Marlaba do “Pajonokkon Diri tu Debata”

1-2. (a) Aha do na porlu taulahon asa boi marale-ale tu sasahalak? (b) Aha do na lao tabahas di artikel on?

ADONG do ale-alemuna? Aha do na mambahen gabe jonok hamu tu ibana? Jotjot do ra hamu bergaul, diboto hamu do ra akka sitaonon na diadopi ibana, jala aha na dihalomohon dohot na so dihalomohon rohana. Dung i, diboto hamu do ra akka sifatna na denggan jala lomo rohamuna maniru i. Ala diboto hamu sudena i, gabe holong ma rohamuna tu ibana.

² Porlu do talehon tikkitta asa boi marale-ale tu sasahalak. Dos songon i ma, asa boi hita marale-ale tu Jahowa, ikkon talehon do tikkitta lao mananda Ibana. Alana molo tatanda Jahowa, gabe holong ma rohatta tu Ibana. Di artikel on, lao tabahas ma boha do carana pajonokkon diri tu Debata jala aha do manfaatna molo taulahon i. Alai na parjolo, tabahas ma boasa massai penting pajonokkon diri tu Jahowa.

3. Boasa penting mangarimangi manfaat ni pajonokkon diri tu Jahowa? Bahen ma tudosan.

³ Taboto do, massai denggan do pajonokkon diri tu Jahowa. Alai, dang cukkup holan i. Porlu do muse tarimangi sadia balga manfaat ni pajonokkon diri tu Jahowa. Molo taulahon i, gabe taronjar ma rohatta toktong pajonokkon diri tu Ibana. (Ps. 63:​6-8) Pikkirhon ma taringot on: Diboto akka halak do, godang do manfaatna molo diallang nasida sipanganon na sehat, godang minum, olahraga, dohot istirahat. Nang pe songon i, godang dope halak na so mangulahon i. Akibatna, gabe mura ma nasida marsahit. Alai molo akka halak na mamboto manfaat ni mangulahon i, gabe torus ma nasida semangat mangulahon i. Dos songon i ma, taboto do massai denggan do pajonokkon diri tu Jahowa. Alai, porlu do tarimangi sadia balga manfaat ni pajonokkon diri tu Jahowa. Molo taulahon i, gabe lomo ma rohatta toktong jonok tu Jahowa.—Ps. 119:​27-30.

4. Aha do na didok panurat Psalmen 73:28?

⁴ Jaha Psalmen 73:28. Na manurat Psalmen 73 on, i ma halak Lepi na marhobas gabe parmusik di bagas joro ni Jahowa. Nungnga setia ibana melayani Jahowa saleleng martaon-taon. Nang pe songon i, dipaingot ibana do dirina na massai penting do “pajonokkon diri tu Debata”, jala balga do manfaatna molo diulahon ibana i. Jala dipaboa ibana do tong taringot i tu halak na asing. Akka aha do haroa manfaatna molo tapajonok diritta tu Debata?

“PAJONOKKON DIRI TU DEBATA” PAROHON LAS NI ROHA

5. (a) Boasa marlas ni roha hita molo lam jonok tu Jahowa? (b) Aha do manfaatna molo marbisuk hita? (Poda 2:​6-16)

⁵ Lam jonok hita tu Jahowa, lam tamba do las ni rohatta. (Ps. 65:4) Boasa? Godang do alasanna. Contohna, molo taihutton nasehat ni Jahowa na dipaboa di Bibel, gabe marbisuk ma hita. Molo marbisuk hita, dang taihutton be pangalaho na so denggan jala dang taulahon akka ulaon na jahat. (Jaha Poda 2:​6-16.) Alani i ma didok di Bibel, “Marlas ni roha ma halak na dapotan bisuk jala na mamboto dia na sittong dohot dia na sala.”—Poda 3:13.

6. Aha do na mambahen lungun roha ni panurat psalmen i?

⁶ Sipata, olo do lungun roha ni naposo ni Jahowa. Songon i ma na dihilala panurat Psalmen 73. Sanga do mago las ni rohana ala negatif pikkiranna. Boasa? Ala cemburu jala jut do rohana mangida akka halak na jahat, na kejam, dohot na ginjang rohana. Diida ibana hira na tabo do ngolu ni nasida, lam mamora, sehat, jala dang adong masalahna. (Ps. 73:​3-7, 12) Bahkan alani jut ni rohana, gabe didok ibana ma marisuang do upaya na binahenna saleleng on lao melayani Jahowa. Alani i ma didok ibana, “Dang adong gunana hujaga rohakku asa toktong ias, jala dang adong gunana hupaias tanganku asa unang marsala.”—Ps. 73:13.

