Sai Didongani Jahowa do Hita

1-2. (a) Tikki adong sitaononta, boasa boi pos rohatta dang hea sahalakta mangadopi i? (b) Aha do na lao tabahas di artikel on?

TIKKI adong sitaononta, olo do tahilala hira na di tonga-tonga ni hutan hita. Holan sahalakta do disi, jala dang taboto dalan lao kaluar sian i. Alai pos ma rohatta, dang sahalakta mangadopi sitaonon i. Diboto Jahowa Bapakta na di surgo i do sitaonon na taadopi, jala marjanji do Ibana lao mangurupi hita. Alani holongna, dipaboa Jahowa do janji on tu akka naposona na setia, ‘Urupanku do ho.’—Jes. 41:10.

² Di artikel on, lao tabahas ma opat cara ni Jahowa mangurupi hita: (1) manogu-nogu hita, (2) paradehon kebutuhanta, (3) manjaga hita, (4) mangapuli rohatta. Dipapos Jahowa do rohatta manang aha pe tantanganta, dang ditadikkon Jahowa hita. Jadi, dang hea sahalakta mangadopi i.

DITOGU-TOGU JAHOWA DO HITA

3-4. Songon dia do Jahowa manogu-nogu hita? (Psalmen 48:14)

³ Jaha Psalmen 48:14. Diboto Jahowa do, dang boi hita manottuhon dalanta sandiri, jala porlu do hita ditogu-togu Ibana. Attong, songon dia do cara ni Jahowa manogu-nogu hita saonari? Sada carana, i ma marhite Bibel. (Ps. 119:105) Dilehon Jahowa do Bibel asa boi tabahen keputusan na denggan, jala asa boi tatiru cara marpikkir ni Jahowa. Molo taulahon aha na diajarhon Jahowa di Bibel, gabe lam denggan ma ngolutta saonari, jala boi ma hita mangolu saleleng ni lelengna.a Misalna, diajarhon Jahowa do hita asa unang torus muruk, asa jujur hita di sude parniulaotta, jala asa tahaholongi donganta sian nasa roha. (Ps. 37:8; Heb. 13:18; 1 Ptr. 1:22) Molo taulahon songon i, boi ma lam denggan hita gabe natua-tua, suami, istri, dohot dongan.

⁴ Di Bibel, dipaboa Jahowa do taringot akka halak na mangadopi sitaonon na sarupa songon hita. Jala sarupa do tong pakkilalaan ni nasida songon hita. (1 Kor. 10:13; Jak. 5:17) Molo tajaha akka cerita taringot nasida jala molo taulahon akka parsiajaran sian i, adong ma dua manfaat na boi tadapot. Na parjolo, gabe taboto ma dang holan hita na mangadopi sitaonon di portibi on. Adong do halak na sarupa sitaononna songon hita, jala boi do nasida mangadopi i ala diurupi Jahowa. (1 Ptr. 5:9) Na paduahon, gabe taboto ma aha na ikkon taulahon asa martahan mangadopi sitaononta jala toktong marlas ni roha.—Rom 15:4.

5. Akka ise do na dipakke Jahowa lao manogu-nogu hita?

⁵ Ditogu-togu Jahowa do tong hita marhite akka dongan sahaporseaon.b Misalna, taratur do akka pengawas wilayah mangunjungi huria lao patoguhon hita. Akka jamita ni nasida patoguhon haporseaotta jala mangurupi hita asa toktong marsada. (Ul. 15:40–16:5) Adong muse akka sintua di huria na bekerja keras mangurupi hita ganup marsada-sada, asa toktong jonok hubungatta tu Jahowa. (1 Ptr. 5:​2, 3) Akka natua-tua pe berupaya do mangajari gellengna asa makkaholongi Jahowa, mambahen keputusan na denggan, jala marpangalaho na denggan. Berupaya do tong nasida mangajari gellengna asa taratur manjaha Bibel, marpungu, jala marbarita. (Poda 22:6) Adong do muse akka donganta borua di huria na togu haporseaonna tu Jahowa. Dilehon nasida do nasehat dohot hata na patoguhon roha, jala gabe teladan do nasida tu akka borua na upposo.—Tit. 2:​3-5.

