Inganan manimpan orbuk ni halak naung mate di lambung ni poto ni halakna

Aha do na Didok Bibel taringot Kremasi?

Na didok Bibel

Dang adong petunjuk di Bibel taringot kremasi. Jala dang adong dipaboa di Bibel ikkon dikubur manang dikremasi halak naung mate.

Memang, adong do disurat di Bibel taringot naposo ni Debata na mangubur halak naung mate. Umpamana dituhor si Abraham do tano asa adong inganan lao mangubur istrina, si Sarah.—1 Musa 23:2-20; 49:29-32.

Alai, disurat do di Bibel taringot naposo ni Debata na mambakar bakke ni halak naung mate. Umpamana, bakke ni Raja Saul dohot tolu anakna na mate tikki marporang. Tikki i, di daerah musu do bakke ni nasida jala dang dikubur. Dung dibege akka tentara Israel barita i, dibuat nasida ma bakke i. Dibakar ma jala dikubur orbukna. (1 Samuel 31:8-13) Didok di Bibel, dipuji do akka tentara i ala denggan diurus bakke ni si Saul dohot anakna i.—2 Samuel 2:4-6.

Pandapot ni akka halak taringot kremasi

Pandapot ni akka halak: Na so arga do di hita halak na mate i molo dikremasi.

Na sasittongna: Didok di Bibel molo halak naung mate mulak do gabe tano. Jala memang songon i do, busuk ma bakkena i jala gabe tano. (1 Musa 3:19) Molo dikremasi bakke ni halak naung mate, tottu pittor gabe orbuk do, manang tano.

Pandapot ni akka halak: Molo najolo, akka halak na so setia tu Debata do na dikremasi.

Na Sasittongna: Memang adong do na dibakar bakke ni halak na so setia, songon si Agan dohot keluargana. (Josua 7:25) Alai somalna, halak parjahat na diuhum mate, dang dibakar bakkena. (5 Musa 21:22, 23) Adong do halak na burju na dibakar bakkena, songon si Jonatan, anak ni Raja Saul.

Pandapot ni akka halak: Dang boi dipahehe Debata halak na dikremasi.

Na sasittongna: Manang songon dia pe parmatena, atik na dikubur, dikremasi, mago di laut, manang diallang binatang buas, boi do dipahehe Debata nasida. (Pangungkapon 20:13) Mura do di Debata mambahen nasida gabe adong muse.—1 Korint 15:35, 38.

Dia ma na Tapillit, Dikubur manang Dikremasi?

Lao mamillit i, pikkirhon ma on:

Pangidoan ni halak na mate i. Adong do dipaboa di Bibel taringot pangidoan ni sasahalak boha bahenon ni keluargana tu bakkena. Jala i do na diulahon keluargana.—1 Musa 50:4, 5; 2 Musa 13:19.
Hasomalan na adong di luatmuna. Diihutton akka halak do hasomalan di hutana taringot aha na lao dibahen tu bakke ni halak naung mate. (Johannes 19:40) Najolo, somalna dikubur do halak na mate. (1 Musa 49:31; 1 Samuel 28:3) Saonari pe, boi do diihutton hasomalan na adong di hutana be, asal ma dang maralo i tu na didok Bibel.
Peraturan ni pamaretta. Didok di Bibel, ikkon unduk do hita tu pamaretta. (Rom 13:1) Di piga-piga inganan, adong do peraturan dibahen pamaretta taringot boha bahenon tu bakke ni halak naung mate. Umpamana adong peraturan, molo dikremasi do na mate i, adong do ditottuhon inganan lao mambolokkon orbukna.
Mamikkirhon pakkilalaan ni halak na asing. Didok do di Bibel asa tapikkirhon pakkilalaan ni halak na asing. (Pilippi 2:4) Tikki naeng mamillit songon dia naeng tabahen tu halak naung mate i, pikkirhon ma on: Songon dia do pakkilalaan ni keluarga molo dikremasi manang dikubur halak naung mate i? Songon dia do pandapot ni akka halak di huta i taringot i?