Tung Denggan do Pajonokkon Diri tu Akka Dongan

1-2. Boha do pandangan ni Jahowa tu caratta maradoppon halak na asing, jala aha do na dipangido Ibana asa taulahon?

MASSAI penting do di Jahowa boha caratta maradoppon halak na asing. Jala diajari Jesus do tong hita asa makkaholongi halak na asing songon na makkaholongi diritta. (Mat. 22:​37-39) Termasuk ma disi, ikkon burju do hita tu akka halak na so manomba Jahowa. Molo taulahon i, na maniru Jahowa do hita disi. “Ai dipabissar Ibana do mataniari tu akka parjahat dohot tu na burju. Jala diparo do udan tu halak na mangulahon na sittong dohot tu halak na mangulahon na jahat.”—Mat. 5:45.

² Holong do roha ni Jahowa tu sude jolma, tarlumobi tu akka halak na mangoloi Ibana. (Joh. 14:21) Jala lomo do rohana asa tatiru Ibana. Alani i, dijujui Jahowa do asa ‘marsitutu hita marsihaholongan’. Lapatanna, ikkon tahaholongi do akka donganta songon na makkaholongi haha anggi manang ale-aletta.—Rom 12:10; 1 Ptr. 4:8.

3. Boasa holong ni roha i boi dipatudos songon bunga?

³ Holong ni roha i boi dipatudos songon bunga na ikkon denggan diurus asa boi tubu. I do alana didok Apostel Paulus tu hita, “Toktong ma haholongi hamu dongan sahaporseaon.” (Heb. 13:1) Jadi dipangido Jahowa do tu hita asa torus tahaholongi akka donganta. Di artikel on, lao tabahas ma boasa penting pajonokkon diri tu akka dongan jala songon dia carana asa torus taulahon i.

BOASA PENTING PAJONOKKON DIRI TU AKKA DONGAN

4. Aha do na ikkon taulahon asa toktong arga di hita hubungatta dohot akka dongan? (Psalmen 133:1) (Ida gambar.)

⁴ Jaha Psalmen 133:1. Pasti sarupa do pakkilalaatta tu panurat psalmen i. Didok ibana, “tung denggan jala massai uli” do molo marale-ale hita tu akka halak na makkaholongi Jahowa. Alai coba ma jo tapikkirhon on. Molo nungnga tiap ari diida sasahalak pemandangan na bagak, lam leleng olo do gabe dang uli be i di ibana. Dos songon i ma ala jotjot hita pajuppang dohot akka dongan, olo do ra gabe dang arga be di hita hubungatta tu nasida. Jadi boha do carana asa toktong taargai hubungatta dohot akka dongan? Tarimangi ma massai arga do akka donganta i di hita dohot di huria. Molo taulahon i, boi ma lam holong rohatta tu nasida.

5. Tikki diida halak hita marsihaholongan dohot akka dongan, aha do pengaruh ni i tu nasida?

⁵ Jesus mandok, “Molo marsihaholongan hamu, botoon ni sude jolma ma na siseanku hamu.” (Joh. 13:35) Tutu do on. Buktina, kagum do piga-piga halak na parjolo sahali ro marpungu mangida holong na tapatudu tu akka dongan. Alani i gabe pos do roha ni nasida, on do hasittongan. On ma na dihilala sahalak borua na poso na margoar si Citra.a Marsiajar Bibel do ibana dohot Saksi Jahowa. Diundang ma ibana asa ro tu parpunguan regional. Di ari na parjolo dung sae acara i, didok ibana ma tu guru studina, “Dang hea dope au dihaol natua-tuakku. Alai di parpunguan regional on, adong 52 halak na makkaol au! Boi do huhilala holong ni Jahowa i marhite hamu. Lomo do rohakku asa boi gabe bagian sian keluarga ni Jahowa.” Dung i, torus do dibahen si Citra kemajuan, jala nungnga tardidi be ibana di taon 2024. Jadi sian on taboto ma, tikki diida akka halak pangalahotta na denggan, termasuk holong na tapatudu tu akka dongan, gabe taronjar ma roha ni nasida lao manomba Jahowa.—Mat. 5:16.

6. Aha do manfaatna molo jonok hita tu akka dongan?

⁶ Olo do sipata metmet rohatta jala maol tahilala mangulahon na sittong. Di tikki sisongon i, diurupi Jahowa do hita marhite akka donganta. (Ps. 73:​2, 17, 23) Pasti bermanfaat hian do di hita bantuan sisongon i. Alani i ma penting hian do jonok hita tu akka dongan. Boi do nasida mangurupi hita asa unang taulahon na sala. I do alana didok si Paulus, “Toktong ma patogu hamu donganmuna ganup ari . . . Molo dibahen hamu songon i, dang na lao adong sian hamu na gabe jogal rohana ala dioto-otoi dosa.”—Heb. 3:13.

