Semangat ma Marbarita Dos Songon Jesus

1. Aha do na mambahen Saksi Jahowa imbar sian akka halak na mangakku Kristen?

SEMANGAT do Saksi Jahowa marbarita na uli. On ma na mambahen nasida imbar sian akka halak na mangakku Kristen. (Tit. 2:14) Alai sipata, olo do dang semangat hita marbarita. Songon i ma tong na dihilala sahalak donganta sintua. Didok ibana, “Sipata malas hian do au lao marbarita.”

2. Sipata, aha do na mambahen hita dang semangat lao marbarita?

² Olo do ra unlomo rohatta mangulahon akka tugas na asing di organisasi sian apala marbarita na uli. Misalna, dohot tu proyek pembangunan Bale Harajaon, mangurupi akka dongan na hona bencana, manang patoguhon akka dongan. Boasa? Alana tikki taulahon i, boi pittor taida hasilna jala puas tahilala. Asing ni i, tikki bekerja sama hita dohot akka dongan, dame do tahilala jala boi rap marsihaholongan. Jala taboto, pasti diargai nasida do kerja kerasta i. Alai asing do molo marbarita na uli. Olo do ra nungnga martaon-taon hita marbarita di sada daerah. Alai holan saotik do na olo manangihon hita. Bahkan adong do na kasar jala manolak hita. Taboto do muse, lam jonok ari ni Jahowa lam godang do akka halak na marsogo ni roha tu barita na tapasahat. (Mat. 10:22) Nang pe songon i, aha do na porlu taulahon asa torus hita semangat marbarita?

3. Aha do na taparsiajari sian tudosan ni Jesus di Lukas 13:​6-9?

³ Tatiru ma Jesus na toktong semangat marbarita. Tikki di tano on dope Jesus, bekerja keras do ibana marbarita tu akka halak. Bahkan, lam tamba ari lam tamba do semangatna mangulahon i. (Jaha Lukas 13:​6-9.) Dipatudos Jesus do dirina tu sahalak parkarejo na bekerja keras saleleng tolu taon mangurus sada hau ara. Alai dang marparbue hau ara i. Nang pe songon i, dang menyerah parkarejo i. Dos songon i ma, nungnga kerja keras Jesus saleleng tolu taon marbarita tu halak Jahudi, alai godangan sian nasida dang olo gabe siseanna. Nang pe songon i, dang menyerah Jesus. Toktong do semangat ibana. Marsitutu do ibana mangurupi akka halak Jahudi i asa porsea tu barita na uli.

4. Di artikel on, akka aha do na lao taparsiajari sian Jesus?

⁴ Di artikel on, lao tabahas ma songon dia Jesus lam semangat marbarita tarlumobi onom bulan andorang so nakkok ibana tu surgo. (Ida keterangan tambahan sian nwtsty-IN di Lukas 10:​1, “Belakangan”.) Molo taoloi paretta ni Jesus jala tatiru aha na diulahon ibana, hita pe boi do semangat marbarita na uli. Saonari tabahas ma aha do na mambahen Jesus toktong semangat marbarita: (1) Diingot Jesus do aha na dipangido Jahowa sian ibana, (2) diingot ibana do akka surirang ni Bibel, (3) diasahon ibana do Jahowa, jala (4) pos do rohana adong dope na olo manangihon barita na uli i.

DIINGOT JESUS DO NA DIPANGIDO JAHOWA SIAN IBANA

5. Sian dia do taboto mangulahon lomo ni roha ni Jahowa na uppetting di Jesus?

⁵ Semangat do Jesus paboahon “barita na uli taringot tu Harajaon ni Debata”. Alana, i do na dipangido Debata ulahononna. (Luk. 4:43) Alani i, ulaon marbarita na uli ma na uppetting di ngolu ni Jesus. Bahkan piga-piga bulan andorang so mate ibana, lao do ibana tu “akka kota dohot akka huta” lao mangajari akka halak. (Luk. 13:22) Jala dilatik ibana do akka siseanna asa dohot marbarita na uli.—Luk. 10:1.

