PARSIAJARAN 24
ENDE 98 Surat na Badia sian Debata
Parsiajaran sian Hata ni si Jakkob Andorang so Mate Ibana—Bagian 1
“Marpungu ma hamu, asa hupaboa akka na lao masa tu hamu di ari na naeng ro.”—1 MUS. 49:1.
NA LAO DIBAHAS
Parsiajaran sian hata ni si Jakkob tu si Ruben, si Simeon, si Lepi, dohot si Juda andorang so mate ibana.
1-2. Aha do na diulahon si Jakkob andorang so mate ibana, jala boasa? (Ida sampul.)
NUNGNGA matua si Jakkob tikki na pinda i ibana dohot keluargana sian Kanaan tu Mesir. Toktong do ibana setia manomba Jahowa saleleng 17 taon disi. (1 Mus. 47:28) Di tikki i, las hian do rohana ala boi pajuppang muse dohot si Josep, anak haholonganna i. Jala boi ma rap muse ibana dohot sude gellengna disi. Alai, diboto si Jakkob do na lao mate nama ibana satokkin nai. Alani i, dijou ibana ma sude gellengna i ala adong na lao dokkononna tu nasida.—1 Mus. 49:28.
2 Di tikki i, somal do sahalak kepala keluarga manjou akka gellengna lao pasahatton tona andorang so mate ibana. (Jes. 38:1) Jala olo do ra dipaboa ibana ise na gabe kepala keluarga manggattihon ibana.
Si Jakkob pasahatton tona tu 12 anakna andorang so mate ibana (Ida paragraf 1-2)
3. Aha do na taparsiajari sian 1 Musa 49:1, 2?
3 Jaha 1 Musa 49:1, 2. Alai, asing do pertemuan na dibahen si Jakkob na sahali on. Sahalak panurirang ni Jahowa do si Jakkob. Jadi tikki na dipapungu ibana i gellengna, diurupi Jahowa do ibana lao paboahon akka na lao masa tu akka pinopparna. Jadi boi dokkonon, surirang do hata ni si Jakkob tu akka gellengna i.
4. Aha do na lao tabahas di artikel on? (Ida kotak “Keluarga ni si Jakkob”.)
4 Di artikel on, lao tabahas ma hata ni si Jakkob tu opat anakna, i ma si Ruben, si Simeon, si Lepi, dohot si Juda. Di artikel na mangihut, lao tabahas ma hata ni si Jakkob tu anakna na ualu nai. Taparrohahon ma annon, dang holan tu akka anakna i hata ni si Jakkob i. Alai dohot do tong tu akka pinoppar ni nasida, na gabe bangso Israel di pudian ni ari. Tikki taparsiajari na masa tu bangso Israel najolo, boi ma taboto saut do hata ni si Jakkob i. Jala molo taparsiajari hatana i, boi ma taboto boha carana mambahen las roha ni Jahowa.
SI RUBEN
5. Ala anak siakkangan si Ruben, aha do hira-hira na diharappon ibana sian bapakna?
5 Tu si Ruben do parjolo sahali makkatai si Jakkob. Didok ibana, “Ho do anakku siakkangan.” (1 Mus. 49:3) Ala si Ruben do anak siakkangan, berharap do ra ibana dua hali loppit dapotna parbagianan sian bapakna. Dung mate bapakna, berharap do ra si Ruben asa ibana na gabe kepala keluarga manggattihon bapakna, jala asa pinopparna na torus mamimpin keluarga i.
