“Pillit ma . . . Ise na lao Sombaonmuna”

1. Asa boi benar-benar marlas ni roha, aha do na ikkon taulahon, jala boasa? (Jesaya 48:​17, 18)

HOLONG hian do roha ni Jahowa tu hita, jala lomo do rohana asa marlas ni roha hita saonari sahat tu ari na naeng ro. (Pjm. 3:​12, 13) Alai asa boi hita benar-benar marlas ni roha, ikkon tasomba do Jahowa jala taoloi akka parettana. (Pjm. 8:9; Jer. 10:23) Alani i ma, nang pe dilehon Jahowa tu hita godang kemampuan na luar biasa, alai dang diloas Ibana hita na manottuhon dia na sittong dohot dia na sala.—Jaha Jesaya 48:​17, 18.

2. Aha do na didok Sibolis, jala boha do tanggapan ni Jahowa tu hatana i?

² Lomo do roha ni Sibolis asa porsea hita tu hatana. Didok ibana, boi do hita marlas ni roha nang pe dang tasomba Jahowa. Jala boi do hita sandiri na manottuhon dia na sittong dohot na sala. (1 Mus. 3:​4, 5) Alai lao mambuktihon na sala do hata ni Sibolis i, diloas Jahowa ma jolma mamaretta jolma. Boha do hasilna? Takkas do taida, dang boi pamarettaon ni jolma parohon las ni roha. Alai, adong do dipaboa di Bibel taringot akka halak na marlas ni roha ala disomba nasida Jahowa. Sian nasida sude, Jesus ma na tung las rohana ala disomba ibana Jahowa. Di artikel on, lao tabahas ma boasa dipillit Jesus manomba Jahowa. Dung i, tabahas ma boasa tama tasomba Jahowa. Jala na parpudi, tabahas ma boasa tapillit manomba Jahowa.

BOASA DIPILLIT JESUS MANOMBA JAHOWA

3. Aha do na ditawarhon Sibolis tu Jesus, jala aha do na diulahon Jesus?

³ Tikki di tano on Jesus, ikkon dipillit ibana do ise na lao sombaonna. Boasa? Alana dang leleng dukkon tardidi Jesus, ditawarhon Sibolis ma tu ibana sude harajaon ni portibi on. Alai ikkon disomba Jesus do Sibolis, apala sahali pe. Aha do na diulahon Jesus? Didok Jesus ma, “Lao ma ho Bolis! Ai tarsurat do, ‘Jahowa Debatam do na ikkon sombaonmu jala ikkon holan tu Ibana do lehononmu ngolum.’” (Mat. 4:​8-10) Boasa dang olo Jesus manjalo tawaran ni Sibolis i? Tabahas ma piga-piga alasanna.

4-5. Boasa olo Jesus mamillit manomba Jahowa? Paboa ma piga-piga alasanna.

⁴ Alasan na utama dipillit Jesus manomba Jahowa, i ma ala holong hian rohana tu Jahowa. (Joh. 14:31) Asing ni i, diboto Jesus do molo disomba ibana Jahowa, keputusan na sittong do i. (Joh. 8:​28, 29; Pgk. 4:11) Dung i diboto ibana do muse, Jahowa do silehon hangoluan, boi do dihaporseai Jahowa, jala burju do Ibana. (Ps. 33:4; 36:9; Jak. 1:17) Godang do akka na denggan na dilehon Jahowa tu Jesus. Jala dang hea Jahowa margabus tu Jesus. (Joh. 1:14) Alai asing do molo Sibolis. Ibana do na mambahen jolma mardosa jala mate. Pargabus do ibana jala holan dirina do na dipikkirhon. (Joh. 8:44) Alani i ma dang olo Jesus maniru Sibolis, jala gabe mangalo tu Jahowa. Bahkan dang hea ro tu pikkiranna lao mangulahon i.—Plp. 2:​5-8.

⁵ Adong do muse alasan na asing boasa dipillit Jesus manomba Jahowa. Diboto Jesus do molo toktong ibana setia, pasti denggan do hasilna. (Heb. 12:2) Misalna, gabe dipabadia ma goar ni Jahowa. Jala boi ma dilehon ibana ngoluna gabe tobusan, na lao manesa dosa dohot hamatean.

