Pos ma Rohamuna tu “Hakim ni Saluhut Tano on” na Parasi Roha!

1. Parsiajaran penting aha do na dipaboa Jahowa tu si Abraham na boi mangapuli rohatta?

NAJOLO disuru Jahowa do sada suru-suruan paboahon tu si Abraham na lao ripassononna kota Sodom dohot Gumora. Nang pe togu haporseaon ni si Abraham, maol do diattusi si Abraham boasa diulahon Jahowa i. Didok ibana do, ‘Naeng pamateonmu do halak na sittong rap dohot halak na jahat? Sittong do na binahen ni Hakim ni saluhut tano on?’ Nang pe songon i, sabar do Jahowa mangurupi si Abraham mamboto sada parsiajaran na penting, i ma na so ripassonon ni Jahowa akka halak na sittong. Bermanfaat do parsiajaran on tong di hita, jala on boi mangapuli rohatta.—1 Mus. 18:​23-33.

2. Boasa pos rohatta na adil dohot na marasi ni roha do Jahowa tikki manguhumi akka jolma?

² Boasa pos rohatta na adil dohot na marasi ni roha do Jahowa tikki manguhumi akka jolma? Alana taboto, ‘roha do na diida Jahowa’. (1 Sam. 16:7) Takkas do diboto Jahowa “roha ni ganup jolma”. (1 Raj. 8:39; 1 Kron. 28:9) Luar biasa do on. Ummarbisuk do Jahowa sian hita. Alani i didok Apostel Paulus, “Dang adong na boi mangattusi cara ni Ibana manguhumi.”—Rom 11:33.

3-4. Sukkun-sukkun aha do na olo ro tu pikkiranta jala aha do na lao tabahas di artikel on? (Johannes 5:​28, 29)

³ Nang pe taboto sai sittong do na diulahon Jahowa, alai olo do ra sukkun-sukkun rohatta songon si Abraham. Inna rohatta do ra: ‘Mungkin do dipahehe Jahowa muse halak na diripasson Ibana najolo, songon na di Sodom dohot Gumora? Termasuk do nasida akka “halak na jahat” na lao dipahehe Debata?’—Ul. 24:15.

⁴ Taingot ma aha naung taparsiajari taringot haheheon. Baru-baru on nungnga dipatakkas pangattusionta taringot lapatan ni dipahehe “tu hangoluan” dohot ‘dipahehe “lao diuhumi”.a (Jaha Johannes 5:​28, 29.) Di artikel on dohot di artikel na mangihut lao tabahas ma muse pangattusion na asing na ikkon dipatakkas. Alai parjolo sahali tabahas ma, aha do na so taboto jala aha do na taboto taringot panguhuman ni Jahowa.

NA SO TABOTO

5. Aha do na hea didok publikasitta taringot akka halak na diripasson di Sodom dohot Gumora?

⁵ Najolo hea do didok di publikasitta, akka jolma na diripasson Jahowa songon na di Sodom dohot Gumora dang na lao dipahehe. Alai dung diriset jala ditangiakkon naposo haposan taringot on, dang boi hape tabahen kesimpulan songon i. Boasa?

6. Paboa ma akka ise halak na jahat na diripasson Jahowa, jala aha do na so dipaboa Bibel tu hita?

⁶ Adong do piga-piga contoh di Bibel na paboahon taringot panguhuman ni Jahowa tu halak na jahat. Contohna, hea do diripasson Jahowa akka halak marhite Aek na Sumar. Holan si Noak dohot keluargana do na malua di tikki i. Hea do muse dipakke Jahowa halak Israel lao mangaripasson pitu bangso na tinggal di Tano na Dijanjihon. Asing ni i, hea do disuru Ibana sada suru-suruan lao pamatehon 185.000 tentara Asiria di bagasan saborngin. (1 Mus. 7:23; 5 Mus. 7:​1-3; Jes. 37:​36, 37) Sian akka contoh on adong do dipaboa di Bibel naung diputusson Jahowa dang na lao dipahehe ganup halak i? Daong. Boasa tadok songon i?

7. Aha do na so taboto taringot halak Kanaan na diripasson Jahowa dohot halak na mate tikki masa Aek na Sumar? (Ida gambar sampul.)

