Tingki Didok Roham Tumagon Mate

Si Adriana na tading di Brasil mandok, “Torus do sai lungun rohangku. Alani i, didok rohangku ma tumagon ma ahu mate.”

HEA DO lungun hian rohamu jala didok rohamuna tumagon mate? Molo songon i, boi ma diantusi hamu pangkilalaan ni si Adriana. Didok dokter, nunga parah hian depresina. On mambahen si Adriana gabe jotjot mandele, marsak jala mansai susa dihilala.

Sahalak baoa sian Jepang na margoar si Kaoru mangurus natorasna naung matua jala marsahit-sahit. Didok ibana, “Nunga loja hian huhilala di parkarejoan. Ndang lakku ahu mangan jala ndang boi modom. Gabe ro ma tu pingkiranku, sae do sude masalah on molo mate ahu.”

Sahalak baoa sian Nigeria na margoar si Ojebode mandok, “Sai tangis do ahu tingki lungun rohangku. Gabe hupingkiri ma cara laho bunu diri.” Tuani ma, ndang saut si Ojebode, si Kaoru, dohot si Adriana bunu diri. Alai ganup taon, hira-hira 800.000 halak mate ala bunu diri.

NA BOI MANGURUPI

Godangan halak na bunu diri i ma angka baoa, ala maila nasida mangido diurupi. Hea do didok Jesus, porlu do dokter di halak na marsahit. (Lukas 5:31) Alani i, tingki depresi hamu jala marpingkir naeng bunu diri, unang ma maila mangido asa diurupi. Godang halak na depresi boi do martahan ala marubat tu dokter. On ma na diulahon si Ojebode, si Kaoru, dohot si Adriana umbahen na boi nasida martahan.

Ra, boi do dilehon dokter ubat, ditogihon mangkata-hatai, manang duansa do dibahen dokter i asa diboto aha na boi mangurupi halak na depresi i. Angka keluarga dohot angka dongan pe, ingkon sabar do jala rade mangurupi. Alai holan Jahowa do ale-ale na umburju, jala dilehon Ibana do Bibel laho mangurupi hita.

NDANG ADONG BE HALAK NA DEPRESI

Angka halak na depresi, ingkon jotjot do marubat jala ingkon diuba nasida do angka hasomalan ni nasida. Molo depresi hamu, ingot ma angka na denggan na laho masa di ari na naeng ro, songon na diulahon si Ojebode. Didok ibana, “Huingot ma hata na didok di Jesaya 33:24, laho adong ma tingkina ndang adong be halak di tano on na mandok ‘Na gale do ahu.’” Songon si Ojebode, boi ma pos rohanta tu janji ni Debata taringot “tano na imbaru”, na so adong be “na hansit”. (Pangungkapon 21:1, 4) Lapatanna, ndang adong be arsak ni roha dohot lungun ni roha. Jala ndang adong be halak na depresi. Jala, “ndang be ingoton angka na parjolo i manang tarsunggul tu roha”.—Jesaya 65:17.

Ayat ni Bibel na Boi Mangurupi

Lomo do roha ni Debata mangurupi hamu.

“Ahu do Jahowa Debatam, na maniop tanganmu siamun, jala na mandok tu ho: Unang ho mabiar, ahu do mangurupi ho.”—Jesaya 41:13.

Jahowa do na umboto pangkilalaanta, jala lomo rohana mangurupi hita.

Rimangi ma Hata ni Debata.

“Mangidohon mate hosana, ninna [si Elia] ma: . . . ale Jahowa, buat na ma tagonan hosangki.”—1 Rajaraja 19:4.

Didok si Ojebode ma, “Tarapul do rohangku tingki mangarimangi Hata ni Debata. Gabe huboto ma, hea do panurirang Elia mangkilala songon na huhilala.”

Marsiajar ma sian contoh ni Bibel.

“Nunga hubahen pangidoanku [Jesus] tu Debata taringot tu ho [Petrus] asa unang mago haporseaonmu.”—Lukas 22:32.

Dung tolu hali si Petrus mansoadahon Jesus, gabe lungun ma rohana jala sai tumatangis ma ibana. Didok si Kaoru, “Pengalaman ni si Petrus mangurupi ahu mamboto na parduli do Jahowa dohot Jesus tu pangkilalaan ni si Petrus. On patoguhon rohangku.”

Jala, “ndang be ingoton angka na parjolo i manang tarsunggul tu roha”.—Jesaya 65:17