Aha do Guna ni Tangiang di Hamu?

Tikki marsahit na posi si Pamela, marubat do ibana tu rumah sakit na jago. Alai martangiang do muse ibana tu Debata mangido asa margogo ibana mangadopi i. Marguna do tangiang i di ibana?

Didok si Pamela, “Saleleng diubati sahit kankerhi, jotjot do naeng mate huhilala. Alai molo martangiang au tu Debata Jahowa, gabe dame ma huhilala jala tenang ma pikkiranku. Haccit do memang huhilala tikki diubati sahitti. Alai gabe marpikkiran positif ma au molo dung martangiang. Molo disukkun halak tu au songon dia huhilala, hudok ma haccit do nian huhilala. Alai tetap do au semangat!”

Dang jolo ikkon adong sitaonon na borat baru pe asa martangiang hita. Ai sude do hita mangadopi sitaonon, balga manang gelleng. Jala porlu do hita diurupi tikki mangadopi i. Jadi marguna do molo martangiang?

Didok Bibel, “Pasahat ma holso ni roham tu Jahowa, sai urupanna do ho. Dang pasombuonna madabu halak na tigor marroha.” (Psalmen 55:22) Tarapul do roha mamboto ayat on! Alai songon dia do tangiang mangurupi hamu? Tikki martangiang hamu tu Debata mangihutton lomo ni rohana, lehononna ma na porlu di hamu lao mangadopi sitaononmuna.—Ida ma kotak, “Songon dia do Tangiang i Mangurupi Hamu?”

Songon dia do Tangiang i Mangurupi Hamu?

Dame pakkilalaan

“Pangido hamu ma saluhutna tu Debata marhite tangiang dohot elek-elek mardongan hamauliateon. Asa marhite Kristus Jesus, lehonon ni Debata ma tu hamu hadameon na so boi diattusi jolma, na boi manjaga roha dohot pikkiranmuna.” (Pilippi 4:6, 7) Molo dipaboa hamu arsak ni rohamuna tu Debata, urupanna ma hamu asa dame pakkilalaanmuna jala asa marbisuk hamu nang pe marsak.

Gabe marbisuk

“Molo adong sian hamu na hurang bisuk, toktong ma i dipangido tu Debata. Lehononna do i tu ibana jala dang pailaonna ibana. Ai burju do Debata mangalehon tu sude halak.” (Jakobus 1:5) Tikki marsak, olo do dang denggan keputusan na tabahen. Alai molo martangiang hamu mangido asa dibahen Debata hamu marbisuk, boi do gabe diingot hamu akka ayat na hea dijaha hamu sian Bibel.

Margogo jala tarapul

“Margogo do au di sude na masa, ala dilehon Debata do huaso tu au.” (Pilippi 4:13) Ala Debata Pargogo na So Hatudosan do Jahowa, boi do dilehon Ibana gogo tu hita lao mangadopi sitaononta. (Jesaya 40:29) Didok Bibel do muse Jahowa i “Debata Sipangapul na sumurung”. Boi do Ibana mangapuli hita asa tarapul “manaon sitaonon manang aha pe”.—2 Korint 1:3, 4.