Andigan do Panutup ni Jaman on? Aha do na Didok Jesus

PIKKIRHON MA ADONG DUA NA DIDOK JESUS TARINGOT PANUTUP NI JAMAN ON:

“Alani i, jaga ma hamu, ai dang diboto hamu ari manang jamna.”​—MATEUS 25:13.

“Sai jaga ma, sai dungo ma, ai dang diboto hamu tikki naung ditottuhon i.”​—MARKUS 13:33.

Jadi, dang adong nanggo sada pe jolma di tano on na mamboto andigan do panutup ni jaman on. Alai nungnga ditottuhon Debata andigan pastina “ari dohot jamna” panutup ni jaman on. (Mateus 24:36) Alai na gabe so adong do na mamboto naung jonok ari i? Dang songon i maksudna. Alai dipaboa Jesus do tu akka siseanna akka aha na masa na lao gabe tanda na patuduhon naung jonok panutup ni jaman on.

AKKA TANDA NA DIDOK JESUS

Akka na masa on ma na gabe “tanda ni panutup ni jaman on”. Didok Jesus, “Marporang ma bangso tu bangso jala harajaon tu harajaon. Masa ma haraparon dohot gempa di godang inganan.” (Mateus 24:3, 7) Didok Jesus do muse na lao masa “sahit di godang inganan” manang pandemi. (Lukas 21:11) Nungnga masa be diida hamu akka tanda na didok Jesus on?

Saonari susa do akka halak alani porang, kelaparan dohot gempa bumi, songon i nang akka sahit na baru na sai margatti-gatti. Contohna di taon 2004, masa ma gempa bumi na massai balga di Samudra Hindia na mambahen gabe ro tsunami. Jala adong ma 225.000 halak na mate alani i. Dung i muse, saleleng tolu taon pandemi COVID-19, nungnga adong hira-hira 6,9 juta halak di portibi on na mate alani i. Didok Jesus, akka na masa on ma na gabe tanda na patuduhon naung jonok panutup ni jaman on.

“AKKA ARI PARPUDI”

Dipaboa Bibel do aha na masa di “akka ari parpudi” sebelum panutup ni jaman on. (2 Petrus 3:3, 4) Didok di 2 Timoteus 3:1-5, lam roa do akka pangalaho ni jolma di ari parpudi. (Ida kotak “Akka Pangalaho ni Jolma di Ari Parpudi.”) Diida hamu do molo jolma saonari on holan mamikkiri dirina sandiri, serakah, mangulahon na jahat tu donganna, jala dang marholong ni roha? On ma muse tandana na patuduhon naung mangolu hita di ari parpudi.

Sadia leleng do masa ari parpudi i? Didok Bibel, holan ‘saotik do tikkina’. Dung i, lao dibinasahon Debata ma akka “halak na manegai tano on”.—Pangungkapon 11:15-18; 12:12.

NUNGNGA JONOK PORTIBI NA DUMENGGAN!

Nungnga ditottuhon Debata ari dohot jamna andigan lao dihancurhon Ibana pamarettaon ni jolma na jahat on. (Mateus 24:36) Alai sasittongna, ‘dang lomo roha ni Debata mangaripasson manang ise pe’. (2 Petrus 3:9) Dilehon Ibana do kesempatan tu akka jolma lao marsiajar taringot lomo ni rohana jala mangoloi parettana. Boasa? Alana, lomo rohana asa selamat sude jolma jala mangolu salelengna di tano on dung dibahen tano on gabe songon taman Eden.

Adong do sada organisasi ni Debata di portibi on na boi mangurupi halak lao mamboto songon dia carana asa boi mangolu salelengna di Harajaon ni Debata di tano on. Alana didok Jesus, lao dibaritahon do barita na uli taringot Harajaon ni Debata “di liat portibi on”. (Mateus 24:14) Nungnga marmiliar jom tikki na dilehon Saksi Jahowa lao marbarita dohot mangajari halak marsiajar Bibel. Jadi didok Jesus do, ikkon dibaritahon do barita na uli on tu sude halak di portibi on sebelum panutup ni jaman on.

Satokkin nai nama tikki ni jolma mamaretta di tano on. Alai barita na uli on boi mambahen hamu asa selamat di tikki panutup ni jaman on jala mangolu salelengna di tano on songon naung dijanjihon Debata.