6. Boasa dang dapot ni si Ruben hak ni anak siakkangan? (1 Musa 49:3, 4)
6 Alai, dang dapot ni si Ruben sudena i. (1 Kron. 5:1) Boasa? Alana dang leleng dung mate si Rahel, diulahon si Ruben do seks na so patut tu si Bilha, gundik ni si Jakkob. Si Bilha on ma hatoban ni si Rahel, istri haholongan ni si Jakkob. (1 Mus. 35:19, 22) Jadi, boasa ma diulahon si Ruben songon i tu si Bilha? Anak ni si Lea do si Ruben on, kakak ni si Rahel. Jadi diulahon ibana pe songon i, olo do ra asa sogo roha ni si Jakkob tu si Bilha, jala asa umholong roha ni si Jakkob tu si Lea. Manang olo do ra ala lomo hian roha ni si Ruben tu si Bilha, jala dang boi dikendalihon ibana nafsuna. Manang aha pe alasanna, sala do na diulahonna i di adopan ni Jahowa dohot di si Jakkob.—Jaha 1 Musa 49:3, 4.
7. Songon dia do surirang na dipaboa si Jakkob taringot si Ruben dohot pinopparna gabe saut? (Ida kotak “Hata ni si Jakkob Andorang so Mate Ibana”.)
7 Didok si Jakkob ma tu si Ruben, “Dang ussangap ho sian akka anggim.” Tutu do masa hatana i. Buktina, dang adong dipaboa di Bibel na hea pinoppar ni si Ruben gabe raja, malim, manang panurirang. Nang pe songon i, tetap do dilehon si Jakkob parbagianan tu si Ruben. Jala diloas do pinoppar ni si Ruben gabe bagian sian bangso Israel. (Jos. 12:6) Di pudian ni ari, muba do si Ruben. Dipatudu ibana do akka sifat na denggan, jala dang hea be diulahon ibana seks na so patut.—1 Mus. 37:20-22; 42:37.
8. Aha do na taparsiajari sian na masa tu si Ruben?
8 Parsiajaranna: Ikkon berupaya do hita asa unang sappe mangulahon seks na so patut. Molo targoda hita mangulahon dosa, pikkirhon ma aha do akibat ni na taulahon i tu perasaan ni Jahowa, keluargatta, dohot halak na asing. Jala taingot ma muse, “manang aha na disuan sasahalak, i do panenonna”. (Gal. 6:7) Asing ni i, sian na masa tu si Ruben gabe boi ma taboto taringot asi ni roha ni Jahowa. Memang ikkon tataon do akibat ni kesalahan na tabahen. Alai molo bertobat hita jala berupaya mangulahon na sittong, pasti diampuni Jahowa do hita jala pasu-pasuonna.
SI SIMEON DOHOT SI LEPI
9. Boasa dang lomo roha ni si Jakkob tu si Simeon dohot si Lepi? (1 Musa 49:5-7)
9 Jaha 1 Musa 49:5-7. Dung i, tu si Simeon dohot si Lepi ma makkatai si Jakkob. Alai sian hatana i, tarida do na so lomo roha ni si Jakkob tu nasida. Boasa? Adong do boru ni si Jakkob on, goarna si Dina. Hea do ibana diperkosa sahalak bawa na sian Kanaan, na margoar si Sikem. Gabe muruk situtu do sude anak ni si Jakkob. Alani i, lao ma nasida manipu si Sikem. Jala didok nasida, molo olo si Sikem dohot akka bawa na di kota i disunat, mardame ma nasida. Setuju do sude bawa i. Alai tikki haccitan dope nasida, ro ma si Simeon dohot si Lepi tu kota i. Dang boi dikendalihon nasida muruk ni nasida i. “Diboan nasida ma podang, alai dang curiga halak na di kota i tu nasida. Dipamate nasida ma sude bawa na disi.”—1 Mus. 34:25-29.
10. Songon dia do surirang na dipaboa si Jakkob taringot si Simeon dohot si Lepi gabe saut? (Ida kotak “Hata ni si Jakkob Andorang so Mate Ibana”.)
10 Muruk situtu do si Jakkob tu si Simeon dohot si Lepi. Jadi didok ibana ma tu nasida, na lao marserak do pinoppar ni nasida di Israel. Tutu do masa na didok si Jakkob i. Lobi sian 200 taon dukkon i, sahat ma bangso Israel di Tano na Dijanjihon. Disi dilehon ma tano parbagianan tu marga Simeon, na marserak di luat ni marga Juda. (Jos. 19:1) Dung i, tu marga Lepi dilehon ma 48 kota na marserak di sude luat ni Israel.—Jos. 21:41.
