Parsiajaran sian Hata ni si Jakkob Andorang so Mate Ibana—Bagian 2

1. Aha do na lao tabahas di artikel on?

MARPUNGU ma akka anak ni si Jakkob lao manangihon ibana pasahatton hatana. Songon naung tabahas di artikel na sebelumna, tarsonggot do ra nasida mambege hata ni si Jakkob tu si Ruben, si Simeon, si Lepi, dohot si Juda. Alani i, pasti penasaran do nasida lao mamboto aha na lao dokkonon ni bapakna tu nasida. Saonari, tabahas ma parsiajaran na tadapot sian hata ni si Jakkob tu si Zebulon, si Isasar, si Dan, si Gad, si Aser, si Naptali, si Josep, dohot si Benjamin.a

SI ZEBULON

2. Aha do na didok si Jakkob tu si Zebulon, jala songon dia do i gabe saut? (1 Musa 49:13) (Ida kotak.)

² Jaha 1 Musa 49:13. Didok si Jakkob ma na lao tinggal di topi ni laut do marga Zebulon, di sabola utara ni Tano na Dijanjihon. Saut ma hata ni si Jakkob i lobi sian 200 taon dukkon i. Tikki i dilehon ma tano parbagianan tu marga Zebulon di jonok ni Laut Kineret dohot Laut na Balga. Jala taringot si Zebulon, didok si Musa do, “Marlas ni roha ma ho ale Zebulon, tikki lao ho martiga-tiga.” (5 Mus. 33:18) Boasa didok si Musa songon i? Olo do ra ala di jonok ni dua laut i halak Zebulon tinggal, gabe mura ma nasida lao martiga-tiga. Alai manang aha pe alasanna, pasti marlas ni roha do nasida di tikki i.

3. Boha do carana asa marlas ni roha hita?

³ Parsiajaranna: Boi do hita toktong marlas ni roha dang soal didia hita tinggal manang songon dia situasitta. Alai asa boi hita marlas ni roha, ikkon puas do hita tu na adong di hita. (Ps. 16:6; 24:5) Memang molo holan na so adong di hita do na sai tapikkiri, boi do mago las ni rohatta. Alani i, berupaya ma hita asa torus mamikkirhon akka na denggan na adong di ngolutta.—Gal. 6:4.

SI ISASAR

4. Aha do na didok si Jakkob tu si Isasar, jala songon dia do i gabe saut? (1 Musa 49:​14, 15) (Ida kotak.)

⁴ Jaha 1 Musa 49:​14, 15. Dipuji si Jakkob do si Isasar ala pekerja keras do ibana. Jala dipatudos do si Isasar songon halode na boi mamboan boban na borat. Asing ni i, didok si Jakkob do na lao dilehon tu si Isasar inganan na uli. Saut ma hatana i tikki dilehon tano na subur gabe parbagianan tu marga Isasar di topi ni Sunge Jordan. (Jos. 19:22) Ikkon bekerja keras do nasida mangula tano parbagiananna i. Jala rade do tong nasida mangurupi halak na asing. (1 Raj. 4:​7, 17) Sai rade do tong nasida mangurupi akka marga na asing lao manaluhon musu. Contohna, dohot do nasida mangurupi si Barak dohot si Debora mangalo si Sisera.—Pangh. 5:15

5. Aha do na boi tatiru sian marga Isasar, jala boasa?

⁵ Parsiajaranna: Dos songon marga Isasar, molo bekerja keras hita mangulahon lomo ni roha ni Jahowa, pasti las do rohana mangida hita. (Pjm. 2:24) Contohna, taingot ma akka donganta bawa na so marnaloja mangurus huria. (1 Tim. 3:1) Memang, dang marporang nasida songon marga Isasar i. Alai, marsitutu do nasida melindungi akka naposo ni Debata asa toktong jonok tu Jahowa. (1 Kor. 5:​1, 5; Jud. 17-23) Jala bekerja keras do nasida paradehon dohot pasahatton akka jamita na patoguhon roha.—1 Tim. 5:17.