6. Manang aha pe tugasta di organisasi, aha do tugas na uppetting na ikkon taulahon? (Ida gambar.)

⁶ Saonari pe, dipangido Jahowa dohot Jesus do asa tabahen ulaon marbarita i gabe na uppetting di ngolutta. (Mat. 24:14; 28:​19, 20) Manang aha pe tugas na taulahon di organisasi, songon mambangun Bale Harajaon manang karejo di Betel, sudena i lao mendukung tu ulaon marbarita do. Asing ni i, tikki terjadi bencana, tujuanta mangurupi akka dongan dang holan mangalehon akka na porlu di nasida. Alai na terutama, asa boi do nasida marpungu jala marbarita muse. Jadi taingot ma, ulaon marbarita na uli i do tugas na uppetting na dilehon Jahowa tu hita. Molo sai taingot i, pasti berupaya do hita asa jotjot mangulahon i. Songon i ma na didokkon sahalak donganta sintua na margoar si János di Hungaria. Didok ibana, “Sai huingot do, ulaon marbarita i do tugas na uppetting di hita. Dang adong tugas manang aha pe di organisasi na boi manggattihon i.”

7. Boasa lomo roha ni Jahowa asa torus semangat hita marbarita? (1 Timoteus 2:​3, 4)

⁷ Lomo do roha ni Jahowa asa godang akka halak na mambege barita na uli jala dipalua. (Jaha 1 Timoteus 2:​3, 4.) On patuduhon parduli do Jahowa tu akka jolma. Tatiru ma Jahowa. Parduli ma hita tu nasida asa lam semangat hita marbarita. Asa boi taulahon i, diurupi Jahowa do hita asa lam malo marbarita. Misalna, diparade do brosur Haholongi ma Akka Halak—Urupi ma Nasida Gabe Sisean. Di brosur i, diajari do hita boha carana memulai pakkataion asa tertarik akka halak marsiajar Bibel. Memang saonari, godang do akka halak na so olo dope manomba Jahowa. Alai haduan, sebelum marujung hasusaan bolon dilehon Jahowa dope kesempatan tu nasida lao manomba Ibana. Di tikki i, olo do ra diingot nasida barita na uli na tapasahat i. Jala i ma ra na mambahen nasida olo manomba Jahowa. Alani i, torus ma semangat hita marbarita mulai sian saonari.

DIINGOT JESUS DO AKKA SURIRANG NI BIBEL

8. Surirang na dia do na mambahen denggan Jesus mamakke tikkina?

⁸ Diboto Jesus do na lao saut akka surirang na dipaboa di Bibel. Misalna, diboto ibana do na holan tolu satonga taon ibana mangulahon tugasna di tano on. (Dan. 9:​26, 27) Asing ni i, diboto ibana do na lao marsitaonon ibana sahat tu na mate. (Luk. 18:​31-34) Alani i, denggan do dipakke ibana tikkina. Jala semangat do ibana marbarita asa boi dipasae ibana tugas na dilehon Jahowa i.

9. Aha do manfaatna molo taattusi akka surirang na dipaboa di Bibel?

⁹ Sian akka surirang na dipaboa di Bibel taringot ari parpudi, gabe taboto ma nungnga lam jonok ari ni Jahowa i. Buktina, terjadi do surirang ni Bibel taringot pangalaho ni akka halak dohot akka na masa saonari. ‘Di ari parpudi on’, taida do muse songon dia Raja Selatan, i ma Kuasa Dunia Inggris-Amerika marporang dohot Raja Utara, i ma Rusia dohot akka negara na mendukung nasida. (Dan. 11:40) Asing ni i taboto do, pat ni patung na dipaboa di Daniel 2:​43-45 manggombarhon Kuasa Dunia Inggris-Amerika. Jala songon na didok di ayat i, lao hancurhonon ni Harajaon ni Debata ma sude pamarettaon ni jolma. Alani i, molo tarimangi akka surirang on, gabe pos ma rohatta mangolu di ujung ni ari parpudi do hita saonari. Akka surirang on pe boi do mambahen hita gabe lam denggan mamakke tikkitta jala semangat marbarita na uli.