7. Tikki lungun rohatta, aha do na ikkon taulahon? (Ida sampul.)

⁷ Alai, dang dipasombu panurat psalmen i torus lungun rohana. Buktina, lao do ibana “masuk tu inganan ni Debata na badia i”. Disi diurupi Jahowa ma ibana asa muba cara pandangna. (Ps. 73:​17-19) Hita pe, tikki lungun rohatta, martangiang ma tu Jahowa. Tapangido ma bantuanna, asa taboto aha na lao ulahononta. Pasti urupan ni Jahowa do hita marhite Bibel dohot akka dongan di huria. Gabe boi ma hita margogo jala tetap setia melayani Ibana. Bahkan nang pe massai godang sitaonon na taadopi jala dang taboto aha na lao ulahononta, pasti urupan ni Jahowa do hita asa dame rohatta.—Ps. 94:19.a

“PAJONOKKON DIRI TU DEBATA” MAMBAHEN MARTUJUAN NGOLUTTA JALA ADONG HARAPANTA

8. Aha do muse manfaatna molo tapajonok diritta tu Jahowa?

⁸ Adong do muse manfaat na asing pajonokkon diri tu Debata. Na parjolo, gabe martujuan ma ngolutta. Na paduahon, gabe adong ma harapanta di ari na naeng ro. (Jer. 29:11) Saonari tabahas ma taringot on.

9. Boasa gabe martujuan ngolutta molo tapajonok diritta tu Jahowa?

⁹ Godang do halak saonari dang porsea na tutu adong Debata. Jadi didok roha ni nasida, dang adong tujuan ni na mangolu on. Jala didok nasida do, dang na lao adong be jolma di tano on haduan. Alai asing do molo hita. Dung taparsiajari Bibel, pos do rohatta tutu do adong Debata. Jala taboto do, dang marisuang sude na taulahon lao mambahen las roha ni Jahowa. Boasa? Alana didok di Bibel, ‘lehononna do upa tu halak na marsitutu mangalului Ibana’. (Heb. 11:6) Asing ni i, tikki ditoppa Debata hita, disuanton Ibana do tu rohatta keinginan lao manomba Ibana. Jadi molo tapajonok diritta tu Jahowa jala tasomba Ibana, gabe martujuan ma ngolutta.—5 Mus. 10:​12, 13.

10. Aha do na dijanjihon Jahowa tu akka halak na marhaposan tu Ibana? (Psalmen 37:29)

¹⁰ Molo di akka halak saonari, massai penting do di nasida karejo, menikah, marianakkon, dohot manippan hepeng lao pakkeonna dung matua. Holan i do tujuan ni nasida mangolu. Dang diboto nasida taringot janji ni Debata di ari na naeng ro. Alai molo hita akka naposo ni Jahowa, taboto do akka janjina i. (Ps. 25:​3-5; 1 Tim. 6:17) Jala pos do rohatta pasti pasautonna do sude janjina i. Jadi godang do pasu-pasu ni Jahowa na tapaima saut di ari na naeng ro, termasuk ma i boi hita manomba Ibana saleleng ni lelengna di Paradeiso.—Jaha Psalmen 37:29.

11. Aha do muse manfaatna molo tapajonok diritta tu Jahowa, jala songon dia do perasaan ni Jahowa molo taulahon i?

¹¹ Godang do muse manfaat na asing molo tapajonok diritta tu Debata. Misalna, olo do Jahowa mengampuni akka dosatta molo bertobat hita. (Jes. 1:18) Gabe dang sai marsak be hita alani akka dosa na hea taulahon. (Ps. 32:​1-5) Asing ni i, hita pe marlas ni roha ma ala nungnga tabahen las roha ni Jahowa. (Poda 23:15) Pasti godang nai dope manfaat na dihilala hamu ala marale-ale tu Jahowa. Alai, boha do carana asa boi hamu torus jonok tu Ibana?

TORUS MA “PAJONOKKON DIRI TU DEBATA”

12. Akka aha do naung diulahon hamu asa boi jonok tu Jahowa?

¹² Andorang so tardidi hita, pasti godang do naung taulahon asa jonok tu Jahowa. Misalna, nungnga taparsiajari hasittongan taringot Jahowa dohot Jesus Kristus, bertobat do hita sian akka dosatta, porsea do hita tu Jahowa, jala berupaya do hita asa torus mangoloi Ibana. Alai asa lam jonok hita tu Jahowa, ikkon torus do taulahon sudena i.—Kol. 2:6.

13. Akka aha do na ikkon taulahon asa torus jonok tu Jahowa?

¹³ Aha do na porlu taulahon asa torus jonok tu Jahowa? (1) Ikkon torus do tajaha jala taparsiajari Bibel. Alai, unang ma holan ajaran dasar taringot Debata na taparsiajari. Porlu do taattusi songon dia pikkiran ni Jahowa, jala aha do na dipangido Ibana asa taulahon. Asing ni i, taihutton ma akka prinsip na dipaboa Ibana di Bibel. (Eps. 5:​15-17) (2) Tapatogu ma haporseaotta. Carana, tapikkirhon ma akka aha do naung diulahon Jahowa lao patuduhon holongna tu hita. (3) Tahasogohon ma akka ulaon na dihasogohon Jahowa. Jala unang ma mardongan hita tu akka halak na mangulahon akka ulaon i.—Ps. 1:1; 101:3.