BOASA TAMA TASOMBA JAHOWA

6-7. Boasa godang halak saonari dang manomba Jahowa, alai boasa tama Ibana tasomba?

⁶ Godang do halak saonari na so manomba Jahowa ala dang ditanda nasida dope Ibana. Dang diboto nasida akka sifatna dohot akka na denggan naung dilehon Jahowa tu nasida. Sarupa ma nasida songon akka halak di Atena, na mandapot barita na uli sian si Paulus.—Ul. 17:​19, 20, 30, 34.

⁷ Dipatorang si Paulus do tu akka halak na di Atena i, Debata na sittong do na manoppa hita. Didok si Paulus, “[Debata] do na mangalehon hangoluan, hosa, ro di saluhutna tu sude jolma. Sian sada jolma do dibahen Ibana sude bangso.” Dung i didok si Paulus do muse, “Alani Ibana do hita gabe adong, marhosa, jala mangolu.” Jadi, tama do tasomba Jahowa.—Ul. 17:​25, 26, 28.

8. (a) Dipaksa Jahowa do hita asa manomba Ibana? (b) Aha do buktina na holong hian do roha ni Jahowa tu hita?

⁸ Jahowa do Sitoppa saluhutna jala Ibana do Debata Natumimbul. Alai, dang dipaksa Jahowa akka jolma asa manomba Ibana. Justru lomo do rohana asa hita sandiri na mamutusson ise na lao sombaotta. Alani i ma diparade Ibana godang bukti na patuduhon tutu do adong Ibana jala holong hian do rohana tu hita. Lomo do rohana asa godang halak gabe ale-alena. (1 Tim. 2:​3, 4) Alani i, dilatik Jahowa do akka naposona asa boi paboahon taringot lomo ni rohana tu akka halak, jala songon dia Ibana lao pasautton lomo ni rohana i. (Mat. 10:​11-13; 28:​19, 20) Diparade Ibana do muse akka huria. Gabe boi ma hita manomba Ibana jala mandapot bantuan sian akka sintua.—Ul. 20:28.

9. Aha do buktina na massai holong roha ni Jahowa tu sude jolma?

⁹ Massai holong do roha ni Jahowa tu sude jolma, bahkan tu akka halak na so porsea tu Ibana. Aha ma buktina? Sian najolo, holan mangihutton lomo ni rohana sandiri do godangan halak. Dang dioloi nasida Jahowa. Nang pe songon i, sai burju do Jahowa tu nasida. Dilehon Ibana do akka na dihaporluhon nasida dohot na mambahen las roha ni nasida. (Mat. 5:​44, 45; Ul. 14:​16, 17) Misalna, boi do nasida marale-ale dohot halak na asing, boi marianakkon, jala boi menikmati hasil kerja keras ni nasida. (Ps. 127:3; Pjm. 2:24) Sudena on patuduhon, massai holong do roha ni Jahowa tu sude jolma. (2 Mus. 34:6) Saonari, tabahas ma boasa olo hita manomba Jahowa, jala aha do pasu-pasu na tadapot molo tasomba Ibana.

BOASA TAPILLIT MANOMBA JAHOWA

10. (a) Aha do alasan na utama umbahen na olo hita manomba Jahowa? (Mateus 22:37) (b) Boha do perasaanmuna dung mamboto Debata na sabar do Jahowa i? (Psalmen 103:​13, 14)

¹⁰ Dos songon Jesus, alasan na utama olo hita manomba Jahowa, i ma ala massai holong rohatta tu Ibana. (Jaha Mateus 22:37.) Asing ni i, ala taparsiajari akka sifat ni Jahowa, gabe lomo ma rohatta marale-ale tu Ibana. Misalna, coba ma jo tapikkirhon taringot kesabaran ni Jahowa. Nang pe mulak-ulak halak Israel mangalo tu Ibana, dipangido Jahowa do tu nasida, “Unang be ulahon hamu na jahat.” (Jer. 18:11) Jala nang pe jotjot taulahon na sala, rade do Jahowa mengampuni hita. Boasa? Ala diingot Ibana do jolma na so sempurna dope hita. (Jaha Psalmen 103:​13, 14.) Jadi molo dirimangi hamu kesabaran ni Jahowa dohot akka sifatna na asing, dang na gabe taronjar rohamuna lao manomba Ibana saleleng ni lelengna?

