Aha do na Boi Menjamin Asa Bahagia Masa Depanta?

Songon naung dipaboa di halaman sebelumna, godang do halak na berupaya marsikkola na timbo, porsea tu nasib, mangalului godang hepeng, jala gabe halak na burju asa boi denggan masa depanna. Alai sude akka na diulahon nasida i, dos ma i songon na mamakke peta na sala tikki naeng lao tu sada tempat. Molo songon i, adong do petunjuk na boi dihaporseai na boi mambahen bahagia masa depanta? Adong!

SUMBER INFORMASI NA DUMENGGAN

Tikki naeng mambahen keputusan, biasana tapangido do nasehat sian halak na uttua manang na ummalo sian hita. Suang songon i ma, asa boi bahagia masa depanta adong do sada Pribadi na uttua jala na ummalo sian hita na boi mangalehon nasehat na dumenggan na boi mangurupi hita. Nasehat i, adong do dipaboa di sada bukku na disurat hira-hira 3.500 taon naung salpu. Bukku i, i ma Bibel.

Boasa Bibel i boi tahaporseai? Alana, Bibel i sian sada Pribadi na uttua jala na ummalo di saluhut portibi on. Didok do Ibana “Naung Adong sian Najolo”, i ma Debata “na so marmula jala na so marujung”. (Daniel 7:9; Psalmen 90:2) Jala Ibana do “Sitoppa langit, Debata na sittong, Debata na manoppa tano on”. (Jesaya 45:18) Jala dipaboa Ibana do goarna tu hita, i ma Jahowa.—Psalmen 83:18.

Ala sian Debata do Bibel, i ma Debata na manoppa sude jolma, jadi dang adong didok Ibana di Bibel na undenggan sada kebudayaan manang sada suku sian akka kebudayaan manang suku na asing. Nasehat na adong di Bibel, dang ketinggalan jaman jala bermanfaat do tu sude jolma. Bibel, i ma bukku na unggodang diterjemahon tu godang bahasa jala na unggodang dijaha akka jolma.a Alani i, sude do halak boi manjaha jala boi mandapot manfaat sian Bibel i. Jadi, tutu do sude songon na didok di Bibel:

“Na so marimbar jolma di jolo ni Debata. Lomo do roha ni Debata mangida ganup halak na makkabiari Ibana jala na mangulahon na sittong, dang soal sian bangso na dia pe nasida.”—ULAON NI APOSTEL 10:34, 35.

Dos songon natua-tua na makkaholongi jala na olo mangurupi ianakkonna, songon i ma Debata Jahowa na makkaholongi jala na olo mangurupi hita marhite Bibel na marisi Hatana. (2 Timoteus 3:16) Jadi, boi do porsea hamu tu na didok di Bibel. Alana, Jahowa do na manoppa hita jala diboto Ibana do aha na mambahen las rohatta.

BOI DO TAHAPORSEAI BIBEL

Boi do porsea hita tu na didok Bibel taringot masa depan. Alana, hira-hira 2.000 taon naung salpu nungnga disurat di Bibel akka aha na lao masa dohot pangalaho ni akka jolma na taida saonari.

AKKA NA MASA

“Marporang ma bangso tu bangso jala harajaon tu harajaon. Masa ma gempa na massai gogo jala masa ma haraparon dohot sahit di godang inganan.”—LUKAS 21:10, 11.

AKKA PANGALAHO NI HALAK

“Na ro ma tikki hasusaan di ari parpudi. Ai makkaholongi dirina sandiri ma jolma, holongan di hepeng, marhata manggang, ginjang rohana, mangaleai, dang mangoloi natorasna, dang diboto mandok mauliate, dang setia, dang marroha holong, dang olo mardos ni roha, paroa-roahon donganna, dang diboto mangorom diri, parmuruk-muruk, makkasogohon na denggan, mangulahon na jahat tu donganna, sijogal rukkung, sombong, unlomo do rohana mangoloi giot-giot ni rohana sian apala mangoloi Debata.”—2 TIMOTEUS 3:1-4.

Menurut hamu, boasa akka na terjadi saonari on pas songon na didok di Bibel i? Pasti setuju do hamu tu na didok si Leung na sian Hong Kong. Didok ibana, “Sude akka na didok di Bibel nungnga leleng i disurat. Jala pas do sude terjadi songon na didok di Bibel i. Alani i, dang mungkin adong ramalan ni jolma na boi terjadi pas songon i. Jadi, Bibel i pasti sian sasahalak na umhebat sian hita sude.”

Adong do marratus naung terjadi akka na dipaboa di Bibel.b On patuduhon, na tutu do Bibel i Hata ni Debata. Didok Jahowa, “Au do Debata, jala dang adong na songon Au. Sian mulana nungnga hupaboa hian songon dia ujungna.” (Jesaya 46:9, 10) I do alana, boasa porsea hita tu na didok di Bibel taringot masa depan.

BERMANFAAT DO BIBEL TU HAMU SAONARI SAHAT TU SALELENGNA

Molo diihutton hamu nasehat na dipaboa di Bibel, pasti bermanfaat do i di hamu. Pikkirhon ma piga-piga contoh on.

NASEHAT NA DENGGAN TARINGOT HEPENG DOHOT PARKAREJOAN

“Dumenggan do sanggolom istirahat sian dua golom halojaon, na dos songon mangalele alogo.”—PARJAMITA 4:6.

ASA BAHAGIA KELUARGAMUNA

“Ikkon haholonganmuna do istrimuna songon makkaholongi dirimuna. Jala ikkon sangap do bahenon ni istri tu suamina.”—EPESUS 5:33.

ASA BOI DENGGAN HUBUNGANTA DOHOT NA ASING

“Unang ma muruk ho jala unang tarrimas, unang ma jut roham, jala unang ma gabe diulahon ho na jahat.”—PSALMEN 37:8.

Molo diulahon hamu aha na didok Bibel, boi ma bahagia ngolumuna saonari jala denggan masa depanmuna. Di Bibel, dipaboa do muse akka janji ni Debata taringot masa depan na massai denggan

DAME MA SUDE NGOLU NI JOLMA

“Marlas ni roha situtu ma nasida, ai dame do ngolu ni nasida.”—PSALMEN 37:11.

SUDE MA HALAK ADONG JABUNA JALA GODANG SIPANGANON

“Dibangun nasida ma jabu jala nasida ma na mangingani, dibahen nasida ma ladang anggur jala nasida ma na mangallang parbuena.”—JESAYA 65:21.

DANG ADONG BE NA MARSAHIT MANANG NA MATE

“Dang adong be hamatean nang arsak ni roha, nang angguk-angguk, nang na haccit, dang disi be.”—PANGUNGKAPON 21:4.

Aha do na ikkon diulahon hamu asa boi bahagia masa depanmuna? Di halaman na mangihut, tadapot ma alusna.

a Molo naeng mamboto taringot penerjemahan ni Bibel jala boasa boi i sahat tu godang halak, ida ma www.jw.org/bbc di bagian NA DIAJARHON BIBEL > SEJARAH & BIBEL.

b Lao mamboto informasi tambahan, ida bukku Alkitab—Firman dari Allah atau dari Manusia? pasal 9. Bukku on diterbitton Saksi Jahowa jala adong do di internet. Ida ma di www.jw.org/id jala pillit ma bagian PERPUSTAKAAN > BUKKU & BROSUR.