Cara ni Jahowa Mangalusi Tangiangta

1-2. Sukkun-sukkun aha do na bisa jadi ro tu rohatta taringot tangiang?

HEA DO sukkun-sukkun rohamuna alusan ni Jahowa do tangiangmuna manang na dang? Molo hea, dang holan hamu na songon i. Godang do akka dongan na merasa songon i khususna tikki masa sitaonon tu nasida. Tikki susa hita olo do maol taida songon dia Jahowa mangalusi tangiangta.

² Di artikel on tabahas ma boasa boi pos rohatta na dialusi Jahowa do tangiang ni akka naposona. (1 Joh. 5:15) Tabahas ma muse sukkun-sukkun on: Boasa sipata tahilala hira na so dialusi Jahowa tangiangta? Songon dia do Jahowa mangalusi tangiangta saonari?

DANG SAI SONGON NA TAHARAPPON CARA NI JAHOWA MANGALUSI TANGIANGTA

3. Boasa dipangido Jahowa tu hita asa martangiang tu Ibana?

³ Di Bibel dipaboa do na massai holong roha ni Jahowa tu hita jala arga do hita di Ibana. (Hag. 2:7; 1 Joh. 4:10) I do alana dipangido Jahowa tu hita asa mangido bantuanna marhite tangiang. (1 Ptr. 5:6, 7) Lomo do rohana asa toktong jonok hita tu Ibana jala asa boi martahan mangadopi sitaonon.

4. Sian dia do taboto na dialusi Jahowa tangiang ni akka naposona? (Ida gambar.)

⁴ Di Bibel jotjot do tajaha songon dia Jahowa mangalusi tangiang ni akka naposona. Contohna tangiang ni Raja Daud. Jotjot do ngoluna terancam alani musu jala jotjot do ibana mangido bantuan ni Jahowa di tangiangna. Hea do Raja Daud martangiang, “Ale Jahowa, tangihon ma tangiakku. Tangihon ma elek-elekku na mangido asa urupanmu au. Alusi ma au, ai setia do Ho jala sittong do ulaonmu.” (Ps. 143:1) Dialusi Jahowa do tangiang ni si Daud i jala dipalua do ibana. (1 Sam. 19:10, 18-20; 2 Sam. 5:17-25) Gabe pos ma roha ni si Daud mandok, “Jonok do Jahowa tu sude halak na jou-jou tu Ibana.” Hita pe boi do marpos ni roha songon si Daud.​—Ps. 145:18.

5. Sai songon cara na taharappon do dialusi Jahowa tangiangta? Paboa ma contohna. (Ida gambar.)

⁵ Bisa jadi cara ni Jahowa mangalusi tangiangta dang songon na taharappon. Songon i ma na terjadi tu Apostel Paulus. Dipangido ibana do tu Jahowa asa dibolokkon ‘suga na di bagasan dagingna’, jala tolu hali ma ditangiakkon ibana taringot i. Dialusi Jahowa do tangiangna i? Ido, alai carana dang songon na diharappon si Paulus. Dang dipasae Jahowa masalahna i, alai dilehon Jahowa do gogo na dihaporluhon si Paulus asa boi ibana toktong setia manomba Jahowa.​—2 Kor. 12:7-10.

6. Sipata boasa tahilala hira na so dialusi Jahowa tangiangta?

⁶ Songon i ma nang tu hita. Sipata tangiangta i dialusi dang songon cara na taharappon. Pos do rohatta diboto Jahowa do cara na terbaik lao mangurupi hita. Boi do dialusi Ibana tangiangta “unggodang sian na tapangido dohot na tapikkiri”. (Eps. 3:20) Alani i ma olo do dialusi Jahowa tangiangta di tikki dohot cara na so taduga.

7. Aha do na mambahen porlu tapauba tangiangta? Paboa ma contohna.

⁷ Sipata porlu do tapauba isi ni tangiangta dung lam takkas taboto aha na dihalomohon Jahowa. Taparrohahon ma pengalaman ni donganta si Martin Poetzinger. Dang leleng dukkon menikah, dipenjarahon ma ibana di kamp konsentrasi Nazi. Mulana dipangido ibana do tu Jahowa asa kaluar ibana sian penjara, asa boi rap dohot istrina jala marbarita na uli muse. Alai dukkon hira-hira dua minggu diida ibana ma hira na so adong do tanda-tanda na lao dipalua ibana sian penjara i. Jadi didok ibana ma di tangiangna, “Jahowa, patudu ma aha do na ikkon huulahon.” Dung i mulai ma diparrohahon ibana akka dongan na asing na di kamp konsentrasi i. Godang do sian nasida na khawatir tu istri dohot akka gellengna. Martangiang ma muse donganta si Poetzinger tu Jahowa. Didok ibana, “Jahowa, mauliate ma tu penugasanku na baru on. Urupi ma au patoguhon akka dongan sahaporseaon dison.” Jadi saleleng sia taon ibana dipenjara, torus do ibana patoguhon akka donganna.