6. Songon dia ma carana patuduhon na taargai sude bantuan ni Jahowa?

⁶ Nungnga ditogu-togu Jahowa hita asa boi tabahen keputusan na denggan jala asa marlas ni roha hita. Attong, songon dia ma carana patuduhon na taargai sude bantuan naung dilehon Jahowa i? Poda 3:​5, 6 mandok, “Marhaposan tu Jahowa ma ho sian nasa roham, jala unang ma ho mangasahon pikkiranmu sandiri.” Molo taulahon songon i, ‘bahenon ni Jahowa ma tigor akka dalanta’. Lapatanna, lao diurupi Jahowa ma hita asa unang tahilala na haccit ala tabahen keputusan na sala. Hasilna, gabe las ma rohatta. Nungnga dilehon Jahowa nasehat na denggan tu hita ganup marsada-sada. Pasti mandok mauliate do hita ala massai takkas ditanda Jahowa hita jala massai holong rohana tu hita.—Ps. 32:8.

DIPARADE JAHOWA DO KEBUTUHANTA

7. Aha do na dilehon Jahowa tu hita? (Pilippi 4:19)

⁷ Jaha Pilippi 4:19. Asing ni manogu-nogu hita, dipasu-pasu Jahowa do tong upayatta lao mandapot akka na tahaporluhon. Misalna sipanganon, pakkean, dohot tempat tinggal. (Mat. 6:33; 2 Tes. 3:12) Wajar do molo sipata khawatir hita mamikkirhon songon dia carana mandapot akka kebutuhan i. Alai dang lomo roha ni Jahowa molo paholsohu hita mamikkiri i. (Mat. 6:25) Alana dang hea Jahowa Bapakta i manadikkon hita. (Mat. 6:8; Heb. 13:5) Pos ma rohatta, pasti dipasaut Jahowa do janjina lao paradehon kebutuhanta.

8. Songon dia do Jahowa mangurupi si Daud?

⁸ Pikkirhon ma songon dia Jahowa mangurupi si Daud. Saleleng martaon-taon, susa do dihilala si Daud ala dilele Raja Saul ibana. Alai sai diparade Jahowa do kebutuhan ni si Daud dohot akka tentarana. Tikki dirimangi si Daud muse songon dia Jahowa mangurupi ibana, didok ibana do, “Hea do au poso jala nungnga matua au saonari, alai dang hea dope huida halak na tigor marroha ditinggalhon, jala dang hea gellengna mangido-ido sipanganon.” (Ps. 37:25) Songon si Daud, ra nungnga diida hamu songon dia Jahowa mangurupi akka naposona na setia.

9. Songon dia do Jahowa paradehon kebutuhan ni akka naposona saonari tikki masa bencana? (Ida gambar.)

⁹ Diparade Jahowa do tong kebutuhan ni akka naposona tikki masa bencana. Misalna di abad na parjolo tikki terjadi kelaparan di Jerusalem, pittor dilehon akka dongan na sian inganan na asing do kebutuhan ni akka dongan na disi. (Ul. 11:​27-30; Rom 15:​25, 26) Saonari pe, las do roha ni naposo ni Jahowa mangurupi akka dongan sahaporseaon ni nasida na makkaporluhon bantuan. Tikki masa bencana, dipakke Jahowa do naposona lao mangurupi akka dongan na tinggal di daerah na hona bencana. Diparade nasida do akka sipanganon, aek, pakkean, dohot obat. Kerja keras do tim pembangunan lao padenggatton jabu dohot Bale Harajaon na sega. Tikki masa bencana, godang do donganta na susa ala hancur jabuna manang mate halak na dihaholongi ibana. Alai pittor ro do akka dongan lao mangapuli nasida marhite akka ayat ni Bibel.c

10-11. Aha do na boi taparsiajari sian pengalaman ni sahalak bawa di Ukraina?

¹⁰ Diparade Jahowa do tong kebutuhan ni akka halak na so manomba Ibana dope. Boi do tatiru Jahowa, talului ma cara lao patuduhon haburjuon tu akka halak na so manomba Jahowa. (Gal. 6:10) Molo tabahen songon i, ra boi do i gabe dalan lao marbarita tu nasida. Taida ma pengalaman ni sahalak bawa na gabe kepala sekolah di Ukraina. Nang pe dang Saksi Jahowa ibana, burju do ibana tu akka muridna na Saksi jala diargai ibana do haporseaon ni nasida. Ala masa porang, pinda ma ibana tu daerah na lebih aman di negara i, jala diurupi akka donganta ma ibana disi. Dung i, ro ma ibana tu Borngin Parningotan Ari Hamamate ni Jesus. Tikki diingot ibana muse akka bantuan na dilehon Saksi Jahowa, didok ibana ma, “Burju hian do Saksi Jahowa tu au, diparade nasida do sude kebutuhanku. Mandok mauliate do au tu Saksi Jahowa.”

