Januari

Dung “diida” Jesus ina na mabalu i, gabe “asi ma rohana”. (Luk. 7:13) Alai dang holan i, bertindak do Jesus lao mangurupi ina na mabalu i. Lambok do Jesus makkatai tu ibana, didok, “Unang be sai tangis ho.” Dibahen Jesus ma mukjizat jala dipahehe ma anak ni ina na mabalu i. Dung i “dipasahat Jesus ma [anakna i] tu omakna”. (Luk. 7:​14, 15) Aha ma na boi taparsiajari sian mukjizat ni Jesus on? Marsiajar do hita massai penting do patuduhon asi ni roha tu akka halak na berduka. Songon Jesus, tapakke ma daya pengamatan lao patuduhon asi ni roha tu akka halak na berduka. Berinisiatif ma hita mangurupi jala menghibur nasida sian hata dohot tindakanta. (Poda 17:17; 2 Kor. 1:​3, 4; 1 Ptr. 3:8) Nang pe sederhana i, alai massai balga do pengaruhna tu nasida. w23.04 5-6 ¶13-15

Nang pe diboto Jesus nungnga mate ale-alena si Lasarus, alai disi dope ibana tinggal saleleng dua ari nai. Dung pe i asa lao ibana tu Betani. Jadi dung sahat Jesus di Betani, nungnga opat ari si Lasarus mate. Lomo do roha ni Jesus mambahen mukjizat lao mangurupi akka ale-alena i jala lao pasangappon Debata. (Joh. 11:​6, 11, 17) Sian peristiwa na masa di Betani on, boi ma hita marsiajar taringot na marale-ale. Pikkirhon ma: Tikki disuru si Marta dohot si Maria halak paboahon barita tu Jesus, dang dipangido nasida asa ro Jesus tu Betani. Nasida holan paboahon na marsahit do si Lasarus ale-alena. (Joh. 11:3) Tikki mate si Lasarus, boi do sebenarna Jesus pahehehon ibana sian na dao. Alai ro do Jesus tu Betani asa boi mandongani ale-alena si Maria dohot si Marta. Adong do ale-alemuna na rade mangurupi hamu dang pola jolo dipangido? Molo adong, berarti ale-ale na boi diandalhon do ibana, na rade mangurupi hamu “tikki masa sitaonon”. (Poda 17:17) Tatiru ma Jesus, gabe ale-ale sisongon i ma hita tu na asing. w23.04 10 ¶10-11

Tikki masa sitaonon, bisa jadi hita merasa dang lao saut be janji ni Jahowa taringot tano na imbaru. Molo tubu perasaan sisongon i, na gale do haporseaotta? Belum tentu. Parrohahon ma ilustrasi on. Molo torus ro udan saleleng piga-piga minggu, olo do hita merasa dang na lao las be ari. Alai faktana pasti las do muse ari. Dos songon i ma tikki merasa kecil hati hita alani sitaonon, mungkin tahilala dang lao ro be tano na imbaru i. Alai molo togu haporseaotta, taboto do na lao saut janji ni Debata i. (Ps. 94:​3, 14, 15; Heb. 6:​17-19) Molo songon i haporseaotta, pasti tabahen do ulaon manomba Jahowa na uppetting di ngolutta. Porlu do muse haporseaon na togu tikki marbarita na uli. Alana godang do halak na merasa “barita na uli” taringot tano na imbaru dang mungkin terjadi. (Mat. 24:14; Hes. 33:32) Ikkon hati-hati do hita asa unang ragu tu na diajarhon Jahowa alani cara marpikkir sisongon i. Jadi porlu do tapatogu haporseaotta. w23.04 27 ¶6-7; 28 ¶14

Hea do sukkun-sukkun rohamuna alusan ni Jahowa do tangiangmuna manang na dang? Molo hea, dang holan hamu na songon i. Godang do akka dongan na merasa songon i khususna tikki masa sitaonon tu nasida. Tikki susa hita, olo do maol taida songon dia Jahowa mangalusi tangiangta. Boasa boi pos rohatta na dialusi Jahowa do tangiang ni akka naposona? Di Bibel dipaboa do na massai holong roha ni Jahowa tu hita jala arga do hita di Ibana. (Hag. 2:7; 1 Joh. 4:10) I do alana dipangido Jahowa tu hita asa mangido bantuanna marhite tangiang. (1 Ptr. 5:​6, 7) Lomo do rohana asa toktong jonok hita tu Ibana jala asa boi martahan mangadopi sitaonon. Jotjot do tajaha di Bibel songon dia Jahowa mangalusi tangiang ni akka naposona? w23.05 8 ¶1-4