10. Ala taboto surirang ni Bibel taringot janji ni Debata di ari na naeng ro, aha ma pengaruh ni i tu hita?

¹⁰ Dipaboa do muse di Bibel surirang taringot janji ni Debata di ari na naeng ro. Jala lomo do rohatta paboahon i tu halak na asing. I ma na dihilala sahalak donganta borua na margoar si Carrie sian Republik Dominika. Didok ibana, “Las hian do rohakku mamboto janji ni Jahowa di ari na naeng ro. Jala taronjar do rohakku paboahon i tu halak na asing.” Didok ibana do muse, “Alani godang ni sitaonon ni akka halak saonari, gabe husadari ma, dang holan tu au hape janji i. Alai porlu do tong diboto nasida i.” Asing ni i, akka surirang na dipaboa di Bibel pe paposson rohatta diurupi Jahowa do hita di ulaon marbarita. Jala on mambahen hita gabe semangat marbarita. Songon i ma na dihilala si Leila na tinggal di Hungaria. Didok ibana, “Sian surirang na dipaboa di Jesaya 11:​6-9 huboto ma, boi do Jahowa mangurupi akka halak asa muba. Alani i, gabe semangat ma au marbarita tu manang ise pe. Bahkan tu akka halak na hira na so lomo rohana tu barita na uli i.” Jala songon i do tong na dihilala si Christopher, sahalak donganta bawa di Zambia. Didok ibana, “Songon na dipaboa di Markus 13:​10, ikkon jolo dibaritahon do barita na uli i di liat portibi on. Jadi, bangga do au boi dohot marbarita jala boi dohot mambahen surirang on terjadi.” Molo hamu, surirang na dia do na mambahen hamu lam semangat marbarita?

DIASAHON JESUS DO JAHOWA

11. Boasa Jesus ikkon mangasahon Jahowa tikki marbarita? (Lukas 12:​49, 53)

¹¹ Denggan do cara ni Jesus marbarita. Alai memang diboto Jesus, sai adong do halak na muruk jala dang marlomo ni roha mambege barita i. (Jaha Lukas 12:​49, 53.) Buktina, ala marbarita Jesus muruk do akka pamimpin agama bahkan berupaya do nasida lao pamatehon Jesus. (Joh. 8:59; 10:​31, 39) Nang pe songon i, tetap do Jesus marbarita. Alana pos do rohana pasti didongani Jahowa do ibana. Didok Jesus, “Ibana na marsuru au i do donganku. Dang dipasombu Ibana sahalakku, ai toktong do huulahon lomo ni rohana.” (Joh. 8:​16, 29) Sian on taboto ma, sai diasahon Jesus do Jahowa jala i do na mambahen ibana toktong semangat marbarita.

12. Songon dia do Jesus mangurupi siseanna asa toktong marbarita nang pe adong tantangan?

¹² Dipaingot Jesus do akka siseanna asa mangasahon Jahowa. Mulak-ulak do dipapos Jesus roha ni nasida pasti urupan ni Jahowa do nasida nang pe dianiaya. (Mat. 10:​18-20; Luk. 12:​11, 12) Alai dipaingot Jesus do tong akka siseanna asa manat tikki marbarita jala dang mamaksa halak manjalo barita na uli. (Mat. 10:16; Luk. 10:​3, 10, 11) Jala didok Jesus do tu nasida, molo dianiaya nasida di sada inganan ikkon lari do nasida sian i. (Mat. 10:23) Sian on taboto, memang semangat do Jesus marbarita na uli jala sai diasahon. Alai manat do tong ibana jala dihindari ibana do situasi na berbahaya.—Joh. 11:​53, 54.

13. Boasa pos rohamuna pasti urupan ni Jahowa hamu?

¹³ Saonari, godang do halak na sogo rohana mangida hita marbarita na uli. Jadi, porlu do diurupi Jahowa hita asa toktong semangat marbarita. (Pgk. 12:17) Alai boasa pos rohamuna pasti urupan ni Jahowa hamu? Alana nga ditangiakkon Jesus taringot i. Boi do tajaha tangiang ni Jesus i di Johannes bindu 17. Dipangido Jesus do asa dijaga Jahowa akka apostelna. Jala memang, dialusi Jahowa do tangiang ni Jesus i. Buktina di bukku Ulaon ni Apostel dipaboa, nang pe dianiaya akka apostel i, diurupi Jahowa do nasida asa tetap semangat marbarita. Asing ni i, ditangiakkon Jesus do tong asa dijaga Jahowa akka halak na porsea tu barita na uli, termasuk ma hamu disi. Jadi sahat tu saonari, dialusi Jahowa dope tangiang ni Jesus i. Pasti urupan ni Jahowa do hamu songon Ibana mangurupi akka apostel najolo.—Joh. 17:​11, 15, 20.

