Ajari ma Ianakkonmuna Patuduhon Hamauliateon

Menurut penelitian halak na mamboto mandok mauliate biasana gabe halak na bahagia, sehat, dang mura menyerah tikki adong masalahna, jala setia tu donganna. Sahalak peneliti na margoar si Robert A. Emmons paboahon aha gunana patuduhon hamauliateon. “Boi do i mambolokkon perasaan na so denggan sian dirina, misalna late ni roha, sogo ni roha, serakah, jala kecewa.”a

Aha do manfaatna tu akka dakdanak? Saleleng opat taon dibahen ma penelitian tu 700 halak na poso. Dung diparrohahon, akka na poso na patuduhon hamauliateon jarang do mancontek, dang mamakke narkoba dohot alkohol, jala dang mambahen masalah.

• Molo merasa sasahalak marhak mandapot manang aha pe di ngoluna, pasti maol do ibana mandok mauliate. Godang do dakdanak na songon i pangalahona. Molo adong na mambahen na denggan tu ibana, dianggap ibana do na pantas ibana mandapot i, dang dianggap ibana i songon hadiah. Ujungna dang diboto ibana mandok mauliate.

  Saonari pe godang do halak na taida songon i. Sahalak ina na margoar si Katherine mandok, “Di TV, di majalah, dohot di internet godang do akka gambar na manjujui hita asa pittor manuhor akka na tahalomohon. Didok do na ‘pantas’ hita mandapot i.”

• Boi do diajari dakdanak patuduhon hamauliateon sian mulai tagelleng. Sahalak ina na margoar si Kaye mandok, “Mura do diajari dakdanak. Molo diajari kebiasaan na denggan tu nasida sian mulai tagelleng, dos ma i songon na manukkol suan-suanan mamakke hau asa tigor partubuna.”

Na boi diajarhon hamu tu ianakkonmuna

• Ajari ma aha na ikkon didok ianakkonmuna. Bahkan dakdanak tagelleng pe, boi do diajari mandok mauliate tikki adong halak na burju manang tikki adong na mangalehon hadiah tu nasida. Ujungna dung lam magodang nasida, gabe lam diargai nasida ma halak na patuduhon haburjuon tu nasida.

  

  Prinsip ni Bibel: “Toktong ma hamu mandok mauliate.”—Kolosse 3:15.

  “Pahoppunami na marumur tolu taon nga terbiasa mandok ‘mauliate’, jala molo adong na naeng dipangido ibana, selalu do didok ibana ‘tolong’. Sian natua-tuana do ibana marsiajar mandok songon i. Jotjot do diida ibana natua-tuana sopan makkatai jala sai patuduhon hamauliateon tu halak.”—Jeffrey.

• Ajari ma aha na ikkon diulahon ianakkonmuna. Molo adong na mangalehon hadiah tu ianakkonmuna, boi do diajari hamu nasida mambahen kartu ucapan lao mandok mauliate. Asing ni i, boi do dilehon hamu tugas di jabu tu akka gellengmuna. Molo diulahon hamu i, gabe diattusi nasida ma godang do na ikkon diulahon asa nyaman tinggal di jabu.

  

  Prinsip ni Bibel: “Umlas do roha ni halak na mangalehon sian na manjalo.”—Ulaon ni Apostel 20:35.

  “Olo do gellengnami na remaja dohot makkarejohon tugas di jabu. Adong na mambahen daftar ni sipanganon na lao diloppa, adong na mangaloppa, dohot paiasson jabu. Gabe diattusi nasida ma godang do na diulahon hami natua-tuana di jabu. Lam diargai nasida ma upayanami.”—Beverly.

• Ajari ma sifat na ikkon dipatudu ianakkonmuna. Molo serep roha ni sasahalak, gabe ummura do ibana patuduhon hamauliateon. Alana halak na serep rohana dang maila minta bantuan tu halak na asing. Sadar do ibana adong do na so boi diulahon ibana sahalakna. Jadi tikki adong na mangurupi, gabe mandok mauliate ma ibana.

  

  Prinsip ni Bibel: “Toruk ma rohamuna, jala sangap ma bahen tu na asing. Unang ma holan mamparrohahon na porlu di hamu, alai parrohahon ma na porlu di na asing.”—Pilippi 2:3, 4.

  “Sipata tikki mangan malam, olo do hami mambahen permainan songon on: Tiap halak paboahon aha na dihamauliatehon ibana di ngoluna. Hasilna, gabe positif ma cara marpikkirnami jala lam diargai hami sudena.”—Tamara.

Tips: Ikkon boi do hamu ditiru gellengmuna. Molo jotjot do dibege gellengmuna hamu mandok mauliate tu nasida nang tu halak na asing, gabe dohot ma nasida mangulahon na sarupa.