November

Godang halak saonari mandok ndang marguna ajaran ni Bibel. Didok nasida do molo umringkot tabahen halak na asing, gabe mura ma hita dioto-otoi halak. Alai, aha do hasilna molo mangihuthon bisuk ni portibi on? Las do rohana? Denggan do keluarga dohot donganna? Boi do ibana marale-ale tu Debata? Molo pandapotmuna, dia do na dumenggan? Mangihuthon bisuk ni portibi on manang bisuk na sian Jahowa? (1 Kor. 3:19) Halak na mangihuthon halak na marbisuk di portibi on, dos do i songon halak na lilu manungkun dalan tu halak na lilu. Taringot halak na “marbisuk” di jaman ni Jesus, didok ibana, “Panogu-nogu na mapitung do nasida. Molo na mapitung manogu-nogu na mapitung, tarrobung do duansa.” (Mat. 15:14) Tutu ma, haotoon do di Debata bisuk ni portibi on. w19.05 24-25 ¶14-16

Di piga-piga taon na parpudi on, lam godang do halak na mangan roti dohot minum anggur di Borngin Parningotan. Gabe marsak do rohatta alani i? Daong. “Ditanda Jahowa do angka na di Ibana.” (2 Tim. 2:19) Nang pe boi dietong akka dongan sadia godang halak na mangan roti dohot minum anggur di Borngin Parningotan, alai dang diboto nasida ise do sasittongna halak na miniahan. Holan Jahowa do na mamboto i. Adong do halak na mangakku molo nasida halak na miniahan hape sasittongna daong. Umpamana, adong do halak naung leleng mangan roti dohot minum anggur, alai di pudian ni ari dang diulahon ibana be i. Na asing, adong do na paposhu rohana tu dirina sandiri jala didok rohana dohot do ibana mamaretta rappon Jesus di surgo. Alani i, dang boi tapastihon sadia godang halak na miniahan na tading dope di tano on. Adong dope akka halak na miniahan di tano on tikki ro Jesus lao mamboan nasida tu surgo. Didok do di Bibel, saleleng ari parpudi adong dope akka halak na miniahan na tading di tano on. (Pgk. 12:17) Alai dang dipaboa sadia godang bilangan ni nasida tikki ro hasusaan bolon. w20.01 29-30 ¶11-13

Dipatudu Jesus do sadia balga holong ni Jahowa tu ianakkonna marhite tudosan taringot anak na mago. (Luk. 15:11-32) Sai hirim do roha ni ama na dipaboa di tudosan i asa mulak muse anakna i. Tikki mulak anakna i, pittor dijakkon ibana do. Molo hea tatadikkon Jahowa alai olo hita marhamubaon, pos ma rohatta rade do Jahowa manjakkon hita muse. Lao padengganon ni Jahowa ma akka naung sega na dibahen si Adam. Dung mangalo si Adam, dipillit Jahowa ma 144.000 halak sian tano on lao gabe raja dohot malim rap dohot Jesus di surgo. Di tano na imbaru, diurupi nasida ma akka halak na setia asa gabe jolma na sempurna. Dung marhasil nasida mangadopi ujian na parpudi, lehonon ni Jahowa ma hangoluan na salelengna tu nasida. Tikki i, massai las do roha ni Debata mangida tano on marisi akka anakna naung sempurna. Tontu, massai denggan do ngolutta di tikki i! w20.02 6-7 ¶17-19

Boi do tasungkun dirinta, ‘Holan asa diida halak do umbahen na olo ahu muba manang marsitutu do ahu laho maniru Kristus?’ Hata ni Jesus na disurat di Mateus 12:43-45, patuduhon aha na ingkon taulahon. Parsiajaran na ringkot, i ma: Ndang sae holan pasidingkon pingkiran na sala, alai ingkon tapingkirhon do aha na dihalomohon Debata. Boi do hita paubahon roha dohot pingkiranta. Bibel mandok, “Pangke hamu ma pangalaho na imbaru hombar tu lomo ni roha ni Debata mangihuthon hasintongan dohot roha na marsihohot.” (Eps. 4:24) Alai ndang sai mura mangulahon i, jala ndang sae holan pasidingkon manang ndang mangulahon na sala. Porlu do hita paubahon ‘roha dohot pingkiran’. Lapatanna, ingkon tapauba do aha na tahalomohon, pangalaho dohot na jotjot tapingkirhon. Jala ingkon torus do on taulahon. w19.06 9-10 ¶6-7