Togu do parale-aleon ni si Maria tu Jahowa, jala haporseaonna dang bergantung tu si Josep. Takkas do diboto ibana Surat na Badia. Dilehon ibana do muse tikkina lao mangarimangi i. (Luk. 2:​19, 51) Takkas ma, parale-aleon ni si Maria na togu tu Jahowa mambahen ibana gabe istri na burju. Saonari godang do akka istri na berupaya maniru teladan ni si Maria. Contohna sahalak donganta na margoar si Emiko mandok, “Tikki lajang au, adong do hubahen rutin rohanikku. Alai dung menikah, suamikku do na martangiang tu hami jala manguluhon ibadat keluarganami. Alai lam leleng gabe bergantung tu suamikku do haporseaokku. Husadari ma tanggung jawabhu do manjaga parale-aleokku tu Jahowa. Jadi hubahen ma tikki sahalakku lao martangiang tu Ibana, manjaha Bibel, jala mangarimangi isina.” (Gal. 6:5) Hamu akka istri, molo torus hamu berupaya patoguhon parale-aleonmuna tu Jahowa, gabe lam godang ma alasan ni suamimuna lao mamuji jala makkaholongi hamu.—Poda 31:30. w23.05 22 ¶5-6

Biar tu Jahowa dang taboan sian na tubu. Ikkon marsiajar do hita patuduhon i. Sada cara asa boi tahabiari Debata, i ma mengamati akka toppaan. Lam takkas taida bisuk, huaso, dohot holong ni Jahowa sian “akka na dibahen Ibana”, gabe lam tergerak ma hita asa makkaholongi jala mangargai Ibana. (Rom 1:20) Cara na asing na boi mangurupi hita asa makkabiari Debata, i ma taratur martangiang. Molo taratur hita martangiang, lam nyata ma Jahowa i di hita. Tikki tapangido gogo sian Jahowa asa boi martahan mangadopi sitaonon, dipaingot do hita tu huasona na luar biasa. Tikki mandok mauliate hita tu Jahowa ala dilehon Ibana Anakna gabe tobusan, gabe dipaingot ma hita na massai holong do roha ni Jahowa tu hita. Jala molo tapangido petunjuk ni Jahowa tikki adong masalahta, dipaingot do hita tu bisuk ni Debata. Tangiang sisongon i mangurupi hita asa makkabiari Ibana. Molo taulahon on, gabe lam bertekad ma hita asa unang manegai parale-aleotta tu Ibana. w23.06 15 ¶6-7

Jahowa do Silehon Patik, jala takkas do dipaboa Jahowa patikna i asa mura diattusi naposona. Uppamana di abad na parjolo, dipaboa naposo haposan do tu halak Kristen di tikki i cara asa toktong togu: (1) unang manomba debata na so sittong, alai holan Jahowa ma na disomba, (2) mangargai hangoluan dohot mudar, jala (3) mangihutton paretta na disurat di Bibel asa unang mangulahon seks na so patut. (Ul. 15:​28, 29) Songon dia do halak Kristen saonari boi toktong togu mangulahon na tolu i? Holan Jahowa ma na tasomba jala na taoloi. Diparettahon Jahowa do halak Israel najolo asa holan manomba Ibana. (5 Mus. 5:​6-10) Jala tikki digoda Sibolis Jesus, takkas do didok Jesus holan Jahowa do na ikkon tasomba. (Mat. 4:​8-10) Alani i, dang olo hita manomba akka patung. Dang olo muse hita manomba jolma songon akka pamimpin agama, parpolitik, atlet, manang artis. Holan Jahowa ma na tasomba ala Ibana do na “manoppa saluhutna”.—Pgk. 4:11. w23.07 14-15 ¶3-4

Berusaha do portibi na dirajai Sibolis on manjujui akka halak asa mangulahon seks na so patut jala mangida pornografi. (Eps. 4:19) Jadi ikkon marsitutu do hita asa makkabiari Jahowa jala mandao sian na jahat. Di Poda bindu 9, adong dipaboa taringot dua borua na manggombarhon bisuk dohot manggombarhon haotoon. Diundang nasida do akka halak na so marpengalaman manang “halak na oto”. Didok nasida, ‘Ro ma ho tu jabukku jala allang ma rotikku.’ (Poda 9:​1, 4-6) Alai asing be do na lao masa tu akka halak na manjalo undangan ni nasida i. Pikkirhon ma undangan ni “borua na oto” i. (Poda 9:​13-18) Dang maila ibana manjou akka halak na so marpengalaman asa ro tu jabuna jala mangallang sipanganon na diparade ibana. Aha do na lao masa tu na manjalo undangan i? Na lao masuk ma nasida tu “bagasan Kuburan”. Dipasingot do hita taringot “boru-boru sibabi jalang” dohot “boru-boru na so hasea”. Dipaboa do muse tu hita disi “na mandapotton hamatean do molo lao tu jabuna”. (Poda 2:​11-19) Di Poda 5:​3-10 pe dipasingot do hita taringot “boru-boru na so hasea” na ‘mangalakka turun tu hamatean’. w23.06 22 ¶6-7

