Unang ma Paleleng-leleng Hamu lao Tardidi

1. Aha do piga-piga alasan na mambahen olo sasahalak tardidi?

DEBATA JAHOWA do na mangalehon akka na denggan tu hamu, termasuk ma i hangoluan. Holong do rohamuna tu Jahowa, jala lomo do rohamuna patuduhon holongmuna i tu Ibana? Sada carana i ma mangalehon diri tu Jahowa jala tardidi. Molo diulahon hamu songon i, sai diurupi jala dipasu-pasu Jahowa ma hamu. Alana nungnga gabe bagian sian keluarga ni Jahowa hamu. Gabe Ama dohot Ale-Ale ma Jahowa i di hamu, jala gabe appunana ma hamu. (Ps. 73:24; Jes. 43:​1, 2) Asing ni i, molo talehon diritta tu Jahowa jala tardidi, boi ma dapotta hangoluan na salelengna.—1 Ptr. 3:21.

2. Aha do na lao tabahas di artikel on?

² Adong do na mangabbati hamu lao tardidi? Molo adong, unang ma metmet rohamuna. Adong do marjuta halak na makkilala sisongon i, jala marhasil do nasida mangatasi tantangan i. Boi do dipauba nasida pangalaho dohot cara marpikkir ni nasida asa boi tardidi. Saonari las hian do roha ni nasida boi melayani Jahowa jala semangat do nasida mangulahon i. Adong do parsiajaran na boi tadapot sian akka halak na tardidi di abad na parjolo. Di artikel on, lao tabahas ma aha do tantangan na diadopi nasida, jala parsiajaran aha do na tadapot sian i.

AKKA HALAK SAMARIA

3. Tantangan aha do na mungkin diadopi halak Samaria andorang so tardidi nasida?

³ Di tikki ni Jesus, halak Samaria i sada kelompok agama. Godang do halak Samaria na tinggal di jonok ni kota Sikem dohot di kota Samaria na adong di Judea sabola utara. Andorang so tardidi halak Samaria, ikkon adong do parbinotoan ni nasida na bagas taringot Hata ni Debata. Hape holan bukku 1 Musa sahat tu 5 Musa do na dihaporseai halak Samaria, jala dohot do ra bukku Josua. Alai songon janji ni Jahowa na disurat di 5 Musa 18:​18, 19, diharappon halak Samaria do asa ro Messias i. (Joh. 4:25) Asa boi tardidi, ikkon diakkui nasida do Jesus i Messias na dijanjihon jala ‘godang do halak Samaria’ na mangulahon i. (Joh. 4:39) Asing ni i, ala godang do halak Kristen di abad na parjolo sian halak Jahudi, ikkon marsitutu do piga-piga halak Samaria manguba cara pandang ni nasida tu halak Jahudi. Alana di tikki i, dang marsiattoan halak Samaria dohot halak Jahudi.—Luk. 9:​52-54.

4. Songon na disurat di Ulaon ni Apostel 8:​5, 6, 14, songon dia do tanggapan ni piga-piga halak Samaria tu barita na dipasahat si Pilippus?

⁴ Aha do na mangurupi halak Samaria asa boi tardidi? Tikki si Pilippus pasahatton barita “taringot tu Kristus”, adong do piga-piga halak Samaria na ‘manjalo hata ni Debata’. (Jaha Ulaon ni Apostel 8:​5, 6, 14.) Nang pe si Pilippus halak Jahudi, alai olo do nasida mambege barita na dipasahat si Pilippus. Alana, diingot nasida do ra na tarsurat di bukku 5 Musa na paboahon dang dibeda-bedahon Debata akka halak. (5 Mus. 10:​17-19) Asing ni i, ‘diparrohahon nasida do hata na dipasahat si Pilippus’ taringot tu Kristus. Jala takkas do diida nasida na didongani Debata do si Pilippus. Dibahen ibana do godang mukjizat. Misalna, pamaluppon na marsahit dohot palaohon suru-suruan na jahat.—Ul. 8:7.

