Cara Asa Boi Mangolu Salelengna di Tano on

Di halaman sebelumna dipaboa do na lao dihancurhon Debata sude pamarettaon ni jolma, jala dang adong be hasusaan ni jolma. Pos do rohatta na lao saut do i. Boasa? Alana nungnga marjanji Debata. Didok di Bibel:

“Na lao salpu nama portibi on.”—1 JOHANNES 2:17.

Pos do rohatta, adong do na lao selamat. Alana didok do muse di ayat i:

“Mangolu saleleng ni lelengna do halak na mangulahon lomo ni roha ni Debata.”

Alai asa boi hita selamat, ikkon taulahon do lomo ni roha ni Debata. Asa taboto aha do lomo ni roha ni Debata, ikkon jolo tatanda do Ibana.

BOI SELAMAT MOLO ‘MANANDA’ DEBATA

Gambar: 1. Sahalak perawat hundul di lantai ni rumah sakit, loja jala marsak hian. 2. Istrahat ma ibana di kantin jala diida ibana dongan sakarejona marlas ni roha manjaha sada majalah. 3. Dijahahon dongan sakarejona ayat ni Bibel tu ibana jala dilehon kartu kontak jw.org.

Didok Jesus, “On do hangoluan na saleleng ni lelengna, ikkon tandaon ni nasida do Ho Debata na Sasada i, na sittong i.” (Johannes 17:3) Jadi asa boi selamat tikki panutup ni jaman on jala mangolu salelengna, ikkon jolo ‘tatanda’ do Debata. Alai, dang cukkup holan porsea tu Debata manang holan mamboto taringot Ibana, alai ikkon jonok do hita tu Debata. Molo lomo rohatta asa lam akrab hita tu donganta, tottu ikkon jotjot do hita makkatai tu ibana. Suang songon i ma nang tu Debata. Pikkirhon ma piga-piga hasittongan na boi taparsiajari sian Bibel, na boi mangurupi hita asa toktong jonok tu Debata.

Taparsiajari ma Hasittongan na sian Bibel

Taboto ma na lomo do roha ni Debata asa mangolu hita salelengna di tano on.

Ditoppa Debata do jolma na parjolo i ma, si Adam dohot si Hawa jala dibahen do nasida di inganan na massai bagak, i ma taman Eden. Sempurna do nasida, jala dilehon Debata do sude akka na porlu di nasida asa marlas ni roha nasida jala mangolu salelengna. Molo toktong dioloi nasida Debata, boi ma nasida mangolu salelengna. Alai, dang dioloi nasida paretta ni Debata.

Taboto ma boasa susa hita.

Ala dang mangoloi si Adam dohot si Hawa tu Debata, gabe dang boi be nasida mangolu salelengna di tano on dohot akka keturunanna, termasuk ma hita. Didok Bibel, “Masuk do dosa i tu portibi on marhite sada jolma jala dosa i parohon hamatean. Nungnga rarat hamatean i tu sude jolma.” (Rom 5:12) Songon sasahalak na cacat alani keturunan sian natua-tuana, suang songon i ma ala dang sempurna be si Adam, sude keturunanna pe gabe dang sempurna be. Akibatna, gabe matua ma hita jala mate.

Taboto ma aha naung dibahen Debata lao mangurupi hita.

Didok Bibel, “Songon on do balga ni holong ni roha ni Debata tu portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.” (Johannes 3:16) Disuru Debata do Jesus ro tu tano on asa mangalehon ngoluna lao manobus hita. Taringot patuduhon holong, adong sahalak bawa na marumur 86 sian India na margoar si Prabhakar mandok, “Tobusan i patuduhon na massai balga do holong ni Jahowaa tu au. Alani tobusan i, gabe adong ma harapan di au mangolu salelengna.”

Taboto ma songon dia carana mandok mauliate tu Debata.

Didok Bibel molo toktong ‘taoloi akka parettana’, on ma caratta lao mandok mauliate tu Debata di sude akka naung dibahen Ibana tu hita. (1 Johannes 2:3) Dipaboa Debata Jahowa do tu hita aha na boi taulahon asa boi marlas ni roha hita mangolu saonari on. (Jesaya 48:17, 18, surat na di toru) Dang lomo roha ni Debata susa hita. Molo taoloi paretta ni Debata, marjanji do Ibana dang holan saonari hita boi marlas ni roha. Alai dilehon do kesempatan mangulahon parettana asa boi mangolu salelengna.

JAHA MA BIBEL GANUP ARI

Sahalak perawat hundul di luar tikki jam istrahat mangan siang manatap tu langit dung dijaha ibana Bibel. — Molo martangiang hamu mangido asa diurupi Debata jala mangulahon lomo ni rohana, boi ma hamu selamat tikki panutup ni jaman on

Asa boi hita tetap mangolu, ikkon taratur do hita mangan. Alai didok Jesus, “Dang holan sian roti jolma boi mangolu, alai sian ganup hata na kaluar sian pamangan ni Jahowa.”—Mateus 4:4.

Saonari, boi do taboto hata ni Jahowa sian Bibel. Molo marsiajar Bibel hamu, boi ma botoonmuna aha naung diulahon Debata najolo, aha na diulahon Debata saonari jala aha na lao ulahonon ni Debata di masa depan.

MARTANGIANG TU DEBATA ASA DIURUPI

Lomo do rohamuna mangoloi paretta ni Debata, hape maol dihilala hamu asa unang be mangulahon akka na sala. Alani i, aha ma na ikkon diulahon hamu? Molo songon i do situasina, boi do hamu diurupi molo takkas ditanda hamu Debata.

Adong ma sahalak borua na margoar si Sakura, mangulahon seks bebas do ibana. Alai dung marsiajar Bibel ibana, diboto ibana ma adong paretta ni Debata na mandok, “padao hamu ma dirimuna sian ulaon seks na so patut”. (1 Korint 6:18) Martangiang ma si Sakura tu Debata asa boi dikendalihon ibana dirina jala asa unang be diulahon i. Alai tetap dope ibana ikkon berupaya asa boi mengendalihon dirina. Didok ibana ma, “Molo ro i tu pikkiranku, pittor martangiang do au tu Jahowa. Jala hupaboa ma na maol dope hukendalihon dirikku. Tangiang do na mangurupi au asa lam jonok tu Jahowa.” Songon si Sakura, godang do halak na lomo rohana mananda Debata. Dilehon Debata do gogo tu nasida asa unang diulahon nasida be ulaon na sala jala asa diulahon nasida lomo ni roha ni Debata.—Pilippi 4:13.

Molo lam “ditanda hamu Debata”, hamu pe gabe ditanda Debata ma. (Galatia 4:9; Psalmen 25:14) Gabe boi ma dapotmuna kesempatan mangolu salelengna di tano on. Alai, gabe songon dia do haduan tano on? Dipatorang ma i di halaman selanjutna.

a Jahowa, i ma goar ni Debata na dipaboa di Bibel.