Ikkon gabe teladan do akka sintua patuduhon sikap masuk akkal. (1 Tim. 3:​2, 3) Misalna sahalak sintua dang mamaksahon asa diihutton pandapotna holan ala ibana do na uttua manang lebih berpengalaman sian sintua na asing. Sadar do ibana na boi tondi parbadia ni Jahowa mambahen sintua na dia pe mangalehon saran na marguna na boi mangurupi nasida mambahen keputusan na denggan. Jala molo godangan akka sintua setuju tu sada keputusan na so maralo tu prinsip ni Bibel, ikkon olo do ibana mendukung keputusan i nang pe bisa jadi berbeda sian pandanganna. Molo masuk akkal hita, godang do manfaat na tadapot. Boi ma lam denggan hubungatta tu dongan sahaporseaon jala dame ma huria. Boi ma hita muse marlas ni roha nang pe marasing-asing kepribadian dohot budaya ni naposo ni Jahowa. Jala na luar biasa, nang pe hita sude marasing-asing boi do hita gabe sada keluarga manomba Jahowa. Na uppetting, boi ma hita marlas ni roha mamboto nungnga tatiru be Jahowa, Debata na masuk akkal. w23.07 25 ¶16-17

Denggan do motif ni si Daniel mamparsiajari surirang, i ma lao mamboto hasittongan. Serep do roha ni si Daniel. Diboto ibana, urupan ni Jahowa do ibana mangattusi akka surirang i molo toktong ibana marale-ale tu Jahowa jala mangoloi parettana. (Dan. 2:​27, 28) Dipatudu si Daniel do muse na serep rohana ala diandalhon ibana bantuan ni Jahowa. (Dan. 2:18) Manat do muse si Daniel tikki mamparsiajari surirang i. Dibahen ibana do riset sian akka surat na badia na adong di tikki i. (Jer. 25:​11, 12; Dan. 9:2) Songon dia do hamu boi maniru si Daniel? Tapikkirhon ma alasanta mamparsiajari surirang. Ala naeng mamboto hasittongan do umbahen na diparsiajari hamu i? Molo i do, pasti diurupi Jahowa do hamu. (Joh. 4:​23, 24; 14:​16, 17) Alai adong do halak na asing motifna tikki mamparsiajari surirang. Adong do na naeng mambuktihon dang tutu Bibel i sian Debata. Alani i didok roha ni nasida, boi do nasida sandiri na manottuhon dia na sittong dohot na sala. Jadi ikkon denggan do motifta tikki marsiajar. w23.08 9 ¶7-8

Boi do gabe boban di hita molo tabandingkon diritta dohot na asing. (Gal. 6:4) Molo torus songon i hita, boi do gabe cemburu hita tu nasida jala gabe bersaing. (Gal. 5:26) Molo berupaya hita mangulahon songon na diulahon halak na asing, hape dang tolap hita, gabe susa do hita. Pikkirhon ma on: Didok Bibel boi do gabe metmet rohatta molo ‘sundat na tapaima-ima’. (Poda 13:12) Tarlumobi ma molo dang dapotta na tapaima-ima i. Akibatna gabe loja ma hita jala gabe lambat marlojong di parlumbaan i. Jadi unang ma paksahon dirimuna mangulahon lobi sian na tolapmuna. Alana dang hea dipangido Jahowa hita mangulahon na so tolapta. (2 Kor. 8:12) Pos ma rohatta, dang olo Jahowa mambandingkon hita dohot na asing. (Mat. 25:​20-23) Diargai Jahowa do upayatta, kesetiaanta, dohot ketekunanta melayani Ibana. w23.08 29 ¶10-11