14. Nang pe adong tantangan, aha do na ikkon taingot asa toktong hita semangat marbarita? (Ida gambar.)

¹⁴ Lam jonok ari ni Jahowa, olo do ra lam godang tantangan na mambahen moru semangatta marbarita. Alai dipapos Jesus do rohatta na pasti urupanna do hita mangulahon i. (Luk. 21:​12-15) Alai taingot ma dos songon Jesus dohot akka siseanna najolo, unang ma tapaksa akka halak manjalo barita i jala unang ma sappe berdebat dohot nasida. Alai boha do molo diorai pamaretta ulaonta marbarita? Tatiru ma akka dongan na tinggal di negara na mangorai ulaonta marbarita. Boi do nasida tetap semangat ala diasahon nasida Jahowa. Jala taingot ma, dos songon na diulahon Jahowa tu halak Kristen di abad na parjolo, lehononna do tondi parbadia tu hita saonari asa ‘boi tapasahat barita na uli sian nasa gogotta’. (2 Tim. 4:17) Jadi pos ma rohatta, molo taasahon do Jahowa pasti boi do hita torus semangat marbarita sahat tu na didok Jahowa, ‘Nungnga sae be!’

POS ROHANA SAI ADONG DO NA OLO MANANGIHON BARITA NA ULI

15. Sian dia do taboto na pos roha ni Jesus pasti sai adong na olo manangihon barita na uli?

¹⁵ Pos do roha ni Jesus pasti sai adong do halak na olo manangihon barita na uli. On ma na mambahen Jesus semangat jala marlas ni roha di ulaon marbarita. Misalna di ujung ni taon 30 M, diida Jesus godang do halak na olo manangihon barita na uli. Dipatudos ibana ma nasida songon ladang naung boi dipanen. (Joh. 4:35) Alani i ma hira-hira sataon dukkon i, didok ibana tu akka siseanna, “Bidang do nian sisabion.” (Mat. 9:​37, 38) Jala dang sadia leleng dukkon i, didok Jesus ma muse, “Bidang do nian sisabion . . . Pangido ma tu Nappuna sisabion i asa disuru akka panabi tu sisabionna i.” (Luk. 10:2) Jadi takkas ma, sai pos do roha ni Jesus pasti adong do halak na olo manangihon barita na uli jala massai las do rohana tikki pajuppang tu halak sisongon i.—Luk. 10:21.

16. Tudosan aha do na dipaboa Jesus lao mangurupi akka siseanna? (Lukas 13:​18-21) (Ida gambar.)

¹⁶ Didok Jesus do tu akka siseanna, pasti adong do hasil na denggan molo toktong nasida marbarita. Molo diingot nasida i, pasti gabe lam semangat ma nasida mangulahon i. Dipaboa Jesus ma dua tudosan lao mangurupi akka siseanna i. (Jaha Lukas 13:​18-21.) Na parjolo, dipatudos Jesus do barita na uli i songon sada boni na gelleng na tubu gabe sada hau na balga, jala dang adong na boi mangabbati i tubu. Dos songon i ma, pasti sai adong do na olo manangihon barita i, jala dang adong na boi mangabbati barita i sahat tu nasida. Na paduahon, dipatudos Jesus ma barita na uli i songon ragi. Boasa? Alana barita na uli i dipasahat di godang inganan jala boi mangurupi akka halak asa muba nang pe dang pittor tarida perubahanna. Jadi sian dua tudosan on, Jesus naeng paboahon tu akka siseanna dang sia-sia kerja keras ni nasida di ulaon marbarita.

17. Boasa boi pos rohatta sai adong dope halak na olo manangihon barita na uli?

¹⁷ Molo taingot godang hasil na denggan sian ulaon marbarita di liat portibi on, pasti gabe lam semangat do hita mangulahon i. Misalna ganup taon, adong marjuta halak na ro tu Borngin Parningotan jala na marsiajar Bibel dohot hita. Asing ni i, adong marratus ribu halak na tardidi jala dohot marbarita na uli. Memang dang taboto sadia godang nai halak na olo manjalo barita na uli. Alai sian Bibel taboto do, na lao adong punguan bolon na lao malua sian hasusaan bolon. (Pgk. 7:​9, 14) Jala Jahowa pe, nappuna ladang i, pos do rohana godang nai dope halak na olo manjalo barita na uli. Alani i, torus ma hita semangat marbarita.

18. Tikki marbarita hita, ikkon songon dia do hita ditanda halak?

¹⁸ Molo sian najolo, ditanda do akka sisean ni Jesus akka halak na ringgas marbarita na uli. Misalna ala barani jala semangat akka apostel marbarita, gabe takkas ma diboto akka halak “na dongan ni Jesus” do nasida. (Ul. 4:13) Boha molo hita? Barani jala semangat ma hita marbarita na uli. Sai anggiat ma boi takkas diida akka halak na tatiru semangat ni Jesus.