Songon dia do Jesus Pabadiahon jala Paiasson Goar ni Jahowa?

1-2. (a) Aha do na diulahon Jesus di borngin andorang so dihukum mate ibana? (b) Aha do na lao tabahas di artikel on?

DI ARI Kamis borngin tanggal 14 Nisan 33 M, rap mangan ma Jesus dohot akka apostelna na setia di sada ruangan. Diboto Jesus do satokkin nai na lao dihianati do ibana, disiksa, jala dihukum mate. Jadi dung sae nasida na mangan i, dipatogu Jesus ma akka apostelna i. Jala andorang so lao nasida sian ruangan i, martangiang ma Jesus. Disurat Apostel Johannes ma tangiangna i di Johannes bindu 17.

² Adong do na boi taparsiajari sian tangiang ni Jesus i. Misalna, aha do na mambahen marsak ibana di tikki i? Jala saleleng di tano on ibana, aha do na uppetting di ngoluna? Tabahas ma i di artikel on.

“NUNGNGA HUPABOA GOARMU TU NASIDA”

3. Aha do lapatan ni hata ni Jesus na mandok, “Nungnga hupaboa goarmu tu nasida”? (Johannes 17:​6, 26)

³ Di tangiangna, didok Jesus do, “Nungnga hupaboa goarmu tu nasida.” Bahkan sappe dua hali ma i didok Jesus. (Jaha Johannes 17:​6, 26.) Aha do lapatan ni hata ni Jesus i? Na so diboto akka siseanna do goar ni Debata? Diboto nasida do i. Alana halak Jahudi do nasida. Jala tarsurat do goar ni Debata di Akka Bukku Heber hampir 7.000 hali. Jadi tikki didok Jesus hatana i, ibana dang na lao paboahon ise goar ni Debata. Alai, Jesus lao mangajarhon Debata na songon dia do Jahowa i. Lomo do roha ni Jesus asa lam ditanda nasida Jahowa, aha sakkapna, akka ulaonna, dohot akka sifatna. Holan Jesus do na boi mangulahon i. Alana holan ibana do na takkas mananda Jahowa.

4-5. (a) Aha do na mambahen gabe massai penting goar ni sasahalak di hita? Bahen ma tudosan. (b) Aha do na mambahen gabe massai penting goar ni Jahowa di sisean ni Jesus?

⁴ Bayakkon ma adong sintua di huriamuna na margoar si David. Sahalak dokter bedah do ibana. Nungnga leleng ditanda hamu ibana. Sada tikki, marsahit ma hamu jala ikkon hatop dioperasi. Diboan ma hamu tu rumah sakit, jala disi do si David i karejo. Ibana ma na mangoperasi hamu, jala gabe sehat ma muse hamu. Alani i, gabe holong hian ma rohamuna tu ibana. Molo dibege hamu goarna, pasti diingot hamu do akka aha naung diulahon ibana tu hamu. Dang holan sintua be si David i di hamu. Alai sahalak dokter bedah do tong ibana naung mangurupi hamu asa sehat muse.

⁵ Dos songon i ma, diboto akka sisean ni Jesus do Jahowa goar ni Debata. Alai dung diurupi Jesus nasida takkas mananda Jahowa, gabe massai penting ma goar ni Jahowa i di nasida. Songon dia ma Jesus mangulahon i? Dipatudu ibana do akka sifat ni Jahowa sian hata dohot akka pambahenanna. Jadi tikki diparrohahon akka sisean i cara ni Jesus mangajari jala songon dia ibana maradoppon halak na asing, gabe lam takkas ma “ditanda” nasida Jahowa.—Joh. 14:9; 17:3.

“GOARMU NA NILEHONMI TU AU”

6. Boasa didok Jesus dilehon Jahowa goarna tu ibana? (Johannes 17:​11, 12)

⁶ Tikki martangiang Jesus, ditangiakkon ibana do tong akka siseanna. Didok ibana, “Hujaga do nasida alani goarmu na nilehonmi tu au.” (Jaha Johannes 17:​11, 12.) Sian hatana i, na gabe dijou do tong Jesus i Jahowa? Daong. Molo taparrohahon tangiangna i, didok Jesus do tu Jahowa, “alani goarmu”. Jadi dang gabe dijou Jesus i Jahowa. Attong, boasa didok Jesus songon i? Alana Jesus do na mewakili Jahowa dohot na pasahatton hatana. Marhite goar ni Jahowa do ibana ro tu tano on. Jala marhite goar i do dibahen ibana godang mukjizat. (Joh. 5:43; 10:25) Asing ni i, lapatan ni goar ni Jesus, i ma “Jahowa do Haluaon”. Sian on taboto ma, adong do hubungan ni goar ni Jesus tu goar ni Debata.

