Nungnga Dipaboa Bibel Hian Taringot Situasi Politik na Lam Gaor

Godang do saonari halak na marbada alani masalah politik. Misalna, olo do nasida marbada ala dang setuju tu hukum manang undang-undang na berpengaruh tu ngolu ni nasida ganup ari. Jala olo do kasar cara ni nasida pasahatton pandapot ni nasida. Di pamarettaon pe olo do dang sapandapot akka pejabat na mambahen hukum dohot akka pejabat na asing, jala dang adong sian nasida na olo mengalah. I ma na mambahen gabe gaor situasi ni politik, jala boi do i mambahen pamaretta maol mangulahon tugasna.

Alai, porlu do taparrohahon situasi politik na masa di Amerika Serikat dohot di Britania Raya (na jotjot digoari Inggris). Boasa? Alana nungnga dipaboa Bibel hian, na lao gaor do situasi politik ni dua negara on. Jala di tikki i ma lao bertindak Harajaon ni Debata padenggatton keadaan ni portibi on.

Gaor do situasi politik “di ujung ni akka ari i”

Adong sada surirang na luar biasa di Bibel, na disurat di bukku Daniel. Di surirang i, dipaboa Debata do “aha na lao masa di ujung ni akka ari i,” i ma di ari na naeng ro, na mambahen muba ngolu ni sude jolma.—Daniel 2:28.

Marhite nipi ni raja Babel do Debata paboahon surirang i. Di nipi i, diida raja i ma sada patung na balga. Sian mas murni do ulu ni patung i, sian perak do andorana dohot tanganna, sian tombaga do butuha dohot hae-haena, jala sian bosi na marcampur tano liat do mulai sian mataniari patna sahat tu jari-jarina. Dung i dipaboa si Daniel ma, manggombarhon akka harajaon na lao mangarajai tano on do mulai sian ulu ni patung i sahat tu jari-jarina. Jala na lao margatti-gatti do akka harajaon i marhuaso di portibi on.a Alai ujungna, na lao hancur do patung i dibahen sada batu na manggombarhon sada Harajaon manang sada pamarettaon na dipajongjong Debata.—Daniel 2:36-45.

Menurut surirang i, Harajaon ni Debata i ma na lao manggattihon sude pamarettaon ni jolma na adong di tano on. Harajaon i do tong na disuru Jesus asa ditangiakkon akka siseanna tikki didok ibana, “Sai ro ma Harajaonmu.”—Mateus 6:10.

Alai memang adong do dipaboa di surirang i taringot na lao gaor keadaan ni politik saonari on? Molo taida muse surirang i, adong do dipaboa disi “sian bosi na marcampur tano liat do mulai sian mataniari ni patna sahat tu jari-jarina”. (Daniel 2:33) Hape mulai sian uluna sahat tu patna, dang adong na marcampur tano liat. On patuduhon na lao adong do sada harajaon manang kuasa dunia na berbeda sian akka harajaon na asing. Aha do maksudna? Songon on ma na didok si Daniel taringot surirang i:

Jadi menurut surirang i, na lao gaor do situasi politik ni kuasa dunia na digombarhon pat ni patung i. Jala rakyatna sandiri do na mambahen moru huaso ni kuasa dunia i.

Surirang ni si Daniel na dipasaut saonari

Manggombarhon kuasa dunia na saonari do pat ni patung i, i ma Amerika Serikat na bekerja sama dohot Inggris. Sian dia ma boi taboto i?

Bibel mandok, “sian bosi na marcampur tano liat do jari-jari ni patung i.” Dang boi marsada bosi dohot tano liat. (Daniel 2:42) Saonari on, moru do huaso ni Amerika Serikat dohot Inggris alani rakyat ni nasida sandiri. Misalna, dang boi marsada akka rakyatna. Jotjot do nasida demon lao menuntut hakna. Akka pejabat na dipillit rakyat pe dang boi mangulahon pangidoan ni rakyatna. Ala dang boi marsada rakyatna, gabe maol ma pamaretta mangulahon akka rencanana.

Ida ma jo lapatan ni piga-piga hatorangan na adong di surirang ni si Daniel jala songon dia i dipasaut saonari:

Surirang: “Tarbagi do harajaon i. Karas do deba harajaon i dos songon bosi.”—Daniel 2:41.

Lapatanna: Nang pe adong masalah politik di pamarettaon ni Amerika Serikat dohot Inggris, alai gogo do nasida dos songon bosi alani kekuatan militer ni nasida. Jadi boi do tindakan ni nasida mempengaruhi sude negara na asing.

Songon dia i dipasaut?

Molo dipasada hepeng na dipakke negara Amerika dohot Inggris tu biaya militer di taon 2023, unggodang do i sian sude hepeng na dipakke sian 12 negara na asing.—Institut Penelitian Perdamaian Internasional Stockholm.