¹¹ Sude hita boi do maniru Jahowa Bapakta na parasi roha. Boha do carana? Tapatudu ma holong tu sude halak na makkaporluhon bantuan, dang soal manomba Jahowa nasida manang na dang. (Luk. 6:​31, 36) Harap do rohatta gabe taronjar roha ni nasida lao mananda Jahowa jala manomba Ibana rap dohot hita. (1 Ptr. 2:12) Alai dang soal nasida manomba Jahowa annon manang na dang, tetap do las rohatta. Alana Bibel mandok, “Umlas do roha ni halak na mangalehon.”—Ul. 20:35.

DIJAGA JAHOWA DO HITA

12. Songon dia do Jahowa manjaga akka naposona? (Psalmen 91:​1, 2, 14)

¹² Jaha Psalmen 91:​1, 2, 14. Saonari, marjanji do Jahowa lao manjaga akka naposona sian manang aha pe na boi manegai hubungan ni nasida tu Ibana. Dang na lao paloason ni Jahowa Sibolis manegai ibadat na sittong. (Joh. 17:15) Jala saleleng “hasusaan bolon” haduan, pos ma rohatta lao pasauton ni Jahowa do janjina lao manjaga naposona. Urupanna do hita asa toktong setia tu Ibana, jala paluaonna do hita.—Pgk. 7:​9, 14.

13. Songon dia do Jahowa manjaga hita ganup marsada-sada?

¹³ Songon dia do Jahowa manjaga hita ganup marsada-sada? Dilehon Jahowa do Bibel asa boi taboto dia na sittong jala dia na sala. (Heb. 5:14) Molo taulahon akka na taparsiajari sian Bibel, gabe toktong ma jonok hubungatta tu Jahowa. Gabe boi ma tabahen keputusan na denggan na mambahen hita sehat jala marlas ni roha. (Ps. 91:4) Asing ni i, dijaga Jahowa do hita marhite huria. (Jes. 32:​1, 2) Massai holong do roha ni akka dongan tu Jahowa, jala dioloi nasida do parettana. Alani i, molo talehon tikki lao bergaul dohot nasida, boi do i patoguhon hita jala mangurupi hita pasidikkon ulaon na sala.—Poda 13:20.

14. (a) Boasa diloas Jahowa hita mangadopi hasusaan? (b) Boasa Psalmen 9:10 paposson rohatta? (Ida surat na di toru.)

¹⁴ Sipata, dilindungi Jahowa do akka naposona najolo asa unang tarlukka manang dipamate. Alai dang sai dibahen Ibana songon i. Bibel mandok, boi do masa tu sude halak “akka na so diharappon”. (Pjm. 9:11) Asing ni i, diloas Jahowa do piga-piga naposona dianiaya manang dipamate. Tujuanna, lao mambuktihon na pargabus do Sibolis. (Job 2:​4-6; Mat. 23:34) Saonari pe songon i do. Memang dang pittor dipasae Jahowa akka hasusaatta i. Alai pos ma rohatta, dang hea ditadikkon Jahowa akka halak na makkaholongi Ibana.d—Ps. 9:10.

DIAPULI JAHOWA DO ROHATTA

15. Songon dia do cara ni Jahowa mangapuli rohatta? (2 Korint 1:​3, 4)

¹⁵ Jaha 2 Korint 1:​3, 4. Olo do sipata marsak hita, holsoan, jala marhabot ni roha. Ra saonari adong tantangan na mambahen hamu merasa kesepian, jala didok rohamuna dang adong na mangattusi pakkilalaanmuna. Alai pos ma rohamuna, diattusi Jahowa do arsak ni rohamuna i. Jala rade do Jahowa mangurupi hamu ‘asa margogo mangadopi sude sitaononmuna’. Songon dia carana? Tikki martangiang hita paboahon sude na di rohatta tu Jahowa, lehononna ma tu hita “hadameon na so boi diattusi jolma”. (Plp. 4:​6, 7) Tarapul do muse rohatta molo tajaha Bibel. Boi ma taboto sian Bibel, na massai holong do roha ni Jahowa tu hita. Diajari Ibana do hita asa marbisuk, jala dipaboa Ibana do harapan na luar biasa tu hita. Tarapul do muse rohatta molo ro hita tu parpunguan. Alana di parpunguan, taparsiajari do akka na patoguhon roha sian Bibel, jala rap bergaul do hita dohot akka dongan na makkaholongi hita.

