Pengetahuan na Paboahon Harapan

Lao Dimusnahon Akka Parjahat

“Nang pe tubu akka parjahat songon ramba- ramba, Jala lam lomak i, Na lao dipamate do nasida saleleng ni lelengna.”​—PSALMEN 92:7.

Songon na dipaboa di halaman sebelumna, lam godang do masa akka na so denggan. Alai dang pola heran hita disi. Alana songon na didok Bibel di 2 Timoteus 3:1-5, lam jahat do pangalaho ni jolma “di ari parpudi”. Aha do maksudna tikki didok ari parpudi? Maksudna ari parpudi i ma, godang akka halak di portibi on na mangalo tu Debata. Alani i, satokkin nai lao dimusnahon Debata nama akka halak na so olo bertobat. Jadi, holan akka halak na mangoloi Debata nama na boi tinggal di tano on. “Lehononna do tano on gabe parbagianan ni halak na tigor marroha, jala mangolu ma nasida disi saleleng ni lelengna.”​—Psalmen 37:29.

Lao Dibinasahon Nama Sibolis

“Debata Silehon dame i . . . lao mangaripasson Sibolis.”​—ROM 16:20.

Molo dung dibinasahon Sibolis, akka suru-suruan na jahat dohot akka halak na jahat, dame ma portibi on. Marjanji do Debata, “Dang adong be na mambahen [ho] mabiar.”​—Mika 4:4.

Dang Adong be Sahit dohot Hamatean

“Apusan ni Debata ma nasa ilu-ilu sian mata ni nasida. Dang adong be hamatean nang arsak ni roha, nang angguk-angguk, nang na haccit, dang disi be. Ai nungnga salpu na parjolo i.”​—PANGUNGKAPON 21:4.

Haduan, dang adong be hasusaan dohot sahit. Alana, lao dipadenggan Debata nama sude akka na susa na terjadi alani Sibolis, si Adam, si Hawa, dohot alani kesalahatta sandiri. Jala ‘hamatean pe dang adong be’. Mangolu salelengna ma halak na makkaholongi jala na mangoloi Debata. Alai lao didia do nasida tinggal?

Lao Bahenonna ma Tano on Songon Taman Eden Najolo

“Marlas ni roha ma gurun pasir dohot tano na harsang, Marlas ni roha ma gurun jala gok ma akka bunga disi.”​—JESAYA 35:1.

Molo dung dibinasahon Debata akka na jahat sian tano on, gabe songon taman Eden najolo ma muse tano on. Gabe inganan na massai bagak ma sude tano on, jala godang ma sipanganon. (Psalmen 72:16) Gabe ias ma akka laut, danau, dohot sunge, jala godang ma akka makhluk hidup na mangolu disi. Dibangun akka halak ma jabu ni nasida, jala nasida sandiri do na tinggal disi. Dang adong be akka jolma na so marjabu, na kelaparan, manang na pogos.—Jesaya 65:21, 22.

Lao Paheheonna Akka Halak Naung Mate

‘Lao dipahehe do halak naung mate.’​—ULAON NI APOSTEL 24:15.

Lomo do rohamuna pajuppang muse dohot halak na dihaholongi hamu naung mate? Lao dipahehe Debata ma muse nasida di tano on. Tikki dipahehe, tandaonmuna do nasida jala nasida pe, tandaonna do hamu. Bayakkon ma songon dia las ni rohamuna dohot nasida. Boasa boi porsea hita na lao tutu do on terjadi? Alana adong do dipaboa contoh di Bibel naung hea dipahehe akka naung dewasa dohot dakdanak jala boi do nasida muse rap dohot keluargana. Jala tikki dipahehe Jesus halak naung mate, jotjot do dibahen ibana i di jolo ni godang halak.​—Lukas 8:49-56; Johannes 11:11-14, 38-44.