Ditangihon Jahowa do tangiang ni si Simson. Dibahen Jahowa do mukjizat asa adong siinumon ni si Simson. Tikki diinum si Simson i, “mulak ma gogona jala las ma rohana”. (Pangh. 15:19 dohot surat na di toru.) Piga-piga taon dukkon i, tikki disurat Panurirang Samuel bukku Panguhum adong dope mata mual i. Aha do na diingot halak Israel tikki diida nasida mata mual i? Sai diurupi Jahowa do naposona na toktong mangandalhon Ibana di tikki na dihaporluhon. Nang pe adong bakatta jala godang pengalamanta, porlu do tapangido bantuan ni Jahowa asa marhasil hita mangulahon tugasta. Dung i, ikkon serep do rohatta jala mangakkui holan alani mangandalhon Jahowa do boi hita marhasil. Songon si Simson na margogo dung manginum aek na disediahon Jahowa, tapakke ma sude na disediahon Jahowa lao mangurupi hita asa toktong setia tu Ibana.—Mat. 11:28. w23.09 4 ¶8-10

Olo do ra adong halak na paroa-roahon goar ni Jahowa manang mangarehei hita ala mangihutton isi ni Bibel. Aha do na boi taulahon molo masa situasi na songon i? Martangiang ma hita tu Jahowa mangido tondi parbadia dohot bisuk asa boi tapatudu lambok ni roha. Alai boha ma molo tasadari nga gabe terpancing hita muruk tu nasida? Tangiakkon ma muse taringot i jala pikkirhon ma boha carana asa boi tapatudu lambok ni roha molo masa muse situasi na sarupa. Pasti dilehon Jahowa do tu hita tondi parbadia asa boi takendalihon diritta jala patuduhon lambok ni roha. Godang do ayat ni Bibel na boi mangurupi hita asa boi mengendalihon diri jala lambok makkatai di situasi na maol. Diurupi tondi parbadia ni Jahowa do hita mangingot akka ayat i. (Joh. 14:26) Misalna godang do prinsip di bukku Poda na boi mangurupi hita asa gabe halak na lambok roha. (Poda 15:18) Dipaboa do muse di Bibel aha manfaatna molo boi takendalihon diritta jala toktong tenang.—Poda 10:19; 17:27; 21:23; 25:15. w23.09 15 ¶6-7

Setia do Apostel Petrus manomba Jahowa saleleng martaon-taon. Rap do ibana mandongani Jesus tikki marbarita. Mulai do ibana marbarita tu akka halak na so Jahudi jala dukkon i gabe anggota punguan na mangaradoti do ibana. Tikki diboto si Petrus na lao mate nama ibana, dilehon Jahowa do muse tugas tu ibana. Hira-hira taon 62-64 M, dipakke Jahowa do ibana lao mambahen dua surat na gabe bagian ni Bibel, i ma bukku 1 dohot 2 Petrus. (2 Ptr. 1:​13-15) Tikki disuratton si Petrus dua suratna i, marragam do sitaonon na diadopi akka donganna. (1 Ptr. 1:6) Misalna, adong do halak na berupaya mangajarhon ajaran na so sittong jala marpangalaho na so denggan di huria. (2 Ptr. 2:​1, 2, 14) Asing ni i muse, susa do halak Kristen na tinggal di Jerusalem ala naeng ro halak Rom manghancurhon kota ni nasida dohot bagas joro. Didok si Petrus do tikki i “ujung ni saluhutna”. (1 Ptr. 4:7) Jadi surat ni si Petrus i boi mangurupi halak Kristen asa toktong setia nang pe nasida mangadopi sitaonon jala paradehon nasida lao mangadopi hasusaan na naeng ro. w23.09 26 ¶1-2

Dos songon Jesus, hita pe marsiajar do asa unduk tikki masa sitaonon tu hita. Misalna, tikki masa pandemi COVID-19, dipangido do tu hita asa unang tu Bale Harajaon be marpungu. Jala diorai do hita marbarita sian jabu tu jabu. Maol do dihilala hamu mangoloi petunjuk i? Alai ala olo do hamu unduk, gabe selamat ma hamu, toktong marsada dohot akka dongan sahaporseaon, jala gabe las ma roha ni Jahowa tu hamu. Saonari, nungnga lam rade be hita lao mangihutton petunjuk saleleng hasusaan bolon. Molo unduk hita tu akka petunjuk i, gabe selamat ma hita! (Job 36:11) Olo do hita unduk tu Jahowa, ala na holong do rohatta tu Ibana. Jala lomo rohatta mambahen las rohana. (1 Joh. 5:3) Dang boi tarbalosta sude na dibahen Jahowa tu hita. (Ps. 116:12) Alai boi do hita mangoloi Ibana dohot akka halak naung dilehon Ibana hak lao mambahen aturan tu hita. Molo unduk hita tu nasida, on patuduhon na marbisuk do hita. Jala molo marbisuk hita, gabe las ma roha ni Jahowa.—Poda 27:11. w23.10 11 ¶18-19

