Tiru ma Akka Suru-suruan na Setia

1-2. (a) Aha do perbedaan ni suru-suruan tu hita? (b) Aha do persamaanta tu akka suru-suruan?

TIKKI gabe Saksi Jahowa hita, gabe bagian sian keluarga ni Jahowa ma hita. Jala termasuk do disi marjuta akka suru-suruan na setia. (Dan. 7:​9, 10) Tikki tabege hata suru-suruan, ra didok rohatta berbeda do suru-suruan on sian hita. Contohna, nungnga adong suru-suruan on sebelum ditoppa dope jolma. (Job 38:​4, 7) Jala dao do umgogo suru-suruan sian hita. Dung i muse, badia do nasida jala ussangap sian hita, alana jolma na so sempurna do hita.—Luk. 9:26.

² Nang pe godang perbedaanta tu akka suru-suruan, alai adong do tong persamaanta tu nasida. Contohna, songon suru-suruan boi do hita maniru sifat ni Jahowa. Hita pe boi do mambahen keputusan sandiri. Asing ni i, adong do goar ni akka suru-suruan, jala marasing-asing do sifat dohot tugas ni nasida. Songon i ma tong hita. Jala songon suru-suruan, hita pe ikkon manomba Sitoppa hita.—1 Ptr. 1:12.

3. Aha ma na boi tatiru sian akka suru-suruan na setia?

³ Ala godang do persamaanta tu akka suru-suruan, gabe boi ma dapotta godang parsiajaran sian akka teladan ni nasida. Jala on boi lam patoguhon hita. Di artikel on, tabahas ma songon dia hita boi maniru cara ni suru-suruan patuduhon serep ni roha, holong ni roha tu akka jolma, kesetiaan, dohot upaya ni nasida lao manjaga huria toktong badia.

SEREP DO ROHA NI AKKA SURU-SURUAN

4. (a) Songon dia do akka suru-suruan patuduhon serep ni roha? (b) Boasa massai serep roha ni akka suru-suruan? (Psalmen 89:7)

⁴ Serep do roha ni akka suru-suruan na setia. Nang pe berpengalaman nasida, gogo, jala marbisuk, alai sai diihutton nasida do tudu-tudu sian Jahowa. (Ps. 103:20) Tikki mandalatton tugas, dang hea dianggarhon nasida gogo ni nasida. Las do roha ni nasida mangulahon sude lomo ni roha ni Jahowa, nang pe dang disurat goar ni nasida.a (1 Mus. 32:​24, 29; 2 Raj. 19:35) Jala dang olo nasida manjalo hasangapon na seharusna dilehon tu Jahowa. Boasa boi massai serep roha ni akka suru-suruan i? Ala massai holong do roha ni nasida tu Jahowa, jala diargai nasida do Ibana.—Jaha Psalmen 89:7.

5. Songon dia do sada suru-suruan patuduhon serep ni roha tikki pasingotton si Johannes? (Ida gambar.)

⁵ Taida ma sada peristiwa na patuduhon serep ni roha ni akka suru-suruan. Di taon 96 M, sada sian suru-suruan na so dipaboa goarna, patuduhon sada parnidaan tu Apostel Johannes. (Pgk. 1:1) Aha do na diulahon si Johannes dung diida ibana parnidaan i? Gabe naeng marsomba ma ibana tu suru-suruan i. Alai pittor diorai suru-suruan i do ibana marsomba, jala didok ma, “Unang! Unang bahen songon i! Ai hatoban do au songon ho dohot songon akka donganmu . . . Somba ma Debata!” (Pgk. 19:10) Serep do roha ni suru-suruan i. Dang lomo rohana dipasangap jala pittor disuru ibana do asa disomba si Johannes Debata Jahowa. Jala dang didok rohana na ussangap ibana sian si Johannes. Nang pe umgogo suru-suruan i sian si Johannes jala ulleleng melayani Jahowa, alai serep do roha ni suru-suruan i jala didok rap hatoban do nasida. Dang kasar hatana tikki pasingotton si Johannes. Gariada, lambok do ibana makkatai. Jala diattusi ibana do naeng marsomba pe si Johannes tu ibana, ala na takjub do si Johannes mangida parnidaan i. 

6. Songon dia do caratta maniru serep ni roha ni akka suru-suruan?

⁶ Songon dia do caratta maniru serep ni roha ni akka suru-suruan? Tikki taulahon sada tugas, unang ma tabanggahon keterampilan manang kemampuan na adong di hita. (1 Kor. 4:7) Jala unang ma didok rohatta unjago hita sian na asing ala ulleleng hita melayani Jahowa manang adong tanggung jawab na dilehon tu hita. Seharusna, lam godang akka tugas na dilehon tu hita, ikkon lam serep do rohatta. (Luk. 9:48) Songon suru-suruan i, lomo do rohatta pasangappon na asing. Unang ma hita marpikkir, ikkon hita na dipasangap.