11. Akka aha do na denggan na diulahon pinoppar ni si Simeon dohot si Lepi?
11 Dang ditiru pinoppar ni si Simeon dohot si Lepi na diulahon ompu ni nasida. Buktina, toktong do setia halak Lepi mangulahon ibadat na sittong. Tikki dilehon Jahowa Patik tu si Musa di Dolok Sinai, godang do halak Israel na manomba patung anak ni lombu. Alai dang olo halak Lepi dohot mangulahon i. Gariada diurupi nasida do si Musa pamatehon akka halak na manomba patung i. (2 Mus. 32:26-29) Aha ma hasilna? Dilehon Jahowa ma tugas istimewa tu akka bawa na sian marga Lepi gabe malim di Israel. (2 Mus. 40:12-15; 4 Mus. 3:11, 12) Boha molo tu pinoppar ni si Simeon? Di pudian ni ari, diurupi marga Simeon do marga Juda mangalo halak Kanaan. Jala on mambahen las roha ni Jahowa.—Pangh. 1:3, 17.
12. Aha do na taparsiajari sian na masa tu si Simeon dohot si Lepi?
12 Parsiajaranna: Molo adong halak na mambahen haccit rohamuna manang keluargamuna, wajar do molo muruk hamu. Alai, unang ma torus hamu muruk. Alana, balga do pengaruh ni i tu keputusan dohot tindakanmuna. (Ps. 4:4) Taingot ma, dang lomo roha ni Jahowa molo tabalos pambahenan ni halak na jahat tu hita. (Jak. 1:20) Jadi molo adong dongan sahaporseaon manang halak na asing mambahen haccit rohatta, tapasae ma i mangihutton prinsip na adong di Bibel. Alana, boi do on mangurupi hita asa unang sai muruk jala dang mangulahon akka ulaon na mambahen haccit roha ni halak. (Rom 12:17, 19; 1 Ptr. 3:9) Aha ma muse parsiajaran na asing? Molo diulahon natua-tuamuna akka ulaon na mambahen haccit roha ni Jahowa, unang ma tiru hamu i. Jala unang ma didok rohamuna, dang boi dibahen hamu las roha ni Jahowa alani pambahenan ni natua-tuamuna. Alana pasti urupan ni Jahowa do hamu mangulahon na sittong, jala pasti pasu-pasuonna do hamu.
SI JUDA
13. Aha do hira-hira na mambahen si Juda gabe khawatir?
13 Dung i, tu si Juda ma makkatai si Jakkob. Dung dibege ibana hata ni bapakna tu tolu abangna i, gabe khawatir do ra si Juda. Boasa? Alana hea do tong ibana mangulahon piga-piga kesalahan na serius. Misalna, dohot do ra ibana mambuati akka arta di Kota Sikem. (1 Mus. 34:27) Dohot do muse ibana manjual si Josep gabe hatoban, jala ditipu ibana do bapakna. (1 Mus. 37:31-33) Asing ni i, diulahon ibana do seks na so patut tu parumaenna, si Tamar. Alana dirippu ibana do pelacur si Tamar i.—1 Mus. 38:15-18.
14. Akka aha do na denggan na diulahon si Juda? (1 Musa 49:8, 9)
14 Alai, dipuji si Jakkob do si Juda jala dipasu-pasu. (Jaha 1 Musa 49:8, 9.) Boasa? Alana, holong hian do roha ni si Juda tu bapakna naung matua i. Jala holong hian do rohana tu si Benjamin, adek siappudanna i. Bahkan, rade do ibana gabe hatoban lao paluahon adekna i.—1 Mus. 44:18, 30-34.