Asi roha ni Jahowa tu si Lot. Disuru Jahowa do angka suru-suruan laho paluahon ibana dohot keluargana. Ala ‘lambat do si Lot’, ditiop suru-suruan i ma tangan ni si Lot jala diboan kaluar sian huta i. (1 Mus. 19:15, 16, Bibel siganup ari) Dung i, didok suru-suruan i ma asa lari ibana tu dolok. Alai ndang dioloi ibana Jahowa. Dipangido si Lot do asa tu kota na umjonok ibana laho. (1 Mus. 19:17-20) Sabar do Jahowa tu si Lot, jala dipaloas do si Lot laho tusi. Alai dung sahat di kota i, mabiar do ibana tading disi. Pinda ma muse ibana tu dolok, hape tusi do parjolo sahali disuru Jahowa ibana laho. (1 Mus. 19:30) Mansai sabar do Jahowa tu si Lot! Songon si Lot, ra adong do donganta na mambahen keputusan na sala jala gabe susa ibana alani keputusanna i. Molo masa sisongon i, aha do na taulahon? Ra olo do gabe tubu di rohanta mandok, alani salana sandiri do umbahen na masa i tu ibana. (Gal. 6:7) Alai adong do cara na dumenggan. Tatiru ma cara ni Jahowa mangurupi si Lot. w19.06 20-21 ¶3-5

Tingki diorai angka musu ulaonta, lomo roha ni nasida mambahen hita asa mabiar laho manomba Jahowa. Ra, didok nasida do angka na so sintong taringot hita. Olo do disuru polisi ro tu jabunta jala dipaksa hita diboan tu pengadilan. Manang adong do piga-piga donganta na dipenjara. Didok roha ni nasida molo adong donganta na di penjara, on mambahen hita gabe mabiar. Alai molo mabiar hita, boi do gabe gale hita manang ndang be manomba Jahowa. Tontu, ndang olo hita gabe songon halak na didok di 3 Musa 26:36, 37. Unang ma tapaloas biar ni roha mambahen hita gabe ndang manomba Jahowa. Pos ma rohanta tu Jahowa jala unang mabiar. (Jes. 28:16) Martangiang ma hita mangido tudu-tudu sian Jahowa. Pos ma rohanta, ndang adong manang ise pe na boi mangambati hita manomba Jahowa. Nang pe diorai ulaonta, boi do i mambahen hita gabe lam marsitutu manomba Jahowa jala ndang pola mabiar. w19.07 9 ¶6-7

Nang pe ndang adong na diurupi hamu marsiajar Bibel, unang ma menyerah. Ingot ma, dipatudos Jesus do ulaon mambahen sisean songon na manjala dengke. Ingkon marjam-jam do karejo angka panjala dengke asa boi dapot ni nasida dengke. Jotjot do nasida manjala tingki borngin, manang tingki sogot dope ari. Sipata, ingkon laho do nasida sahat tu inganan na dao. (Luk. 5:5) Suang songon i ma, ingkon sabar do piga-piga Sitindangi marbarita di tingki sadihari pe jala didia pe. Boasa? Asa boi godang halak na dijumpangi nasida. Ala marsitutu mangulahon i, jumpang ni nasida do angka halak na olo manangihon barita na tapasahat. Boi do hamu marbarita di tingki manang di inganan na godang halak boi dijumpangi? Boasa ingkon sabar hita tingki mangurupi halak marsiajar Bibel? Alana ingkon taurupi do ibana mamboto jala mangkaholongi angka ajaran ni Bibel. Jala ingkon taurupi do ibana muse mamboto jala mangkaholongi Jahowa, i ma Pangarang ni Bibel. w19.07 18 ¶14-15

Ra, adong do sian hita na manguhumi dirina sandiri alani dosana najolo. Molo songon i, bahen ma pelajaran pribadi taringot tobusan ni Jesus. Molo taparsiajari, tarimangi, jala tatangiangkon na taparsiajari i, on mangurupi hita asa unang sai manguhumi diri sandiri. Unang be sai tapingkiri dosa naung disesa Jahowa. Adong do muse parsiajaran na asing na boi tatiru sian si Paulus. Saonari, godang do angka donganta na manadingkon karejo na jago asa boi lam godang tingkina laho marbarita. Molo songon i do na taulahon, boi do hita mangalupahon jala ndang sai mamingkirhon angka naung tatadingkon i? (4 Mus. 11:4-6; Pjm. 7:10) “Angka naung salpu”, boi do muse lapatanna angka na denggan naung hea taulahon tingki marhobas tu Jahowa, manang songon dia hita marhasil mangadopi ambat-ambat. Tontu molo taingot muse songon dia Jahowa mamasu-masu jala mangurupi hita, gabe lam solhot ma hita tu Ibana. Alai, unang ma didok rohanta nunga sae be angka naung taulahon tu Jahowa.​—1 Kor. 15:58. w19.08 3 ¶5-6