7. Songon dia do caratta patuduhon serep ni roha tikki mangalehon sipasingot manang nasehat tu sasahalak?

⁷ Boi do hita patuduhon serep ni roha tikki mangalehon nasehat manang sipasingot tu sasahalak. Sipata, ikkon talehon do sipasingot tu dongan sahaporseaon, manang tu ianakkotta. Ra, porlu do talehon sipasingot na tegas. Alai tatiru ma suru-suruan na lambok makkatai tikki pasingotton si Johannes. Unang ma sappe tabahen sasahalak marmetmet ni roha alani sipasingot na tapasahat. Molo dang taanggap uppetting diritta sian na asing, boi ma denggan caratta jala lambok tikki pasahatton nasehat na sian Bibel tu nasida.—Kol. 4:6.

HOLONG DO ROHA NI AKKA SURU-SURUAN TU AKKA JOLMA

8. (a) Songon na disurat di Lukas 15:​10, songon dia do suru-suruan patuduhon holong ni rohana tu akka jolma? (b) Aha do peran ni suru-suruan di ulaon marbarita? (Ida sampul.)

⁸ Holong do roha ni akka suru-suruan tu akka jolma, jala parduli do nasida tu hita. Tikki adong sasahalak na mangulahon dosa na balga bertobat, manang tikki adong sasahalak na so aktif mulak muse manomba Jahowa, las hian do roha ni nasida. Las hian do muse roha ni akka suru-suruan tikki adong sasahalak marsiajar Bibel jala manomba Jahowa. (Jaha Lukas 15:10.) Akka suru-suruan pe toktong do mangurupi hita tikki marbarita. (Pgk. 14:6) Nang pe dang boi nasida langsung marbarita tu akka jolma, alai diarahon nasida do hita tu sasahalak na lomo rohana mananda Jahowa. Memang dang na berarti, tikki pajuppang hita tu halak na berminat, nga pasti ditogu suru-suruan hita disi. Alana dipakke Jahowa do tong cara na asing lao mangurupi hita. Misalna, dilehon Ibana do tondi parbadiana mangurupi hita jala mangarahon hita. (Ul. 16:​6, 7) Alai torus do dipakke Jahowa akka suru-suruan i lao mangurupi hita. Pos do rohatta, tikki marbarita na uli hita, sai adong do suru-suruan na mangurupi hita.—Ida ma kotak “Dialusi do Tangiang ni Nasida”.b

9. Songon dia do caratta maniru akka suru-suruan lao patuduhon holong tu akka halak?

⁹ Songon dia do caratta maniru akka suru-suruan lao patuduhon holong tu akka halak? Tikki tabege adong sasahalak na bertobat jala mulak muse tu huria, marlas ni roha ma hita songon akka suru-suruan i. Tasambut ma nasida, jala tadok ma na holong rohatta tu nasida. (Luk. 15:​4-7; 2 Kor. 2:​6-8) Asing ni i songon akka suru-suruan, berupaya ma hita asa ringgas marbarita na uli. (Pjm. 11:6) Jala songon akka suru-suruan na sai toktong mangurupi hita di ulaon marbarita, talului ma cara lao mangurupi akka donganta di ulaon marbarita. Contohna, boi do tabahen rencana asa rap marbarita na uli dohot penyiar na baru. Asing ni i, boi do tong taurupi akka donganta naung matua dohot na marsahit asa boi nasida toktong marbarita.

10. Aha do na boi taparsiajari sian pengalaman ni si Sara?

¹⁰ Boha do molo situasitta mambahen dang godang be na boi taulahon? Boi do tong talului cara lao bekerja sama dohot suru-suruan di ulaon marbarita. Parrohahon ma pengalaman ni donganta si Sara di India.c Dukkon merintis ibana saleleng 20 taon, marsahit ma ibana jala holan di podoman nama. Gabe sai marsak ma ibana. Alai ala sai dipatudu akka dongan holong ni roha tu ibana jala dijaha ibana Bibel ganup ari, gabe marpikkiran positif ma si Sara. Memang ikkon dibahen ibana do penyesuaian lao marbarita. Ala dang boi be ibana hundul lao mambahen surat, ikkon sian telepon nama ibana marbarita. Jadi, ditelepon ibana ma akka kunjunganna. Jala dipatandahon akka kunjunganna i ma muse tu ibana akka halak na berminat. Aha ma hasilna? Dung piga-piga bulan, adong ma 70 halak na olo marsiajar Bibel dohot si Sara. Jadi ala dang sanggup si Sara mangurupi nasida sude, dibagi ibana ma piga-piga parsiajar Bibel i tu akka dongan di huria. Jala saonari, nungnga adong akka parsiajar Bibel i na ro tu parpunguan. Pasti massai las do roha ni akka suru-suruan bekerja sama dohot akka dongan na bersemangat songon si Sara.