⁷ Dang taboto songon dia cara ni Jahowa manguhumi ganup halak. Jala dang taboto atik na hea manang na dang dilehon Jahowa kesempatan tu nasida lao marsiajar taringot Ibana jala bertobat. Taingot ma muse tikki masa Aek na Sumar. Bibel mandok, “sahalak parbarita na paboahon dalan ni Debata na sittong” do si Noak. (2 Ptr. 2:5) Alai dang adong didok di Bibel tikki na dibahen si Noak i parau i, na marbarita do tong ibana tu ganup halak di tano on. Dos songon i ma taringot halak Kanaan. Dang taboto atik na hea manang na dang dilehon Jahowa kesempatan tu nasida lao marsiajar taringot Ibana jala bertobat.

8. Aha do na so taboto taringot halak Sodom dohot Gumora?

⁸ Boha taringot halak Sodom dohot Gumora? Adong do halak na sittong disi, i ma si Lot. Alai dang taboto atik na marbarita ibana tu sude halak Sodom dohot Gumora manang na dang. Jahat do memang nasida. Alai diboto nasida do na jahat nasida? Dang taboto taringot i. Taingot ma hea do didok di Bibel, ro godang bawa “na poso dohot na matua” lao memperkosa tamu ni si Lot. On patuduhon sude nasida dang hasea pangalahona mulai sian dakdanak. Jala dang hea nasida marsiajar taringot standar ni Debata. (1 Mus. 19:4; 2 Ptr. 2:7) Alai memang naung diputusson Jahowa do dang na lao paheheonna nanggo sada sian akka halak na di Sodom dohot Gumora? Dang boi tadok songon i. Memang, dang adong nanggo sappulu halak na sittong na tinggal di kota i. (1 Mus. 18:32) Jahat do nasida jala adil do Jahowa manguhumi nasida. Alai alani i do gabe tadok dang adong nanggo sada sian nasida na lao dipahehe? Dang boi tadok songon i!

9. Aha do na so taboto taringot si Salomo?

⁹ Di Bibel dipaboa do muse taringot halak na burju na ujungna gabe halak na jahat. Contohna Raja Salomo. Mulana denggan do diihutton ibana hata ni Debata. Jala dapotna do godang pasu-pasu sian Jahowa. Alai di pudian ni ari, gabe manimbil ma ibana jala manomba debata na so sittong. Alani dosana i, gabe muruk situtu ma Jahowa jala gabe susa ma bangso Israel saleleng marratus taon. Memang didok di Bibel ‘dikuburhon do ibana rap dohot akka ompuna’, termasuk ma i Raja Daud na setia. (1 Raj. 11:​5-9, 43; 2 Raj. 23:13) Alai gabe boi do tajamin pasti dipahehe Jahowa annon si Salomo? Dang adong dipaboa Bibel alusna. Adong halak marpikkir pasti dipahehe do annon si Salomo. Alana Bibel mandok, “Molo nungnga mate sasahalak, nungnga malua be ibana sian dosana.” (Rom 6:7) Alai on dang na lapatanna, sude halak na mate pasti dipahehe. Jadi dang berarti molo mate sasahalak, na marhak do ibana dipahehe muse. Alana silehon-lehon sian Jahowa do haheheon i. Jahowa do na manottuhon ise na lao dipahehe Ibana asa boi manomba Ibana salelengna. (Job 14:​13, 14; Joh. 6:44) Jadi lao dipahehe do annon si Salomo? Holan Jahowa do na mamboto alusna. Alai pos ma rohatta, pasti bahenon ni Jahowa do na sittong.

NA TABOTO

10. Songon dia do perasaan ni Jahowa tikki mangaripasson akka jolma? (Hesekiel 33:11) (Ida gambar.)

¹⁰ Jaha Hesekiel 33:11. Dipaboa Jahowa do songon dia perasaanna manguhumi akka jolma. Sarupa do dipaboa di surat ni si Hesekiel tu na dipaboa Apostel Petrus taringot perasaan ni Jahowa manguhumi akka jolma. “Dang lomo rohana diripasson manang ise pe.” (2 Ptr. 3:9) On paposson rohatta pasti adong do alasan na masuk akkal boasa diripasson Jahowa akka halak jala dang paheheonna nasida. Parasi roha do Ibana. Jala sai berupaya do Ibana patuduhon asi ni rohana i.

11. Akka ise do na so dipahehe, jala sian dia do taboto i?

¹¹ Aha do na takkas taboto taringot akka ise na so dipahehe? Adong do dipaboa di Bibel akka ise contohna.b Didok Jesus do dang na lao dipahehe si Judas Iskariot. (Mrk. 14:21; ida muse hatorangan na adong di Johannes 17:12 Alkitab Edisi Pelajaran Bahasa Indonesia.) Alana takkas do diboto si Judas, na diulahon ibana i na mangalo Jahowa dohot Jesus do. (Ida hatorangan na adong di Markus 3:29 Alkitab Edisi Pelajaran Bahasa Indonesia.) Songon i do tong akka pamimpin agama na mangalo Jesus. Didok Jesus, dang na lao dipahehe nasida. (Mat. 23:33; ida hatorangan “orang” na adong di Johannes 19:11 Alkitab Edisi Pelajaran Bahasa Indonesia.) Asing ni i, dipasingot Apostel Paulus do akka halak na murtad, molo dang bertobat nasida dang na lao dipahehe nasida.—Heb. 6:​4-8; 10:29.