7. Boasa boi tadok hata ni Jahowa do na dipasahat Jesus? Bahen ma tudosan.

⁷ Bayakkon ma adong sahalak duta besar manang utusan sian sada negara. Ibana ma na mewakili presiden sian negara i. Ala ibana do na mewakili presiden i, hata ni presiden i do na dipaboa ibana tu akka halak. Dos songon i ma, ala Jesus do na mewakili Jahowa, hata ni Jahowa do na dipasahat ibana tu akka halak.—Mat. 21:9; Luk. 13:35.

8. Boasa didok Jahowa, Jesus i ‘ro di bagasan goarna’ bahkan tikki di surgo dope Jesus? (2 Musa 23:​20, 21)

⁸ Di Bibel, didok do Jesus i “Hata”. Ibana do na pasahatton hata ni Jahowa dohot akka petunjukna tu suru-suruan dohot tu jolma. (Joh. 1:​1-3) Jala Jesus do ra suru-suruan na disuru Jahowa manjaga bangso Israel saleleng di padang belantara nasida. Tikki i, dipangido Jahowa do asa dioloi bangso Israel suru-suruan i. Boasa? Alana didok Jahowa, “Ai di bagasan goarhu do ibana ro.”a (Jaha 2 Musa 23:​20, 21.) Aha do lapatanna? Jesus do na mewakili Jahowa. Jala Jesus do na terutama berperan pabadiahon dohot paiasson goar ni Jahowa.

“ALE AMANG, PASANGAP MA GOARMI”

9. Sadia penting do goar ni Jahowa di Jesus? Patorang ma.

⁹ Songon naung tabahas, massai penting do di Jesus goar ni Jahowa bahkan tikki di surgo dope ibana. Alani i ma saleleng di tano on Jesus, dipatudu ibana do sian sude pambahenanna na massai penting goar ni Jahowa i di ibana. Piga-piga ari andorang so mate Jesus, didok Jesus do tu Jahowa, “Ale Amang, pasangap ma goarmi.” Pittor dialusi Jahowa do i jala gogo do didok Ibana sian surgo, “Nungnga hupasangap i, jala pasangapokku do i muse.”—Joh. 12:28.

10-11. (a) Songon dia do cara ni Jesus pasangappon goar ni Jahowa? (Ida gambar.) (b) Boasa porlu dipabadia jala dipaias goar ni Jahowa?

¹⁰ Dipasangap Jesus do goar ni Jahowa. Songon dia ma ibana mangulahon i? Sada carana, i ma paboahon akka sifat dohot akka na diulahon Jahowa. Alai diboto Jesus do tong ikkon dipabadia jala dipaias do goar ni Jahowa.b Tarida ma i sian contoh tangiang na diajarhon ibana tu akka siseanna. Didok ibana, “Ale Amanami na di banua ginjang, sai dipabadia ma goarmu.”—Mat. 6:9.

¹¹ Boasa porlu dipabadia jala dipaias goar ni Jahowa? Alana tikki di Taman Eden najolo, difitnah Sibolis do Debata Jahowa. Didok Sibolis do pargabus Jahowa i jala adong na denggan na so dilehon Jahowa tu si Adam dohot si Hawa. (1 Mus. 3:​1-5) Asing ni i, didok Sibolis do muse dang sittong cara ni Jahowa mamaretta. Akka tuduhan ni Sibolis on mambahen marlea goar ni Jahowa. Dung i muse di jaman ni si Job didok Sibolis do olo pe jolma manomba Jahowa, holan asa dipasu-pasu do nasida. Didok Sibolis do muse, molo marsitaonon jolma i pasti dang olo be nasida manomba Jahowa. Alana dang benar-benar holong roha ni nasida tu Jahowa. (Job 1:​9-11; 2:4) Jadi porlu do tikki lao mambuktihon ise do na pargabus, Jahowa do manang Sibolis.

“HULEHON DO NGOLUKKU”

12. Ala holong roha ni Jesus tu Jahowa, aha do na diulahon Jesus?

¹² Ala holong hian do roha ni Jesus tu Jahowa, olo do ibana mangulahon manang aha pe lao pabadiahon dohot paiasson goar ni Jahowa. Bahkan rela do ibana mate lao mangulahon i.c (Joh. 10:​17, 18) Ro do ibana tu tano on, lao patuduhon na holong rohana tu Jahowa. Buktina, saleleng di tano on dioloi ibana do sude paretta ni Jahowa. (Heb. 4:15; 5:​7-10) Dang sarupa Jesus songon si Adam dohot si Hawa na mangalo tu Jahowa jala mangihutton Sibolis. Toktong do setia Jesus tu Jahowa sahat tu na mate ibana di hau partinaonan i. (Heb. 12:2) Jadi sian on taboto ma, massai holong do roha ni Jesus tu Jahowa jala massai penting do goar ni Jahowa i di ibana.