TOKTONG DO SETIA AKKA SURU-SURUAN

11. Songon dia do akka suru-suruan i patuduhon na toktong nasida setia tu Jahowa?

¹¹ Akka suru-suruan na setia ma teladan na massai denggan tu hita asa boi hita toktong setia. Diida nasida do akka hasusaan dohot hajahaton saleleng marribu taon. Diida nasida do tong Sibolis dohot akka suru-suruan na jahat mangalo Jahowa. (1 Mus. 3:1; 6:​1, 2; Jud. 6) Disurat do tong di Bibel, adong sada suru-suruan na setia na mangalo suru-suruan na jahat na tung massai gogo. (Dan. 10:13) Jala asing ni i, mulai sian adong si Adam dohot si Hawa sahat tu saonari, holan saotik do halak na olo manomba Jahowa. Nang pe songon i, toktong do setia jala marlas ni roha akka suru-suruan i manomba Jahowa. Diboto nasida, lao dipasae Jahowa do sude hasusaan di tikkina.

12. Aha do na boi mangurupi hita asa toktong martahan?

¹² Songon dia do caratta maniru teladan ni akka suru-suruan na toktong setia? Songon suru-suruan, godang do akka hajahaton na taida saonari. Alai songon nasida, pos do rohatta lao dipasae Jahowa do sude hajahaton di tikkina. Jadi songon akka suru-suruan i, “unang ma hita marnaloja mangulahon akka na denggan”. (Gal. 6:9) Marjanji do Jahowa lao mangurupi hita asa boi martahan. (1 Kor. 10:13) Alani i toktong ma hita martangiang mangido tondi parbadia, na boi mangurupi hita asa toktong sabar jala marlas ni roha. (Gal. 5:22; Kol. 1:11) Alai boha do molo adong tantangan? Pos ma rohatta tu Jahowa jala unang ma mabiar. Pasti sai diurupi Jahowa do hita jala toktong dipatogu.—Heb. 13:6.

DIJAGA AKKA SURU-SURUAN DO HURIA ASA TOKTONG BADIA

13. Di ari parpudi on, tugas istimewa aha do na dilehon Jahowa tu akka suru-suruan? (Mateus 13:​47-49)

¹³ Dilehon Jahowa do sada tugas na istimewa tu akka suru-suruan di ari parpudi on. (Jaha Mateus 13:​47-49.) Marjuta do halak di liat portibi on na tertarik tu hasittongan. Alai dang sude nasida mangihutton aturan ni Jahowa sian ias ni rohana. Alani i ma dilehon tugas tu akka suru-suruan lao “manirang parjahat sian halak na mangulahon na sittong” asa toktong badia huria. Alai on dang na berarti, dang boi be mulak akka halak na maninggalhon Jahowa. Jala dang na berarti, dang na lao adong masalah di huria. Alai pos do rohatta, sai toktong do bekerja keras akka suru-suruan lao mamastihon asa toktong badia huria.

14-15. Songon dia do caratta mendukung akka suru-suruan lao manjaga huria toktong badia? (Ida gambar.)

¹⁴ Songon dia do caratta mendukung akka suru-suruan lao manjaga huria toktong badia? Marsitutu ma hita manjaga hubungatta toktong togu tu Jahowa. Boha do carana? Tapillit ma akka dongan na makkaholongi Ibana. Jala tapadao ma diritta sian akka halak na so makkaholongi Jahowa. (Ps. 101:3) Asing ni i, taurupi ma akka dongan asa toktong marsihohot tu Jahowa. Contohna, aha ma na ikkon taulahon molo adong donganta na mangulahon dosa na balga? Ala holong rohatta tu ibana, ikkon tajujui do asa ibana sandiri na makkatai tu sintua. Molo dang olo ibana mangulahon i, hita ma na ikkon paboahon i tu sintua. Lomo do rohatta asa denggan muse hubungan ni donganta i tu Jahowa.—Jak. 5:​14, 15.

¹⁵ Piga-piga halak na mangulahon dosa na balga gabe dipakaluar sian huria. Molo masa sisongon i, porlu do taihutton poda na sian Bibel na mandok, “unang mardongan be hamu” dohot nasida.d (1 Kor. 5:​9-13) Pengaturan on dibahen lao manjaga asa toktong badia huria i. Asing ni i, molo dang mardongan be hita dohot halak na dipakaluar sian huria, sasittongna on patuduhon na holong do rohatta tu nasida. Molo taihutton pengaturan on, gabe adong ma kesempatan tu nasida asa mulak muse manomba Jahowa. Molo mulak nasida, gabe marlas ni roha ma hita rap dohot Jahowa dohot akka suru-suruan.—Luk. 15:7.

16. Aha do na naeng ditiru hamu sian akka suru-suruan?

¹⁶ Massai las do rohatta ala dilehon Jahowa kesempatan tu hita lao marsiajar sian akka suru-suruan, jala boi bekerja sama dohot nasida. Jadi tatiru ma akka sifat ni nasida, songon serep ni roha, holong ni roha tu akka jolma, kesetiaan, dohot upaya ni nasida lao manjaga asa toktong badia huria. Molo torus tatiru akka suru-suruan na setia on, boi ma hita toktong gabe bagian sian keluarga ni Jahowa sahat tu salelengna.