12. Aha do na taboto taringot asi ni roha ni Jahowa? Paboa ma piga-piga contohna.

¹² Alai songon na dipaboa nakkin, parasi roha do Jahowa, “dang lomo rohana diripasson manang ise pe”. Songon dia do Jahowa patuduhon asi ni rohana tu piga-piga halak na mangulahon dosa na balga? Parrohahon ma piga-piga contoh. Misalna si Daud, diulahon ibana do dosa na balga songon mangalakkup jala mambunu. Alai ala bertobat si Daud, diampuni Jahowa do ibana. (2 Sam. 12:​1-13) Contoh na asing, i ma Raja Manasse. Massai godang do hajahaton na diulahon ibana saleleng ngoluna. Alai ala bertobat si Manasse, diampuni Jahowa do ibana. (2 Kron. 33:​9-16) Sian akka contoh on, taboto do sai dipatudu Jahowa do asi ni rohana, molo memang adong alasan na masuk akkal lao mangulahon i. Lao paheheonna do si Daud dohot si Manasse ala nungnga diakkui nasida dosana jala bertobat.

13. (a) Songon dia do Jahowa patuduhon asi ni rohana tu halak Ninive? (b) Aha do na didok Jesus taringot halak Ninive?

¹³ Dipatudu Jahowa do asi ni rohana tu halak Ninive. Mulana didok Jahowa do tu si Jona, “Paboa ma na lao hukumokku nama pangisi ni kota i. Ai nungnga huida hajahaton ni nasida.” Alai dung bertobat nasida, diampuni Jahowa do nasida. Tikki muruk si Jona, didok Debata do lao paingotton ibana, ‘Dang diboto halak Ninive dia na sittong dohot na sala.’ (Jona 1:​1, 2; 3:10; 4:​9-11) Jadi ummarasi ni roha do Jahowa sian si Jona. Di pudian ni ari, dipakke Jesus ma contoh on lao mangajarhon, na adil jala na marasi ni roha do Jahowa. Jesus mandok, dung bertobat halak Ninive lao dipahehe do nasida “di Ari Panguhuman”.—Mat. 12:41.

14. Kesempatan aha do na dapot ni halak Ninive dung dipahehe “di Ari Panguhuman”?

¹⁴ Kesempatan aha do na dapot ni halak Ninive dung dipahehe “di Ari Panguhuman”? Didok Jesus do, adong “akka na mangulahon na jahat hehe lao diuhumi”. (Joh. 5:29) Jadi tikki Pamarettaon Saribu Taon ni Kristus, rap dipahehe ma “halak na burju dohot halak na jahat”. (Ul. 24:15) Molo akka halak na jahat, dipahehe do nasida “lao diuhumi”. Lapatanna, idaon ni Jahowa dohot Jesus do nasida na olo do nasida mangihutton standar ni Jahowa manang na dang. Molo dang olo halak Ninive manomba Jahowa, dang pasombuon ni Jahowa nasida mangolu salelengna. (Jes. 65:20) Alai manang ise pe na mamillit lao manomba Jahowa, lao mangolu do nasida salelengna.—Dan. 12:2.

15. (a) Boasa dang boi tadok dang adong nanggo sada pe halak Sodom dohot Gumora na lao dipahehe? (b) Aha do maksud ni hata na disurat di Judas 7? (Ida kotak “Lapatan ni Hata na Disurat di Judas 7”.)

