Pos ma Rohamuna Holong do Roha ni Jahowa tu Hamu

1. Boasa olo hamu mangalehon dirimuna tu Jahowa? (Ida gambar.)

DIINGOT hamu dope tikki martangiang hamu tu Jahowa lao mangalehon dirimuna tu Ibana? Di tikki i, marjanji do hamu lao manomba Ibana saleleng ni ngolumuna. Boasa dibahen hamu keputusan i? Ala nungnga ditanda hamu Jahowa jala holong rohamuna tu Ibana. Bertekad do hamu lao mambahen lomo ni roha ni Jahowa gabe na uppetting di ngolumuna. Jala lomo do rohamuna asa toktong makkaholongi Ibana sian nasa rohamuna, ngolumuna, pikkiranmuna, dohot gogomuna. (Mrk. 12:30) Mulai sian i, gabe lam balga ma holongmuna tu Jahowa. Jala tikki adong na manukkun tu hamu, “Holong do roham tu Jahowa?” Pasti pittor didok hamu do, “Holong hian do rohakku tu Jahowa, jala Ibana do na uppetting di ngolukku!”

2-3. Aha do na dipangido Jahowa sian hita, jala aha do na lao tabahas di artikel on? (Jeremia 31:3)

² Alai molo disukkun tu hamu, “Pos do roham na holong roha ni Jahowa tu ho?” Ra, didok rohamuna do dang layak hamu dihaholongi Jahowa. I ma na dihilala sahalak donganta borua. Alana tikki dakdanak, merasa do ibana dang adong na marholong ni roha tu ibana. Didok ibana, “Holong do rohakku tu Jahowa. Alai jotjot do au ragu, tutu do holong roha ni Jahowa tu au?” Attong songon dia do sasittongna perasaan ni Jahowa tu hamu?

³ Lomo do roha ni Jahowa asa pos rohamuna na holong do rohana tu hamu. (Jaha Jeremia 31:3.) Buktina ditarik Jahowa do hamu gabe ale-alena. Asing ni i, tikki dilehon hamu dirimuna tu Jahowa jala tardidi, dilehon Ibana ma hadiah na massai arga, i ma holongna na manoktong i. Jadi, massai holong do roha ni Jahowa tu hamu jala dang na lao tadikkononna hamu. Di adopan ni Jahowa, “massai arga” do sude naposona na setia, termasuk ma hamu disi. (Mal. 3:17) Lomo do roha ni Jahowa asa sarupa pakkilalaanmuna songon Apostel Paulus. Pos situtu do roha ni Apostel Paulus na benar-benar holong roha ni Jahowa tu ibana. Alani i ma didok ibana, “Pos do rohakku, hamatean, hangoluan, manang suru-suruan, manang pamaretta, akka na adong saonari manang na adong di ari na naeng ro, huaso, akka na adong di ginjang manang akka na adong di toru, manang toppaan na dia pe, dang adong na boi manirang hita sian holong ni Debata.” (Rom 8:​38, 39) Di artikel on, lao tabahas ma boasa ikkon pos rohatta na benar-benar holong do roha ni Jahowa tu hita. Jala aha na porlu taulahon asa lam pos rohatta tu holongna i.

BOASA IKKON POS ROHATTA TU HOLONG NI JAHOWA?

4. Aha do na ikkon taulahon asa unang hona jorat ni Sibolis hita?

⁴ Molo pos rohatta na holong roha ni Jahowa tu hita, dang hona “jorat” ni Sibolis hita. (Eps. 6:11) Lomo do roha ni Sibolis asa unang tasomba be Jahowa. Sada carana lao mangulahon i, i ma asa porsea hita dang tutu holong roha ni Jahowa tu hita. Alai taingot ma, pargabus do Sibolis i. Di Bibel dipatudos do ibana songon singa. (1 Ptr. 5:​8, 9) Biasana binatang na gale do na diserang singa. Dos songon i ma, tikki gale hita manang loja, disi ma diserang Sibolis hita. Misalna, tikki lungun rohatta alani akka na masa di tikki naung salpu, alani masalah na taadopi saonari, manang ala marsak mamikkiri aha na lao masa haduan. (Poda 24:10) Jadi marsitutu do Sibolis mambahen metmet rohatta asa unang tasomba be Jahowa. Alai molo pos rohatta na benar-benar holong roha ni Jahowa tu hita, boi ma ‘taalo’ Sibolis i, jala dang hona joratna be hita.—Jak. 4:7.