11. Aha do alasan na asing umbahen na olo hita manomba Jahowa?

¹¹ Alasan na asing umbahen na olo hita manomba Jahowa, ala taboto keputusan na denggan do i. (Mat. 4:10) Asing ni i, molo toktong hita setia manomba Jahowa, pasti denggan do hasilna. Misalna, gabe dohot ma hita pabadiahon goar ni Jahowa, boi ma tabuktihon pargabus do Sibolis, jala boi ma tabahen las roha ni Jahowa. Asing ni i, molo tapillit manomba Jahowa saonari, boi ma hita manomba Ibana saleleng ni lelengna.—Joh. 17:3.

12-13. Aha do na taparsiajari sian pengalaman ni si Jane dohot si Pamela?

¹² Nang pe dakdanak dope hita, boi do tubu holongta tu Jahowa. Jala sahat tu na matua hita, boi do lam togu holong ni rohatta i tu Jahowa. Taida ma pengalaman ni dua donganta, goarna si Jane dohot si Pamela.a Tikki marumur 11 taon si Jane jala 10 taon si Pamela, marsiajar Bibel ma nasida. Memang, dang lomo roha ni natua-tua ni nasida marsiajar Bibel. Alai diloas do nasida marsiajar, asal ma tu gareja nasida ganup minggu. Didok si Jane, “Ala marsiajar Bibel au, gabe boi ma hutolak tekanan sian akka donganku lao marnarkoba manang mangulahon seks.”

¹³ Piga-piga taon dukkon i, gabe penyiar ma nasida. Dung i, merintis ma nasida huhut mangurus natua-tuana naung matua. Didok si Jane ma, “Molo huingot muse pengalamannami, boi ma hurasahon songon dia Jahowa mangurus akka ale-alena. Jala songon na didok di 2 Timoteus 2:​19, ‘Ditanda Jahowa do akka na di Ibana.’” Jadi pos ma rohatta, sai diparrohahon Jahowa do akka halak na makkaholongi jala na olo manomba Ibana!

14. Aha do na ikkon taulahon lao mambela goar ni Jahowa? (Ida gambar.)

¹⁴ Pasti lomo do rohatta pabadiahon goar ni Jahowa. Pikkirhon ma on: Adong ma ale-alemuna na burju, sabar, jala rade mengampuni. Alai adong ma na mandok, kejam do ale-alemuna i jala pargabus. Boha do perasaanmuna? Pasti dibela hamu do ale-alemuna i. Dos songon i ma, tikki adong na mandok akka na so tutu taringot Jahowa, pasti tabela do Ibana. Tapaboa do hasittongan taringot Jahowa. (Ps. 34:1; Jes. 43:10) Jadi, tapatudu ma na holong rohatta tu Jahowa jala lomo rohatta manomba Ibana sian hata dohot tindakanta.

15. Ala rade Apostel Paulus mambahen penyesuaian, pasu-pasu aha do na dapotna? (Pilippi 3:​7, 8)

¹⁵ Pasti lomo do rohatta mambahen penyesuaian asa boi palasson roha ni Jahowa manang asa boi talehon gumodang tikki tu Ibana. I ma na diulahon Apostel Paulus. Sasittongna, halak na massai sangap do ibana di agama Jahudi. Alai, ditinggalhon ibana do agamana i asa boi gabe sisean ni Kristus jala manomba Jahowa. (Gal. 1:14) Aha ma hasilna? Ala diulahon ibana songon i, massai godang do dapotna pasu-pasu, bahkan boi ibana rap mamaretta dohot Kristus di surgo. Dang hea disolsoli ibana keputusanna i lao manomba Jahowa. Jadi hita pe, molo tapillit lao manomba Jahowa, pasti dang menyesal hita disi.—Jaha Pilippi 3:​7, 8.