7. Boasa holong ni roha i boi mambahen hita marsada? (Kolosse 3:​13, 14)

⁷ Di organisasi ni Jahowa, sude do hita berupaya asa marsihaholongan. Alani i ma godang pasu-pasu na tahilala. (1 Joh. 4:11) Contohna ala adong di hita holong, boi ma hita ‘toktong sabar tu na asing’, jala on mangurupi hita asa marsada dohot akka dongan. (Jaha Kolosse 3:​13, 14; Eps. 4:​2-6) Jadi holan di parpunguanta do boi tahilala dame dohot holong sisongon i. Dang adong juppangta songon i di inganan na asing di liat portibi on.

PASANGAP MA NA ASING

8. Aha do na diulahon Jahowa lao mangurupi hita asa marsada?

⁸ Nang pe dang sempurna dope hita, boi do Jahowa mangurupi hita sude asa marsada. (1 Kor. 12:25) Alana didok di Bibel, ‘diajari Debata do hita asa marsihaholongan’. (1 Tes. 4:9) Alai aha do na ikkon taulahon asa boi hita diajari Debata? Taparsiajari ma akka nasehat ni Jahowa na adong di Bibel jala taulahon. Alana disi do dipaboa Jahowa boha carana asa lam jonok hita tu akka dongan. (Heb. 4:12; Jak. 1:25) Jala on ma na torus diupayahon sude Saksi Jahowa.

9. Aha do na taparsiajari taringot pasangappon halak na asing sian Rom 12:​9-13?

⁹ Disurat do di Bibel, boha carana asa lam jonok hita tu akka dongan. Dipaboa si Paulus do taringot i di Rom 12:​9-13. (Jaha.) Didok ibana, “Parjolo ma hamu pasangappon halak na asing.” Lapatanna, hita ma na parjolo patuduhon ‘holong’ tu akka donganta. Misalna, rade ma hita manalpuhon hasalaan ni nasida jala burju ma hita tu nasida. (Eps. 4:32) Unang ma tadok di rohatta, ikkon akka donganta do na parjolo pajonokkon diri tu hita. Alai hita ma na “parjolo” mangulahon i. Molo taulahon i, tahilala ma aha na didok Jesus. Didok ibana, “Umlas do roha ni halak na mangalehon sian na manjalo.”—Ul. 20:35.

10. Songon dia do hita patuduhon na ringgas hita mangurupi halak na asing? (Ida gambar.)

¹⁰ Dung dipaboa si Paulus na ikkon parjolo hita pasangappon halak na asing, didok ibana do muse, “Ringgas ma hamu, unang malas.” Semangat do halak na ringgas jala bekerja keras do ibana. Molo dilehon tu ibana tugas, marsitutu do ibana mangulahon i. Jadi ikkon songon i do tong hita tikki mangulahon na denggan. Didok di Poda 3:​27, 28, “Unang ma manjua ho mambahen na denggan tu halak na hurangan molo tolap do ho mangurupi.” Alani i molo taboto adong sasahalak na porlu diurupi, pittor taurupi ma ibana. Unang ma tadok di rohatta, ‘Adong do annon na mangurupi ibana.’—1 Joh. 3:​17, 18.

11. Aha do muse na porlu taulahon asa lam jonok tu akka dongan?

¹¹ Cara na asing lao patuduhon na tapasangap akka donganta, i ma rade ma hita mengampuni nasida. Didok di Epesus 4:​26, “Unang ma muruk hamu sadari manipat.” Boasa? Alana molo torus hita muruk, di ayat 27 didok songon na ‘mangalehon tikki do hita tu Sibolis’. Molo tajaha di Bibel, jotjot do dipangido Jahowa asa rade hita mengampuni. Contohna di Kolosse 3:​13, dipangido do tu hita asa ‘toktong rade manalpuhon hasalaan’. Molo taulahon i, gabe lam jonok ma hita tu akka dongan. On pe patuduhon na ‘rade do hita ditogu-togu tondi parbadia jala rade do hita mangalului hadameon. Alana on do na mambahen hita marsada’. (Eps. 4:3) Jadi sian on taboto ma molo rade hita mengampuni akka dongan, boi ma huria toktong mardame jala marsada.

12. Boha do cara ni Jahowa mangurupi hita asa rade mengampuni na asing?

¹² Memang olo do ra tahilala maol mengampuni halak naung mambahen haccit rohatta. Alai pasti boi do taulahon i molo diurupi tondi parbadia hita. Dung dipangido si Paulus asa ‘tahaholongi’ akka dongan jala asa “ringgas” hita, didok ibana ma muse, “Loas ma tondi parbadia mambahen lam ringgas hamu.” Aha do maksudna? Boi do tondi parbadia ni Jahowa mambahen hita semangat jala gabe lomo hian rohatta mangulahon sude na dipangido Jahowa tu hita. (Rom 12:11) Alani i, pangido ma tondi parbadia sian Jahowa asa diurupi hamu makkaholongi jala rade manalpuhon hasalaan ni akka dongan.—Luk. 11:13.