5. Boasa ikkon pos rohatta na holong roha ni Jahowa tu hita?

⁵ Molo pos rohatta na holong roha ni Jahowa tu hita, gabe lam jonok ma hita tu Ibana. Boasa tadok songon i? Tikki ditoppa Jahowa hita, disuanton Ibana do di rohatta kebutuhan lao makkaholongi jala asa dihaholongi. Jadi molo holong roha ni sasahalak tu hita, gabe taronjar ma tong rohatta lao makkaholongi ibana. Dos songon i ma, molo pos rohatta na holong roha ni Jahowa tu hita, gabe taronjar ma tong rohatta lao makkaholongi Ibana. (1 Joh. 4:19) Jala molo lam balga holongta tu Jahowa, gabe lam balga ma tong holong ni Jahowa tu hita. Alani i ma didok di Bibel, “Pajonok hamu ma tu Debata, dung i pajonokonna ma tu hamu.” (Jak. 4:8) Alai aha do na ikkon taulahon asa lam pos rohatta na holong roha ni Jahowa tu hita?

AHA DO NA IKKON TAULAHON ASA POS ROHATTA TU HOLONG NI JAHOWA?

6. Molo dang pos dope rohamuna na holong roha ni Jahowa tu hamu, aha do na porlu diulahon hamu?

⁶ Sai tangiakkon ma taringot i tu Jahowa. (Luk. 18:1; Rom 12:12) Ganup ari, pangido ma tu Jahowa asa diurupi hamu mamboto boha perasaanna tu hamu. Alana sipata olo do ra metmet rohamuna alani hagaleonmuna. Jala dang pos rohamuna na holong roha ni Jahowa tu hamu. Alai ingot ma, umbalga do Jahowa sian rohatta. (1 Joh. 3:​19, 20) Diida Ibana do akka sifatmuna na denggan, bahkan na so disadari hamu adong i di dirimuna. (1 Sam. 16:7; 2 Kron. 6:30) Jadi ‘paboa ma sude’ na di rohamuna i tu Jahowa, jala pangido ma asa dipapos rohamuna na holong do rohana tu hamu. (Ps. 62:8) Dung martangiang hamu, ulahon ma akka saran na di toru on.

7-8. Aha do na dipaboa di bukku Psalmen taringot holong ni Jahowa tu hita?

⁷ Porsea ma tu hata ni Jahowa. Marhite tondi parbadia, ditogu-togu Jahowa do akka bawa na manurat Bibel. Jadi akka na disurat nasida taringot Jahowa, boi do tahaporseai. Misalna, dipaboa si Daud do taringot Jahowa di bukku Psalmen. Didok ibana, “Jonok do Jahowa tu halak na mandele. Dipalua Ibana do akka halak na hancur rohana.” (Ps. 34:18) Tikki mandele hamu, olo do ra didok rohamuna dang adong na mangattusi perasaanmuna. Alai ingot ma, di tikki sisongon i jonok do Jahowa tu hamu. Alana diboto Ibana do porlu hian do hamu diurupi. Di ayat na asing didok si Daud, “Disippan Ho do ilu-ilukku tu inganan ni aekmu.” (Ps. 56:8) Massai arga do sattetek aek di halak na mardalan di padang gurun. Dos songon i ma, massai arga do ilu-ilumuna di Jahowa. Diida Jahowa do tikki lungun rohamuna, jala maniak do ate-atena tikki susa hamu. Takkas ma massai parduli do Jahowa i tu hamu. Asing ni i, di Psalmen 139:3 didok, “Diboto [Jahowa] do sude lakkakku.” Lapatanna diida Jahowa do sude na diulahon hamu. Alai holan akka na denggan do na diingot Ibana sian hamu. (Heb. 6:10) Boasa? Alana arga situtu do di Jahowa upayamuna lao pasonakkon rohana.a

⁸ Sian akka ayat i, hira na didok Jahowa ma tu hamu, “Pos ma roham, holong hian do rohakku tu ho jala parduli do au tu ho.” Alai songon naung tabahas, lomo do roha ni Sibolis asa porsea hamu dang tutu holong roha ni Jahowa tu hamu. Jadi molo di sada tikki ragu hamu tu holong ni Jahowa, pikkirhon ma on: ‘Tu ise do au porsea, tu Sibolis “ama ni gabus” i do, manang tu Jahowa “Debata na makkatahon na sittong”?’—Joh. 8:44; Ps. 31:5.

