong sehat, ingkon diallang do sipanganon na marvitamin. Tontu, ndang allangonna be angka sipanganon na so sehat manang na basi. Suang songon i ma hita, molo naeng maniru pingkiran ni Jahowa, unang ma tapamasuk angka na so denggan tu pingkiranta. w18.11 24-25 ¶14-15

Ingkon tongtong ma taulahon na taparsiajari. Di Bibel, dipatudos do hasintongan i songon ikat pinggang ni sahalak tentara. Najolo molo naeng marporang sahalak tentara, ingkon gomos do dibahen ikat pinggangna. Molo ndang dibahen songon i, olo do gabe bahaya manang gabe targanggu ibana tingki marporang. Suang songon i ma hasintongan i, ingkon gomos do i tatiop. Molo gomos tatiop hasintongan i, boi ma tapasiding pingkiran na sala. Jala boi ma hita mambahen keputusan na denggan. Jadi songon sahalak tentara na ingkon mamangke ikat pinggang tingki laho marporang, hita pe unang ma tatinggalhon hasintongan. Jala taulahon ma aha na naung taparsiajari. w18.11 13 ¶15

Asa taboto hasintongan sian Bibel, ingkon tabahen do pengorbanan. Molo dung ‘tatuhor hasintongan’, ‘unang ma tagadis’ i. Lapatanna molo dung tadapot hasintongan i, unang ma tatinggalhon. Molo didok na gratis, ndang na gabe so mararga. Hata ‘tuhor’ di bahasa Heber na dipaboa di Poda 23:23, boi do lapatanna “mandapot”. Jadi molo naeng mandapot na arga sasahalak, ingkon dibahen do pengorbanan. Umpamana, adong ma pisang na gratis di onan. Nang pe gratis pisang i, ingkon taalap do i tu onan. Jadi, ingkon adong do pengorbanan na tabahen laho mandapot i. Suang songon i ma molo naeng mandapot hasintongan, ingkon tabahen do pengorbanan asa boi tadapot i. w18.11 4 ¶4-5

Ditogihon Jesus do si Petrus, si Jakobus, dohot si Johannes mandongani ibana nangkok tu dolok na timbo. (Luk. 9:29-32) Diida nasida ma marsinondang bohi ni Jesus jala pangkeanna mansai bontar. Jala diida nasida si Musa dohot si Elia mangkata-hatai dohot Jesus taringot hamatean dohot haheheon ni Jesus. Dung i adong ma ombun manutupi nasida, jala dibege nasida ma soara ni Debata sian ombun i! Parnidaan i patuduhon, hasangapon dohot huaso ni Jesus tingki gabe Raja haduan di Harajaon ni Debata. Tontu, on patoguhon jala mampargogoi Jesus asa boi martahan mangadopi angka sitaonon na laho masa tu ibana. Jala parnidaan i, patoguhon angka sisean ni Jesus asa boi mangadopi angka hasusaan na laho masa tu nasida. Jala mangurupi nasida laho mangulahon tugas na dilehon Jesus tu nasida. Dung 30 taon, disurat si Petrus do taringot parnidaan i. On patuduhon, na tangkas dope diingot ibana parnidaan i.​—2 Ptr. 1:16-18. w19.03 10 ¶7-8

Aha do na mambahen halak Kristen na sintong imbar tu angka halak sian agama palsu? Tongtong ma hita “mandok hata hasintongan”. (Sak. 8:16, 17) Ingkon jujur do hita tu angka halak na so tatanda, dongan sakarejo, ale-alenta, dohot keluarga. Molo hamu sahalak na poso, ra lomo do rohamuna asa boi marsaor dohot donganmuna. Ala songon i do pangkilalaan na poso, gabe adong ma na mangihuthon pangalaho ni angka donganna na so Sitindangi. Burju do nasida di jolo ni keluargana, dohot di huria. Alai, tingki di media sosial manang marsaor dohot halak na so sisomba Jahowa, gabe imbar do pangalaho ni nasida. Na margabus do hamu tu natua-tuamuna, tu angka dongan di huria, dohot tu Jahowa. (Ps. 26:4, 5) Alai diboto Jahowa do tapasangap do manang taulahon na dihasogohon Ibana. (Mrk. 7:6) Jadi, taulahon ma poda na mandok, “Unang mangiburu roham mida halak pardosa, mangapian ma tagonan di biar mida Jahowa ariari.”​—Poda 23:17. w18.10 6-7 ¶14-15

