Penglihatan ni si Johannes

Tikki dipenjara si Johannes di pulo Patmos, dipatudu Jesus ma tu ibana 16 penglihatan taringot ari na naeng ro. Di akka penglihatan i dipaboa ma songon dia goar ni Jahowa dipabadia, songon dia situasina molo ro Harajaon ni Debata, jala songon dia molo nungnga saut lomo ni roha ni Debata di tano on songon na di surgo.

Di sada penglihatan, diida si Johannes ma Jahowa hundul di tahtana na mulia. Tarbege ma soara ni ronggur sian tahta i jala ro ma sillam. Di sakaliling ni Debata, adong ma 24 sintua na marpakkean na bottar jala mamakke mahkota na sian mas. Marsomba ma 24 sintua i di jolo ni Jahowa. Asing ni i, diida si Johannes ma marpungu godang halak sian sude bangso dohot bahasa lao manomba Jahowa. Jesus do na mamimpin nasida jala diboan ma nasida tu aek hangoluan. Di penglihatan na asing, diida si Johannes ma Jesus rap mamaretta dohot 24 sintua i. Dung i, diida ibana ma muse Jesus marporang mangalo naga i, i ma Sibolis, dohot malaikat na jahat. Didabuhon Jesus ma nasida sian surgo tu tano on.

Dung i, diida si Johannes ma Anak ni Domba rap dohot 144.000 halak jongjong di Dolok Sion. Jala diida ibana ma adong sada malaikat na habang tu sude luat di tano on. Diparettahon malaikat i ma akka jolma asa mangoloi jala mamuji Debata.

Di penglihatan na mangihut, diida si Johannes ma porang Armagedon. Di Armagedon, marporang do Jesus dohot tentarana mangalo pemerintahan ni Sibolis. Na parpudi, diida si Johannes ma dame situasi di surgo dohot di tano on. Dang adong be Sibolis dohot akka na mangihutton ibana. Sude na di surgo dohot na di tano on mamuji jala manomba Jahowa.