¹⁵ Didok Jesus, di “Ari Panguhuman” ubborat do hukuman tu akka halak na so manjakkon Jesus dohot na so manjalo ajaranna, sian tu kota Sodom dohot Gumora. (Mat. 10:14, 15; 11:​23, 24; Luk. 10:12) Aha do maksud ni hata ni Jesus on? Olo do ra tarippu, gaya bahasa hiperbola do na dipakke Jesus dison. Alai asing do maksud ni Jesus dison. Taingot ma di kesempatan na asing didok Jesus lao dipahehe do halak Ninive di Ari Panguhuman, jala dang mamakke gaya bahasa hiperbola Jesus disi.c Jadi olo do ra sarupa na dimaksud Jesus taringot halak Sodom dohot Gumora. Sarupa do “Ari Panguhuman” na lao masa tu nasida songon tu halak Ninive. Alana, songon halak Ninive, halak Sodom dohot Gumora pe mangulahon na jahat do. Alai bedana, dang dilehon Jahowa kesempatan tu halak Sodom dohot Gumora asa muba songon tu halak Ninive. Taingot ma muse na didok Jesus taringot akka halak na dipahehe “lao diuhumi”, termasuk ma i “akka na mangulahon na jahat”. (Joh. 5:29) Jadi olo do ra adong harapan tu piga-piga halak Sodom dohot Gumora lao dipahehe. Jala lao adong ma kesempatan di hita lao mangajari nasida taringot Jahowa dohot Jesus Kristus.

16. Aha do na taboto sian cara ni Jahowa mamutusson ise na lao dipahehe? (Jeremia 17:10)

¹⁶ Jaha Jeremia 17:10. Ayat on mangurupi hita mangattusi songon dia Jahowa manguhumi. Sai ‘dipareso Jahowa do roha dohot pikkiran ni jolma na buni’. Tikki mamutusson ise na lao dipahehe, bahenonna do na hombar tu pangalaho ni ganup jolma. Sai diihutton Jahowa do standarna na sittong, alai tong do dipatudu Ibana asi ni rohana molo memang adong alasan lao patuduhon i. Jadi molo so adong didok di Bibel dang na lao dipahehe sasahalak, dang boi pittor tabahen kesimpulan.

SAI SITTONG DO CARA NI JAHOWA MANGUHUMI

17. Aha do na lao masa tu akka halak naung mate?

¹⁷ Dung mangalo si Adam dohot si Hawa tu Jahowa jala marpihak tu Sibolis, akibatna godang do jolma na mate. Musu na kejam do hamatean i. (1 Kor. 15:26) Alai aha do lao masa tu akka halak na mate i? Molo tu 144.000 halak Kristen na miniahan dipahehe do nasida jala mangolu saleleng ni lelengna di surgo. (Pgk. 14:1) Molo tu akka halak na setia jala na makkaholongi Jahowa, lao dipahehe ma nasida di tano on. Molo toktong nasida setia saleleng Pamarettaon Saribu Taon ni Kristus dohot saleleng ujian na parpudi, lao mangolu saleleng ni lelengna ma nasida. (Dan. 12:13; Heb. 12:1) Jala saleleng Pamarettaon Saribu Taon ni Kristus lao dipahehe ma akka “halak na jahat”, termasuk ma i akka halak na so hea manomba Jahowa dohot na hea mangulahon akka na jahat. Dilehon Jahowa do kesempatan tu nasida lao manguba pangalahona jala gabe naposo ni Jahowa na setia. (Luk. 23:​42, 43) Alai adong do memang piga-piga halak na jahat hian jala mangalo Jahowa. Jadi, dang na lao paheheon ni Jahowa nasida.—Luk. 12:​4, 5.

18-19. (a) Boasa pos rohatta tu cara ni Jahowa manguhumi akka halak? (Jesaya 55:​8, 9) (b) Aha do na lao tabahas di artikel na mangihut?

¹⁸ Pos ma rohatta, sai sittong do sude cara ni Jahowa manguhumi akka halak. Songon si Abraham takkas do ditanda ibana Jahowa, “Hakim ni saluhut tano on”. Sempurna, marbisuk, jala marasi ni roha do Jahowa. Dilatik Ibana do Anakna, jala dilehon Ibana do tanggung jawab tu Anakna lao manguhumi akka halak. (Joh. 5:22) Boi do diboto Jahowa dohot Anakna roha ni ganup halak. (Mat. 9:4) Jadi tikki manguhumi akka halak pasti dibahen nasida do na “sittong”.

¹⁹ Bertekad ma hita asa marpos ni roha tu keputusan na dibahen Jahowa. Saonari nungnga taboto, holan Jahowa do na marhak manguhumi akka halak. (Jaha Jesaya 55:​8, 9.) Ido alana pos rohatta tu sude cara ni Jahowa dohot Anakna lao manguhumi akka halak. Jala taboto, sempurna do Jesus maniru Bapakna na adil jala na marasi ni roha. (Jes. 11:​3, 4) Alai songon dia do cara ni Jahowa dohot Jesus lao manguhumi akka halak tikki hasusaan bolon? Aha do na so taboto jala aha do na taboto taringot i? Sukkun-sukkun on lao dibahas ma di artikel na mangihut.