SI DAN

6. Aha do tugas na dilehon tu marga Dan? (1 Musa 49:​17, 18) (Ida kotak.)

⁶ Jaha 1 Musa 49:​17, 18. Dipatudos si Jakkob do si Dan songon ulok na boi manurbing binatang na umbalga sian ibana. Contohna, hoda na dipakke lao marporang. Jala toho do hata ni si Jakkob i. Buktina, sai rade do nasida jala barani marporang mangalo akka musu ni Israel. Asing ni i, saleleng di pardalanan lao tu Tano na Dijanjihon, marga Dan do na melindungi bangso Israel. Buktina, nasida do na gabe “rombongan na parpudi”. (4 Mus. 10:25) Nang pe dang sai diboto akka marga na asing na diulahon marga Dan i, alai massai penting do tugas ni nasida.

7. Ikkon songon dia do pandanganta tu akka tugas na dilehon Jahowa tu hita?

⁷ Parsiajaranna: Sipata, olo do dilehon tu hamu tugas jala dang godang halak na mamboto i. Contohna, paiasson jala mangarawat Bale Harajaon, gabe relawan di parpunguan wilayah manang regional, dohot akka tugas na asing. Massai denggan do ala olo hamu mangulahon i. Taingot ma, diparrohahon Jahowa do upayamuna i jala las do rohana ala olo hamu mangulahon i. Alai na uppetting, ulahon ma akka tugasmuna i alani holongmuna tu Jahowa, dang asa dipuji akka halak hamu. Molo diulahon hamu songon i, las hian ma roha ni Jahowa.—Mat. 6:​1-4.

SI GAD

8. Boasa daerah ni marga Gad mura diserang akka musu? (1 Musa 49:19) (Ida kotak.)

⁸ Jaha 1 Musa 49:19. Didok si Jakkob, na lao diserang akka pangarampok do si Gad. Tutu do saut hatana i lobi sian 200 taon dukkon i. Tikki i, dilehon ma tano parbagianan tu marga Gad di sabola timur ni Sunge Jordan. Daerah on berbatasan do tu daerah ni akka musu. Alani i, mura do nasida diserang. Nang pe songon i, olo do nasida tetap tinggal disi. Alana cocok do daerah i gabe inganan ni nasida marmahan. (4 Mus. 32:​1, 5) Sian on taboto ma, halak na barani do halak Gad. Dang holan i. Pos situtu do roha ni nasida tu Jahowa, na lao urupanna do nasida manjaga tano parbagiananna i asa unang dibuat akka pangarampok. Bahkan saleleng martaon-taon, lao do akka bawa na sian marga Gad mangurupi akka marga na asing manaluhon akka bangso di sabola barat ni Sunge Jordan, asa boi nasida tinggal di Tano na Dijanjihon. (4 Mus. 32:​16-19) Pos do roha ni nasida, pasti dijaga Jahowa do istri dohot akka gelleng ni nasida. Dipasu-pasu Jahowa do nasida ala barani jala rade mambahen pengorbanan.—Jos. 22:​1-4.

9. Molo marpos ni roha hita tu Jahowa, aha do na taulahon?

⁹ Parsiajaranna: Toktong ma hita marpos ni roha tu Jahowa. Molo taulahon i, boi ma hita torus melayani Jahowa, dang soal sitaonon aha na masa tu hita. Memang dang sai mura mangulahon i. Alai godang do akka donganta naung mambuktihon, pasti diparade Jahowa do akka na porlu di nasida, molo pos roha ni nasida tu Ibana. (Ps. 37:3) Gabe rade ma nasida mambahen pengorbanan asa boi dohot mangurupi proyek pembangunan, pinda tu inganan na makkaporluhon akka parbarita, manang mangulahon akka tugas na asing.—Ps. 23:1.