Tikki sadihari jala didia pe, boi do hita martangiang tu Debata. Sai ditangihon Ibana do tangiangta. Tikki taboto na sai ditangihon Jahowa tangiangta, gabe lam holong ma rohatta tu Ibana. Sahalak panurat psalmen mandok, “Holong do rohangku di Jahowa, ai ditangihon do ahu.” (Ps. 116:1) Dang holan ditangihon, alai dialusi Jahowa do tangiangta. Apostel Johannes mandok, “Manang aha na tapangido hombar tu lomo ni rohana, tangihononna do hita.” (1 Joh. 5:14, 15) Dialusi Jahowa do tangiangta, alai ra dang songon na tapikkirhon. Diboto Ibana do aha na dumenggan tu hita. I do alana sipata dang songon na tapangido i alusna, manang dipangido Ibana hita asa sabar paimahon. (2 Kor. 12:7-9) Disarihon Jahowa do hita. Diulahon Jahowa do tugasna gabe sahalak ama. (1 Tim. 5:8) Dilehon Ibana do aha na porlu di ianakkonna ganup ari. Dang lomo rohana hita holsoan taringot sipanganon, pakkean dohot inganatta tading. (Mat. 6:32, 33; 7:11) Ala Ama na parholong do Jahowa, paradeonna do akka na tahaporluhon di ari naeng ro. w20.02 5 ¶10-12

Dang sude halak na marpakkirimon lao mangolu di surgo gabe “naposo haposan jala na marbisuk”. (Mat. 24:45-47) Dos songon abad na parjolo, saonari pe dipakke Jahowa dohot Jesus do piga-piga baoa lao mangalehon mangan manang mangajari naposona. Di abad na parjolo, dang sude halak Kristen na miniahan dipakke lao manurat akka Bukku Junani Kristen. Jala saonari pe, holan piga-piga halak Kristen na miniahan do na martanggung jawab lao mangalehon naposo ni Debata “mangan di tingkina”. Jahowa do na mamillit halak na lao mangolu salelengna di tano on dohot na mangolu di surgo. Dipasu-pasu Jahowa do sude naposona, i ma na digombarhon gabe “halak Jahudi” dohot “sampulu halak”. Dipangido Ibana do nasida asa unduk tu patikna jala toktong setia. (Sak. 8:23) Alani i, ikkon serep do roha ni nasida sude. Ikkon rap do nasida manomba Jahowa jala marsada. Jala, ikkon toktong do dijaga nasida hadameon di huria. Ala naung jonok nama ari ni Jahowa, rap ma hita sude gabe “sada punguan” na toktong manomba Jahowa dohot mangihuthon Kristus. w20.01 31 ¶15-16

Ndang boi tapaksahon keluarganta asa manjalo barita na uli. Alai boi do tajujui nasida asa mambungka roha dohot pingkiran ni nasida tu Bibel. (2 Tim. 3:14, 15) Patudu ma pangalaho na denggan. Umjotjot do diparrohahon keluarganta aha na taulahon sian aha na tahatahon. Tongtong ma urupi keluargamuna. Dilehon Jahowa do sitiruon tu hita. “Tongtong” do dilehon Ibana tingki tu angka halak asa manangihon barita na uli jala mandapot hangoluan salelengna. (Jer. 44:4) Asing ni i, didok si Paulus do tu si Timoteus asa tongtong mangurupi na asing. Boasa? Alana molo diulahon ibana i, boi do i paluahon dirina dohot na manangihon ibana. (1 Tim. 4:16) Ala tahaholongi do keluarganta, lomo do rohanta asa diboto nasida hasintongan na sian Bibel. w19.08 14 ¶2; 16-17 ¶8-9

Taingot ma, molo adong donganta na marsitutu pasingothon hita, ra ala balga do hasalaan na taulahon i. Ra, mulana ndang lomo rohanta manangihon sipasingot i. Gariada, gabe muruk do hita tu na mangalehon sipasingot i manang tu carana pasahathon i. Alai molo serep rohanta, marsitutu do hita manjalo sipasingot i. Diargai halak na serep roha do sipasingot. Umpamana: Bayangkon ma molo di parpunguan hamu. Tingki mangkatai dohot piga-piga dongan, sada sian nasida manat paboahon tu hamu na adong saotik sipanganon na longkot di iponmuna. Tontu maila do hamu. Alai mandok mauliate do hamu tu ibana ala nunga dipaboa i tu hamu. Gariada ra didok rohamu do, tuani ma adong na hatop paboahon i tu hamu! Suang songon i ma, molo serep rohanta, mandok mauliate do hita molo adong dongan na barani pasingothon hita di tingki na pas. Ale-alenta do ibana, ndang musunta.​—Poda 27:6; Gal. 4:16. w19.09 5 ¶11-12