Angka Sitindangi Ni Jahowa songon na marhaha maranggi do di liat portibi on. Dihaholongi nasida do angka donganna. (1 Joh. 4:21) Sipata dibahen nasida do pengorbanan laho mangurupi donganna, marragam cara do dibahen nasida laho patuduhon i. Umpamana, dilului nasida do dalan laho mamuji dohot mandok mauliate tu angka donganna. Molo taulahon i, na maniru Jahowa do hita disi.” (Eps. 5:1) Denggan jala tangkas do Jesus maniru Amana. Sai burju do Jesus tu angka halak. Didok ibana do, “Ro ma hamu tu ahu, hamu angka na loja jala na mamboan boban na borat, asa hupargogoi hamu.” (Mat. 11:28, 29) Molo tatiru Jesus jala “mangalehon roha tu na pogos” on mambahen las roha ni Jahowa, jala hita pe marlas ni roha. (Ps. 41:2) Alani i, tongtong ma hita patuduhon holong tu keluarga, dongan sahuria, jala tingki marbarita na uli. w18.09 27 ¶1-2

Mangurupi angka dongan na hona bencana pe sada cara asa rap saulaon dohot Jahowa. Umpamana, boi do talehon sumbangan. (Joh. 13:34, 35; Ul. 11:27-30) Asing ni i, dohot ma hita paiashon manang paturehon angka bangunan na sega. Songon donganta sian Polandia na margoar si Gabriela, las do rohana ala diurupi angka dongan sian huria na asing laho paturehon jabuna na sega ala hona banjir. Tingki diingot ibana pengalamanna i gabe ndang holsoan be ibana nang pe mago godang artana. Gariada pangurupion sian angka dongan i do na sai diingot ibana. Didok ibana, “Alani pengalaman on gabe pos ma rohangku, sada hasangapon na sumurung do gabe bagian sian naposo ni Jahowa di liat portibi on, jala parohon las ni roha do i.” Godang do donganta na mandapot pangurupion sisongon i tongtong marlas ni roha. Jala angka dongan na mangalehon pangurupion i pe tong mangkilala las ni roha.​—Ul. 20:35; 2 Kor. 9:6, 7. w18.08 25 ¶12

Asa boi denggan tajaga rohanta, ingkon taboto do aha na boi manegai rohanta jala ingkon hatop do i tapasiding. Hata “jaga” paingothon hita taringot tugas ni sahalak panjaga. Alana, di tingki ni si Salomo, sahalak panjaga ingkon jongjong do di tembok ni kota. Molo adong bahaya na ro, pintor hatop do dipaboa ibana. Tudosan on, mangurupi hita asa mamboto aha na ingkon taulahon asa taboto pasidingkon aha na boi manegai rohanta. Di tingki najolo, sahalak panjaga tembok ni kota ingkon kerjasama do dohot na manjaga gerbang kota. (2 Sam. 18:24-26) Molo ro musu, ingkon dipastihon nasida do naung ditutup gerbang. (Neh. 7:1-3) Panggora ni roha naung dilatik Bibel, dos do songon panjaga ni tembok i. Dipaingot do hita molo adong bahaya sian Sibolis na boi manegai pingkiran dohot rohanta. Alani i, tingki dipaingot panggora ni rohanta hita, tatangihon ma jala pintor pasiding ma na boi manegai rohanta. w19.01 17 ¶10-11

Tingki sintua maradophon angka na poso, ndang boi mangihuthon hasomalan dohot pamingkirion ni nasida. Alai ingkon poda ni Bibel do na diihuthon nasida. (2 Tim. 3:16, 17) Molo angka sintua ndang mangihuthon tudu-tudu ni Bibel, gabe diambati nasida do angka na poso mandapot tanggung jawab. Umpamana di sada luat, adong ma sada parhobas di huria na denggan mangulahon tanggung jawabna. Jala diboto angka sintua do molo ibana sasintongna nunga boi gabe sintua. Hape, adong piga-piga sintua na naung matua mandok molo parhobas i paposohu dope gabe sintua. Ala songon i pamingkirion ni angka sintua i gabe ndang dilantik parhobas i. Taboto ma, godang do na songon i dope pamingkirionna. Alani i, ringkot ma mangihuthon tudu-tudu sian Bibel jala unang ma mangihuthon pamingkirionta. Taihuthon ma poda ni Jesus, jala unang ma paimbar-imbarhon halak sian na taida.​—Joh. 7:24. w18.08 14 ¶16-17