“UNANG MA TARBAGI-BAGI HAMU”

13. Aha do na boi mambahen dang marsada hita dohot akka dongan?

¹³ Sude hita na di huria, ro sian marragam latar belakang. (1 Tim. 2:​3, 4) Alani i ma gabe marasing-asing do keputusanta taringot mamillit pakkean, hiburan, manang taringot perawatan kesehatan. Jadi molo dang manat hita, boi do sudena i mambahen hita dang marsada dohot akka dongan di huria. (Rom 14:4; 1 Kor. 1:10) Alai ala “nungnga diajari Debata [hita] asa marsihaholongan”, dang tadok di rohatta undenggan pilihan na tabahen sian halak na asing. Jala dang tapaksa nasida mangihutton pilihan na tabahen.—Plp. 2:3.

14. Aha do na ikkon toktong taulahon jala boasa?

¹⁴ Adong do muse na ikkon taulahon asa marsada huria. Berupaya ma hita asa toktong masiurupan jala patoguhon na asing. (1 Tes. 5:11) Boha do caratta mangulahon i? Baru-baru on, godang do akka na so aktif dohot na dipakaluar sian huria mulak muse tu huria. Tottu las do rohatta menyambut nasida. (2 Kor. 2:8) Taida ma pengalaman ni sahalak donganta borua na mulak muse marpungu dukkon sappulu taon dang aktif. Didok ibana, “Disambut akka dongan do au jala dijalang nasida do au.” (Ul. 3:19) Ala dibahen akka dongan songon i, boha do pakkilalaan ni donganta i? Didok ibana, “Boi do huhilala na diurupi Jahowa au asa mulak muse las ni rohakku.” Jadi molo berupaya hita patoguhon akka dongan, hira na dipakke Jesus ma hita lao mampargogoi “akka na loja jala na mamboan boban na borat”.—Mat. 11:​28, 29.

15. Aha do muse cara na asing na boi taulahon asa toktong marsada huria? (Ida gambar.)

¹⁵ Asing ni i, asa toktong marsada huria ikkon manat do hita tikki naeng makkatai. Didok di Job 12:​11, “Pinggol do na mamboto denggan manang na dang begeon sada hata songon dila na mandai sipanganon.” Pikkirhon ma on: Adong ma sahalak koki na jago mangaloppa. Andorang so dilehon ibana loppa-loppana i diallang halak, pasti jolo didai ibana do i. (Ps. 141:3) Dos songon i ma hita, andorang so makkatai ikkon jolo tapikkirhon do aha na lao tadokkon. Jadi ikkon sai tapastihon do aha na tadokkon i patoguhon roha jala “marlaba tu akka na manangihon”.—Eps. 4:29.

16. Akka ise do na terutama porlu mamikkirhon hata na lao sidokkononna?

¹⁶ Hamu akka suami dohot akka natua-tua, hamu do na terutama porlu mamikkirhon aha na lao dokkononmuna asa boi patoguhon roha ni na asing. (Kol. 3:​19, 21; Tit. 2:4) Asing ni i, akka sintua pe porlu do berupaya lambok tikki makkatai jala patoguhon sude biru-biru ni Jahowa. (Jes. 32:​1, 2; Gal. 6:1) Jadi sai taingot ma na didok Bibel, “Massai denggan do hata sakkababa na didok pas di tikkina.”—Poda 15:23.

PATUDU MA HOLONG ‘SIAN IAS NI ROHA DOHOT PAMBAHENAN’

17. Boha do carana patuduhon holong sian ias ni rohatta?

¹⁷ Didok Apostel Johannes, “Molo tutu do holong rohamuna unang ma holan di hata manang holan di pamangan, alai ikkon tarida do i sian pambahenan jala patudu ma i sian ias ni roha.” (1 Joh. 3:18) Lapatanna, ikkon tahaholongi do akka donganta sian ias ni rohatta. Boha ma caratta mangulahon i? Talehon ma tikkitta asa boi rap bergaul dohot nasida. Misalna di parpunguan manang tikki rap marbarita. Boi do tong ro hita tu jabu ni nasida. Alana, lam jotjot hita bergaul dohot akka donganta, lam jonok ma hita tu nasida jala lam holong ma rohatta tu nasida. Molo taulahon sudena i, on patuduhon na olo do hita ‘diajari Debata asa marsihaholongan’. (1 Tes. 4:9) Jala boi ma tahilala ayat na mandok, “Tung denggan jala massai uli do molo rap tinggal akka na marhaha maranggi jala marsada ni roha!”—Ps. 133:1.