9. Aha do janji ni Jahowa tu akka halak na makkaholongi Ibana? (2 Musa 20:​5, 6)

⁹ Pikkirhon ma songon dia perasaan ni Jahowa tu akka halak na makkaholongi Ibana. Parrohahon ma aha na didok Jahowa tu si Musa dohot tu halak Israel. (Jaha 2 Musa 20:​5, 6.) Marjanji do Jahowa, na lao patuduonna do holong na manoktong tu akka halak na makkaholongi Ibana. Ala setia do Jahowa i, pos ma rohatta molo holong rohatta tu Jahowa, pasti holong do tong rohana tu hita. (Neh. 1:5) Alai molo sada tikki ragu hamu tu holong ni Jahowa, pikkirhon ma on, ‘Holong do rohakku tu Jahowa?’ Dung i, rimangi ma on: Molo tutu do holong rohamuna tu Jahowa jala lomo rohamuna mambahen las rohana, pos ma rohamuna holong hian do roha ni Jahowa i tu hamu. (Dan. 9:4; 1 Kor. 8:3) Jadi molo benar-benar holong rohamuna tu Jahowa, unang be ragu hamu tu holong ni Jahowa i. Pos ma rohamuna, pasti sai haholonganna do hamu jala dang na lao tinggalhononna hamu.

10-11. Aha do na porlu taingot taringot tobusan? (Galatia 2:20)

¹⁰ Rimangi ma taringot tobusan. Dilehon Jahowa do Jesus Kristus lao manobus sude jolma. Silehon-lehon na luar biasa do i. (Joh. 3:16) Alai, pos do rohamuna tu hamu do tong diparade Jahowa tobusan i? Taida ma pengalaman ni Apostel Paulus. Andorang so gabe halak Kristen ibana, diulahon ibana do dosa na serius. Jala dung gabe halak Kristen ibana, tetap dope berjuang ibana mangatasi hagaleonna. (Rom 7:​24, 25; 1 Tim. 1:​12-14) Alai pos do rohana, tu ibana do tong diparade Jahowa tobusan i. (Jaha Galatia 2:20.) Jala ingot ma, Jahowa do na manogu-nogu si Paulus asa manurat taringot on di Bibel. Jadi, lomo do roha ni Jahowa asa marsiajar hita sian na disurat si Paulus i. (Rom 15:4) Sian i taboto ma, lomo do roha ni Jahowa asa pos rohamuna hadiah sian Ibana do tobusan i tu hamu. Molo dirimangi hamu taringot on, pasti gabe lam pos ma rohamuna na dihaholongi Jahowa do hamu.

¹¹ Mandok mauliate do hita tu Jahowa ala disuru Ibana Jesus tu tano on lao manobus hita. Alai asing ni i, tujuan ni Jesus ro tu tano on, i ma lao paboahon hasittongan taringot Debata. (Joh. 18:37) Hasittongan na pinaboana i termasuk ma disi taringot boha perasaan ni Jahowa tu akka ianakkonna.

SONGON DIA DO JESUS MANGURUPI HITA ASA POS ROHATTA TU HOLONG NI JAHOWA?

12. Boasa boi tahaporseai na didok Jesus taringot Jahowa?

¹² Tikki di tano on Jesus, dipaboa ibana do tu akka halak Debata na songon dia Jahowa i. (Luk. 10:22) Pos do rohatta, sittong do sude na dipaboa Jesus taringot Jahowa. Boasa? Alana andorang so ro Jesus tu tano on, nungnga massai leleng rap ibana dohot Jahowa di surgo. (Kol. 1:15) Takkas do diboto Jesus na massai holong roha ni Bapakna tu ibana. Jala diida Jesus do tong songon dia Bapakna makkaholongi akka suru-suruan na setia dohot akka anak nang boruna na di tano on. Alai, songon dia do cara ni Jesus mangurupi akka halak asa pos roha ni nasida tu holong ni Jahowa i?

13. Aha do na dipaboa Jesus taringot Jahowa?

¹³ Lomo do roha ni Jesus asa taboto boha perasaan ni Jahowa tu hita. Di Injil, adong do lobi sian 160 hali dipakke Jesus hata “Ama” lao manjou Jahowa. Jala tikki makkatai ibana tu akka siseanna, dipakke ibana do hata “Amamuna” manang “Amamuna na di banua ginjang i”. (Mat. 5:16; 6:26) Andorang so ro Jesus tu tano on, jotjot do akka naposo ni Jahowa manjou Jahowa i Debata ‘Pargogo na so Hatudosan’, ‘Natumimbul’, ‘Sitoppa Saluhutna’, dohot akka gelar na asing. Alai molo Jesus, jotjot do ibana manjou Jahowa i ‘Ama’. On patuduhon lomo do roha ni Jahowa asa jonok akka naposona tu Ibana, songon dakdanak na jonok tu bapakna. Takkas ma, naeng diajarhon Jesus do tu hita molo Jahowa i songon sahalak Ama na makkaholongi akka gellengna. Saonari, tabahas ma dua contoh na patuduhon songon dia Jesus mamakke hata “Ama” lao paboahon taringot Jahowa.

