Sukkun-Sukkun sian na Manjaha

Ise do petugas ni bagas joro, jala aha do tugas ni nasida?

Adong do piga-piga halak Lewi na so marhobas gabe malim, alai dilehon do tu nasida tanggung jawab na asing, i ma gabe petugas ni bagas joro. Sude na niulahon ni halak i diawasi kepala panjaga ni bagas joro. Sahalak panurat na sian Jahudi na margoar si Philo patorakkon akka aha do tugas ni nasida. Didok ibana, “Piga-piga sian nasida ditugashon lao manjaga di pintu masuk. Na deba ditugashon manjaga di jolo ni inganan na badia [i ma di bagas joro]. Ikkon dijaga nasida do disi asa unang sanga masuk akka halak na so boi masuk tu inganan na badia i, sangaja manang na dang, songon na didok di patik. Na deba nai ditugashon lao makkaliangi bagas joro i. Adong na ditugashon di tikki arian, adong muse na ditugashon di tikki borngin.”

Boi do dipangido Sanhedrin pangurupion ni akka petugas ni bagas joro on. Alana holan nasida do kelompok ni halak Jahudi na dipaloas pamaretta Rom mamboan sinjata.

Sahalak pakar na margoar Joachim Jeremias mandok, “Tikki ditakkup Jesus, didok ibana nga somal ibana saleleng on mangajar di bagas joro ganup ari, alai dang hea ditakkup. Jadi hata ni Jesus on patuduhon akka halak na manakkup Jesus i, i ma petugas ni bagas joro.” (Mat. 26:55) Jala menurut si Jeremias, andorang so masa pe i, hea do petugas ni bagas joro disuru lao manakkup Jesus. (Joh. 7:32, 45, 46) Dung i, diparettahon Sanhedrin ma kepala panjaga dohot piga-piga petugas ni bagas joro lao mamboan akka sisean ni Jesus tu nasida. Jala tikki disarat pe Apostel Paulus kaluar sian bagas joro, ra petugas ni bagas joro i do na mangulahon i.​—Ul. 4:1-3; 5:17-27; 21:27-30.