Bayakkon ma molo makkatai suru-suruan tu hamu. Olo do hamu manangihon ibana? Saonari on, adong do suru-suruan na makkatai “tu akka jolma na di tano on, tu saluhut bangso, suku, marga, dohot bahasa”. Didok ibana, ‘Habiari hamu ma Debata jala pasangap ma Ibana. . . . Somba hamu ma Ibana na manoppa banua ginjang dohot tano on.’ (Pgk. 14:​6, 7) Holan Jahowa do Debata na sittong, jala holan Ibana do na tama disomba. Mandok mauliate do hita ala dilehon Debata do hasangapon tu hita lao manomba Ibana di bagas joro na mulia! Aha do bagas joro na mulia i, jala didia do boi dapotta hatorangan taringot i? Dang sada bangunan bagas joro on, alai on manggombarhon pengaturan taringot ibadat na sittong na dibahen Jahowa marhite tobusan ni Jesus. Takkas do dipaboa Apostel Paulus taringot pengaturan on di suratna tu halak Kristen Heber na di Judea di abad na parjolo. w23.10 24 ¶1-2

Di taon 522 SM, marhasil do akka musu pasohon ulaon padenggatton bagas joro. Alai dipapos si Sakaria do roha ni halak Jahudi na urupan ni Jahowa do nasida, dang soal aha pe tantangan na diadopi nasida. Di taon 520 SM dipaloas Raja Darius do nasida asa padenggatton bagas joro, jala dilehon do bantuan tu nasida. Disuru do tong akka gubernur di daerah i lao mangurupi nasida. (Esr. 6:​1, 6-10) Marjanji do Jahowa na urupanna do nasida molo dijumolohon nasida padenggatton bagas joro. (Hag. 1:​8, 13, 14; Sak. 1:​3, 16) Ala dipatogu akka panurirang i, boi ma dipadenggan nasida bagas joro di taon 520 SM. Jala dang gok lima taon nungnga sae dipadenggan bagas joro i. Ala dijumolohon halak Jahudi mangulahon lomo ni roha ni Debata nang pe godang masalah ni nasida, gabe diurupi Jahowa do nasida. Hasilna, marlas ni roha ma nasida manomba Debata Jahowa.—Esr. 6:​14-16, 22. w23.11 15 ¶6-7

Godang do halak na hea mambege taringot si Abraham. Alai holan saotik do na diboto nasida taringot ibana. Molo hita, godang do na taboto taringot ibana. Taboto do ibana “Ama ni sude halak na porsea”. (Rom 4:11) Alani i olo do gabe sukkun-sukkun rohatta, ‘Boi do togu haporseaokku songon si Abraham?’ Boi. Sada cara asa togu haporseaotta songon si Abraham, i ma maniru teladanna. Sai diulahon si Abraham do sude na dipangido Jahowa tu ibana. Olo do ibana pinda tu inganan na dao sian hutana, tinggal di tenda saleleng martaon-taon, jala mangalehon anak haholonganna si Isak gabe pelean. Diulahon si Abraham pe i sude, ala massai togu do haporseaonna tu Jahowa. Alani haporseaon dohot parniulaonna i, gabe las ma roha ni Jahowa jala gabe ale-alena ma ibana. (Jak. 2:​22, 23) Songon i do tong na dipangido Jahowa tu hita sude, termasuk ma hamu. Lomo do roha ni Jahowa asa tabahen las rohana jala gabe ale-alena. Alani i, disurat si Paulus dohot si Jakobus do di Bibel taringot teladan ni si Abraham. w23.12 2 ¶1-2

Akka borua, marlatik ma asa denggan manangihon jala manat makkatai. Massai penting do on taparsiajari. Dipaboa Apostel Jakobus do nasehat na denggan di ayat sadari on. Molo manat ditangihon hamu tikki makkatai halak na asing, on patuduhon na parduli manang na “sapakkilalaan” do hamu tu nasida. (1 Ptr. 3:8) Molo dang diattusi hamu dope aha na dihatahon sasahalak jala songon dia pakkilalaanna, denggan ma sukkun tu ibana. Jala tikki naeng makkatai hamu tu ibana, jolo pikkiri hamu ma aha na lao sidohononmuna. (Poda 15:28) Sukkun ma tu dirimuna: ‘Sittong do na huhatahon on, jala patoguhon roha do on? Huargai do halak na asing?’ Marsiajar ma hamu sian akka borua na manat tikki makkatai. (Poda 31:26) Parrohahon ma aha na dihatahon nasida, jala songon dia cara ni nasida pasahatton i. Molo marlatik hamu mangulahon on, gabe mura ma hamu mardongan dohot halak na asing jala toktong mardame dohot nasida. w23.12 21 ¶12