Dilehon Jahowa do tugas na ringkot tu angka ina di keluarga ni nasida. Martanggung jawab do nasida tu ianakhonna. Aha na diulahon dohot na dihatahon sahalak ina, adong do pengaruhna tu ianakhonna saleleng ngoluna. (Poda 22:6) Taulas ma aha na boi diparsiajari angka ina sian contoh ni si Maria, omak ni Jesus. Tangkas do diboto si Maria Hata ni Debata. Unduk do ibana tu Jahowa jala togu do parale-aleonna tu Ibana. Rade do ibana mangulahon parenta ni Jahowa, nang pe gabe muba ngoluna alani i. (Luk. 1:35-38, 46-55) Angka ina, aha do na boi diparsiajari hamu sian si Maria? Na parjolo, sai patogu ma parale-aleonmuna tu Jahowa marhite ringgas marsiajar Bibel sahalakmuna dohot martangiang. Na paduahon, rade ma mambahen las roha ni Jahowa, nang pe gabe adong na muba di ngolumuna. w19.09 18 ¶17-19

Dilehon Debata ma parnidaan tu Apostel Johannes taringot ari na naeng ro. Di parnidaan i, adong sada suru-suruan mandok tu opat suru-suruan na asing asa maniop alogo ni hasusaan bolon sahat tu na dimeteraihon sada punguan naposo ni Debata. (Pgk. 7:1-3) Punguan on, i ma 144.000 halak na laho mamarenta rap dohot Jesus di surgo. (Luk. 12:32; Pgk. 7:4) Dung i, dipaboa si Johannes ma muse taringot punguan na asing. Mansai balga do punguan i umbahen didok ibana, “Huida ma sada punguan bolon na so habilangan ni jolma, na ro sian saluhut bangso, marga, dohot bahasa. Jongjong do nasida di jolo ni habangsa i dohot di jolo ni Anak ni Biru-biru i.” (Pgk. 7:9-14) Mansai las do roha ni si Johannes, ala di ari na naeng ro godang do halak na manomba Debata marhite cara na sintong! Dipatogu do haporseaon ni si Johannes alani parnidaan i. Tarlumobi ma hita, lam dipatogu do haporseaonta ala di tingkinta saonari do masa parnidaan i! Saonari, marjuta halak naung manomba Jahowa. Jala marpangkirimon do nasida asa malua sian hasusaan bolon jala mangolu salelengna di tano on. w19.09 26 ¶2-3

Bayangkon ma nunga didok angka bangso boa-boa “dame do jala ndang adong be sihabiaran”. Ra didok nasida nunga dame be portibi on. Jala lomo roha ni nasida asa porsea hita na marhasil do nasida pasaehon sude hasusaan na di portibi on. Alai ndang boi diambati nasida aha na laho masa dungkon i! Laho dihancurhon do “Babel na Balga”! (Pgk. 17:5, 15-18) “Debata do na mangonjar roha ni nasida laho mangulahon lomo ni rohana.” Aha do lomo ni roha ni Debata? Laho manghancurhon sude agama palsu, dohot ma i angka agama na mangangku Kristen. Dibahen Debata do lomo ni rohana tu roha ni “sampulu tanduk” sian “binatang buas na rara songon api”. Sampulu tanduk, manggombarhon angka pamarenta na gabe bagian sian “binatang buas”, i ma Perserikatan Bangsa-Bangsa. (Pgk. 17:3, 11-13; 18:8) Tingki diserang pamarenta angka agama palsu, dimulai ma hasusaan bolon. Tompu do i masa jala balga do pengaruhna tu sude jolma di portibi on. w19.10 14 ¶1, 3