8. Aha do na porlu taingot tikki martangiang hita?

⁸ Taingot ma muse pasauton ni Jahowa do sakkapna di tikki naung ditottuhon Ibana. Sakkapna i termasuk ma manalpuhon sude akka na mambahen jolma marsitaonon misalna bencana alam, sahit, dohot hamatean. Pasauton ni Jahowa ma sakkapna i marhite Harajaonna. (Dan. 2:44; Pgk. 21:3, 4) Alai huhut paimahon i, dipaloas Jahowa dope Sibolis mamaretta portibi on saonari.b (Joh. 12:31; Pgk. 12:9) Alani i molo dipasae Jahowa saonari masalah na adong di portibi on, gabe hira na marhasil ma pamarettaon ni Sibolis. Nang pe ikkon tapaima Jahowa pasautton sakkapna i, pos ma rohatta dang tinggalhononna hita. Saonari tabahas ma piga-piga cara ni Jahowa mangurupi hita.

CARA NI JAHOWA MANGALUSI TANGIANGTA SAONARI

9. Songon dia do Jahowa mangurupi hita tikki mambahen keputusan? Paboa ma contohna.

⁹ Dilehon Jahowa do tu hita bisuk. Marjanji do Jahowa mangalehon bisuk na tahaporluhon lao mambahen keputusan na denggan. Khususna porlu do di hita bisuk na sian Debata tikki mambahen keputusan na berpengaruh tu ngolutta, misalna melajang manang menikah. (Jak. 1:5) Taparrohahon ma pengalaman ni donganta borua lajang na margoar si Maria.c Las situtu do rohana melayani sebagai perintis biasa tikki pajuppang ibana dohot sahalak donganta bawa. Didok ibana, “Mardongan ma hami, jala gabe saling tertarik. Huboto do ikkon hubahen do sada keputusan. Alani i jotjot ma au martangiang tu Jahowa taringot i. Porlu do di au petunjuk ni Jahowa, alai takkas do huboto dang Jahowa na mambahen keputusan di au.” Boi do dirasahon donganta i na dialusi Jahowa tangiangna mangido bisuk. Songon dia carana? Misalna tikki mangariset ibana sian akka publikasi, dapotna ma artikel khusus na mambahas taringot i jala na mangurupi ibana mangalusi sukkun-sukkunna. Dung i ditangihon ibana do muse nasehat ni omakna na togu haporseaonna tu Jahowa. Gabe boi ma si Maria mamareso perasaanna. Ujungna boi ma dibahen ibana keputusan na denggan.

10. Sesuai tu Pilippi 4:13, songon dia do Jahowa mangurupi naposona? Paboa ma sada pengalaman. (Ida gambar.)

¹⁰ Dilehon Jahowa do gogo asa boi martahan. Dilehon Jahowa do gogo tu hita asa boi martahan di situasi na maol, songon naung dibahen Ibana tu Apostel Paulus. (Jaha Pilippi 4:13.) Parrohahon ma songon dia Jahowa mangurupi sahalak donganta bawa na margoar si Benjamin tikki mangadopi situasi na maol. Tikki poso ibana, tinggal do ibana dohot keluargana di kamp pengungsian di Afrika. Didok si Benjamin, “Torus do au martangiang tu Jahowa. Hupangido do tu Ibana asa dilehon tu au gogo lao mangulahon lomo ni rohana. Dialusi Jahowa do tangiakki, dilehon do tu au dame ni roha, habaranion lao marbarita na uli, dohot publikasi asa boi au toktong jonok tu Ibana.” Didok ibana ma muse, “Tikki hujaha pengalaman ni akka dongan jala huparsiajari songon dia Jahowa mangurupi nasida, gabe lam bertekad ma au asa toktong setia.”

11-12. Songon dia do Jahowa mamakke dongan sahaporseaon lao mangalusi tangiangta? (Ida gambar.)

¹¹ Dipakke Jahowa do akka dongan sahaporseaon. Di borngin andorang so mate Jesus, marsitutu do ibana martangiang. Dipangido ibana ma tu Jahowa asa unang dianggap halak ibana mate alani mangaleai goar ni Jahowa. Jadi diutus Jahowa ma sada suru-suruanna lao patoguhon Jesus. (Luk. 22:42, 43) Bisa jadi Jahowa patoguhon hita marhite akka dongan sahaporseaon na manelepon manang mangunjungi hita. Takkas ma, sude do hita boi mangalului kesempatan lao mandok “akka hata na denggan” tu dongan sahaporseaon.​—Poda 12:25.

¹² Parrohahon ma na dihilala sahalak donganta borua na margoar si Miriam piga-piga minggu dung mate suamina. Gabe sahalakna ma di jabu, massai lungun do rohana, jala merasa tertekan. Sai torus do ibana tumatangis jala porlu do adong donganna makkatai. Didok ibana, “Hira na so adong do gogokku lao manelepon manang ise pe. Alani i martangiang ma au tu Jahowa. Tikki martangiang au huhut tangis, makkuling ma teleponku. Sahalak sintua do na manelepon i, jala dongan na huhaholongi do ibana.” Gabe tarapul do roha ni si Miriam, ala ditelepon sintua dohot istrina ibana. Pos do rohana Jahowa do na menggerakkon roha ni donganta i lao manelepon ibana.

