Manaluhon Hamatean—Songon dia Carana?

ALA ndang unduk si Adam dohot si Hawa, gabe mardosa jala mate ma sude jolma. Alai, ndang muba sangkap ni Debata tu jolma. Marhite Bibel, marulak-ulak do dipaboa molo sangkap ni Debata i ndang laho muba.

• “Teanon ni angka partigor i do sogot tano i, jala tongtong do nasida maringanan disi.”​—Psalmen 37:29.

• “Bondutonna ma hamatean salelenglelengna jala apusan ni Tuhan Jahowa ma iluilu sian nasa bohi.”​—Jesaya 25:8.

• “Musu na parpudi na laho ripashononna, i ma hamatean.”​—1 Korint 15:26.

• “Ndang adong be hamatean nang arsak ni roha, nang angguk-angguk, nang na hansit, ndang disi be.”​—Pangungkapon 21:4.

Songon dia Jahowa pasidingkon manang manalpuhon hamatean? Tangkas do didok di Bibel molo ‘angka partigor . . . tongtong do maringanan’. Alai didok do muse, “Ndang adong jolma partigor di tano on nanggo sada, anggo tung holan na denggan diulahon.” (Parjamita 7:20) Na gabe dilanggar Debata do aturan na binahenna asa boi jolma na mardosa mangolu salelengna? Tontu ndang songon i! Alana “Debata na so margabus” do Ibana. (Titus 1:2) Alani i, aha do na laho bahenonna asa boi pasauthon sangkapna tu jolma?

MANGALEHON TOBUSAN

Dibahen Jahowa do sada cara laho manobus jolma sian hamatean, i ma marhite pelean tobusan. Tobusan, i ma arga na dos na dilehon laho manggantihon aha naung mago. Ala sude jolma nunga mardosa jala ujungna mate, tangkas do didok di Bibel, “So manang tartobus manang ise donganna manang tarlehonsa partobusna tu Debata. Maargahu do partobus ni tondina i, ingkon pasohotonna do salelenglelengna.”​—Psalmen 49:8, 9.

Tingki mate jolma na so sempurna, nunga malua be ibana sian dosana sandiri. Alai ndang boi ibana manobus dirina asa malua sian hamatean jala ndang boi ibana manobus dosa ni halak na asing. (Rom 6:7) Tahaporluhon do jolma na sempurna jala na so mardosa laho mangalehon dirina gabe tobusan tu sude jolma.​—Heber 10:1-4.

Songon i do na dibahen Debata. Disuru Ibana do Anakna Jesus ro tu tano on ditubuhon gabe jolma na sempurna jala ndang mardosa. (1 Petrus 2:22) Didok Jesus do molo ibana ro laho “mangalehon ngoluna bahen tobus ni torop jolma”. (Markus 10:45) Alani i, mate ma Jesus laho manobus hita sian dosa dohot hamatean.​—Johannes 3:16.

ANDIGAN HAMATEAN I DITALUHON?

Saonari, nunga masa be “tingki hasusaan” songon na disurirangkon di Bibel. On patuduhon na mangolu do hita di “ari parpudi” na dirajai Sibolis. (2 Timoteus 3:1) Angka ari parpudi on dipaujung di “ari panguhuman laho mangaripashon angka na so pasangaphon Debata”. (2 Petrus 3:3, 7) Alai angka halak na mangkaholongi Debata boi do martahan di ari panguhuman i jala dapot ni nasida ma “hangoluan saleleng ni lelengna”.​—Mateus 25:46.

Marjuta halak na asing boi mandapot ngolu salelengna tingki dipahehe nasida. Dipatudu Jesus do i tingki di kota Nain. Alani asi ni rohana, dipahehe ibana ma anak sasada ni sahalak ina na mabalu. (Lukas 7:11-15) Didok apostel Paulus ma, “Mangkirim do ahu tu Debata, na adong do haheheon tu halak na burju dohot halak na jahat.” Janji ni Debata on patuduhon holongna tu sude jolma.​—Ulaon ni Apostel 24:15.

Marjuta halak laho mangolu salelengna. Bibel mandok, “Teanon ni angka partigor i do sogot tano i, jala tongtong do nasida maringanan disi.” (Psalmen 37:29) Tingki i, mansai las do roha ni nasida jala dipatogu ala tutu do masa hata na disurat si Paulus 2.000 taon naung salpu na mandok, “Ale hamatean, didia do hamonanganmi? Ale hamatean didia do soropmi?” (1 Korint 15:55) Tingki i ma musu ni sude jolma, i ma hamatean nunga ditaluhon!