5. Parsiajaran aha do na boi tadapot sian halak Samaria?

⁵ Sasittongna, adong do alasan ni halak Samaria i dang manjalo hasittongan. Na parjolo, halak Jahudi do si Pilippus i. Na paduahon, dang hea dope dibege halak i hasittongan na dipasahat si Pilippus i. Alai dijalo nasida do hasittongan i. Didok di Bibel, “Dung ditangihon nasida barita na uli na dipaboa si Pilippus taringot tu Harajaon ni Debata dohot taringot tu goar ni Jesus Kristus, gabe porsea ma nasida tu ibana. Tardidi ma nasida, bawa nang borua.” (Ul. 8:12) Dung pos roha ni halak Samaria tu hasittongan na dipasahat si Pilippus, pittor tardidi ma nasida. Jadi, boha do molo hamu? Pos do rohamuna tu hasittongan na disurat di Bibel? Pos do rohamuna Saksi Jahowa halak Kristen na sittong, na patuduhon holong songon na dipatudu Jesus? (Joh. 13:35) Molo nungnga pos rohamuna, unang be paleleng-leleng lao tardidi. Ingot ma, pasti dipasu-pasu Jahowa do upayamuna i.

6. Aha do na boi taparsiajari sian si Ruben?

⁶ Taparrohahon ma pengalaman ni donganta si Ruben na sian Jerman. Saksi Jahowa do natua-tuana. Tikki poso dope ibana, dang porsea ibana na tutu adong Jahowa. Alai aha do na diulahon si Ruben? Disadari ibana do dang bagas dope parbinotoanna taringot i, jadi diriset ibana ma i. Tikki marsiajar au, hulului ma akka bukti na patuduhon dia do na sittong dohot na sala. Misalna, piga-piga hali huparsiajari do taringot evolusi. Dung i dijaha ibana ma bukku na marjudul Apakah Ada Pencipta yang Mempedulikan Anda? Godang do manfaat na dapot ni si Ruben sian bukku i. Didokkon ibana ma, ‘Tutu do hape adong Jahowa i bah!’ Tikki ro ibana tu kantor pusat, diida ibana ma boi marsada akka dongan di liat portibi on. Didok rohana, hira mukjizat do on. Tikki mulak ibana tu Jerman, tardidi ma si Ruben tikki marumur 17 taon. Jadi, boha do molo hamu? Molo dang pos dope rohamuna tu na diparsiajari hamu, bahen ma riset taringot i. Alana “parbinotoan na bagas” boi mambahen lam pos rohamuna tu hasittongan. (Eps. 4:​13, 14) Dung i muse, molo dibereng hamu holong ni akka dongan di liat portibi on dohot di huriamuna, gabe lam diargai hamu ma kesempatan boi gabe naposo ni Jahowa.

SI SAULUS NA SIAN TARSUS

7. Cara marpikkir na songon dia do na ikkon diuba si Saulus?

⁷ Saonari tabahas ma taringot si Saulus na sian Tarsus. Halak Jahudi do ibana, diajarhon do tu ibana patik ni halak Jahudi, jala gabe sangap do ibana di tonga-tonga ni halak Jahudi. (Gal. 1:​13, 14; Plp. 3:5) Di tikki i godang do halak Jahudi na mandok, halak na murtad do siihutton Jesus. Alani i ma marsitutu si Saulus mambahen na haccit tu nasida. Alana didok rohana, las do roha ni Debata molo dibahen ibana songon i. (Ul. 8:3; 9:​1, 2; 26:​9-11) Di pudian ni ari, tardidi do si Saulus jala gabe halak Kristen. Alai asa boi tardidi ibana, ikkon diuba ibana do cara marpikkirna jala ikkon rade do ibana dianiaya.

8. (a) Aha do na mangurupi si Saulus asa tardidi? (b) Songon na dipaboa di Ulaon ni Apostel 22:​12-16, aha do na diulahon si Ananias lao mangurupi si Saulus? (Ida gambar.)