16. Aha do na boi taparsiajari sian pengalaman ni si Nathan dohot si Priscilla?

¹⁶ Diapuli Jahowa do rohatta marhite Bibel. Taida ma pengalaman ni si Nathan dohot si Priscilla na tinggal di Amerika Serikat. Piga-piga taon na salpu, dibahen nasida ma rencana lao pinda tu daerah na makkaporluhon parbarita. Didok si Nathan, “Pos do rohanami pasti dipasu-pasu Jahowa do upayanami.” Alai dung pinda, toppu ma marsahit nasida jala susa di parhepengon. Ikkon mulak ma muse nasida tu hutana. Nang pe songon i, tong do susa parhepengon ni nasida. Didok si Nathan do, “Sukkun-sukkun do rohakku, boasa dang dipasu-pasu Jahowa hami songon na diharappon hami. Bahkan sanga do au marpikkir, atik adong do na sala na hubahen.” Alai ujungna diboto si Nathan dohot si Priscilla ma, dang hea ditadikkon Jahowa nasida. Didok si Nathan, “Di tikki i, dipatogu Jahowa do hami marhite Bibel. Hira dongan na burju do Bibel i, na sai mangapuli rohanami jala patoguhon hami. Dang masalahnami na sai torus dipikkirhon hami, alai songon dia Jahowa mangurupi hami di tikki susa. Gabe pos ma rohanami, pasti diurupi Jahowa do tong hami mangadopi tantangan di ari na naeng ro.”

17. Songon dia do Jahowa mangapuli roha ni si Helga? (Ida gambar.)

¹⁷ Diapuli Jahowa do tong rohatta marhite akka dongan. Songon dia carana? Taida ma pengalaman ni si Helga na tinggal di Hungaria. Saleleng martaon-taon, godang do sitaonon na mambahen ibana marsak jala merasa dang mararga. Alai tikki diingot si Helga muse pengalamanna i, diboto ibana ma na diapuli Jahowa do rohana marhite akka dongan di huria. Didok si Helga, “Loja hian do huhilala ala ikkon karejo, mangarawat gellengku na marsahit, dohot akka masalah na asing. Alai sai dipatogu Jahowa do au. Saleleng 30 taon na parpudi on, sai dipasaut Jahowa do janjina. Sai diurupi Ibana do au marhite hata na patoguhon sian akka dongan. Jotjot do dapottu pesan, kartu ucapan, manang pujian sian nasida di tikki na pas.”

18. Boha do caratta mangapuli roha ni na asing?

¹⁸ Boi do tatiru Jahowa molo taapuli roha ni na asing. Boha do carana? Tikki makkatai nasida, sabar ma hita manangihon. Lambok ma hita tikki makkatai, jala talehon ma bantuan tu nasida. (Poda 3:27) Berupaya ma hita mangapuli roha ni akka halak na marsak, termasuk ma i akka na so manomba Jahowa dope. Molo taboto adong na marhabot ni roha, na marsahit, manang na marsak, tajuppangi ma nasida. Tatangihon ma nasida, jala tajahahon ma ayat na patoguhon sian Bibel. Molo tatiru Jahowa “Debata Sipangapul na sumurung”, boi ma taurupi akka dongan sahaporseaotta asa toktong setia jala martahan. Dang holan i, gabe taronjar ma roha ni akka na so sisomba Jahowa naeng marsiajar taringot Jahowa.—Mat. 5:16.

SAI DIURUPI JAHOWA DO HITA

19. Aha do na diulahon Jahowa tu hita, jala boha do caratta maniru Ibana?

¹⁹ Massai holong do roha ni Jahowa tu sude halak na makkaholongi Ibana. Tikki susa hita, dang hea ditadikkon Jahowa hita. Songon natua-tua na parholong na mamparrohahon gellengna, songon i ma Jahowa. Diparrohahon Ibana do akka naposona na setia. Ditogu-togu Ibana do hita, diparade kebutuhanta, dijaga do hita, jala diapuli do rohatta. Boi do tatiru Bapakta na parholong i molo taurupi jala tapatogu halak na asing tikki susa nasida. Saleleng mangolu di portibi na jahat on, sai adong do sitaonon na mambahen lungun rohatta. Alai pos ma rohatta sai didongani Jahowa do hita. Alana nga marjanji Ibana, “Unang ho mabiar, ai hudongani do ho.” (Jes. 41:10) Pos ma rohatta, dang hea dipasombu Jahowa hita sahalakta.