Saonari dipakke Jahowa do keluargatta, akka dongan sahaporseaon, dohot akka sintua lao patoguhon hita. Alai tikki marsak hita, olo do dang lomo rohatta didongani halak na asing. Naeng ma nian sahalakta. Wajar do i. Alai aha do na porlu taulahon asa boi dipatogu Jahowa hita? Unang ma mandao sian halak na asing. Alana boi do gabe holan diritta dohot masalahta na sai tapikkiri. Akibatna gabe maol ma hita mambahen keputusan na denggan. Memang adong do tikkina hita naeng sahalakta, tarlumobi molo borat hian sitaononta. Alai molo palelengku hita mandao sian halak na asing, gabe dang boi be tahilala bantuan ni Jahowa. Alana marhite nasida do Jahowa patoguhon hita. Tajalo ma bantuan ni keluargatta, donganta, dohot akka sintua. Taanggap ma nasida na dipakke Jahowa lao mangurupi hita.—Poda 17:17; Jes. 32:​1, 2. w24.01 24 ¶12-13

Dang boi halak Nasir manggusting obukna. On patuduhon na dioloi nasida do Jahowa. Alai adong do halak Israel na so mangargai halak Nasir. Jadi ikkon barani do halak Nasir i imbar sian halak na asing jala mangulahon janji ni nasida. (Am. 2:12) Ala taoloi Jahowa, gabe diida halak ma na imbar hita sian nasida. Ikkon barani do hita paboahon tu akka dongan sakarejo manang sasikkola na Saksi Jahowa hita. Jala ala lam tu roana do pangalaho ni akka halak di portibi on, olo do lam maol tahilala mangihutton prinsip ni Bibel dohot marbarita na uli. (2 Tim. 1:8; 3:13) Alai taingot ma molo barani hita imbar sian akka halak na so sisomba Jahowa, gabe tabahen ma las roha ni Jahowa.—Poda 27:11; Mal. 3:18. w24.02 16 ¶7; 17 ¶9

Parrohahon ma songon dia situasi di huria Rom. Piga-piga sian nasida halak Jahudi do, i ma halak na sian gelleng diajari taringot Patik ni si Musa. Alai na deba ro sian bangso na asing, jala marragam do latar belakang ni nasida. Adong do halak Kristen na gabe hatoban, jala na asing halak na merdeka, bahkan adong do ra hatoban ni nasida. Aha do na mangurupi nasida asa toktong marsihaholongan? Dijujui Apostel Paulus do nasida asa ‘burju manjalo donganna na asing’. Aha do lapatanna? Hata “manjalo” di ayat on lapatanna burju manjakkon sasahalak, mamboan ibana tu jabu, manang patandahon ibana tu akka dongan na asing. Misalna, didok si Paulus do tu si Pilemon asa denggan manjalo hatobanna si Onesimus na hea lari sian si Pilemon. (Plm. 17) Asing ni i, dijakkon si Priskilla dohot si Akuila do si Apollos na so pola godang mamboto ajaran ni halak Kristen, jala ‘ditogihon nasida do ibana makkata-hatai’. (Ul. 18:26) Dang diloas halak Kristen perbedaan ni nasida mambahen nasida gabe dang marsada. Gariada, dijakkon nasida do akka dongan na asing. w23.07 6 ¶13

Boasa olo hita mangalehon ngolutta tu Jahowa? Alasan utamana, ala holong do rohatta tu Ibana. Alai dang holan perasaan sambing on. Holong do rohatta tu Jahowa ala nungnga tadapot “parbinotoan na bagas taringot tu lomo ni roha ni Debata”. (Kol. 1:9) Ala marsiajar Bibel hita, gabe pos ma rohatta (1) na tutu do adong Jahowa i, (2) Hata ni Debata do Bibel i, jala (3) na dipakke Ibana do organisasina lao mangulahon lomo ni rohana. Asa boi mangalehon ngolutta tu Jahowa, ikkon taboto do ajaran dasar ni Bibel jala taihutton paretta ni Jahowa di ngolutta. Marsitutu ma hita paboahon na taparsiajari tu halak na asing. (Mat. 28:​19, 20) Ala holong rohatta tu Jahowa, gabe taronjar do rohatta asa holan manomba Ibana. w24.03 4-5 ¶6-8