⁸ Aha do na mangurupi si Saulus asa boi tardidi? Tikki dipataridahon Jesus dirina tu si Saulus, gabe mapitung ma si Saulus. (Ul. 9:​3-9) Dung i, marpuasa ma si Saulus saleleng tolu ari jala dirimangi ibana do na masa tu ibana. Alani i gabe pos do roha ni si Saulus, Jesus i Messias jala akka sisean ni Jesus do na mangihutton agama na sittong. Jala manolsoli do tong si Saulus ala dohot do ibana terlibat di parmate ni si Stepanus! (Ul. 22:20) Dung tolu ari ibana mapitung, ro ma si Ananias manjuppangi ibana. Dipamalum ma ibana jala dijujui ma ibana asa pittor tardidi. (Jaha Ulaon ni Apostel 22:​12-16.) Jadi sian on taboto ma, serep do roha ni si Saulus, ditangihon do hata ni si Ananias i jala pittor tardidi ma ibana.—Ul. 9:​17, 18.

9. Parsiajaran aha do na tadapot sian si Saulus?

⁹ Adong do na boi taparsiajari sian si Saulus. Nang pe sangap ibana, alai dipaserep ibana do rohana jala dang mabiar ibana tu jolma. Buktina, olo do ibana manjalo hasittongan taringot Kristus jala tardidi. (Ul. 26:​14, 19) Hape diboto ibana do molo gabe halak Kristen ibana, pasti dianiaya do ibana. (Ul. 9:​15, 16; 20:​22, 23) Alai torus do diandalhon ibana Jahowa. Alani i, boi ma ibana tetap setia tu Jahowa nang pe godang tantangan. (2 Kor. 4:​7-10) Jadi sian on taboto molo gabe Saksi Jahowa hamu, pasti diadopi hamu do godang tantangan na manguji haporseaonmuna. Alai pos ma rohamuna, pasti urupan ni Debata dohot Kristus do hamu.—Plp. 4:13.

10. Aha do na taparsiajari sian si Anna?

¹⁰ Dipagodang-godang di Eropa Timur do si Anna jala godang do keluargana na tinggal di jabu ni nasida. Dukkon tardidi omakna, mulai ma si Anna marsiajar Bibel tikki marumur sia taon jala diloas bapakna do ibana marsiajar. Alai dung diboto akka keluargana na marsiajar Bibel ibana dohot Saksi Jahowa, muruk ma nasida. Alana didok roha ni nasida parohon ila do molo manimbil sasahalak sian agama ni oppungna. Alai nang pe songon i, tikki marumur 12 taon si Anna naeng tardidi do ibana jala dipaboa ibana ma i tu bapakna. Alai jolo disukkun bapakna do si Anna, aha do na mambahen ibana naeng tardidi? Ala na sian rohana do i manang ala adong na mamaksa ibana? Dialusi si Anna ma bapakna, “Ala na holong do rohakku tu Jahowa.” Ujungna, diloas bapakna ma ibana tardidi. Dukkon tardidi ibana, godang ma tantangan na diadopi ibana sian keluargana. Sada sian keluargana i mandok, “Tumagon do ho gabe halak na so hasea, marisap, sian apala gabe Saksi Jahowa ho.” Gabe mabiar do si Anna? Didok ibana, “Diurupi Jahowa do au asa margogo mangadopi i, jala dipatogu omak dohot bapak do tong au.” Jotjot do disurat si Anna akka naung diulahon Jahowa lao mangurupi ibana, jala jotjot do i dijaha ibana. Jadi molo mabiar hamu ala godang tantangan, pos ma rohamuna pasti diurupi Jahowa do hamu.—Heb. 13:6.

SI KORNELIUS

11. Aha do hira-hira na mangabbati si Kornelius asa tardidi?

¹¹ Adong do na boi taparsiajari sian si Kornelius. “Sahalak perwira” ni Rom do ibana. Di tikki i, sahalak perwira mangawasi 100 tentara. (Ul. 10:1) Jadi timbo do pangkat ni si Kornelius jala sangap do ibana. Nang pe songon i, “godang do diurupi ibana akka na pogos”. (Ul. 10:2) Sada tikki disuru Jahowa do Apostel Petrus lao pasahatton barita na uli tu ibana. Boha do tanggapan ni si Kornelius? Olo do ibana tardidi?