Di abad na parjolo, sahalak na margoar si Diotrepes mangiburu tu akka na manguluhon di huria. Lomo rohana “patimbohon dirina” di huria. Alani i, diparoa-roa ibana ma apostel Johannes dohot akka dongan na martanggung jawab di huria. (3 Joh. 10) Nang pe dang songon si Diotrepes, alai boi do hita gabe mangiburu tu dongatta na mandapot tugas na tahalomohon di huria, tarlumobi molo tahilala dumenggan do hita na mangulahon tugas i. Mangiburu, dos do songon suan-suanan na marasun. Molo nungnga marurat roha mangiburu i di rohatta, maol do i dicabut. Pikkiran na roa songon late ni roha, ginjang ni roha, dohot makkarikotton diri sandiri boi mambahen hita gabe lam mangiburu. Jala roha mangiburu boi mangambati hita patuduhon akka parange na denggan, songon holong, asi ni roha, dohot haburjuon. Molo tahilala adong tubu roha mangiburu di diritta, pittor hatop ma i tacabut. w20.02 15 ¶6-7

Didok Apostel Paulus do sitaonon i songon “suru-suruan ni Sibolis” na “sai mamungkuli” (“sai mamastapi”, surat na di toru) ibana. Ra, ndang Sibolis dohot suru-suruanna na langsung mambahen sitaonon ni si Paulus i. Alai tingki diboto nasida “suga” na diadopi si Paulus, ra dibahen nasida do i lam bagas masuk tu dagingna. Gabe lam hansit ma dihilala si Paulus. Aha do na diulahon si Paulus? Hea do dipangido si Paulus tu Jahowa asa dipamago “suga” i sian dagingna. Didok ibana, “Nunga tolu hali hupangido tu Tuhan [Jahowa] i asa dipamago i sian ahu.” Nang pe nunga didok si Paulus songon i, tongtong do adong suga i di dagingna. Na so dialusi Jahowa do tangiang ni si Paulus i? Tontu dialusi do. Tutu, ndang pintor dipamago Jahowa sitaononna i. Alai, dipargogoi Jahowa do si Paulus laho mangadopi i. Didok Jahowa, “Lam balga do huasongku alani hagaleonmi.” (2 Kor. 12:8, 9) Ala diurupi Debata, boi do si Paulus tongtong mangkilala hadameon dohot las ni roha!​—Plp. 4:4-7. w19.11 9 ¶4-5

Holan Jahowa do na tama tasomba, ala Ibana do Sitompa hita. (Pgk. 4:11) Alai, adong ambat-ambat na taadopi. Nang pe tahaholongi jala tapasangap Jahowa, alai olo do adong angka na asing na mambahen hita gabe ndang manomba Jahowa songon na dihalomohon rohana. Didok di Bibel, holong na mansai bagas tu Jahowa do na mambahen hita holan manomba Ibana. Alani i, ndang tapaloas ise pe manang aha pe manggantihon Ibana di rohanta. (2 Mus. 34:14) Godang do alasanta mangkaholongi Jahowa. Angka aha ma i? Godang do naung taparsiajari taringot Ibana. Tahalomohon do angka parangena. Taboto do aha na dihalomohon dohot na so dihalomohon rohana, jala songon i do pangkilalaanta. Taboto do jala dohot do hita mangulahon aha sangkapna tu jolma. Jala las do rohanta ala boi gabe ale-alena. (Ps. 25:14) Sude na taparsiajari taringot Jahowa, boi mambahen hita lam jonok tu Ibana.​—Jak. 4:8. w19.10 26 ¶1-3

Saonari, marragam do hasusaan na diadopi angka dongan. Ra, adong do na hona bencana alam manang susa alani porang. Tingki masa i, ra boi do tatogihon nasida tading di jabunta. Manang, boi do talehon sumbangan tu nasida. Alai sude hita, boi do mangido tu Jahowa asa diurupi nasida. Tingki taboto adong angka donganta na marmetmet ni roha, ra ndang taboto aha na laho tadok dohot na laho taulahon. Alai boi do taurupi nasida. Umpamana, talehon ma tingkinta tu nasida. Denggan ma tatangihon tingki dipaboa nasida songon dia pangkilalaanna. Asing ni i, boi do tapaboa ayat favorit na patoguhon roha. (Jes. 50:4) Alai na rumingkot, ingkon rade do hamu mangurupi angka dongan tingki dihaporluhon. Ingkon marsitutu do hita marale-ale jala patoguhon parale-aleonta i sian saonari. Parale-aleonta i ndang holan martahan sahat tu ajal ni portibi on. Alai martahan do i saleleng ni lelengna! w19.11 7 ¶18-19