13. Paboa ma contoh songon dia Jahowa menggerakkon roha ni akka halak na so manomba Ibana lao mangalusi tangiangta.

¹³ Dipakke Jahowa do halak na so manomba Ibana. (Poda 21:1) Sipata dipakke Jahowa do akka halak na so manomba Ibana lao mangalusi tangiangta na mangido asa diurupi. Misalna digerakkon Ibana do roha ni Raja Artasasta lao mangoloi pangidoan ni si Nehemia mulak tu Jerusalem lao paturehon kota i. (Neh. 2:3-6) Saonari pe boi do dibahen Jahowa cara na sarupa mangurupi hita tikki tahaporluhon.

14. Songon dia do pengalaman ni si Su Hing boi patoguhon hamu? (Ida gambar.)

¹⁴ Sahalak donganta borua na margoar si Su Hing merasa na diurupi Jahowa ibana marhite dokterna. Marsahit gangguan mental do anakna. Jala tikki kecelakaan anakna i, gabe kaluar ma ibana dohot suamina sian karejona asa boi mangurus anakna i. Alani i, gabe susa ma nasida di parhepengon. Didok si Su Hing hira na so sanggup do ibana martahan alani sitaonon i. Dipaboa ibana ma sude na adong di rohana tu Jahowa jala mangido bantuan ma ibana tu Jahowa. Dukkon i, tergerak ma dokterna mangalului cara lao mangurupi si Su Hing dohot keluargana. Alani i gabe dapot ni nasida ma bantuan sian pamaretta dohot tempat tinggal na layak. Dukkon i didok si Su Hing ma, “Boi do huhilala na diurupi Jahowa hami. Toho ma Ibana ‘Sitangihon tangiang’.”​—Ps. 65:2.

PORLU DO HAPORSEAON LAO MANGALULUI JALA MANJALO ALUS NI TANGIANGTA

15. Aha do na mangurupi sahalak donganta borua mamboto nungnga dialusi Jahowa tangiangna?

¹⁵ Dang sai ikkon luar biasa cara ni Jahowa mangalusi tangiangta. Alai sai dilehon Ibana do akka na tahaporluhon asa boi hita torus setia tu Ibana. Jadi porlu do taida songon dia Jahowa mangalusi tangiangta. Sahalak donganta borua na margoar si Yoko merasa dang dialusi Jahowa tangiangna. Alai mulai ma dicatat ibana akka pangidoanna tu Jahowa. Dung piga-piga tikki diida ibana ma muse catatanna i. Gabe disadari ibana ma godang do pangidoanna naung dialusi Jahowa, bahkan akka pangidoanna na so diingot ibana be. Jadi sian tikki tu tikki porlu do tarimangi songon dia Jahowa mangalusi tangiangta.​—Ps. 66:19, 20.

16. Songon dia do hita patuduhon haporseaon tikki martangiang? (Heber 11:6)

¹⁶ Tarida do haporseaotta dang holan tikki martangiang, alai molo rade hita manjalo alus ni tangiangta dang soal songon dia carana. (Jaha Heber 11:6.) Parrohahon ma pengalaman ni si Mike dohot istrina si Chrissy. Marcita-cita do nasida lao melayani di Betel. Didok si Mike, “Saleleng martaon-taon sai diisi hami do formulir lao melayani di Betel. Jala torus do ditangiakkon hami tu Jahowa cita-citanami i. Alai dang hea hami diundang.” Torus do pos roha ni si Mike dohot si Chrissy na diboto Jahowa do cara na terbaik tu nasida lao melayani Ibana. Fokus do nasida mangulahon akka ulaon na boi diulahon nasida. Merintis biasa do nasida di inganan na makkaporluhon parbarita, jala dohot do nasida mangurupi proyek konstruksi. Saonari gabe pengawas wilayah do si Mike. Didok si Mike, “Dang sai dialusi Jahowa tangiangta songon cara na taharappon. Alai dialusi Ibana do tangiangta marhite cara na terbaik na so hea tapikkirhon.”

17-18. Aha do na boi taparsiajari sian Psalmen 86:6, 7?

¹⁷ Jaha Psalmen 86:6, 7. Pos do roha ni si Daud na manurat Psalmen i, na dialusi Jahowa do tangiangna. Hamu pe boi do songon i. Akka contoh na dibahas di artikel on paposson rohatta na dilean Jahowa do tu hita bisuk dohot gogo na tahaporluhon lao martahan. Dipakke Jahowa do muse akka dongan sahaporseaon manang akka halak na so manomba Ibana lao mangurupi hita.

¹⁸ Nang pe dang songon cara na taharappon dialusi Jahowa tangiangta, alai taboto do pasti do dialusi i. Diparade Ibana do na tahaporluhon di tikki na pas. Alani i torus ma hamu martangiang jala porsea ma na ditangihon Jahowa do hamu. Pos ma rohamuna na parduli do Jahowa tu hamu saonari. Jala annon di tano na imbaru “lehononna ma na pinangido ni roham”.​—Ps. 37:4.