12. Aha do na mangurupi si Kornelius asa tardidi?

¹² Aha do na mangurupi si Kornelius asa boi tardidi? Didok di Bibel, “Halak na makkabiari Debata do ibana songon i nang keluargana.” Jala jotjot do si Kornelius martangiang tu Debata. (Ul. 10:2) Dung dipaboa si Petrus barita na uli tu si Kornelius, gabe porsea ma ibana dohot keluargana tu Kristus jala pittor tardidi ma nasida. (Ul. 10:​47, 48) Jadi sian on taboto ma, rade do si Kornelius mangulahon manang aha pe asa boi ibana dohot keluargana manomba Jahowa.—Jos. 24:15; Ul. 10:​24, 33.

13. Parsiajaran aha do na tadapot sian si Kornelius?

¹³ Dos songon si Saulus, nang pe timbo jabatan ni si Kornelius dang dipasombu i mangabbati ibana asa tardidi. Boha do molo hamu? Rade do hamu mangulahon manang aha pe asa boi hamu tardidi? Molo diulahon hamu songon i, pos ma rohamuna pasti diurupi Jahowa do hamu. Jala molo marsitutu hamu mangulahon akka prinsip na adong di Bibel, pasti pasu-pasuon ni Jahowa do hamu.

14. Aha do na taparsiajari sian si Tsuyoshi?

¹⁴ Taparrohahon ma pengalaman ni si Tsuyoshi na sian Jepang. Barani do ibana mangulahon lomo ni roha ni Jahowa di parkarejoanna asa boi ibana tardidi. Si Tsuyoshi karejo di sada sikkola na terkenal di Jepang. Goar ni sikkola i, Ikenobo. Sikkola on khusus lao mangajari akka muridna merangkai bunga. Jala tugasna di sikkola i mangurupi kepala sekolah. Molo adong acara pemakaman, biasana ro do kepala sekolah i tu acara i. Diboan ibana do karangan bunga sian sikkola ni nasida jala dohot do ibana mangulahon ritual Buddha. Alai molo dang boi kepala sekolah i ro tusi, si Tsuyoshi ma na disuru tusi jala ikkon dohot do ibana mangulahon ritual i. Alai dung diparsiajari si Tsuyoshi sian Bibel taringot keadaan ni halak naung mate, diboto ibana ma molo diulahon ibana ritual i dang boi ibana tardidi. Alani i dipaboa ibana ma tu kepala sekolah i, dang boi be ibana dohot tu acara ritual sisongon i. (2 Kor. 6:​15, 16) Boha do hasilna? Boi do si Tsuyoshi tetap karejo di sikkola i jala dang pola ikkon dohot ibana mangulahon ritual i. Tardidi ma si Tsuyoshi sataon dukkon marsiajar Bibel ibana.a Boha do molo hamu? Adong do akka penyesuaian na porlu dibahen hamu di parkarejoanmuna asa boi mambahen las roha ni Debata? Molo diulahon hamu songon i, pos ma rohamuna pasti pasu-pasuon ni Jahowa do hamu jala diparade Ibana akka na dihaporluhon hamu dohot keluargamuna.—Ps. 127:2; Mat. 6:33.

HALAK KORINT

15. Aha do hira-hira na boi mangabbati akka halak Korint lao tardidi?

¹⁵ Godang do halak Korint na mangulahon akka ulaon na dihasogohon Jahowa. Misalna, holongan di hepeng jala mangulahon seks na so patut. Sian on taboto ma, pasti maol do akka halak di tikki i manjalo barita na uli. Alai tikki ro Apostel Paulus tu kota i jala paboahon barita na uli taringot Kristus, didok di Bibel, “Godang do halak Korint na mambege barita na uli i gabe porsea jala tardidi.” (Ul. 18:​7-11) Dung i, dipataridahon Jesus Kristus ma dirina tu si Paulus marhite sada parnidaan jala didok Jesus ma, “Godang do halak di kota on na lao porsea tu au.” Jadi toktong do si Paulus marbarita disi saleleng sada satonga taon.