On patuduhon, na holong do rohana tu Jahowa. Halak na mangalehon pelean i, keluargana, dohot angka malim boi mangallang jagal pelean i. Alai, adong piga-piga bagian sian pelean binatang i na ingkon dilehon tu Jahowa. Angka aha ma i? Dipaboa Jahowa do molo bagian na dumenggan sian pelean binatang, i ma tabo-tabona. Jala didok muse piga-piga bagian na asing sian binatang i, i ma ginjalna. (3 Mus. 3:6, 12, 14-16) Alani i, las do roha ni Jahowa tingki rade halak Israel mangalehon i gabe pelean. Jala on patuduhon na lomo do roha ni nasida mangalehon na dumenggan tu Jahowa. Suang songon i ma, dilehon Jesus do na dumenggan tu Jahowa ala holong do rohana tu Ibana. (Joh. 14:31) Lomo do roha ni Jesus mangulahon sangkap ni Debata. (Ps. 40:9) Mansai las do roha ni Jahowa tingki mangida Jesus rade mangulahon lomo ni rohana! w19.11 22-23 ¶9-10

Bibel mandok, dung “ari” paonomhon, so do Jahowa sian ulaonna manompa angka na adong di tano on. (1 Mus. 2:2) Alai lomo do roha ni Jahowa karejo jala marhite cara na asing, ‘tongtong do Ibana karejo’. (Joh. 5:17) Karejo do Jahowa saleleng onom ari jala maradi Ibana di ari papituhon. I do alana diparentahon Ibana halak Israel asa maradi di ari papituhon. Didok Debata molo ari Sabbat i gabe tanda parjanjian ni halak Israel dohot Ibana. (2 Mus. 31:12-14) Ndang diloas manang ise pe karejo di ari i, tarmasuk ma i dakdanak, hatoban, dohot binatang na di ladang. (2 Mus. 20:10) Di ari i, godang ma tingki tu angka halak laho patoguhon parale-aleonna tu Jahowa. Alai di tingki ni Jesus, dibahen angka pamimpin agama ma aturan na kaku taringot ari Sabbat. Didok nasida, ndang boi sasahalak mamutik biur ni gandum manang pamalumhon halak na marsahit di ari Sabbat. (Mrk. 2:23-27; 3:2-5) Ndang songon i na dihalomohon Debata, alani i dipatangkas Jesus ma taringot i tu angka na manangihon ibana. w19.12 3-4 ¶8-9

Molo jotjot taparsiajari taringot angka parangena, boi do i mangurupi hita maniru Ibana. Tangkas do ditanda si Daud Debata. Alani i, boi do ditiru ibana parangena tingki maradophon angka halak. Ala togu parale-aleon ni si Daud tu Jahowa, gabe holong hian do roha ni halak Israel tu ibana. Jala dipangke Jahowa do si Daud gabe contoh na denggan tu angka raja ni Israel na asing. (1 Raj. 15:11; 2 Raj. 14:1-3) Aha ma parsiajaranna tu hita? Ingkon tatiru do Debata. Tingki tatiru angka parangena, on patuduhon molo hita angka anak ni Debata. (Eps. 4:24) Tongtong do hita marsiajar taringot Jahowa. (Pjm. 3:11) Ra, godang do na taboto taringot Ibana. Alai na rumingkot, ingkon taulahon do na taparsiajari i. Molo taulahon i jala marsitutu maniru Ibana, pajonokon ni Jahowa ma dirina tu hita. (Jak. 4:8) Marhite Hatana, marjanji do Jahowa ndang tadingkononna angka halak na marsitutu mananda Ibana. w19.12 21 ¶20-21, 23

Holong do roha ni si Jakkob tu sude ianakkonna. Alai humolong do rohana tu si Josep na marumur 17 taon dope tikki i. Ala mamboto i, songon dia do pakkilalaan ni akka abang ni si Josep? Gabe mangiburu ma nasida jala muruk tu si Josep. Digadis nasida ma si Josep gabe hatoban jala didok ma tu bapakna, naung mate si Josep dibunu binatang liar. Ala mangiburu, gabe dang adong be hadameon di keluarga i. Dibahen nasida do mandele roha ni bapakna. (1 Mus. 37:3, 4, 27-34) Didok do molo mangiburu i termasuk sian akka “parniulaon ni daging”. Boi do i mambahen sasahalak dang parsidohot tu Harajaon ni Debata. (Gal. 5:19-21) Mangiburu, jotjot do i mambahen akka halak gabe marmusu, marbada, jala mura muruk. Contoh sian akka abang ni si Josep patuduhon songon dia roha mangiburu boi manegai parale-aleon dohot hadameon na adong di keluarga. Nang pe dang taulahon songon na diulahon nasida, alai sude hita dang sempurna jala akkal do roha i. I do alana, olo do sipata hita gabe mangiburu tu halak na asing. w20.02 14 ¶1-3