14. Aha do na porlu taulahon ganup ari lao mambahen las roha ni Jahowa? (1 Korint 10:31) (Ida gambar.)

¹⁴ Jaha 1 Korint 10:31. Ikkon berupaya do hita asa torus mambahen las roha ni Jahowa. Alai, dang cukkup holan marpungu dohot marbarita. Ikkon tarida do tong i sian na taulahon ganup ari. Uppamana, ikkon jujur do hita jala olo mangalehon na adong di hita tu na asing. (2 Kor. 8:21; 9:7) Asing ni i, dipangido Jahowa do asa taargai hangoluan on. Alani i, tajaga ma kesehatanta. Manat ma tapikkirhon aha na lao taallang dohot na tainum. Jadi molo berupaya hita mangulahon manang aha pe lao mambahen las roha ni Jahowa, pasti lam holong do roha ni Jahowa tu hita.—Luk. 16:10.

15. Ikkon songon dia do caratta maradoppon halak na asing?

¹⁵ Burju do Jahowa tu sude halak, bahkan tu akka na so manomba Ibana. (Mat. 5:45) Alani i, dipangido Jahowa do tong asa burju hita tu halak na asing. Songon na didok di Bibel, ‘Unang ma taparoa-roa manang ise pe, unang marbada, . . . jala lambok ma hita tu sude halak.’ (Tit. 3:2) Molo taingot on, pasti dang tadok unjago hita sian akka halak na so Saksi Jahowa. (2 Tim. 2:​23-25) Jadi molo burju hita tu sude halak, gabe lam jonok ma hita tu Jahowa.

‘TAPAJONOK MA DIRITTA TU DEBATA’ TIKKI LUNGUN ROHATTA

16. Dung piga-piga tikki melayani Jahowa, aha do na dihilala panurat Psalmen 73?

¹⁶ Alai boha do molo sada tikki, didok rohatta dang tama hita dihaholongi Jahowa alani akka kesalahan na hea taulahon? Taingot ma, i do tong na hea dihilala panurat Psalmen 73. Hea do didok rohana, dang tama ibana dihaholongi Jahowa ala sala cara marpikkirna. Alani lungun ni rohana, didok ibana ma, “Nungnga naeng lilu au, nungnga naeng tarsulandit pattu.” (Ps. 73:2) Jala didok ibana do muse tu Jahowa, “Mandele do au . . . Massai oto do au . . . Songon binatang na oto do au di jolom.”—Ps. 73:​21, 22.

17. (a) Aha do na diulahon panurat psalmen i tikki lungun rohana? (b) Aha do na taparsiajari sian pengalamanna i? (Ida gambar.)

¹⁷ Memang, sanga do panurat psalmen i merasa nungnga ditinggalhon Jahowa ibana. Alai, dang dipasombu ibana songon i torus perasaanna. Tikki lungun rohana, disadari ibana do na porlu ibana pajonokkon diri tu Jahowa. Sian dia taboto? Didok ibana, “Alai saonari toktong do au rap dohot Ho [Jahowa]; ditiop Ho do tangan kananku. Dilehon Ho do poda tu au lao manogu-nogu au, jala patuduhononmu do na lomo roham mangida au.” (Ps. 73:​23, 24) Tatiru ma panurat psalmen i. Tikki lungun rohatta jala marsak hita alani akka kesalahan na hea tabahen, tapangido ma bantuan ni Jahowa jala taandalhon ma Ibana. Ai Ibana do na gabe Dolok Batu di hita. (Ps. 73:26; 94:18) Nang pe hea taulahon dosa na balga, boi do hita mulak muse tu Jahowa. Alana pos rohatta, ‘rade do Ibana manalpuhon hasalaanta’. (Ps. 86:5) Jadi tikki lungun jala metmet rohatta, ikkon berupaya do hita asa lam jonok tu Jahowa.—Ps. 103:​13, 14.

“PAJONOKKON DIRI TU DEBATA” SALELENG NI LELENGNA

18. Boasa boi hita torus jonok tu Jahowa?

¹⁸ Boi do torus jonok hita tu Jahowa sahat tu saleleng ni lelengna. Alana, godang nai dope na lao taparsiajari taringot Ibana. Songon na didok di Bibel, “dang adong na boi takkas patorakkon” taringot bisukna, parbinotoanna, dohot akka ulaonna.—Rom 11:33.

19. Aha do pos ni rohamuna dung taparsiajari Psalmen on?

¹⁹ Didok di Psalmen 79:​13, “Mandok mauliate ma hami tu Ho saleleng ni lelengna, mandok mauliate ma bangsom dohot punguan ni biru-biru na diparmahani Ho, jala pujionnami ma Ho saleleng ni lelengna.” Molo torus hamu jonok tu Jahowa, hilalaonmuna ma pasu-pasuna sahat tu saleleng ni lelengna, jala boi ma didok hamu, “Dipatogu Debata do rohakku, Ibana do na gabe parbagiananku saleleng ni lelengna.”—Ps. 73:26.