16. Aha do na mangurupi akka halak Korint asa tardidi? (2 Korint 10:​4, 5)

¹⁶ Aha do na mangurupi akka halak Korint asa boi tardidi? (Jaha 2 Korint 10:​4, 5.) Hata ni Debata dohot tondi parbadia do na mangurupi nasida asa muba. (Heb. 4:12) Bahkan dung dibege nasida barita na uli taringot Kristus, gabe boi do nasida pasidikkon akka ulaon na so suman. Dang mabuk be nasida, dang manakko, jala dang mangulahon homoseks.—1 Kor. 6:​9-11.b

17. Parsiajaran aha do na tadapot sian halak Korint?

¹⁷ Memang dang mura di halak Korint lao muba. Alai pos do roha ni nasida pasti boi do nasida muba jala gabe halak Kristen. Marsitutu do nasida asa boi masuk tu dalan hangoluan i. (Mat. 7:​13, 14) Boha do molo hamu? Adong do hasomalan na sala na mangabbati hamu asa boi tardidi? Unang ma menyerah. Pangido ma bantuan ni Jahowa asa dilehon Ibana tondi parbadia mangurupi hamu mangatasi hagaleonmuna.

18. Aha do na taparsiajari sian si Monika?

¹⁸ Taida ma pengalaman ni si Monika na sian Georgia. Marsitutu do ibana pasidikkon akka hasomalan na sala asa boi ibana tardidi. Misalna asa unang mandok hata na so suman jala asa unang mamillit hiburan na so hasea. Didok ibana, “Tikki remaja dope au, sai hupangido do bantuan ni Jahowa asa boi au muba. Diboto Jahowa do na lomo rohakku mangulahon na sittong. Alani i, sai diurupi jala ditogu-togu Ibana do au.” Ujungna, tardidi ma si Monika tikki marumur 16 taon. Boha do molo hamu? Adong do akka hasomalan na porlu dipasiding hamu asa boi mambahen las roha ni Jahowa? Toktong ma pangido bantuan ni Jahowa asa boi hamu muba. Pasti dilehon Jahowa do tondi parbadiana i lao mangurupi hamu.—Joh. 3:34.

HAPORSEAONMUNA BOI PAPINDAHON DOLOK

19. Aha do na boi mangurupi hamu mangadopi tantangan na songon dolok? (Ida gambar.)

¹⁹ Adong do ra piga-piga situasi na mangabbati hamu lao tardidi. Alai pos ma rohamuna, massai holong do roha ni Jahowa tu hamu. Jala lomo do rohana asa gabe bagian sian keluargana hamu. Hea do didok Jesus tu akka siseanna di abad na parjolo, “Molo adong haporseaonmu nasa batu ni siarum, boi do dohononmu tu dolok on, ‘Pinda ma ho tusan,’ pinda do i. Jala dang adong na so boi bahenonmu.” (Mat. 17:20) Akka halak na manangihon hata ni Jesus di tikki i, piga-piga taon dope nasida gabe sisean ni Jesus. Jadi ikkon torus dope dipatogu nasida haporseaon ni nasida. Alana didok Jesus molo togu haporseaon ni nasida, pasti urupan ni Jahowa do nasida mangadopi tantangan na massai balga, na dos songon dolok. Jala pos ma rohamuna, songon i do tong na lao bahenon ni Jahowa tu hamu!

20. Aha do na taparsiajari sian halak Kristen di abad na parjolo dohot di tikkitta saonari?

²⁰ Molo disadari hamu adong na porlu dipadenggan hamu sian dirimuna asa boi tardidi, pittor ulahon ma i, unang dipaleleng-leleng be. Tiru ma akka donganta di abad na parjolo dohot di tikkitta saonari. Sai anggiat ma pengalaman ni nasida patoguhon rohamuna jala mangurupi hamu asa mangalehon diri tu Jahowa jala tardidi. Alana, i do keputusan na massai denggan na boi dibahen hamu saonari!