14. Aha do na didok Jesus lao paposson rohatta na massai arga do hita di Jahowa? (Mateus 10:​29-31) (Ida gambar.)

¹⁴ Na parjolo, taparrohahon ma hata ni Jesus na disurat di Mateus 10:​29-31. (Jaha.) Didok Jesus, massai arga do di Bapakna akka amporik. Bahkan diboto Jahowa do molo adong sian akka amporik i na madabu tu tano. Hape, dang disomba akka amporik i Jahowa, jala dang dihaholongi amporik i Ibana. Sian on taboto, haru akka amporik i arga do di Jahowa, tarlumobi ma hita. Boasa? Alana, holong do rohatta tu Jahowa jala tasomba do Ibana. Asing ni i, didok Jesus do muse, diboto Bapakna do sadia godang obukta. Molo diboto Jahowa do taringot i, pos ma rohatta parduli situtu do Ibana tu hita sude. Takkas ma, lomo do roha ni Jesus asa pos rohatta na massai arga do hita di adopan ni Jahowa.

15. Aha do na dipaboa Jesus di Johannes 6:44?

¹⁵ Saonari, tabahas ma contoh na paduahon tikki dipakke Jesus hata “Ama”. (Jaha Johannes 6:44.) Ditarik Amang Jahowa do hamu asa ditanda jala dihaholongi hamu Ibana. Alana, diida Ibana do akka sifatmuna na denggan. (Ul. 13:48) Jala tikki didok Jesus hatana na di Johannes 6:44 i, ra dikutip ibana do hata ni Jahowa na disurat di Jeremia 31:3. Di ayat i, didok Jahowa, “Toktong do hupatudu holong na manoktong tu ho jala hutarik do ho tu Au.” (Jer. 31:​3, surat na di toru; bandingkon tu Hosea 11:4.) Aha do lapatan ni i? Sai diida Jahowa do akka na denggan sian dirimuna, bahkan na so disadari hamu adong i di dirimuna.

16. (a) Aha do na diajarhon Jesus tu hita, jala boasa boi tahaporseai hatana? (b) Aha do na porlu taulahon asa pos rohatta Ama Parholong do Jahowa i? (Ida kotak “Bapak na Terbaik tu Sude Jolma”.)

¹⁶ Marhite hatana i, hira na didok Jesus ma tu hita songon on, “Bapakku do Jahowa i, jala Bapakmu do tong Ibana. Pos ma roham, holong do rohana tu ho jala parduli situtu do Ibana tu ho.” Jadi molo di sada tikki ragu hamu tu holong ni Jahowa, ingot ma hata ni Jesus i. Jala porsea ma hamu tu ibana. Boasa? Alana, akka na sittong do na dipaboa Jesus. Jala ibana do naung takkas mananda Amang Jahowa i.—1 Ptr. 2:22.

TOKTONG MA TAPAPOS ROHATTA TU HOLONG NI JAHOWA

17. Boasa ikkon toktong tapapos rohatta na holong roha ni Jahowa tu hita?

¹⁷ Ikkon toktong do tapapos rohatta na holong roha ni Jahowa tu hita. Songon naung tabahas, marsitutu do Sibolis mambahen asa unang tasomba be Jahowa. Lomo do rohana asa metmet rohatta. Torus do berupaya Sibolis mambahen asa porsea hita dang tutu holong roha ni Jahowa tu hita. Jadi, taalo ma Sibolis. Unang ma porsea hita tu gabusna i!—Job 27:5.

18. Aha do na ikkon toktong diulahon hamu asa pos rohamuna na holong roha ni Jahowa tu hamu?

¹⁸ Di artikel on, nungnga diparsiajari hamu aha na porlu diulahon asa pos rohamuna na holong roha ni Jahowa tu hamu. Martangiang ma tu Ibana. Jala pangido ma Ibana mangurupi hamu mangida akka sifat na denggan di dirimuna. Jala rimangi ma akka ayat ni Bibel na paboahon boha perasaan ni Jahowa tu akka halak na makkaholongi Ibana. Ingot ma, sai dihaholongi Jahowa do akka halak na makkaholongi Ibana. Asing ni i, rimangi ma taringot tobusan. Hadiah na luar biasa do i tu hamu. Jala pos ma rohamuna, Jahowa i Bapakmuna do tong songon na didok Jesus. Jadi molo adong na manukkun tu hamu, “Pos do roham na holong roha ni Jahowa tu ho?” Pos ma rohamuna mandok, “Ido, holong do roha ni Jahowa tu au. Jala marsitutu do au patuduhon holongku tu Ibana ganup ari!”