Naung Ditottuhon Hian do Andigan Hita Mate?

Na didok Bibel

Daong, dang adong didok di Bibel naung ditottuhon hian hamatean ni sasahalak. Gariada Bibel mandok molo hamatean i jotjot terjadi “di tikki na so panagaman.”​—Parjamita 9:​11.

Dang na Bibel sandiri tahe na mandok “adong do tikkina mate”?

Toho, Parjamita 3:2 mandok, “Adong do tikkina tubu, adong do tikkina mate. Adong do tikkina manuan, adong do tikkina mamanen na disuan i.” Alai molo taida akka ayat sebelum dohot dukkon ayat i, boi ma taboto taringot akka na masa di ngolu ni jolma do na dibahas. (Parjamita 3:​1-8) Dang hea ditottuhon Debata andigan pangula ikkon manuan boni ni suan-suanan. Dos songon i ma dang hea ditottuhon Debata andigan sasahalak mate. Gariada, akka ayat on paingotton hita asa unang sappe lupa lao mamuji Debata na manoppa hita, ala sibuk mangulahon ulaon siganup ari.​—Parjamita 3:​11; 12:​1, 13.

Adong do na boi taulahon asa lam ganjang umurta?

Memang dang boi tapastihon sadia leleng hita boi mangolu. Alai, molo marbisuk hita mandalani ngolutta, boi do i mangurupi hita asa ganjang umurta. Bibel mandok, “Parohon hangoluan do na niajarhon ni halak na marbisuk, na padaohon halak sian jorat ni hamatean.” (Poda 13:14) Hea do tong didok si Musa tu halak Israel, ikkon dioloi nasida do Debata asa ‘ganjang umur’ ni nasida. (5 Musa 6:2) Sebalikna, gabe jeppek do umurta molo dang marbisuk, jala taulahon akka na so denggan.​—Parjamita 7:​17.

Nang pe nungnga tabahen na denggan jala marbisuk hita mandalani ngolutta, dang boi tadok gabe dang mate hita. (Rom 5:​12) Alai pos do rohatta na lao muba do sudena i. Alana didok Bibel, ‘dang na lao adong be hamatean’ satokkin nai.​—Pangungkapon 21:4.