Menikah do si Abigail dohot si Nabal. Bibel mandok, halak na jahat jala kasar do si Nabal on. (1 Sam. 25:3) Pasti borat do di si Abigail rap dohot si Nabal. Adong do kesempatan di si Abigail maninggalhon suamina. Sada tikki, naeng dipamate si Daud do si Nabal ala jahat si Nabal tu ibana dohot akka tentarana. (1 Sam. 25:​9-13) Di tikki i, boi do lari si Abigail jala dipasombu ibana si Daud mangulahon rencanana i. Alai dang diulahon si Abigail i. Gariada dipapos ibana do si Daud asa unang dipamate si Nabal. (1 Sam. 25:​23-27) Boasa boi diulahon ibana songon i? Holong do roha ni si Abigail tu Jahowa, jala diargai ibana do pengaturan taringot perkawinan. Diboto si Abigail do na massai badia perkawinan di jolo ni Debata. Lomo do rohana mambahen las roha ni Debata. Alani i marsitutu do ibana mampartahatton perkawinanna, termasuk ma i menyelamatton suamina. Pittor bertindak do ibana asa unang dipamate si Daud suamina. w24.03 16-17 ¶9-10

Adong do ditanda hamu akka dongan na mambahen sederhana ngoluna asa boi mangalehon na unggodang tu Jahowa? Adong do ditanda hamu akka na poso na mandapot tantangan di sikkola, alai barani nasida imbar sian akka donganna? Adong do ditanda hamu halak na toktong setia tu Jahowa nang pe ditentang keluargana? Molo adong, marsitutu ma hamu patoguhon nasida. Jala paboa ma na massai diargai hamu do habaranion dohot sude pengorbanan na dibahen nasida tu Jahowa. (Plm. 4, 5, 7) Diboto Jahowa do na lomo rohatta mambahen las rohana. Jala diboto Ibana na lomo rohatta mambahen pengorbanan asa boi mangulahon janjitta tu Ibana. Diargai Jahowa do hita. Dilehon Ibana do tu hita kesempatan lao patuduhon holongta tu Ibana. (Poda 23:​15, 16) Alani i, anggiat ma hita torus melayani Jahowa jala mangalehon na dumenggan tu Ibana. w24.02 18 ¶14; 19 ¶16

Pikkirhon ma sada peristiwa di ujung ni taon 29 M, tikki dimulai Jesus pelayananna di tano on. Diundang ma Jesus dohot si Maria omakna tu pesta pernikahan di Kana. Ra martondong dope si Maria dohot keluarga ni pengantin i jala dohot do ibana marhobas disi. Alai tikki pesta habis ma anggur. Pittor hatop ma si Maria mandokkon tu Jesus anakna, “Dang adong be anggur ni nasida.” (Joh. 2:​1-3) Aha do na dibahen Jesus? Diuba Jesus do aek gabe “anggur na dumenggan”. (Joh. 2:​9, 10) Godang do mukjizat na dibahen Jesus saleleng pelayananna di tano on. Misalna hea do Jesus mangalehon mangan 5.000 bawa jala di tikki na asing 4.000 bawa. Sasittongna molo termasuk akka borua dohot dakdanak na dietong, boi do jumlahna lobi sian 27.000 halak. (Mat. 14:​15-21; 15:​32-38) Di dua peristiwa i dipamalum Jesus do tong godang halak na marsahit.—Mat. 14:14; 15:​30, 31. w23.04 2 ¶1-2

Tikki masa sitaonon na mambahen hita trauma, olo do gabe loja daging dohot pikkiranta. Olo do songon si Elia perasaanta. Dang semangat be hita lao dungo, jala naeng modom ma torus. (1 Raj. 19:​5-7) Porlu do hita diurupi asa toktong semangat manomba Jahowa. Tikki songon i situasitta, dipapos Jahowa do rohatta marhite ayat harian sadari on. Dihilala Raja Daud do bantuan ni Jahowa. Tikki adong sitaononna jala tikki mangadopi akka musuna ibana, didok ibana do tu Jahowa, “Dipakke Ho do tanganmu na gogo i lao mangurupi au.” (Ps. 18:35) Jotjot do dipakke Jahowa halak na asing lao patoguhon hita. Contohna si Daud. Tikki metmet rohana, ro ma ale-alena si Jonatan patoguhon ibana. (1 Sam. 23:​16, 17) Dos songon i ma tu si Elia. Dipakke Jahowa do si Elisa lao mangurupi ibana.—1 Raj. 19:​16, 21; 2 Raj. 2:2. w24.01 23-24 ¶10-12