Jolo rimangi ma hatorangan sian e-mail manang SMS na laho dibagihon hamu. Alana boi do i parohon jea tu na asing. Umpamana, di piga-piga luat diorai pamarenta do ulaonta. Jala dibahen na marsogo ni roha do gabus laho pabiar-biarhon hita manang mambahen hita curiga tu angka donganta. Songon i ma na masa di Uni Soviet najolo. Disi adong polisi sian KGB (Komisi Keamanan Soviet). Didok polisi i do tu donganta molo piga-piga sintua di huria, nunga kaluar sian organisasi ni Jahowa. Ala pintor porsea tu hatorangan i gabe sega do haporseaon ni nasida. Godang do na kaluar sian organisasi ni Jahowa. Alai ndang sadia leleng adong do na mulak tu organisasi, alai na deba nai ndang. (1 Tim. 1:19) Songon dia do asa unang masa i tu hita? Pasiding ma cerita na so sintong dohot hatorangan na so denggan. Jadi molo ndang jolo tadapot hatorangan na sintong taringot na tabege, unang ma pintor porsea hita. w18.08 5-6 ¶8

Di manuskrip Junani najolo, ndang sai dipangke tanda baca. Saonari di godangan bahasa, dipangke angka penerjemah do tanda koma asa mura mangantusi lapatan ni sada kalimat. On mambahen sungkun-sungkun rohanta. Toho do didok Jesus, “Tutu do na hudok on tu ho, sadari on rap do ho dohot ahu di Paradeiso?” Manang, “Tutu do na hudok on tu ho sadari on, rap do ho dohot ahu di Paradeiso?” Hea do didok Jesus tu angka siseanna taringot parmatena. Didok ibana, “Songon i ma Anak ni jolma i di bagasan kuburan tolu ari tolu borngin.” (Mat. 12:40; 16:21; 17:22, 23; Mrk. 10:34; Ul. 10:39, 40) Jadi, dung mate Jesus dohot parjahat i, ndang pintor laho nasida tu Paradeiso. Alai dipaboa di Bibel, “di Kuburan” dope Jesus saleleng tolu ari, sahat tu na dipahehe Debata ibana. (Ul. 2:31, 32) Tingki didok Jesus taringot Paradeiso tu parjahat i, ndang na di surgo na nidokna disi. Sian dia taboto? Alana, ndang diboto parjahat i naung marjanji Jesus tu angka apostelna na setia na laho rap nasida mamarenta di surgo. (Luk. 22:29) Jala parjahat i pe, ndang tardidi dope. (Joh. 3:3-6, 12) Alani i, tingki marjanji Jesus tu parjahat i, tontu paradeiso na di tano on do na nidokna. w18.12 6-7 ¶17-18; 8 ¶20-21

Ndang sadia leleng, disomba halak Israel ma patung ni anak ni lombu! Nang pe nunga sala ulaon i, alai dirimpu nasida marpihak dope Jahowa tu nasida. Jala didok si Aron do panombaon i “ari raya di Jahowa”. Songon dia ma Jahowa mangida i? Didok Jahowa ma tu si Musa, nunga marbalik roha ni nasida, jala ndang diihuthon be podaNa. Muruk situtu do Jahowa jala naeng ripashononNa do saluhut bangso i. (2 Mus. 32:5-10) Alai ndang jadi diripashon Jahowa bangso Israel. (2 Mus. 32:14) Nang pe dohot si Aron mambahen anak lombu mas i, alai marpihak tu Jahowa do ibana dohot piga-piga halak Lepi. Gabe mate do marribu halak na manomba gana-ganaan i. Alai malua do nasida. Jala marjanji do Debata laho mamasu-masu nasida.​—2 Mus. 32:26-29. w18.07 18-19 ¶13-16