SI ASER

10. Aha do na so diulahon marga Aser? (1 Musa 49:20) (Ida kotak.)

¹⁰ Jaha 1 Musa 49:20. Didok si Jakkob, na lao mamora do marga Aser. Jala tutu do i saut. Dilehon do tano parbagianan tu marga Aser jala i ma tano na massai subur di Israel. (5 Mus. 33:24) Daerah ni nasida i adong di jonok ni Laut na Balga, jala termasuk do tong pelabuhan Sidon, na gabe pusat perdagangan di tikki i. Alai, dang dipalao marga Aser on akka halak Kanaan sian daerah ni nasida. (Pangh. 1:​31, 32) Jadi ala mardongan marga Aser tu halak Kanaan jala ala mamora nasida, on do ra na mambahen gabe hurang semangat nasida manomba Jahowa. Tarida ma i tikki dipangido si Barak akka tentara lao mangurupi ibana manaluhon halak Kanaan. Dang olo marga Aser mangurupi si Barak. Akibatna, dang dohot nasida mangida mukjizat na dibahen Jahowa lao mambahen monang halak Israel di ‘jonok ni mual Megiddo’. (Pangh. 5:​19-21) Pasti maila hian do marga Aser tikki diendehon si Barak dohot si Debora ende on, “Holan na hundul do marga Aser di topi ni laut.”—Pangh. 5:17.

11. Boasa dang olo hita mangihutton pandangan ni akka halak di portibi on taringot hepeng?

¹¹ Parsiajaranna: Unang ma taihutton pandangan ni akka halak na di portibi on taringot hepeng dohot arta. Molo taulahon i, boi ma hita mangalehon na dumenggan tu Jahowa. (Poda 18:11) Memang porlu do di hita hepeng. Alai, unang ma gabe i na uppetting sian ulaonta manomba Jahowa. (Pjm. 7:12; Heb. 13:5) Alani i, unang ma gabe suda tikkitta dohot gogotta lao mangalului hepeng dohot arta. Jadi mulai sian saonari, talehon ma na dumenggan tu Jahowa. Alana taboto, di tano na imbaru do annon benar-benar tabo ngolutta dibahen Jahowa.—Ps. 4:8.

SI NAPTALI

12. Songon dia do hira-hira hata ni si Jakkob taringot si Naptali gabe saut? (1 Musa 49:21) (Ida kotak.)

¹² Jaha 1 Musa 49:21. Didok si Jakkob, na lao dohonon ni si Naptali do “akka hata na uli”. Ra na dimaksud disi, i ma taringot cara ni Jesus mangajari saleleng di tano on ibana. Alana leleng do Jesus di Kapernaum, i ma sada kota di daerah Naptali. Alani i ma hira naung “hutana” sandiri do Kapernaum i di Jesus. (Mat. 4:13; 9:1; Joh. 7:46) Asing ni i didok si Jesaya do, na lao idaon ni halak Zebulon dohot halak Naptali do “sinondang na tiur”. (Jes. 9:​1, 2) Tutu do i saut. Marhite ajaranna, dipatudu Jesus do na ibana “panondang na tutu i . . . na manondangi sude jolma”.—Joh. 1:9.

13. Boha do carana mambahen las roha ni Jahowa marhite akka hatatta?

¹³ Parsiajaranna: Diparrohahon Jahowa do sude na tahatahon jala penting do i di Ibana. Jadi boha do carana asa holan “akka hata na uli” na mambahen las roha ni Jahowa na tahatahon? Na parjolo, jujur ma hita. (Ps. 15:​1, 2) Dung i, tapatogu ma halak na asing. Tapuji ma nasida, unang marungut-ungut, jala unang tapaboa-boa akka na so denggan taringot halak na asing. (Eps. 4:29) Asing ni i, marsitutu ma hita asa lam denggan tikki mamulai pakkataion di ulaon marbarita.

SI JOSEP

14. Songon dia do hata ni si Jakkob tu si Josep gabe saut? (1 Musa 49:​22, 26) (Ida kotak.)

¹⁴ Jaha 1 Musa 49:​22, 26. Bangga hian do si Jakkob tu si Josep. Alana “sian sude haha anggina”, si Josep do na dipillit Jahowa. Didok si Jakkob do si Josep i “dakka ni hau na marparbue”. Si Jakkob ma hau i jala si Josep ma dakkana. Si Josep on ma anak siakkangan ni si Jakkob sian si Rahel, istri haholonganna i. Taringot tu si Josep, didok si Jakkob do na lao dilehon dua hali loppit parbagianan ni si Josep. Hape sebenarna, si Ruben do na marhak mandapot i. Alana, ibana do anak siakkangan ni si Jakkob sian si Lea. (1 Mus. 48:​5, 6; 1 Kron. 5:​1, 2) Songon dia do saut hatana i? Dilehon ma tano parbagianan tu akka anak ni si Josep, i ma si Epraim dohot si Manasse. Jala nasida na dua ma na gabe dua marga na adong di Israel.—1 Mus. 49:25; Jos. 14:4.