13. Boasa ma Jesus na paling pas patuduhon na pargabus do Sibolis? (Ida gambar.)

¹³ Takkas situtu do ditanda Jesus Jahowa. Jadi molo adong pe sada sian tuduhan ni Sibolis i na sittong, pasti diboto Jesus do i. Toktong do dibela Jesus Jahowa jala dibuktihon ibana sittong do sude na diulahon Bapakna. Ala diboto ibana, gabus do sude na didok Sibolis i. Bahkan nang pe hira na ditinggalhon Jahowa Jesus, tetap do setia ibana tu Jahowa sahat tu na mate. (Mat. 27:46)d Sian on taboto ma saleleng di tano on Jesus, takkas do dipatudu ibana Sibolis do pargabus, dang Jahowa.—Joh. 8:44.

“NUNGNGA HUPASAE ULAON NA DIPASAHAT HO”

14. Pasu-pasu aha do na dilehon Jahowa tu Jesus ala toktong ibana setia?

¹⁴ Di tangiangna i didok Jesus do tong, “Nungnga hupasae ulaon na dipasahat Ho lao ulahonokku.” Pos do roha ni Jesus, pasti dipasu-pasu Jahowa do ibana ala tetap setia. (Joh. 17:​4, 5) Buktina, dipahehe Jahowa do ibana. (Ul. 2:​23, 24) Jala dilehon Jahowa do tu Jesus hasangapon na umbalga di surgo. (Plp. 2:​8, 9) Dung i, gabe Raja ni Harajaon ni Debata ma Jesus. Aha do na lao dipasaut marhite Harajaon i? Alusna adong di tangiang na diajarhon Jesus tu akka siseanna. Didok ibana, “Sai ro ma Harajaonmu. Sai saut ma lomo ni roham di tano on songon na di banua ginjang.”—Mat. 6:10.

15. Aha do na lao ulahonon ni Jesus?

¹⁵ Satokkin nai, marporang ma Jesus mangalo sude musu ni Jahowa. Jala diripasson ma nasida sude di Armagedon. (Pgk. 16:​14, 16; 19:​11-16) Dang leleng dukkon i, disappatton ma Sibolis tu “lombang na massai bagas”. Hira na dipenjarahon ma ibana disi jala dang boi diulahon ibana manang aha pe. (Pgk. 20:​1-3) Dung i mamaretta ma Jesus saleleng saribu taon. Disi diurupi ibana ma akka jolma asa sempurna jala makkilala dame ni roha. Asing ni i, paheheonna ma akka naung mate jala bahenonna ma tano on gabe Paradeiso. Di tikki i saut ma lomo ni roha ni Jahowa!—Pgk. 21:​1-4.

16. Songon dia do ngolu ni jolma dung marujung Pamarettaon Saribu Taon ni Kristus?

¹⁶ Dung marujung Pamarettaon Saribu Taon ni Kristus, songon dia do ngolutta? Dang mardosa be jolma. Alani i dang porlu be nasida mangido pengampunan sian Jahowa. Jala dang porlu be adong parhitean di nasida asa boi jonok tu Jahowa. Asing ni i, nungnga ditaluhon be musu na parpudi, i ma hamatean. Nungnga dipahehe be akka naung mate, jala nungnga sempurna be sude jolma di tano on.—1 Kor. 15:​25, 26.

17-18. (a) Aha do na masa dung marujung Pamarettaon Saribu Taon? (b) Dung marujung Pamarettaon Saribu Taon i, aha do na diulahon Jesus? (1 Korint 15:​24, 28) (Ida gambar.)

¹⁷ Asing ni i, dung marujung Pamarettaon Saribu Taon, nungnga ias be goar ni Jahowa. Dang na lao adong be na mambahen marlea goar ni Jahowa. Boasa? Alana nungnga tarbukti Debata parholong do Jahowa i. Taingot ma tikki di Taman Eden, didok Sibolis do Jahowa i pargabus jala dang denggan carana mamaretta. Alai mulai sian i, godang do naposo ni Jahowa na torus pabadiahon goarna.

¹⁸ Dung marujung Pamarettaon Saribu Taon i, aha ma na lao ulahonon ni Jesus? Na lao dialo ibana do Jahowa songon na diulahon Sibolis? Daong! (Jaha 1 Korint 15:​24, 28.) Lao paulakon ni Jesus ma Harajaon i tu Jahowa jala unduk ma ibana tu pamarettaon ni Jahowa. Jadi dang ditiru ibana Sibolis. Gariada, dilehon ibana do sude hasangapon i tu Jahowa ala massai holong do rohana tu Bapakna. Gabe tarbukti ma sala do sude hata ni Sibolis i.

19. Aha do naung taparsiajari taringot Jesus sian artikel on?

¹⁹ Saonari nungnga taboto be boasa dilehon Jahowa goarna tu Jesus. Sempurna do cara ni Jesus patuduhon Debata na songon dia Jahowa i. Jala massai penting do goar ni Jahowa di Jesus. Rela do ibana mate lao mambela goar ni Jahowa. Jala dung marujung haduan Pamarettaon Saribu Taon i, dipaulak Jesus ma Harajaon i tu Jahowa. Jadi aha do na porlu taulahon lao maniru Jesus? Lao tabahas ma i di artikel na mangihut.