Sian dia do hasangapon na dumenggan boi tadapot? Ndang alani hamoraon, timbo singkolana, manang tarbarita asa tadapot i. Taringot i didok si Paulus do, “Saonari nunga ditanda hamu Debata jala nunga ditanda Debata hamu. Alani i, boasa mulak hamu muse mangihuthon angka na so marguna na di portibi on jala olo hamu diparhatoban angka i?” (Gal. 4:9) Sada hasangapon di hita boi “ditanda Debata”, Parhuaso na Umgogo! Tangkas do ditanda Jahowa hita, dihaholongi, jala lomo do rohaNa asa marale-ale hita tu Ibana.​—Pjm. 12:13, 14. w18.07 3-4 ¶3-4

Asa marguna uhum ni Debata di ngolunta, ingkon tahaholongi jala taargai do i. (Am. 5:15) Alai songon dia carana? Ingkon taihuthon ma pingkiran ni Jahowa. Rimangi ma. Umpamana ndang boi hamu renges modom. Jadi, disuru dokter ma hamu asa gok mangallang sayur, olahraga, jala ingkon taratur do ngolumuna. Dung diulahon hamu i, gabe boi ma hamu renges modom! Tontu gabe diargai hamu do tudutudu ni dokter i, ndang i? Suang songon i ma Debata. Dilehon Ibana do uhum tu hita, asa unang na roa na tadapot jala asa lam denggan ngolunta. Umpamana, diajarhon Bibel do asa unang margabus, mangoto-otoi, manangko, mangulahon na rorang, mangulahon na jahat, manang mardatu. (Poda 6:16-19; Pgk. 21:8) Molo nunga taulahon i jala tadapot do na denggan, gabe lam holong ma rohanta tu Debata dohot tu uhumNa. w18.06 16 ¶5-6

Ra, na mabiar do si Latus molo dijujui Jesus halak Jahudi asa mangalo halak Rom. Alai, dialusi Jesus do, “Ndang sian portibi on Harajaonku.” (Joh. 18:36) Ndang olo Jesus dohot tu politik, alana di surgo do harajaonna. Jala didok ibana, laho ‘paboaon hasintongan i’ do ulaonna di tano on. (Joh. 18:37) Tangkas do diboto Jesus aha ulaonna. Ingkon songon i ma hita. Unang ma taihuthon manang tahalomohon partai politik, nang pe di bagasan rohanta sambing. Ndang mura mangulahon i. Songon na didok sahalak pengawas wilayah, lam garang do angka halak di hutana. Dirimpu angka halak, umjago do negarana, jala dumenggan do molo halak sian hutana na mamarenta. Didok pengawas wilayah i muse, “Alai, boi do angka dongan tongtong rap marsada, ala diharingkothon nasida do mamaritahon Harajaon ni Debata. Mangasahon Debata do nasida laho manalpuhon angka hajahaton dohot hasusaan na taadopi.” w18.06 5-6 ¶6-7

Di angka buku Heber, dipangke do goar “Setan” na lapatanna “Pangalo” laho mandok Sibolis. Alai holan tolu buku do na manurat taringot goar i, i ma di 1 Kronika, Job, dohot Sakaria. Boasa holan otik hatorangan taringot ibana andorang so ro Messias? Ndang pola godang dipaboa Jahowa taringot Sibolis di angka buku Heber. Alana, na tinuju ni angka buku i, i ma laho mangurupi angka halak asa mamboto taringot Messias jala mangihuthon ibana. (Luk. 24:44; Gal. 3:24) Dung ro Messias, dipangke Jahowa ma ibana dohot angka siseanna laho patorangkon taringot Sibolis dohot angka surusuruan na mangalo tu Debata. Boasa? Alana Jesus dohot angka na miniahan do na dipangke Jahowa haduan laho mangaripashon Sibolis dohot sude na mangihuthon ibana. (Rom 16:20; Pgk. 17:14; 20:10) Ingot ma, dao do umgogo Jahowa sian ibana. Boi do taalo musunta i ala diondingi Jahowa, Jesus, dohot angka surusuruan do hita. w18.05 15-16 ¶2-4