Sada tikki, dibuat Jahowa ma deba sian tondi parbadia na adong di si Musa jala dilehon ma i tu piga-piga sintua na jongjong di lambung ni kemah parpunguan. Dang leleng dukkon i, dibege si Musa ma adong dua sintua na so dohot tu kemah parpunguan alai mandapot tondi parbadia jala manurirangi. Aha do na diulahon si Musa tikki didok si Josua asa diorai ibana dua sintua i? Dang mangiburu si Musa tikki dilehon Jahowa tondi parbadia tu dua sintua i. Gariada, toktong do serep rohana jala marlas ni roha ala boi nasida manurirangi. (4 Mus. 11:24-29) Aha do na boi taparsiajari sian si Musa? Molo sintua hamu, hea do dipangido tu hamu asa mangalatik sasahalak lao mangulahon tugas na dihalomohon hamu di huria? Molo serep rohamuna songon si Musa, dang gabe jut rohamuna molo dipangido asa mangalatik dongan na asing na lao mangulahon tugas i. Gariada, ikkon las do rohamuna mangurupi ibana. w20.02 17 ¶9-11

Sahit boi mambahen hita marlungun ni roha. Ra, maila do hita tikki diboto halak na asing hita marsahit manang ala ikkon diurupi nasida. Nang pe dang diboto halak na marsahit hita, olo do gabe marsak hita ala dang boi be mangulahon aha na somal taulahon. Di tikki sisongon i, boi do Jahowa patoguhon hita. Songon dia carana? Di Bibel, dipaboa Jahowa do akka hata na denggan na paingothon hita na arga do hita di Ibana nang pe marsahit. (Ps. 31:20; 41:4) Molo tajaha Bibel, urupan ni Jahowa do hita pasidikkon arsak ni roha alani sahit. Pos ma rohamu na diantusi Jahowa do songon dia pakkilalaanmuna. Pangido ma tu Ibana asa diurupi hamu pasidikkon arsak ni roha. Lului ma akka ayat ni Bibel na boi patoguhon rohamuna. Rimangi ma akka ayat na patuduhon songon dia Jahowa mangargai akka naposona. Molo diulahon hamu i, idaonmuna ma na burju do Jahowa tu sude naposona na setia.​—Ps. 84:12. w20.01 15-16 ¶9-10; 17 ¶12

Halak na mamora do si Isak. I do alana gabe mangiburu do halak Palistim tu ibana. (1 Mus. 26:12-14) Alani i, gabe ditutup nasida ma sude sumur ni si Isak. Hape sian i do ibana mangalehon minum akka biru-biru dohot lombuna. (1 Mus. 26:15, 16, 27) Songon halak Palistim, piga-piga halak saonari gabe mangiburu tu hamoraon ni halak na asing. Nasida dang holan makkalomohon hamoraon ni halak na asing, alai didok rohana sai mago ma nian hamoraonna i. Mangiburu do akka pemimpin agama Jahudi tu Jesus ala dipasangap godang halak do ibana. (Mat. 7:28, 29) Na sinuru ni Debata do Jesus, jala diajarhon ibana do hasittongan. Alai, dipaboa akka pemimpin agama i ma gabus lao mambahen roa goar ni Jesus. (Mrk. 15:10; Joh. 11:47, 48; 12:12, 13, 19) Aha ma na boi taparsiajari? Ikkon marsitutu do hita asa unang mangiburu tu akka dongan na dihaholongi di huria ala parange ni nasida na denggan. Gariada, ikkon tatiru do parange ni nasida i.​—1 Kor. 11:1. w20.02 15 ¶4-5

Bayakkon ma hamu mangolu hira-hira 2.500 taon naung salpu di Persia jala naeng makkatai ma hamu tu raja na di luat i. Alai ikkon jolo mangido ijin ma hamu asa boi makkatai tu raja i. Molo dang, boi do dibunu hamu! Mandok mauliate do hita ala Jahowa dang songon raja Persia i! Boi do hita makkatai tu Ibana ganup tikki. Lomo rohana asa unang mabiar hita jonok tu Ibana. Nang pe adong do piga-piga gelar ni Jahowa songon, Sitoppa saluhut, na Sun Hinagogo, dohot Tuan Natumimbul, alai lomo do rohana asa tapakke gelarna na asing, i ma “Ama” tikki makkatai tu Ibana. (Mat. 6:9) Massai las do rohatta ala lomo roha ni Jahowa asa jonok hita tu Ibana! Tama do hita manjou Jahowa “Ama”, alana Ibana do na mangalehon hangoluan tu hita. (Ps. 36:10) Ala Jahowa gabe Ama di hita, ikkon taoloi do Ibana. Tikki taulahon aha na dipangido Ibana, dapotta ma godang pasu-pasu. (Heb. 12:9) Sada sian pasu-pasu i, i ma hangoluan na saleleng ni lelengna di surgo manang di tano on. Jala saonari pe, boi do tadapot laba ala unduk tu Ibana. w20.02 2 ¶1-3

