Sada Kultus do Saksi Jahowa?

Dang sada kultus Saksi Jahowa. Alai, halak Kristen do hami. Marsitutu do hami mangihutton Jesus jala mangolu hombar tu ajaranna.

Aha do lapatan ni kultus?

Godang do pandapot ni halak taringot lapatan ni “kultus”. Alai, adong do dua lapatan ni “kultus” na somal diboto halak, jala dang parsidohot hami tu na dua i.

• Piga-piga halak mandok molo kultus, i ma agama na baru dibahen. Dang agama na baru dibahen Saksi Jahowa. Alai, hami mangihutton isara panombaon ni halak Kristen di abad na parjolo. Disurat do di Bibel, isara panombaon ni nasida. (2 Timoteus 3:16, 17) Jala, hami mangihutton isara panombaon na disurat di Bibel. Pos do rohanami, on do panombaon na sittong.

• Piga-piga halak mandok molo kultus, sekte na mangaliluhon na dipimpin jolma. Dang jolma na gabe pamimpin ni Saksi Jahowa. Alai, hami mangihutton hata ni Jesus on, “Holan sada do pamimpinmuna, i ma Messias.”—Mateus 23:10, Bibel siganup ari.

Dang boi dohonon molo Saksi Jahowa mangaliluhon jolma, ala nasida mangulahon akka prinsip na marlaba tu hami dohot tu na asing. Umpamana, diurupi hami do godang halak pasohon hasomalan na so denggan, songon mabuk manang marnarkoba. Di liat portibi on, diajari hami do halak manjaha dohot manurat. Jala diurupi hami do halak na hona mara. Dung i, marsitutu do hami mangihutton ajaran ni Jesus, asa mangalehon pakkorhon na denggan tu na asing.—Mateus 5:13-16.