16. Aha do na taparsiajari sian pengalaman ni si Julia? (Ida gambar.)

¹⁶ Molo tabahen ulaon manomba Jahowa na uppetting di ngolutta, pasti godang do dapotta pasu-pasu saonari dohot di ari na naeng ro. Taparrohahon ma pengalaman ni donganta si Julia. Tikki dakdanak dope ibana, dohot do ibana tu paduan suara di garejana. Malo hian do ibana marende. Alani malona, adong ma sahalak parende na profesional olo mangalatik ibana. Dang sadia leleng dukkon i, gabe terkenal ma si Julia, jala jotjot do ibana marende di akka gedung na terkenal. Dung i, marsiajar ma muse si Julia di sada sikkola musik na terkenal. Adong ma dongan sakalasna na paboahon taringot Debata tu ibana. Didok donganna i, adong do goar ni Debata, i ma Jahowa. Dung i, mulai ma marsiajar Bibel si Julia dua hali saminggu. Ujungna, dipillit si Julia ma manomba Jahowa jala mangalehon godang tikkina lao manomba Jahowa. Jala ditinggalhon ibana ma karier musikna. Memang, dang mura mambahen keputusan sisongon i. Didok si Julia, “Godang do halak na mandok, oto do au ala hutinggalhon karier musikku. Alai dang pola boha i. Alana, manomba Jahowa do na uppetting di au.” Nungnga lobi 30 taon naung salpu dibahen si Julia keputusanna i. Alai boha do perasaanna? Didok ibana, “Las hian do rohakku ala boi manomba Jahowa. Jala pos do rohakku, haduan pasti lehonon ni Jahowa do godang pasu-pasuna tu au.”—Ps. 145:16.

TORUS MA TASOMBA JAHOWA

17. Ala nungnga massai jonok ari ni Jahowa, aha do pengaruh ni i tu akka na so manomba Jahowa dope dohot tu akka naung manomba Jahowa?

¹⁷ Nungnga massai jonok ari ni Jahowa i. Jala didok Apostel Paulus do, “Ai ‘satokkin nai’, ‘sahat nama Ibana na naeng ro i jala dang palelengonna be i’.” (Heb. 10:37) Aha do pengaruh ni hatana i tu hita? Tu akka halak na so manomba Jahowa dope, ikkon hatop do dibahen nasida keputusan naeng manomba Jahowa manang na daong. (1 Kor. 7:29) Alai, boha do molo tu hita naung manomba Jahowa? Nang pe taadopi godang sitaonon saonari, pos ma rohatta “satokkin nai” lao salpu nama i.

18. Aha do na dipangido Jesus dohot Jahowa asa taulahon?

¹⁸ Dijujui Jesus do akka siseanna asa toktong mangihutton ibana. (Mat. 16:24) Alani i, nang pe nungnga martaon-taon hita manomba Jahowa, ikkon marsitutu do hita asa torus manomba Ibana jala dang menyerah. Memang, dang sai mura mangulahon i. Alai pos ma rohatta, molo torus tasomba Jahowa, pasti marlas ni roha ma hita jala dapotta ma godang pasu-pasu mulai sian saonari.—Ps. 35:27.

19. Aha do na taparsiajari sian pengalaman ni si Glen?

¹⁹ Adong do piga-piga halak na merasa, dang boi bebas nasida mangulahon lomo ni rohana molo disomba nasida Jahowa. Hamu akka na poso, borat do dihilala hamu manomba Jahowa? Taida ma pengalaman ni sahalak donganta na poso na margoar si Glen. Didok ibana, “Dang tabo hurasa gabe Saksi Jahowa. Alana molo hubereng akka donganku, las do roha ni nasida, boi marpestai, marhalleti, dohot margame kekerasan. Hape molo au, ikkon marpungu dohot marbarita.” Ala songon i pikkiran ni si Glen, aha do pengaruhna? Didok ibana, “Tetap do memang husomba Jahowa. Alai, huulahon do tong songon na diulahon akka donganki. Mulana, las do rohakku. Alai holan satokkin do i. Mulai ma hupikkirhon aha do manfaatna molo huihutton nasehat sian Bibel. Ujungna, muba do au. Huputusson ma manomba Jahowa sian nasa rohakku. Mulai sian i gabe pos ma rohakku, sai dialusi Jahowa do tangiakku.”

20. Aha do na gabe tekadta?

²⁰ Di endena, didok panurat psalmen do tu Jahowa, “Marlas ni roha ma halak na pinillitmu, na binoanmu lao tinggal di alamanmu.” (Ps. 65:4) Jadi, bertekad ma hita asa torus manomba Jahowa. Songon si Josua, tadok ma, “Alai anggo au dohot donganku sajabu, Jahowa do sombaonnami.”—Jos. 24:15.