Tujuatta, i ma mangurupi parsiajar Bibelta patoguhon parale-aleonna tu Debata. (Eps. 4:13) Tikki olo sasahalak marsiajar Bibel, ra didok rohana boi do ibana mandapot laba sian parsiajaran i. Molo dung holong rohana tu Jahowa, tottu gabe taronjar do rohana lao mangurupi na asing, dohot ma i akka dongan di huria. (Mat. 22:37-39) Di tikki na pas, boi ma dipaboa hamu tu ibana taringot hak istimewa lao mangalehon sumbangan tu ulaon marbarita. Ajari ma parsiajar Bibelmuna carana mangadopi parsoalan. Ra, nungnga gabe penyiar na so tardidi parsiajar Bibelmuna i. Didok ma tu hamu, haccit rohana dibahen sasahalak di huria. Unang ma pittor didok hamu ise na sittong dohot na sala. Alai paboa ma aha na didok Bibel na ikkon ulahononna. Ra, boi do pittor disalpuhon hasalaan ni donganta i. Molo dang pittor boi diulahon i, jujui ma ibana asa denggan makkatai tu donganta i lao mardame. (Bandikkon Mateus 18:15.) Urupi ma parsiajar Bibelmuna asa mamikkirhon aha na lao sidohononna. w20.01 5-6 ¶14-15

Mandok mauliate do hita ala olo Jahowa manalpuhon dosatta. Tapatudu ma i marhite martangiang paboahon sude hasalaanta, manjakkon sipasingot jala marsitutu asa unang be mangulahon dosa na sarupa. Molo taulahon i, gabe dame ma muse rohatta. Mansai dipatogu do rohatta ala mamboto “jonok do Jahowa tu angka halak na marsak roha, dipalua do angka halak naung mandele”! (Ps. 34:19, Bibel siganup ari) Ala nungnga jonok ajal ni portibi on, lam godang ma na boi mambahen marsak rohatta. Molo marsak hamu, pittor hatop ma martangiang tu Jahowa asa diurupi. Ringgas ma marsiajar Bibel. Marsiajar ma sian contoh ni si Hanna, Apostel Paulus, dohot Raja Daud. Pangido ma asa diurupi Jahowa hamu mamboto aha do na mambahen marsak rohamu. (Ps. 139:23) Paloas ma Ibana patoguhon hamu tikki mangadopi hasusaan, tarlumobi molo dihilala hamu dang tolap be hamu mangadopi i. Molo diulahon hamu i, boi ma hamu songon sahalak panurat psalmen na marende tu Jahowa. Didok ibana, “Di na sai ganggu jala susa ahu, dibahen Ho do las ni rohangku.”​—Ps. 94:19, Bibel siganup ari. w20.02 24 ¶17; 25 ¶20-21

Dipangke Debata do tondi parbadia laho pabotohon pingkiranna tu angka panurat ni Bibel. Alani i, tingki tajaha Bibel jala tarimangi, gabe tapamasuk ma pingkiran ni Debata tu pingkiran dohot rohanta. On boi mangurupi hita marhamubaon laho mambahen las roha ni Jahowa. (Heb. 4:12) Alai asa boi mandapot laba sian tondi parbadia, ingkon talehon do tingki laho marsiajar Bibel jala mangarimangi na tajaha. Dung i, tarida ma laba ni Hata ni Debata sian pangkataion dohot parniulaonta. Asing ni i, ingkon rap marpungu do hita dohot angka dongan. (Ps. 22:23) Adong do tondi parbadia ni Debata di parpunguan. (Pgk. 2:29) Alana tingki rap marpungu hita dohot angka dongan, martangiang do hita laho mangido tondi parbadia. Taendehon do ende Harajaon na dienet sian Bibel, jala tatangihon do tudu-tudu sian Bibel na dipasahat angka donganta na dilantik marhite tondi parbadia. Asa boi mandapot godang laba sian tondi parbadia, ingkon persiapan do hita jala ringgas ma mangalehon komentar di parpunguan. On mangurupi hita asa boi mandapot laba sian tondi parbadia di parpunguan. w19.11 11 ¶13-14