“Kerja sama ni Inggris dohot Amerika. . . . i ma kerja sama na umgomos sian sude kerja sama ni dua negara na asing. Bekerja sama do nasida lao manjaga jala mambela negara ni nasida. Jala dipakke nasida do teknologi na terbaru. . . . Marsiurupan do hami jala masitogu-toguan.”—Komando Strategis Kementerian Pertahanan Inggris, April 2024.

Surirang: “Sian bosi marcampur tano liat do jari-jari ni patung i. Lapatanna, gogo do deba harajaon i, alai gale do na deba nai.”—Daniel 2:42.

Lapatanna: Nang pe gogo kekuatan militer ni negara Amerika dohot Inggris, dang sai boi pamaretta mangulahon sude naung direncanahon nasida. Alana sistem demokrasi do sistem pamarettaon ni nasida. Molo dang setuju rakyat tu kebijakan na dibahen pamaretta, pasti maol ma pamaretta naeng mangulahon kebijakan ni nasida i.

Songon dia i dipasaut?

“Piga-piga pakar mandok, ala dang kompak akka pejabat di pamarettaon ni negara Amerika, gabe maol ma negara i lao mangulahon rencana naung dipaboa nasida tu negara na asing. Misalna taringot keamanan dohot perdagangan.”—“The Wall Street Journal.”

“Godang do masalah politik na baru di negara Inggris. Alani i, gabe holan i ma na dipikkiri akka pejabat ni pamaretta. Akibatna dang boi be nasida mamikkiri akka rencana na marguna tu rakyatna.”—Institute for Government.

Surirang: “Marsada do harajaon i dohot rakyatna, alai dang hea i domu.”—Daniel 2:43.

Lapatanna: Ala sistem demokrasi do sistem pamarettaon ni nasida, boi do rakyat mempengaruhi keputusan ni pamaretta. Nang pe songon i, dang sai las roha ni pamaretta manang rakyat na asing tu keputusan i.

Songon dia i dipasaut?

“Negatif do saonari pandangan ni godangan halak Amerika taringot sistem politik di negara i dohot tu akka pejabatna.”—Pusat Penelitian Pew

“Molo dibandingkon tu 50 taon na parpudi on, nga moru be saonari pos ni roha ni rakyat negara Inggris tu pamaretta dohot tu akka pejabat ni nasida.”—“Pusat Nasional Penelitian Sosial.”

Surirang ni si Daniel na dipasaut di ari na naeng ro

Menurut surirang ni si Daniel, tikki marhuaso dope kuasa dunia Inggris-Amerika ro ma Harajaon ni Debata lao manggattihon sude pamarettaon ni jolma.—Daniel 2:44.

Adong do tong dipaboa surirang taringot i di bukku pangungkapon. Di bukku i didok, na lao dipapungu “ma akka raja na di tano on” mangalo Debata Jahowab di porang Armagedon, “i ma ari ni Debata Pargogo na So Hatudosan i.” (Pangungkapon 16:14, 16; 19:19-21) Di porang i, lao hancurhonon ni Jahowa ma sude pamarettaon ni jolma. Jala dang na lao adong be bagian ni kuasa dunia na dipaboa di surirang ni si Daniel.

Asa lam godang na diboto hamu taringot i, jaha ma artikel “Aha do Porang Armagedon i?”

Aha do manfaatna mamparsiajari surirang ni si Daniel?

Nungnga dipaboa Bibel hian songon dia situasi politik na lao masa di Amerika Serikat dohot di Inggris. Jala godang do manfaatna molo diparsiajari hamu taringot i.

• Gabe diattusi hamu ma boasa dipangido Jesus asa netral akka halak na mangihutton ibana di urusan politik. (Johannes 17:16) Jala gabe diattusi hamu ma muse boasa didok Jesus, i ma raja ni Harajaon ni Debata, “Dang sian portibi on Harajaokku.”—Johannes 18:36.

• Gabe lam pos ma rohamuna na lao bertindak nama satokkin nai Harajaon ni Debata. Jala na lao saut nama sude pasu-pasu na dijanjihon Debata tu jolma.—Pangungkapon 21:3, 4.

• Gabe pos ma rohamuna, dang na lao hancur tano on alani porang na masa di tano on.—Psalmen 37:11, 29.

Molo taida sian surirang ni si Daniel, taboto ma kuasa dunia Amerika-Inggris ma na gabe kuasa dunia na parpudi na marhuaso di tano on, na digombarhon songon pat ni patung i. Dung marujung kuasa dunia i, Harajaon ni Debata nama na mamaretta sian surgo.

Asa diboto hamu aha na lao diulahon Harajaon ni Debata, tonton ma video Aha do Harajaon ni Debata i?