Debata na burju do Jahowa jala mangalehon godang akka na denggan tu hita. Dipatudos ma haburjuon ni Jahowa i songon sahalak borua na disurat di Poda bindu 9. Nungnga diparade borua i jagal, dicampur ibana anggur, jala diparade ibana ma i sude di meja. (Poda 9:2) Dung i di ayat 4 dohot 5, didok borua i ma tu akka halak na oto, “Ro ma hamu tuson, allang ma rotikku.” Boasa ikkon tajalo undangan i? Alana lomo do roha ni Jahowa asa marbisuk sude anakna jala tetap aman. Dang olo Ibana taulahon na sala na ujungna tasolsoli jala mambahen susa ngolutta. I do alana “disippan Ibana do bisuk dos songon arta tu akka halak na tigor marroha”. (Poda 2:7) Molo tahabiari Jahowa, pasti berupaya do hita mambahen las rohana. Tatangihon ma akka nasehatna, jala las rohatta mangulahon i di ngolutta.—Jak. 1:25. w23.06 23-24 ¶14-15

Molo tahilala dang godang be na boi talehon tu Jahowa, pos ma rohatta diargai Jahowa do sude na tabahen lao pasonakkon Ibana. Sian dia taboto? Di jaman ni si Sakaria, dipangido Jahowa do panurirangna mambahen sada mahkota. Mahkota i dibahen sian mas dohot perak na dilehon halak Jahudi na tinggal dope di Babel. (Sak. 6:11) “Mahkota” i ma na gabe “parningotan”, asa sai diingot halak Israel sumbangan na dilehon halak Jahudi na tinggal di Babel. (Sak. 6:14) Jadi pos ma rohatta, dang lupahonon ni Jahowa sude upaya na tabahen lao manomba Ibana nang pe mangadopi sitaonon na borat. Saleleng ari parpudi pasti adong do sitaonon na masa tu hita. Jala lam tu susana do situasitta di ari na naeng ro. (2 Tim. 3:​1, 13) Alai unang ma gabe holsoan hita alani i. Taingot ma hata ni Jahowa na didok tu naposona di jaman ni si Haggai. Didok Ibana, “Ai donganakku do hamu. . . . Unang ma mabiar hamu.” (Hag. 2:​4, 5) Hita pe boi do pos rohatta, donganan ni Jahowa do hita molo tabahen na dumenggan tu Ibana. w23.11 19 ¶20-21

Sasittongna boi do dibahen Jahowa asa unang disurat kesalahan na dibahen si Petrus. Alai dipaboa do i di Bibel asa gabe parsiajaran tu hita. (2 Tim. 3:​16, 17) Molo taparsiajari songon dia si Petrus mangatasi hagaleonna, gabe taboto ma dang diharappon Jahowa hita asa sempurna. Alai lomo do rohana asa berjuang hita mangatasi hagaleonta. Boasa ikkon toktong hita berjuang? Nang pe tahilala nga marhasil hita mangatasi hagaleonta, boi do tabahen muse kesalahan. Alai torus do hita berupaya meraih tujuanta. Olo do di pudian ni ari tasolsoli aha na tadokkon manang na taulahon. Alai molo dang menyerah hita, pasti diurupi Jahowa do hita asa meraih tujuanta. (1 Ptr. 5:10) Asi ni roha na dipatudu Jesus tu si Petrus boi mangonjar rohatta asa toktong melayani Jahowa. w23.09 20-21 ¶2-3

Sasittongna boi do dipamalum Jesus si Lasarus, songon na didok si Marta di ayat sadari on. Alai lomo do roha ni Jesus mangulahon lobi sian i. Didok ibana ma tu si Marta, “Mulak mangolu do muse ibotomi.” Dipapos Jesus do muse roha ni si Marta, “Au do haheheon dohot hangoluan.” (Joh. 11:​23, 25) Takkas ma nungnga dilehon Debata huaso tu Jesus lao pahehehon halak na mate. Sebelumna nungnga hea dipahehe Jesus dakdanak borua dang leleng dung mate dakdanak i. Hea do muse dipahehe Jesus sahalak doli-doli na mate di sadari i. (Luk. 7:​11-15; 8:​49-55) Alai boi do Jesus pahehehon halak naung mate saleleng opat ari jala naung mulai busuk bakkena? Ro ma si Maria, iboto ni si Lasarus na sada nai manjuppangi Jesus. Sarupa do hatana songon si Marta, didok ibana, “Molo dison hian ho Tuan, dang mate ibotokki.” (Joh. 11:32) Tikki dibege jala diida Jesus si Maria dohot na asing tangis, gabe lungun ma rohana. Alani asi ni rohana tu akka ale-alena i, gabe tangis ma Jesus. Diboto ibana do songon dia haccitna molo mate halak na dihaholongi. Jadi, lomo hian do roha ni Jesus lao manalpuhon akka na mambahen nasida tangis! w23.04 10-11 ¶12-13