15. Songon dia do surirang na dipaboa si Jakkob taringot si Juda gabe saut?
15 Dung i didok si Jakkob ma, si Juda do na lao mamimpin akka haha anggina. Alai hira-hira 200 taon dukkon i pe baru saut hata ni si Jakkob i, i ma tikki kaluar bangso Israel sian Mesir. Di tikki i, di padang belantara do nasida lao tu Tano na Dijanjihon. Jala marga Juda do na mamimpin nasida. (4 Mus. 10:14) Martaon-taon dukkon i tikki naeng masuk tu Tano na Dijanjihon, marga Juda do na parjolo lao disuru Jahowa mangalo halak Kanaan. (Pangh. 1:1, 2) Asing ni i, godang do raja na di Israel na sian marga Juda. Jala si Daud ma na parjolo. Alai, adong dope na dipaboa si Jakkob taringot si Juda?
16. Tu ise do saut surirang na dipaboa di 1 Musa 49:10 i? (Ida kotak “Hata ni si Jakkob Andorang so Mate Ibana”.)
16 Didok si Jakkob do muse, na lao adong sada Pamimpin sian marga Juda. Didok si Jakkob do ibana Silo, jala na lao mamaretta do ibana saleleng ni lelengna. (Jaha 1 Musa 49:10, surat na di toru.) Jesus Kristus do Pamimpin i. Jala taringot Jesus, didok sada suru-suruan do, “Lehonon ni Debata Jahowa ma tu ibana tahta ni si Daud ompuna i.” (Luk. 1:32, 33) Asing ni i, didok do tong Jesus i, “Singa na sian marga Juda”.—Pgk. 5:5.
17. Aha do na boi tatiru sian cara ni Jahowa mangida akka naposona?
17 Parsiajaranna: Nang pe hea diulahon si Juda kesalahan na serius, alai dipasu-pasu Jahowa do ibana. Tikki i, olo do ra gabe sukkun-sukkun roha ni haha anggi ni si Juda, boasa dipasu-pasu Jahowa ibana. Alai dang soal aha pe na dipikkirhon nasida, akka na denggan do na diida Jahowa sian si Juda jala dipasu-pasu do ibana. Aha do na boi tatiru sian Jahowa? Molo adong donganta na mandapot tugas na penting di organisasi jala taboto adong hagaleonna, olo do ra gabe sukkun-sukkun rohatta boasa dilehon tugas i tu ibana. Alai taingot ma, akka na denggan do na diida Jahowa sian donganta i. Jadi sian on taboto, akka na denggan do na diida Jahowa sian akka naposona. Alani i, tatiru ma Jahowa.
18. Boasa ikkon sabar hita?
18 Asing ni i, ikkon sabar do tong hita. Taingot ma, sai ditepati Jahowa do janjina. Alai cara ni ibana pasautton janjina i jala andigan i pasautonna, dang sai sarupa tu na taharappon. Misalna, dung dipaboa si Jakkob hatana tu si Juda, dang pittor pinoppar ni si Juda na mamimpin naposo ni Debata. Alai toktong do nasida setia mendukung manang ise pe na dipillit Jahowa gabe pamimpin, songon si Musa sian marga Lepi, si Josua sian marga Epraim, manang Raja Saul sian marga Benjamin. Jadi saonari pe, ikkon torus do tadukung manang ise pe na dipillit Jahowa lao manguluhon hita.—Heb. 6:12.
19. Akka aha do naung taparsiajari taringot Jahowa sian hata ni si Jakkob tu akka anakna?
19 Akka aha do naung taparsiajari sian hata ni si Jakkob tu opat anakna i? Takkas ma, “dang songon cara ni jolma cara ni Debata mangida jolma”. (1 Sam. 16:7) Sabar hian do Jahowa jala olo do Ibana mengampuni hita. Memang, sogo do rohana molo taulahon na sala. Alai dang dituntut Ibana asa sempurna akka naposona. Bahkan olo do Jahowa mamasu-masu halak na hea mangulahon kesalahan na serius. Alai, asal ma olo sasahalak i muba jala diulahon ibana muse na sittong. Di artikel na mangihut, lao tabahas ma hata ni si Jakkob tu anakna na ualu nai.
ENDE 124 Toktong ma Setia