Diboto Hamu Do?

Aha do bukti na patuduhon tutu do hea halak Israel gabe hatoban di Mesir?

Menurut Bibel, dung diboan halak Midian si Josep tu Mesir, gabe pinda ma si Jakkob dohot keluargana sian tano Kanaan tu Mesir. Tading ma nasida di luat na digoari Gosen, i ma di ujung ni Sunge Nil. (1Mus. 47:1, 6) Gabe “lam [godang], jala lam marhuaso situtu” ma bangso Israel. Lam mabiar ma halak Mesir tu nasida jala dipaksa halak Mesir ma nasida gabe hatoban.​—2Mus. 1:7-14.

Piga-piga peneliti mandok, dang toho carita ni Bibel taringot i. Alai adong do akka bukti na patuduhon na hea do pinoppar ni si Sema gabe hatoban di Mesir.

Misalna, piga-piga arkeolog mandapot sada penemuan, i ma bekas huta ni akka halak najolo di Mesir utara. Dr. John Bimson mandok, sian akka huta i, adong lobi 20 huta ni pinoppar ni si Sem di luat i. Asing ni i, sahalak ahli budaya Mesir kuno najolo na margoar James K. Hoffmeier mandok, “Sian taon 1800 SM sahat tu 1540 SM, godang do halak na marbahasa Semitik sian Asia Barat [i ma inganan ni keluarga ni si Jakkob] na gabe lomo rohana pinda tu Mesir.” Didok ibana muse, “Di tikki i do mangolu si Abraham, si Isak, dohot si Jakkob, jadi bukku 1 Musa manuratton akka na masa di tikki mangolu nasida.”

Adong muse bukti na asing di Mesir bagian selatan. Di sada papirus na dibahen hira-hira taon 2000 sahat tu taon 1600 SM, adong disurat goar ni akka hatoban na karejo di sada jabu di Mesir selatan. Lobi sian 40 goar ni akka hatoban i, i ma goar ni akka halak na sian pinoppar ni si Sem. Adong do na karejona mangaloppa, martonun, dohot mangula. Si Hoffmeier mandok, “Di sada jabu di Thebaid [Mesir selatan], adong do lobi sian opat pulu pinoppar ni si Sem na gabe hatoban. Jadi on patuduhon, godang do pinoppar ni si Sem na tading di luat Mesir, tarlumobi di jonok ni ujung ni sunge Nil.”

Disurat sahalak arkeolog na margoar si David Rohl do molo goar ni piga-piga hatoban i, “sarupa songon goar ni akka halak na disurat di Bibel”, songon si Isasar, si Asser, dohot si Sipra. (2Mus. 1:3, 4, 15) Didok si Rohl muse, “On ma bukti na patuduhon tutu do hea halak Israel gabe hatoban di Mesir.”

Dr. Bimson mandok, “Sian sejarah gabe taboto ma na tutu do isi ni Bibel taringot halak Israel na gabe hatoban di Mesir najolo.”