15. Boha do reaksi ni si Josep tikki dibahen na so adil tu ibana?

¹⁵ Didok si Jakkob do tong, na lao “sogo do roha ni akka pemanah tu [si Josep], torus do ibana dialo jala dipanah”. (1 Mus. 49:23) Akka ise do pemanah i? Nasida ma akka abang ni si Josep. Cemburu do nasida tu si Josep, dibahen do na so adil tu ibana, jala gabe susa do si Josep dibahen nasida. Alai boha do reaksi ni si Josep? Didok si Jakkob, “Nungnga siap [tangan ni si Josep] mamanah, gogo do tanganna i, jala hatop do tanganna mamanah.” (1 Mus. 49:24) Aha do lapatanna? Dang dibalos si Josep pambahenan ni akka abangna i. Gariada, burju jala dipatudu ibana do asi ni roha tu nasida. Diampuni si Josep do nasida. Dang torus ibana muruk tu nasida jala dang disalahon ibana Jahowa. Sai diasahon ibana do Jahowa tikki mangadopi akka sitaononna i. (1 Mus. 47:​11, 12) Bahkan akka sitaonon na diadopi si Josep i mambahen gabe lam denggan parangena. (Ps. 105:​17-19) Alani i, toktong ma dipakke Jahowa ibana lao mangulahon akka ulaon na luar biasa.

16. Tikki adong sitaononta, songon dia do hita maniru si Josep?

¹⁶ Parsiajaranna: Tikki adong sitaononta, unang ma gabe mandao hita sian Jahowa dohot sian akka dongan sahaporseaotta. Memang, sipata dipasombu Jahowa do masa sitaonon i lao mangalatik hita. (Heb. 12:7) Hasilna, gabe lam denggan ma akka parangetta. Contohna, gabe lam marasi ni roha ma hita jala rade mengampuni. (Heb. 12:11) Jadi molo toktong hita setia nang pe adong sitaononta, pasti dipasu-pasu Jahowa do hita, songon na diulahon Ibana tu si Josep najolo.

SI BENJAMIN

17. Songon dia do hata ni si Jakkob tu si Benjamin gabe saut? (1 Musa 49:27) (Ida kotak.)

¹⁷ Jaha 1 Musa 49:27. Didok si Jakkob, na lao songon serigala do halak Benjamin jala jago do nasida marporang. (Pangh. 20:​15, 16; 1 Kron. 12:2) Songon dia do saut hatana i? Raja na parjolo di Israel, i ma si Saul na sian marga Benjamin. Barani do si Saul marporang mangalo halak Palistim. (1 Sam. 9:​15-17, 21) Martaon-taon dukkon i, si Ester dohot si Mordahai na sian marga Benjamin do na paluahon bangso Israel asa unang dipamate Harajaon ni Persia nasida.—Est. 2:​5-7; 8:3; 10:3.

18. Aha do na boi tatiru sian marga Benjamin?

¹⁸ Parsiajaranna: Pasti bangga do marga Benjamin tikki dipillit sasahalak sian nasida gabe raja di Israel. Alai tikki dipillit Jahowa si Daud gabe raja, didukung marga Benjamin do i, nang pe si Daud sian marga Juda. (2 Sam. 3:​17-19) Marpulu taon dukkon i, tikki dialo sappulu suku na asing marga Juda, toktong do setia marga Benjamin tu marga Juda dohot tu raja na dipillit Jahowa. (1 Raj. 11:​31, 32; 12:​19, 21) Jadi dos songon marga Benjamin, hita pe toktong ma tadukung akka halak na dipillit Jahowa lao manguluhon akka naposona saonari.—1 Tes. 5:12.

19. Parsiajaran aha do na tadapot sian hata ni si Jakkob tu akka anakna i?

¹⁹ Godang do tadapot parsiajaran sian hata ni si Jakkob tu akka anakna i. Tikki taparsiajari songon dia sudena i saut, gabe lam pos ma rohatta pasti saut do akka surirang na asing na dipaboa Jahowa di Bibel. Jala gabe lam taboto ma boha carana mambahen las roha ni Jahowa.