Lapatanna, holan angka na marparbue do na boi gabe naposo ni Jahowa. (Mat. 13:23; 21:43) Di tudosan na dipaboa di Johannes 15:1-5, marparbue ndang lapatanna ingkon marhasil mambahen halak gabe sisean. (Mat. 28:19) Alana, godang do angka donganta na tongtong marsihohot, alai ndang hea mambahen sasahalak gabe Sitindangi. Jadi, nasida do na didok na so marparbue? Ndang songon i lapatanna! Ndang boi tapaksa angka halak asa gabe sisean ni Jesus. Jala parholong do Debata. Ndang hea dipangido ibana hita asa mangulahon na so tolap taulahon. Holan na boi taulahon, i do na dipangido. (5 Mus. 30:11-14) Jadi, aha do lapatanna marparbue? I ma mangulahon sada tugas na boi taulahon. Tugas aha do i? I ma mamaritahon Harajaon ni Debata.​—Mat. 24:14. w18.05 5 ¶8-9

Saonari on, godang do pamimpin agama. Ra, jotjot do nasida dijou pastor, malim, manang goar na asing. Songon halak Parise do nasida. Ndang diajarhon nasida hasintongan sian Hata ni Debata, alai “dipillit nasida do mangkaporseai gabus”. (Rom 1:18, 25) Angka gabus na dibahen nasida i ma, “sahali malua, tongtong malua”, mangolu dope tondi ni na mate, mar-reinkarnasi do halak molo dung mate, jala ndang muruk Debata molo adong baoa mangoli tu baoa manang borua muli tu borua. Parpolitik pe margabus do laho mangoto-otoi jolma. Laho didok nasida ma bahenonna do portibi on ‘dame jala ndang adong be sihabiaran’. Hape “tompu ma diripashon nasida”. Jadi ndang na laho olo hita porsea molo didok nasida lam dame do portibi on. Sasintongna, nunga tangkas taboto, “songon haroro ni panangko di tingki borngin do haroro ni ari ni Jahowa i”.​—1 Tes. 5:1-4. w18.10 4-5 ¶6-8

Hita saonari mangolu di tingki na susa. Alani i, mura do gabe lungun jala metmet rohanta. Dipangke Jesus do angka donganta na miniahan dohot angka “induk”, i ma angka sintua na laho patoguhon hita. Angka sintua on ndang na laho “mangarajai” haporseaonta, alai na gabe “pangurupi” do nasida asa las rohanta. Lomo do roha ni nasida mangurupi hita asa marlas ni roha jala tongtong marsihohot. (Jes. 32:1, 2; 2 Kor. 1:24) Angka sintua boi maniru apostel Paulus na tongtong patoguhon angka donganna. Ditongos ibana do surat tu halak Kristen na di Tessalonik na susa alani paraloan. Disi didok, “Songon i do sian sihol ni rohanami di hamu huhalashon hami do mangalehon tu hamu barita na uli na sian Debata; lobi tahe, dohot ma antong dirinami, ala naung huhaholongi hami hamu.” (1 Tes. 2:8) Di ayat na diulas sadari on si Paulus mandok tu angka sintua di Epesus, laho mangurupi angka dongan ndang sae holan hata na patoguhon roha. w18.04 22-23 ¶6-8

Didok si Paulus do molo naeng tadapot haluaon i, ingkon tapajonok do dirinta tu Ibana. Lapatanna, ingkon togu do parale-aleonta tu Ibana. (2 Kor. 3:16) Tingki di halongonan, bangso Israel holan mangasahon pingkiran ni nasida sandiri. Ndang tarbungka roha dohot pingkiran nasida. Nasida holan mangihuthon lomo ni rohana sandiri. (Heb. 3:8-10) Haluaon na dilehon Jahowa ndang holan malua sian parhatobanan. Jala ndang boi jolma mangalehon haluaon sisongon i. Haluaon on mambahen hita gabe ndang be diparhatoban dosa, hamatean, dohot angka panombaon na so sintong. (Rom 6:23; 8:2) Mararga situtu do haluaon on! Gariada, boi do sasahalak mangkilala haluaon on, nang pe ibana gabe hatoban manang dipenjarahon.​—1 Mus. 39:20-23. w18.04 10 ¶3-5